1-2. Ta eo ej kõm̦m̦an an ri-karejar ro an Anij m̦õn̦õn̦õ? (Jemes 1:​22-25)

 JEOVA im eo Nejin ejitõnbõro ippãn rekõn̦aan bwe jen m̦õn̦õn̦õ. Ri-jeje eo an Sam 119:2 ej ba: “Em̦õn̦õn̦õ ro rej kõjparok naanin kõnnaan ko An, ro rej kappukot E kõn aolepen bũrueer.” Jesus ear kallim̦ur im ba: “[Em̦õn̦õn̦õ, NW] armej ro rej roñjake naanin Anij im pokake.”—Luk 11:28.

² Kõnke jej ri-karejar ro an Jeova, jelukkuun m̦õn̦õn̦õ. Etke? Elukkuun lõñ un ko unin ad m̦õn̦õn̦õ, ak juon iaan un ko raorõk ej kõnke jej riiti Naanin Anij im jej kate kõj joñan wõt ad maroñ ñan jerbali men ko jej katak kaki.—Riit Jemes 1:​22-25.

3. Ewi wãween ad bõk tokjãn ñe jej jerbale Naanin Anij?

³ Elõñ wãween ko jej bõk tokjãn ñe jej erom “ro rej jerbale naan eo.” Ñan waanjoñak, jejel̦ã bwe eñin ej buñtõn ne eo el̦ap jemaroñ kõm̦m̦ane bwe jen maroñ kabuñbũruon Jeova. Im ñe jej kabuñbũruon Jeova, el̦ap ad m̦õn̦õn̦õ. (Ekl. 12:13) Ilo ad jerbali men ko jej riiti ilo Naanin Anij, mourin baam̦le eo ad enãj em̦m̦anl̦o̦k im jem̦jerã eo ad ippãn rũttõmak ro m̦õttad enaaj epaakl̦o̦k. Ejjel̦o̦k pere bwe eñin wãween mour eo am̦. Ejjab men in wõt, ak jej kõjparok kõj jãn ad iioon elõñ iaan apañ ko rej wal̦o̦k ñan ro rejjab pokake naanin tõl ko an Jeova. Aet, ejjel̦o̦k pere bwe jej errã ippãn Kiiñ Devid. Ãlikin an kar al kõn kien ko, naanin kaiñi ko, im ekajet ko an Jeova, ear kõjem̦l̦o̦k al eo an im ba: “Kõn aõ pokaki aolepeer enaaj wõr aõ jinõkjeej.”—Sam 19:​7-11, UBS.

4. Etke epen ñan erom ro rej jerbale Naanin Anij?

 ⁴ Ilo m̦ool, ejjab aolep iien epidodo ñan jerbale Naanin Anij. Meñe jepoub, ak jej aikuj kõm̦m̦an iien ñan riit im katak Baibõl̦ bwe jen maroñ mel̦el̦e kõn ta eo Jeova ekõn̦aan bwe jen kõm̦m̦ane. Kõn men in, jen etale jet iaan men ko me remaroñ jipañ kõj ñan niknik ilo ad riit. Jenaaj bareinwõt kõnono kõn ta ko renaaj jipañ kõj ñan l̦õmn̦ak kõn ta ko jej riiti im lo wãween ad maroñ jerbali men ko jej katak ilo mour ko ad.

KÕM̦M̦AN IIEN ÑAN RIITI NAANIN ANIJ

5. Ta jet iaan eddo ko me rej kõm̦m̦an ad poub?

⁵ Elõñ iaan armej ro an Jeova relukkuun poub. Jej jol̦o̦k el̦ap iien ñan loloodjake eddo ko Jeova ear litok ñan kõj. Ñan waanjoñak, elõñ iaad jej jerbal bwe jen maroñ kabwe aikuj ko ad im an baam̦le eo ad. (1 Tim. 5:8) Elõñ iaan Kũrjin ro rej lale ro nukwier me rerũtto ak renañinmej. Im kõj aolep jej aikuj kõjparoke ãjmour eo ad, im men in ej bar bõk iien. Kobal̦o̦k ippãn men kein, ewõr ad eddo ilo eklejia eo. Juon eddo eaorõk ewõr ippãd ej jej aikuj kijejeto ilo jerbalin kwal̦o̦k naan. Kõnke elukkuun lõñ eddo ko ippãd, ewi wãween jemaroñ kappok iien ñan niknik ilo ad riiti Baibõl̦ eo, kõl̦mãnl̦o̦kjen̦ kõn men ko jej riiti, im jerbali men ko jej katak kaki?

6. Ewi wãween kwõmaroñ lukkuun lale bwe kwõn riiti Baibõl̦ eo? (Bar lale pija eo.)

⁶ Ãinwõt Kũrjin ro, ad riiti Baibõl̦ eo ej juon iaan men ko “raorõkl̦o̦k” jej aikuj kõm̦m̦ani. Kõn men in, jej aikuj kate kõj ñan lukkuun lale bwe jen kõm̦m̦ane. (Pil. 1:10) Sam jebta 1 ej kõnono kõn armej eo em̦õn̦õn̦õ im ba: “Ej m̦õn̦õn̦õ in kõnono kien ko an [Jeova], im ej katak kake raan im boñ.” (Sam 1:​1, 2, UBS) Alikkar bwe jej aikuj kõm̦m̦an iien ñan riit Baibõl̦. Ñããt eo em̦m̦antata ñan riit Baibõl̦? Uwaak eo emaroñ okkõtaktak ñan kõj kajjojo. Bõtab, men eo eaorõk ej ñan kããlõt juon iien me enaaj em̦m̦an ad riiti Baibõl̦ eo kajjojo raan. Juon jeid im jatid em̦m̦aan etan Victor ej ba: “Em̦m̦an ippa riit Baibõl̦ ilo jibboñ. Meñe ejjab ña juon eo  em̦m̦an ippãn ruj ilo jibboñtata, ak edikl̦o̦k aõ m̦ad ilo awa kein. Epel̦l̦o̦k kõmãlij eo aõ im em̦m̦an aõ kõl̦mãnl̦o̦kjen̦.” Eñin ke wãween eo ippam̦? Kwõmaroñ kajjitõk ippam̦ make, ‘Ñããt eo em̦m̦antata ñan aõ riit Baibõl̦?’

KÕL̦MÃNL̦O̦KJEN̦ KÕN TA KO KWÕJ RIITI

7-8. Ta ko remaroñ bõbraik kõj jãn ad lukkuun bõk tokjãn jãn men ko jej riiti? Kwal̦o̦k juon waanjoñak.

⁷ Ilo m̦ool, jemaroñ ekkeini ad riiti elõñ men ko ak jejjab lukkuun jorome ak bõk tokjãn jãn men ko jej riiti. Kwõnañin ke kar riiti juon men innem ejjabto tokãlik kwõjjab lukkuun keememej aolep men ko kwaar riiti? Em̦õj an men in wal̦o̦k ñan elõñ iaad. Ekabũrom̦õjm̦õj bwe men in emaroñ wal̦o̦k ñe jej riit Baibõl̦. Ñan waanjoñak, bõlen jemaroñ kõm̦m̦an mejãnkajjik ñan riiti jet jebta ko kajjojo raan. Im elukkuun em̦m̦an mejãnkajjik in. Jej aikuj kõm̦m̦an mejãnkajjik im lukkuun kate kõj ñan eddãp wõt ñan mejãnkajjik in ad. (1 Kor. 9:26) Bõtab, elõñl̦o̦k men ko jej aikuj kõm̦m̦ani jãn ad baj riit Baibõl̦ wõt el̦aññe jekõn̦aan lukkuun bõk tokjãn jãne.

⁸ L̦õmn̦ak kõn waanjoñak in: Mennin eddek ko rej aikuj dãnnin wõt bwe en em̦m̦an aer eddek. Bõtab ñe elukkuun l̦ap an wõt ium̦win jidik wõt iien, emaroñ jino ibwij ak eppej lal̦. Ñe ej wõnm̦aanl̦o̦k im wõtlo̦k wõt, eban jipañ menin eddek ko. Bwidej eo enãj aikuj iien ñan jorome dãnnin wõt eo bwe en em̦m̦an an menin eddek ko bõk tokjãn jãne. Ejja ãindeinl̦o̦k wõt, jej aikuj kõjparok bwe jen jab ekkaiuriur ilo ad riit Baibõl̦ kõnke eban em̦m̦an ad jorome ak keememeji men ko jej riiti.—Jem. 1:24.

9. Ta ko jej aikuj kõm̦m̦ani ñe jej kile bwe jej juon eo em̦õkaj an riit Baibõl̦?

⁹ Kwõj ke kile bwe ewõr iien em̦õkaj am̦ riit Baibõl̦? El̦aññe ãindein, ta eo kwõmaroñ kõm̦m̦ane? Bõk am̦ iien. Kate eok ñan kõl̦mãnl̦o̦kjen̦ kõn ta ko kwõj riiti ak ta ko ej kab m̦õj am̦ riiti. Men in ejjab aikuj juon men epen. Kwõmaroñ pepe ñan kaetokl̦o̦k iien am̦ katak bwe en wõr iien ñan am̦ l̦õmn̦ak ak kõl̦mãnl̦o̦kjen̦ kake men ko kwaar riiti. Ak kwõmaroñ kaietl̦o̦k eoon ko kwõj riiti bwe en wõr iien am̦ kõl̦mãnl̦o̦kjen̦ kõn men ko kwaar riiti.  Victor, eo kar kõnono kake m̦oktal̦o̦k, ej ba: “Ñe ij riit, ejjab lukkuun l̦ap aõ riit, emaroñ juon wõt jebta. Kõnke ij riit ilo jibboñtata, imaroñ kõl̦mãnl̦o̦kjen̦ kaki men ko iar riiti ilo aolepen raan eo.” Jabdewõt kõl eo kwõj kããlõte, eaorõk ñan riit ilo juon wãween me enaaj jipañ eok ñan lukkuun bõk tokjãn jãn men ko kwõj riit.—Sam 119:97; lale bo̦o̦k eo etan “ Kajjitõk ko Kwõmaroñ L̦õmn̦ak Kaki.”

10. Kwal̦o̦k waanjoñak kõn wãween am̦ maroñ jerbali men ko kwõj katak kaki. (1 Tessalonika 5:​17, 18)

¹⁰ Jekdo̦o̦n ñããt eo kwõj riiti Baibõl̦ eo im joñan iien eo kwõj jol̦o̦ke ñan kõm̦m̦ane men in, l̦õmn̦ak kõn wãween ko kwõmaroñ jerbali men ko kwõj riiti. Ñe kwõj riiti jet eoon ko ilo Baibõl̦, kajjitõk ippam̦ make, ‘Ewi wãween imaroñ jerbali naan kein kiiõ ak ilo ilju im jekl̦aj?’ Ñan waanjoñak, jen ba bwe kwõj riiti 1 Tessalonika 5:​17, 18. (Riit.) Ãlikin am̦ riiti eoon kein ruo, kwõmaroñ bõjrak im kõl̦mãnl̦o̦kjen̦ kõn joñan ikkutkut in am̦ jar im joñan m̦wilal̦in jar ko am̦. Bareinwõt, kwõmaroñ l̦õmn̦ak kõn men ko kwõj kam̦m̦oolol kaki. Bõlen kwõmaroñ pepe ñan l̦õmn̦ak kõn jilu men ko kwõnaaj kam̦m̦oolole Jeova kaki. Ium̦win jejjo wõt minit in am̦ kõl̦mãnl̦o̦kjen̦ ilo wãween in, kwõj kwal̦o̦k am̦ juon eo ej roñjake im jerbale Naanin Anij. Baj l̦õmn̦ak m̦õk kõn ewi joñan am̦ nãj bõk tokjãn ñe kwõnaaj kõm̦m̦ani buñtõn ne kein ilo am̦ riiti eoon ko jet kajjojo raan! Aet, jidik kõn jidik enaaj em̦m̦anl̦o̦k am̦ karejar ñan Jeova. Bõtab, ta el̦aññe elukkuun lõñ men ko kwõj aikuj in kakõm̦anm̦anl̦o̦k?

KÃÃLÕT MEJÃNKAJJIK KO KWÕMAROÑ TÕPARI

11. Etke jet iien kwõmaroñ jino ebbweer? Kwal̦o̦k juon waanjoñak.

¹¹ Ñe kwõj riit Baibõl̦, emaroñ wõr iien ko kwõj jino tõn ebbweer kõnke kwõj kile bwe elukkuun lõñ men ko kwõj aikuj kakõm̦anm̦anl̦o̦k ippam̦. Ñan waanjoñak, pijaikl̦o̦k am̦ riit Baibõl̦ im ewõr naanin kauwe n̦ae kwal̦o̦k kalijekl̦o̦k. (Jem. 2:​1-8) Kwõj lo bwe kwõmaroñ kakõm̦anm̦anl̦o̦k wãween am̦ kõm̦m̦an ñan ro jet. Elukkuun em̦m̦an! Kiiõ raan eo tok juon kwõj riiti jet eoon ko me rej kwal̦o̦k kõn aorõkin ad aikuj kõjparok lood. (Jem. 3:​1-12) Kwõj kile bwe ewõr iien men ko kwõj kõnono kaki rejjab lukkuun jouj ak rekabbweerer. Kõn men in, kwõj jek ippam̦ make bwe kwõnaaj kajjioñ kõnono ilo juon wãween em̦m̦an im ekõketak. Ilo raan eo tok juon ke kwõj riit Baibõl̦, ewõr naanin kakkõl ko kõn an Kũrjin ro jab aikuj jem̦jerãik lal̦ in. (Jem. 4:​4-12) Kwõj kile bwe kwõj aikuj kal̦apl̦o̦k am̦ kõjparok men ko kwõj riiti, alwõji, im roñjaki. Ilo raan eo keemãn, kwõmaroñ jino ebbweer im l̦õmn̦ak bwe epen ñan am̦ kõm̦m̦ani aolep oktak kein.

12. Etke kwõjjab aikuj ebbweer ñe kwõj riiti Baibõl̦ eo im kile bwe elõñ oktak ko kwõj aikuj kõm̦m̦ani? (Bar lale footnote eo.)

 ¹² Ñe kwõj aikuj kõm̦m̦ani elõñ oktak ko ak kakõm̦anm̦anl̦o̦k elõñ men ko ippam̦, kwõn jab ebbweer. Am̦ kile bwe elõñ men ko kwõj aikuj kakõm̦anm̦anl̦o̦k ej kaalikkar bwe ettã bũruom̦ im ejim̦we unin am̦ kõn̦aan kõm̦m̦an oktak. Kain eo ettã bũruon ej m̦ool ñan e make ñe ej riiti Baibõl̦ eo im ej pukot ta ko ej aikuj kakõm̦anm̦anl̦o̦k ippãn. a Bareinwõt, keememej bwe am̦ kõn̦ak “mour eo ekããl,” ej juon men kwõj aikuj wõnm̦aanl̦o̦k wõt im kõm̦m̦ane. (Kol. 3:10) Ta eo enaaj jipañ eok ñan wõnm̦aanl̦o̦k wõt im jerbale Naanin Anij?

13. Ta juon wãween em̦m̦an kwõmaroñ jerbali men ko kwõj katak kaki? (Bar lale pija eo.)

¹³ Ijello̦kun am̦ kajjioñ jerbali aolep men ko kwõj riiti, kwõmaroñ kõm̦m̦an am̦ mejãnkajjik ñan kajejjete juon ak ruo iaaer. (JK. 11:2) Kwõmaroñ kajjioñe men in: Kõm̦m̦ane juon laajrak kõn men ko kwõj aikuj jerbali, innem kããlõt juon ak ruo iaan men kein kokõn̦aan jerbali m̦okta. Innem, kwõmaroñ jerbali men ko jet tokãlik. Ta ko kwõmaroñ jino jerbali?

14. Ta mejãnkajjik ko kwõmaroñ jino kõm̦m̦ani?

¹⁴ Bõlen kokõn̦aan jino kõn juon mejãnkajjik me epidodol̦o̦k am̦ maroñ kajejjete. Ak kwõmaroñ kããlõt ñan kakõm̦anm̦anl̦o̦k juon men ippam̦ me kwõj kile bwe el̦apl̦o̦k am̦ aikuj kõm̦m̦an oktak ie. Ñe em̦õj am̦ kããlõt ta eo kokõn̦aan kakõm̦anm̦anl̦o̦k, kwõmaroñ kõm̦m̦an research ak etale bok ko jet an doulul in ãinwõt Watch Tower Publications Index ak Bok in Jipañ Ri Kõnnaan ro an Jeova ñan Kappok Mel̦el̦e. Jar kake mejãnkajjik eo am̦, im kajjitõk ippãn Jeova bwe en lewaj “kõn̦aan im kajoor eo ñan em̦m̦akũt.” (Pil. 2:13) Innem jerbali  men ko em̦õj am̦ katak kaki. Ãlikin am̦ kajejjete mejãnkajjik eo am̦ jinointata, enaaj l̦apl̦o̦k am̦ kõn̦aan kõttõpare bar juon mejãnkajjik. Ilo m̦ool, ñe kwõj ejaake juon kadkad ak kõm̦m̦ane juon oktak ilo mour n̦e am̦, emaroñ pidodol̦o̦k ñan am̦ kõm̦m̦ani oktak ko jet.

KÕTL̦O̦K BWE NAANIN ANIJ EN “JERBAL ILO KOM̦”

15. Ewi wãween an oktak armej ro an Jeova jãn elõñ iaan ro rej riiti Baibõl̦ eo? (1 Tessalonika 2:13)

¹⁵ Jet armej rej ba bwe elõñ alen in aer kar riiti Baibõl̦ eo. Bõtab rej ke lukkuun tõmake Baibõl̦ eo? Rej ke jerbale ak kõtl̦o̦k bwe en tõl er ilo mour ko aer? Jaab. Enañin aolep armej rejjab l̦oore naanin kakapilõk ko ilo Baibõl̦. Meñe ãindein, ak elukkuun oktak ippãn armej ro an Jeova! Ãinwõt Kũrjin ro ilo tõre ko an rijjilõk ro, jej tõmak ilo Baibõl̦ eo “kõnke elukkuun m̦ool ãinwõt ke ej naanin Anij.” Ejjab men in wõt, ak jej kate kõj ñan jerbali naanin kakapilõk ko ie ilo mour ko ad.—Riit 1 Tessalonika 2:13.

16. Ta eo emaroñ jipañ kõj bwe jen juon eo ej jerbale Naanin Anij?

¹⁶ Ejjab aolep iien epidodo riiti im jerbale Naanin Anij. Emaroñ pen ñan ad kappok iien ñan riiti Baibõl̦ eo. Ak bõlen ekkã ad riiti ilo juon wãween em̦õkaj im jejjab lukkuun jorome men ko jej riiti. Ak bõlen jemaroñ jino tõn ebbweer kõnke jej lo bwe elõñ men ko jej aikuj kakõm̦anm̦anl̦o̦k ippãd make. Jekdo̦o̦n ta eo ej kõm̦m̦an bwe en pen am̦ riiti im jerbale Naanin Anij, ak kwõmaroñ lo tõprak. Ikijjeen jipañ eo an Jeova, kwõmaroñ kajejjete kõttõpar in am̦. Jen jek ippãd make ñan bõk jipañ jãn Jeova im erom juon eo ej jerbale Naanin Anij, im jab juon eo ej roñjake im mel̦o̦kl̦o̦ke men ko ej riiti. Ejjel̦o̦k pere bwe el̦ak l̦apl̦o̦k ad riiti Naanin Anij im jerbale ilo mour ko ad, enaaj l̦apl̦o̦k ad m̦õn̦õn̦õ.—Jem. 1:25.