1. Iien ekajet ta eo me m̦õttan jidik enaaj wal̦o̦k?

 JEJ mour ilo juon iien me ewõr oktak ko rel̦l̦ap renaaj wal̦o̦k! M̦õttan jidik Jesus enaaj ekajete kajjojo armej me rej mour wõt ijin ioon lal̦. Jesus ear kwal̦o̦k ta ko renaaj wal̦o̦k m̦okta jãn iien in ikijjeen an kar kwal̦o̦k ñan ri-kal̦oor ro an “kõkal̦l̦e” eo ej kaalikkar bwe ej pãd im bwe “epaak jem̦l̦o̦kin jukjukun pãd in.” (Matu 24:3) Kanaan in ej pãd ilo Matu jebta 24 im 25 im ilo bok ko jet me rej bar kwal̦o̦k kõn waanjoñak kein, ilo Mark jebta 13 im Luk jebta 21.

2. Ta ko jenaaj kõnono kaki ilo katak in, im etke men kein renaaj jipañ kõj?

² Jesus ear letok naanin kakkõl ko ñan jipañ kõj bwe jen pojak ikijjeen an kar kwal̦o̦k kõn jilu waanjoñak ko. Waanjoñak kein rej kõn jiip ko im koot ko, bõjin ro remãlõtlõt im bõjin ro rejajel̦o̦kjen̦, im tal̦õn ko. Kajjojo iaan waanjoñak kein rej jipañ kõj ñan mel̦el̦e ewi wãween an kõm̦m̦an ko an juon armej jelõte wãween an nãj bõk ekajet. Ilo ad etali waanjoñak kein, jen lale ta ko jemaroñ katak im wãween ad maroñ jerbali. Ilo waanjoñak eo kein kajuon, jenaaj kõnono kõn jiip ko im koot ko.

JIIP KO IM KOOT KO

3. Ñããt eo Jesus enaaj ekajete armej ro?

³ Ilo waanjoñak eo kõn jiip ko im koot ko, Jesus ear kõnono kõn wãween an nãj ekajete armej ro me ewõr aer maroñ ñan eo̦roñ ennaan eo em̦m̦an im rejetake rũkkapit ro jatin.  (Matu 25:​31-46) Ilo ‘iien eñtaan eo el̦ap,’ enaaj ekajete er im lale el̦aññe er jiip ak koot m̦okta wõt jãn Armagedon. (Matu 24:21) Ãinwõt an juon jabõt kõjenolo̦ke jiip ko jãn koot ko, Jesus enaaj kõjenolo̦ke ro rar tiljek ilo aer rejetake rũkkapit ro jatin jãn ro rejjab rejetake rũkkapit rein.

4. Ekkar ñan Aiseia 11:​3, 4, etke jemaroñ lõke bwe Jesus enaaj jim̦we an ekajete armej ro? (Bar lale pija eo.)

⁴ Baibõl̦ ej kanaan im kwal̦o̦k bwe Jeova ear kããlõt Jesus bwe en ri-Ekajet eo an. Kõn men in, Jesus enaaj jim̦we ilo an ekajet. (Riit Aiseia 11:​3, 4.) Ej etale kõm̦m̦an ko, l̦õmn̦ak ko, im men ko armej ro rej kõnono kaki—ekoba wãween aer kõm̦m̦an ñan rũkkapit ro jatin. (Matu 12:​36, 37; 25:40) Jesus enaaj jel̦ã wõn ro rar rejetake rũkkapit ro jatin im jerbal eo aer. a Juon iaan wãween ko raorõk jiip ro remaroñ rejetake ro jatin Christ ej ikijjeen aer jipañ er ilo jerbalin kwal̦o̦k naan. Ro rej jipañ ilo jerbal in, eokwe naaj ekajete er ãinwõt ro “rewãnõk” im enaaj wõr aer kõjatdikdik ñan “mour ñan indeeo” ijin ioon lal̦. (Matu 25:46; Rev. 7:​16, 17) Alikkar bwe ej juon jinõkjeej em̦m̦an ñan ro rej dãpij wõt aer tiljek! Ilo aer dãpij wõt aer tiljek ilo eñtaan eo el̦ap im m̦aanl̦o̦k, etaer enaaj pãdwõt ilo “bokin mour eo.”—Rev. 20:15.

5. Ta eo jej katak jãn waanjoñak eo kõn jiip ko im koot ko, im wõn ro rej aikuj itoklimo kõn waanjoñak in?

⁵ Kam̦ool bwe kwõj juon eo etiljek im em̦ool. El̦ap an waanjoñak eo an Jesus kõn jiip ko im koot ko jelõt ro ewõr aer kõjatdikdik ñan mour ijin ioon lal̦. Rej kwal̦o̦k aer tõmak ejjab ilo aer rejetake ro jatin Christ wõt, ak ikijjeen aer bar m̦ool ilo aer l̦oore tõl eo an kumi jidikdik eo me ej ejaakin rũkkapit ro Jesus ear kããlõt er. (Matu 24:45) Bõtab, ro ewõr aer kõjatdikdik ñan mour ilañ rebar aikuj pokake naanin kakkõl eo ilo waanjoñak in. Etke? Kõnke Jesus ej lale kõm̦m̦an ko aer, wãween aer l̦õmn̦ak, im aer kõnono. Er bareinwõt rej aikuj kam̦ool bwe retiljek. Ilo m̦ool, Jesus ear kwal̦o̦k kõn ruo waanjoñak ko me rej ñan kakkõl rũkkapit ro. Waanjoñak kein rej bareinwõt pãd ilo Matu jebta 25. Jen kiiõ etale waanjoñak eo kõn bõjin ro remãlõtlõt im bõjin ro rejajel̦o̦kjen̦.

BÕJIN RO REMÃLÕTLÕT IM BÕJIN RO REJAJEL̦O̦KJEN̦

6. Ewi wãween an kar bõjin ro l̦alem kam̦ool bwe remãlõtlõt? (Matu 25:​6-10)

⁶ Ilo waanjoñak eo kõn bõjin ro, Jesus ear kõnono kõn joñoul bõjin ro me rar ilen wõnm̦ae juon em̦m̦aan ej pojakin m̦are. (Matu 25:​1-4) Aolepeer rar kõjatdikdik bwe renaaj etal ippãn em̦m̦aan in ñan ijo rej kõm̦m̦ane kõjota in m̦are eo ie. Jesus ear ba bwe l̦alem iaaer “remãlõtlõt” im ro jet me l̦alem uwaaer “rejajel̦o̦kjen̦.” Bõjin ro remãlõtlõt rar pojak im ekkõl wõt. Rar pojakin kõttare em̦m̦aan eo ear pojakin m̦are jekdo̦o̦n ewi toon aer aikuj kõttar, meñe enaaj itok ilo lukwõn boñ. Eñin unin rar bõktok l̦aam̦ ko aer bwe ren maroñ erre ilo boñ. Joñan, rar bar bõktok weil̦ ñe ebaj rum̦wijtok em̦m̦aan eo. Kõn men in, rar pojak bwe en jab kun l̦aam̦ ko aer. (Riit Matu 25:​6-10.) Ke ear jãdetok em̦m̦aan eo ear pojakin m̦are, bõjin ro remãlõtlõt rar del̦o̦ñl̦o̦k ippãn l̦eo ñan ijo rej kõm̦m̦ane kõjota in m̦are eo ie. Ejja ãindeinl̦o̦k wõt, Kũrjin ro me er rũkkapit me em̦õj aer kam̦ool bwe repojak ikijjeen aer ekkõl wõt im tiljek wõt m̦ae iien eitok Christ, eokwe renaaj bõk jinõkjeej eo aer im kobal̦o̦k ippãn Jesus, eo ej  pojakin m̦are ilo kõkkar ilo Aelõñ eo an ilañ. b (Rev. 7:​1-3) Ak ta kõn bõjin ro rejajel̦o̦kjen̦?

7. Ta eo ear wal̦o̦k ñan bõjin ro l̦alem me rejajel̦o̦kjen̦, im etke?

⁷ Bõjin ro rejajel̦o̦kjen̦ rar jab ãinwõt bõjin ro remãlõtlõt kõnke rar jab pojak ke ear jãdetok em̦m̦aan eo ear pojakin m̦are. L̦aam̦ ko aer rar pojakin kun, im rar jab bar bõktok weil̦ ippãer. Ke rar kile bwe m̦õttan wõt jidik ejãdetok em̦m̦aan eo, rar aikuj etal im wia weil̦. Im ke em̦m̦aan eo ear itok, rejjañin kar ro̦o̦ltok. Ijoke, “bõjin ro rar pojak rar del̦o̦ñl̦o̦k ippãn l̦eo ñan ijo rej kõm̦m̦ane kõjota in m̦are eo ie. Innem ear kilõk kõjãm eo.” (Matu 25:10) Tokãlik, ke bõjin ro rejajel̦o̦kjen̦ rar jepl̦aaktok im rar kõn̦aan del̦o̦ñ, em̦m̦aan eo ear ba ñan er: “Ijaje wõn kom̦.” (Matu 25:​11, 12) Bõjin rein rar jab pojakin kõttar m̦ae iien eitok em̦m̦aan eo, jekdo̦o̦n ñe rar aikuj kõttar ium̦win juon iien aetok. Ta eo rũkkapit ro remaroñ katak?

8-9. Ta eo rũkkapit ro remaroñ katak jãn waanjoñak eo kõn bõjin ro? (Bar lale pija eo.)

⁸ Kam̦ool bwe kwõpojak im kwõj ekkõl wõt. Jesus ejjab ba bwe enaaj wõr ruo kain kumi in rũkkapit ro—juon kumi me ej pojakin kõttar m̦ae iien eitok jem̦l̦o̦kin jukjukun pãd in im juon kumi me ejjab pojak. Ijoke, ej kõmel̦el̦e im kwal̦o̦k ta eo enaaj wal̦o̦k el̦aññe rũkkapit ro rejjab pojakin kijenmej l̦o̦k ñan jem̦l̦o̦kin. Ñe rejjab pojak, reban bõke jinõkjeej eo aer. (Jon 14:​3, 4) Ealikkar bwe elukkuun aorõk naanin kakkõl in! Meñe kõjatdikdik eo ad ej ñan mour ilañ ak ijin ioon lal̦, kõj aolep jej aikuj bõk ñan bũruod naanin kakkõl eo jãn waanjoñak eo kõn bõjin ro. Kajjojo iaad jej aikuj ekkõl wõt im pojak ñan kijenmej l̦o̦k ñan jem̦l̦o̦kin.—Matu 24:13.

⁹ Ãlikin an kar Jesus kõjerbale waanjoñak eo kõn bõjin ro ñan kaalikkar aorõkin ad aikuj pojak im ekkõl wõt, ear kwal̦o̦k waanjoñak eo kõn tal̦õn ko. Waanjoñak in ej kwal̦o̦k aorõkin ad aikuj juon eo eniknik ilo an jerbal.

 TAL̦ÕN KO

10. Ewi wãween an kar ri-karejar ro ruo kam̦ool bwe retiljek? (Matu 25:​19-23)

¹⁰ Ilo waanjoñak eo kõn tal̦õn ko, Jesus ear kõnono kõn ruo ri-karejar me rar tiljek ñan irooj eo aer im juon me ear jab tiljek. (Matu 25:​14-18) Ri-kõm̦akoko ro ruo rar kwal̦o̦k aer tiljek ikijjeen aer kar kate er ñan koorl̦o̦k jããn eo an irooj eo aer. M̦okta jãn an kar irooj eo etal ñan jikin ko rettol̦o̦k, ear lel̦o̦k tal̦õn ko ñan ri-karejar rein an—juon joñan elukkuun l̦ap. Ri-karejar ro ruo me retiljek rar niknik ilo aerro jerbal im kõjerbale jããn ko aerro ilo mãlõtlõt. Ta eo ear wal̦o̦k? Ke irooj eo aer ear jepl̦aak, joñan jããn eo ear lel̦o̦k ñan erro ilo jinoin ear kiiõ l̦apl̦o̦k ruo alen. Irooj eo ear nõbar erro im rar maroñ etal im ‘lañlõñ ippãn.’ (Riit Matu 25:​19-23.) Ak ta kõn ri-karejar eo kein kajilu? Ta eo ear kõm̦m̦ane kõn jããn eo irooj eo an ear lel̦o̦k ñane?

11. Ta eo ear wal̦o̦k ñan ri-karejar eo “ejowan,” im etke?

¹¹ Kar lel̦o̦k ñan ri-karejar eo kein kajilu juon tal̦õn akõ ear juon eo “ejowan.” Irooj eo an ear kõtmãne bwe en kõjerbale tal̦õn eo ilo mãlõtlõt. Ijello̦kun an ãindein, ear kalibwini tal̦õn eo an. Ke irooj eo ear jepl̦aak, ri-karejar in ear jab koorl̦o̦k jããn eo an irooj eo an. Im ear jab em̦m̦an wãween an ri-karejar in l̦õmn̦ak. Ijello̦kun an jol̦o̦k an bõd kõn an kar likjab in koorl̦o̦k jããn eo an irooj eo, ear ba bwe irooj eo ej “juon eo epen kien ko an.” Ear jab buñbũruon irooj eo ippãn ri-karejar in. Ejjab men in wõt, ak kar bõke tal̦õn eo jãne im kar kadiwoje jãn m̦weo im̦õn irooj eo.—Matu 25:​24, 26-30.

12. Ri-karejar ro ruo me retiljek rej jutak kõn wõn ilo raan kein?

¹² Ri-karejar ro ruo me retiljek rej jutak kõn rũkkapit ro retiljek. Irooj eo, Jesus, ej kũr er bwe ren itok im ‘lañlõñ ippãn.’ Renaaj bõk jinõkjeej eo aer ilañ, ak jerkakpeje eo kein kajuon. (Matu 25:​21, 23; Rev. 20:5a) Ijo turãjet, waanjoñak eo kõn ri-karejar eo ejowan ej juon naanin kakkõl ñan rũkkapit ro. Ewi wãween?

13-14. Ta eo rũkkapit ro rej katak jãn bwebwenato eo kõn tal̦õn ko? (Bar lale pija eo.)

¹³ Kam̦ool bwe kwõj juon eo eniknik ilo an jerbal. Ilo waanjoñak eo kõn tal̦õn ko im ilo  waanjoñak eo kõn bõjin ro, Jesus ear jab ba bwe rũkkapit ro renaaj oktak im jowan. Ijoke, ej kwal̦o̦k ta eo enaaj wal̦o̦k ñe ejako aer kijejeto. Renaaj likjab in ‘dãpij wõt jeraam̦m̦an eo aer ke kar kũr im kããlõt er,’ im reban bõk mãlim ñan del̦o̦ñ ilo Aelõñ eo ilañ.—2 Pit. 1:10.

¹⁴ Waanjoñak ko an Jesus kõn bõjin ro im tal̦õn ko rej kaalikkar bwe aolep rũkkapit ro rej aikuj pojak im ekkõl wõt, im rej aikuj niknik ilo aer jerbal. Bõtab ewõr ke men ko jet Jesus ear ba me ej juon naanin kakkõl ñan rũkkapit ro? Aet, ewõr! Naan ko an Jesus ilo Matu 24:​40, 41 rej bar kwal̦o̦k kõn ekajet eo ãliktata an rũkkapit ro.

WÕN RO ‘NAAJ BÕKE’ ER?

15-16. Ewi wãween an Matu 24:​40, 41 kaalikkar aorõkin an rũkkapit ro aikuj ekkõl wõt?

¹⁵ M̦okta jãn an kar Jesus kwal̦o̦k waanjoñak ko jilu, ear kõnono kõn ekajet eo ãliktata an rũkkapit ro me enaaj kaalikkar wõn ro ej buñbũruon kake er. Ear kõnono kõn ruo em̦m̦aan me rej jerbal ilo juon jikin kallib im kõn ruo kõrã me rej irir wiit. Jel̦ak lale, ej ãinwõt ñe em̦m̦aan rein rej kõm̦m̦ane ejja jerbal eo wõt, im kõrã ro rej bareinwõt kõm̦m̦ane ejja jerbal eo wõt. Meñe ãindein, ak Jesus ear ba bwe “naaj bõk juon im kõjekdo̦o̦n eo juon.” (Riit Matu 24:​40, 41.) Innem ear rõjañ ri-kal̦oor ro an im ba: “Kom̦win ekkõl wõt kõnke kom̦ij jab jel̦ã ñããt eo Irooj eo ami enaaj itok.” (Matu 24:42) Jesus ear ba naan ko rej ãinl̦o̦kwõt naan kein ãlikin an kar kwal̦o̦k waanjoñak eo kõn bõjin ro. (Matu 25:13) Naan kein an Jesus rej ke ekkejell̦o̦k ippãn doon? Aet, remaroñ. ‘Naaj bõke’ rũkkapit ro wõt me retiljek im Jesus enaaj kadel̦o̦ñe er ilo Aelõñ eo ilañ.—Jon 14:3.

¹⁶ Kam̦ool bwe kwõj juon eo ej ekkõl wõt. Jabdewõt rũkkapit me ejjab ekkõl wõt ilo tõmak, eokwe reban ain er ippãn “ro kar kããlõt er.” (Matu 24:31) Im aolep ro ewõr aer kõjatdikdik ñan mour indeeo ijin ioon lal̦ rej aikuj bar ekkõl wõt im dãpij aer tiljek.

17. Etke jejjab aikuj inepata kõn ñããt eo Jeova ej kapiti jet armej kõn jetõb kwõjarjar eo an?

¹⁷ El̦ap ad jel̦ã kajjien Jeova. Kõn men in, jej lukkuun lõke wãween an ekajet. Jejjab inepata ñe em̦õj an Jeova kããlõt ñan kapiti jet armej kõn jetõb kwõjarjar eo an ilo iiõ ko rej kab mootl̦o̦k. c Jej keememej ta eo Jesus ear ba ilo waanjoñak eo an kõn jikin kallib kũreep eo ikijjeen ri-jerbal ro rar jerbal ilo 5 awa jim̦a jota. (Matu 20:​1-16) Ear joñan wõt juon on̦ããn ro me kar kũr er ñan jerbal ilo jota im ro rar jerbal ilo raan. Ejja ãindeinl̦o̦k wõt, jekdo̦o̦n ñããt eo kar kããlõt rũkkapit ro ak er aolep renaaj bõk jinõkjeej eo aer ilañ toon wõt aer tiljek wõt.

POKAKE NAANIN KAKKÕL KO

18-19. Ta ko jej katak jãn waanjoñak ko jaar etali?

¹⁸ Ta ko em̦õj ad etali? Ñan ro ewõr aer kõjatdikdik ñan mour indeeo ijin ioon lal̦, waanjoñak eo kõn jiip ko im koot ko rej kaalikkar joñan an aorõk bwe ren dãpij aer tiljek im m̦ool ñan Jeova—kiiõ im ilo eñtaan eo el̦ap me ej pojakin wal̦o̦k. Ilo naaj tõre en̦, Jesus enaaj watõk ro retiljek ãinwõt ro ej tõll̦o̦kier ñan bõk “mour ñan indeeo.”—Matu 25:46.

¹⁹ Jaar bareinwõt etale ruo waanjoñak ko me rej naanin kakkõl ñan rũkkapit ro. Ilo waanjoñak eo an Jesus kõn bõjin ro remãlõtlõt im bõjin ro rejajel̦o̦kjen̦, l̦alem iaaer rar kwal̦o̦k aer mãlõtlõt. Rar pojak im ekkõl wõt,  im rar pojakin kõttare em̦m̦aan eo ej pojakin m̦are jekdo̦o̦n ewi toon aer aikuj kõttar. Bõtab, bõjin ro rejajel̦o̦kjen̦ rar jab pojak. Kõn men in, em̦m̦aan eo ear m̦akoko in kadel̦o̦ñ er ñan iien kõjota in m̦are eo. Kõj bareinwõt jej aikuj pojakin kõttare an Jesus bõktok jem̦l̦o̦kin jukjukun pãd in, jekdo̦o̦n ewi toon ad aikuj kõttar. Bareinwõt, ilo waanjoñak eo an Jesus kõn tal̦õn ko, jaar kõnono kõn ruo ri-karejar ro me rar niknik ilo aer jerbal. Rar lukkuun kate er ilo aer jerbal ñan irooj eo aer, im irooj eo ear buñbũruon ippãer. Bõtab, irooj eo ear jab buñbũruon ippãn ri-karejar eo ejowan. Ta eo jej katak? Jej aikuj lukkuun poub wõt ilo jerbal eo ad ñan Jeova l̦o̦k ñan jem̦l̦o̦kin. Ãliktata, jaar kõnono kõn wãween an rũkkapit ro aikuj ekkõl wõt bwe Jesus en ‘bõke’ er ñan jinõkjeej eo aer ilañ. Rein rej lukkuun kijoorore aer naaj “kobal̦o̦k ippãn” Jesus ilañ. Ãlikin tarin̦ae eo ilo Armagedon, rein renaaj kõrã eo Jesus ej pojakin m̦areiki ilo m̦are eo an L̦aam̦ eo.—2 Tes. 2:1; Rev. 19:9.

20. Ta eo Jeova enaaj kõm̦m̦ane ñan ro rej pokake naanin kakkõl ko an?

²⁰ Meñe epaaktok iien eo Jesus enaaj ekajet, ak jejjab aikuj mijak. Toon wõt ad dãpij ad tiljek, Jemãdwõj ilañ me el̦ap yokwe ippãn enaaj letok ‘kajoor eo el̦ap jãn joñan’ bwe jen “maroñ jutak im̦aan mejãn Nejin armej.” (2 Kor. 4:7; Luk 21:36) Meñe kõjatdikdik eo ad ej ñan mour ilañ ak ijin ioon lal̦, ak jenaaj maroñ kabuñbũruon Jemãdwõj ilañ el̦aññe jej pokake naanin kakkõl ko ilo waanjoñak ko an Jesus. Kõn wõt jouj eo el̦ap an Jeova, naaj ‘je etad ilo bokin’ mour eo.—Dan. 12:1; Rev. 3:5.