1-2. Ewi wãween ad bõk tokjãn jãn an kar Jeova kõm̦anm̦an kõj bwe en l̦apl̦o̦k ad lo m̦õn̦õn̦õ ilo lel̦o̦k jãn bõk?

 KE JEOVA ear kõm̦anm̦an armej, ear lel̦o̦k ñan er maroñ eo ñan lo el̦apl̦o̦k m̦õn̦õn̦õ ilo lel̦o̦k jãn bõk. (Jrb. 20:35) Men in ej ke mel̦el̦ein bwe jejjab m̦õn̦õn̦õ ñe ro jet rej letok juon menin letok? Jaab. Jejel̦ã bwe jem̦õn̦õn̦õ ñe juon ej letok juon ad menin letok. Meñe ãindein, ak el̦apl̦o̦k ad m̦õn̦õn̦õ ñe kõj eo jej lel̦o̦k ñan ro jet. Im ilo m̦ool, el̦ap ad bõk tokjãn jãn an kar Jeova kõm̦anm̦an kõj ilo wãween in. Etke?

² Kõnke Jeova ear kõm̦anm̦an kõj ilo wãween in, ewõr ad maroñ ñan kal̦apl̦o̦k ad lo m̦õn̦õn̦õ. Jemaroñ kal̦apl̦o̦k ad m̦õn̦õn̦õ ikijjeen ad pukot wãween ko jemaroñ lel̦o̦k ñan ro jet. Alikkar bwe elukkuun em̦m̦an wãween an kar Jeova kõm̦anm̦an kõj!—Sam 139:​14, UBS.

3. Etke ekkar im jim̦we an Baibõl̦ ba bwe Jeova ej juon “Anij in m̦õn̦õn̦õ”?

³ Naanin Anij ej kaalikkar bwe ro rej lel̦o̦k ñan ro jet el̦ap aer m̦õn̦õn̦õ, kõn men in jejjab bwilõñ ñe jej lo an Baibõl̦ kõmel̦el̦e kõn Jeova im ba bwe ej juon “Anij in m̦õn̦õn̦õ.” (1 Tim. 1:11) E eo jinointata ear lel̦o̦k ñan ro jet im ejjel̦o̦k juon el̦apl̦o̦k an lel̦o̦k jãn Jeova. Kõn wõt Jeova, “jej mour im m̦akũtkũt im pãd,” ãinwõt an kar rijjilõk Paul kwal̦o̦k kake. (Jrb. 17:28) Aet, “aolep menin letok ko rem̦m̦an im reweeppãn” rej itok jãn Jeova.—Jem. 1:17.

4. Ta eo enaaj jipañ kõj bwe en l̦apl̦o̦k ad lo m̦õn̦õn̦õ?

⁴ Ejjel̦o̦k pere bwe kõj aolep jekõn̦aan bwe en l̦apl̦o̦k ad lo m̦õn̦õn̦õ eo ej itok jãn ad lel̦o̦k. Jemaroñ lo men in ikijjeen ad anõke Jeova ilo ad kwal̦o̦k jouj im m̦õn̦õn̦õ in lel̦o̦k ñan ro jet. (Eps. 5:1) Ilo ad etale joñak eo an Jeova, jenaaj bareinwõt katak kõn ta ko jemaroñ kõm̦m̦ani ñe jej kile bwe ro jet rejjab kwal̦o̦k aer kam̦m̦oolol kõn ad jipañ er. Naanin kakeememej kein renaaj jipañ kõj ñan dãpij wõt im bareinwõt kal̦apl̦o̦k ad lo lañlõñ eo itok jãn ad lel̦o̦k.

 ANÕKE AN JEOVA M̦ÕN̦ÕN̦Õ IN LEL̦O̦K ÑAN RO JET

5. Ta jet iaan men ko Jeova ej litok ñan kõj?

⁵ Ta jet iaan wãween ko Jeova ej kwal̦o̦k an jouj ñan kõj? L̦õmn̦ak kõn jet waanjoñak ko. Jeova ej kabwe aikuj ko ad. Emaroñ jab wõr ippãd m̦weiuk ko rem̦m̦antata ak rel̦l̦ap on̦ããer, ak kam̦m̦oolol bwe kõn wõt Jeova, enañin kõj aolep ewõr ippãd men ko jej aikuji. Ñan waanjoñak, ikijjeen jipañ eo jãn Jeova, ewõr kijed m̦õñã, ballid, im jikin ad jokwe. (Sam 4:​8, UBS; Matu 6:​31-33; 1 Tim. 6:​6-8) Jeova ej ke kabwe aikuj ko ad kõnke ej juon men ej aikuj kõm̦m̦ane? Ejjab ñan jidik! Innem etke Jeova ej kabwe aikuj ko ad?

6. Ta eo jej katak jãn Matu 6:​25, 26?

⁶ Ilo tukadu, Jeova ej kabwe aikuj ko ad kõnke ej yokwe kõj. L̦õmn̦ak kõn naan ko an Jesus ilo Matu 6:​25, 26. (Riit.) Jesus ear kõm̦m̦an waanjoñak kõn menin kõm̦anm̦an ko. Ikijjeen bao ko imejatoto, Jesus ear ba: “Rejjab ekkat ine ak m̦adm̦õd ak aini leen keinikkan ko n̦a ilowaan im̦õn kakkon̦ ko.” Bõtab l̦õmn̦ak kõn ta eo ej ba tokãlik, ej ba: “Jememiwõj ilañ ej naajdik er.” Innem Jesus ear kwal̦o̦k kajjitõk in: “Ta kom̦ij jab aorõkl̦o̦k jãn bao ko ke?” Ta eo jej katak? El̦apl̦o̦k an Jeova kaorõk ri-karejar ro an jãn menninmour ko. El̦aññe Jeova ej kabwe aikuj ko an menninmour ko, innem jemaroñ lõke bwe enaaj kabwe aikuj ko ad! Ãinwõt juon jemãn me el̦ap yokwe ippãn, Jeova ej kabwe aikuj ko an baam̦le eo an kõnke ej yokwe er.—Sam 145:16; Matu 6:32.

7. Ta juon iaan wãween ko jemaroñ anõke an Jeova m̦õn̦õn̦õ in lel̦o̦k ñan ro jet? (Bar lale pija eo.)

⁷ Ãinwõt Jeova, jemaroñ bar jipañ kabwe aikuj ko an ro jet kõnke jej yokwe er. Ñan waanjoñak, kwõjel̦ã ke kajjien juon jeid ak jatid me ej aikuj kijen m̦õñã ak ballin? Jeova emaroñ kõjerbal kwe ñan jipañ kabwe aikuj in an. Armej ro an Jeova rej m̦õkaj im jipañ ro jet ñe ewal̦o̦k jorrããn ko rel̦l̦ap. Ñan waanjoñak, ilo kar iien COVID-19 eo, rũttõmak ro jeid im jatid rar lel̦o̦k m̦õñã ko, nuknuk ko, im men ko jet ñan ro rar pãd ilo aikuj. Ewõr ro jet rar bareinwõt jabawõt ñan rejetake jerbal eo an doulul in ipel̦aakin lal̦ in. Men in ear jipañ kõn aikuj ko an aolep ro jeid im jatid ipel̦aakin lal̦ in me rar iioon jorrããn ko rel̦l̦ap. Rein jeid im jatid me el̦ap aer jouj rar bõk ñan bũrueer naan ko ilo Hibru 13:16: “Jab mel̦o̦kl̦o̦k in kõm̦m̦an em̦m̦an im jipañ ro jet kõn men ko ewõr ippemi bwe Anij ej buñbũruon kõn menin katok rot kein.”

8. Ewi wãween ad bõk tokjãn jãn kajoor eo an Jeova? (Pilippai 2:13)

 ⁸ Jeova ej letok kajoor. Ejjel̦o̦k jem̦l̦o̦kin joñan kajoor eo an Jeova. Kõn men in, em̦õn̦õn̦õ in lel̦o̦k kajoor ñan ri-karejar ro an retiljek. (Riit Pilippai 2:13.) Em̦õj ke am̦ jar kõn kajoor bwe kwõn jab po ilo juon menin kapo ak bwe kwõn kijenmej wõt ium̦win juon wãween elukkuun pen? Bõlen kwaar jar bwe Jeova en lewaj kajoor eo kwõj aikuji kajjojo raan bwe kwõn maroñ kijenmej wõt. Ke kwaar loe an Jeova uwaake jar eo am̦, kwõmaroñ kar errã ippãn rijjilõk Paul ke ear je im ba: “Imaroñ in kõm̦m̦an men otemjej ikijjeen eo ej letok kajoor ñan ña.”—Pil. 4:13.

9. Ta jet iaan wãween ko jemaroñ anõke Jeova ilo ad kõjerbal kajoor im maroñ ko ad ñan jipañ ro jet? (Bar lale pija eo.)

⁹ Jejjab ãinwõt Jeova kõnke ewõr joñan kajoor im maroñ ko ippãd im jejjab maroñ lel̦o̦k kajoor ñan ro jet ilo ejja wãween eo ej kõm̦m̦ane. Meñe ãindein, ak jemaroñ anõke Jeova ikijjeen ad kõjerbal kajoor im maroñ ko ad ñan jipañ ro jet. Ñan waanjoñak, jemaroñ jipañ ro jeid im jatid me rerũtto ak renañinmej ikijjeen ad kõm̦m̦ani jerbal ko ilowaan m̦õko im̦weer ak ilo ad etal ñan m̦õn wia ko im kaikujkuj ñan er. El̦aññe ewõr ad maroñ, jemaroñ karreoiki Im̦õn Kweilo̦k eo ak jipañ kõjparoke im kakõm̦anm̦ane. Ñe jej kõjerbal kajoor im maroñ ko ad ilo wãween kein, jej bõktok tokjãn ko rem̦m̦an ñan rũttõmak ro jeid im jatid.

10. Ewi wãween jemaroñ kõkajoore ro jet ikijjeen naan ko ad?

¹⁰ Jen jab mel̦o̦kl̦o̦k bwe jemaroñ bar kõkajoore ro jet ikijjeen naan ko ad. Kwõmaroñ ke l̦õmn̦ak kõn juon me enaaj lukkuun bõk kõketak jãn am̦ kam̦m̦oolole kõn aolep kate ko an? Kwõjel̦ã ke kõn juon eo me ej aikuj bõk naanin kaenõm̦m̦an? El̦aññe aet, kwõmaroñ em̦m̦akũt m̦okta im kaalikkar ñan armej in bwe kwõj kea kake e. Kwõmaroñ lol̦o̦k e, call e, ak bõlen jilkinl̦o̦k juon kaat, email, ak text. Naan ko am̦ rejjab aikuj wãjepdik. Am̦ lel̦o̦k jejjo wõt naan jãn bũruom̦ emaroñ men eo me enaaj jipañ eo jeim̦ ak jatũm̦ ñan dãpij wõt an tiljek ium̦win bar juon raan ak ñan bõk l̦õmn̦ak ko rekõketak meñe ej iioon juon wãween epen.—JK. 12:25; Eps. 4:29.

11. Ewi wãween an Jeova kõjerbal mãlõtlõt eo an?

¹¹ Jeova ej letok mãlõtlõt. Ri-kal̦oor Jemes ear je im ba: “El̦aññe jabdewõt iaami ejabwe mãlõtlõt ippãn, en jab bõjrak an kajjitõk kake ippãn Anij im enaaj lel̦o̦k ñane, kõnke el̦ap an m̦õn̦õn̦õ in lel̦o̦k ñan aolep armej im ejjab n̦otaik er.” (Jem. 1:5; ftn.) Ãinwõt an naan kein kaalikkar, Jeova ejjab dãpij mãlõtlõt eo an jãn armej ro. Ijoke, el̦ap an m̦õn̦õn̦õ in lel̦o̦k mãlõtlõt eo an ñan ro jet. Ejjab men in wõt, ak  Jemes ear ba bwe ñe Jeova ej lel̦o̦k mãlõtlõt eo an ñan ro jet, “ejjab kajook er” ak “n̦otaik er.” Aet, ejjab kõn̦aan bwe jen jo̦o̦k in kajjitõke tõl eo an. Ilo m̦ool, ej rõjañ kõj bwe jen kõm̦m̦ane men in.—JK. 2:​1-6.

12. Iien ta ko repel̦l̦o̦k ñan ad kõjerbal mãlõtlõt eo ewõr ippãd ñan jipañ ro jet?

¹² Ta kõn kõj? Jemaroñ ke anõke Jeova im kõjerbal mãlõtlõt eo ewõr ippãd ñan jipañ ro jet? (Sam 32:8) Elukkuun lõñ iien ko repel̦l̦o̦k ñan an armej ro an Jeova jipañ ro jet kõn men ko rejel̦ã kaki. Ñan waanjoñak, ekkã ad katakin im kammineneik ri-kwal̦o̦k naan ro rekããl ilo jerbalin kwal̦o̦k naan. Em̦m̦aan ro rej lale eklejia rej kijenmej ilo aer jipañ em̦m̦aan ak likao ro jeid im jatid me em̦õj aer peptaij ekoba rej rijjipañ ilo eklejia ñan katak kilen kõm̦m̦ani eddo ko aer ilo eklejia eo. Im ro me ewõr aer imminene ilo jerbalin ekkal im kõjparok im̦õn kabuñ ko ad rej jipañ katakin im kammineneik ro edikl̦o̦k aer imminene ñan kõm̦m̦ani jerbal kein.

13. Ewi wãween jemaroñ anõke wãween an Jeova katakin im kammineneik ro jet?

¹³ Kate eok ñan anõke wãween an Jeova katakin im kammineneik ro jet. Keememej bwe Jeova em̦õn̦õn̦õ in kwal̦o̦k ñan ro jet men ko ejel̦ã kaki im ejjab dãpiji jel̦ã ko an jãn er. Ãindeinl̦o̦k wõt, jem̦õn̦õn̦õ in kwal̦o̦k kõn jel̦ã ko ad im imminene ko ippãd ñan ro jej katakin er. Jejjab dãpiji jet iaan men ko jejel̦ã kaki kõnke jemijak ñe eo jej katakini emaroñ bõk jikid. Im jejjab ba: ‘Ejjel̦o̦k rar katakin ña! Ej aikuj make katak.’ Ejjab aikuj wõr kain l̦õmn̦ak rot in ibwiljin armej ro an Jeova. Ijello̦kun ad ãindein, jelukkuun m̦õn̦õn̦õ in kwal̦o̦k ñan er kõn aolep jel̦ã ko ad im jej lel̦o̦k aolepen ad ñan katakin im kammineneik er. (1 Tes. 2:8) Innem, jej kõjatdikdik bwe “rein renaaj bareinwõt erom ro rekkar ñan aer katakin ro jet.” (2 Tim. 2:​1, 2) El̦aññe kõj aolep jenaaj m̦õn̦õn̦õ in kwal̦o̦k jel̦ã im imminene ko ad ñan doon, eokwe jej aolep jipañ doon ñan mãlõtlõt l̦o̦k im m̦õn̦õn̦õl̦o̦k.

ÑE RO JET REJJAB KWAL̦O̦K AER KAM̦M̦OOLOL

14. Ta eo ekkã an ro jet kõm̦m̦ane ñe jej kwal̦o̦k jouj ñan er?

¹⁴ Ñe jej kwal̦o̦k jouj ñan ro jet, el̦aptata ñan ro jeid im jatid, ekkã aer kam̦m̦oolole kõj. Remaroñ kõm̦m̦ane men in ikijjeen aer jilkintok juon kaat jidikdik ak ilo bar juon wãween. (Kol. 3:15) Ñe rej kwal̦o̦k aer kam̦m̦oolol, men in ej kal̦apl̦o̦k ad m̦õn̦õn̦õ.

15. Ta eo jej aikuj keememej ñe ro jet rejjab kwal̦o̦k aer kam̦m̦oolol kõn jipañ ko ad?

¹⁵ Bõtab, ejjab aolep iien ro jet renaaj kam̦m̦oolole kõj kõn men ko jej kõm̦m̦ani ñan er. Ewõr iien ko jemaroñ kõjerbal iien ko ad, maroñ ko ad, ak men ko m̦weied ñan jipañ ro jet, bõtab tokãlik jemaroñ pere el̦aññe armej eo ej kam̦m̦oolol kõn aolep men ko jaar kõm̦m̦ani ñan jipañ er. El̦aññe men in ear wal̦o̦k, ewi wãween jemaroñ dãpij wõt ad lañlõñ im kõjparok bwe jen jab oktak im illu ak ebbweer? Keememej eoon eo me ej unin tõl eo an katak in, Jerbal 20:35. Ad lo m̦õn̦õn̦õ eo me ej itok jãn ad lel̦o̦k, ejjab pedped ioon an ro jet kam̦m̦oolole kõj ak jaab. Jemaroñ kããlõt ñan lel̦o̦k ilo m̦õn̦õn̦õ meñe ro jet rejjab kwal̦o̦k aer kam̦m̦oolol. Ewi wãween jemaroñ kõm̦m̦ane men in? L̦õmn̦ak kõn jet wãween ko.

16. Ta eo jej aikuj keememej ñe jej lel̦o̦k ñan ro jet?

¹⁶ Keememej bwe kwõj anõke Jeova. Ej lel̦o̦k men ko rem̦m̦an ñan aolep armej, meñe rej kwal̦o̦k aer kam̦m̦oolol ak jaab. (Matu 5:​43-48) Jeova ej kallim̦ur bwe el̦aññe jej bareinwõt lel̦o̦k ilo ad ‘jab kõtmãne bwe ren karo̦o̦ltok jabdewõt,’ eokwe “enaaj l̦ap [ad] jeraam̦m̦an.” (Luk 6:35) Naan in “jabdewõt” emaroñ kitibuj an ro jet kam̦m̦oolole kõj. Jekdo̦o̦n ñe rej kõm̦m̦ane men in ak jaab, Jeova enaaj  aolep iien n̦aon̦ããd kõn jipañ ko ad ñan ro jet kõnke jej uwaan “ro rej lel̦o̦k ilo m̦õn̦õn̦õ.”—JK. 19:17; 2 Kor. 9:7.

17. Ewi wãween ad maroñ bõk l̦õmn̦ak eo ejim̦we ñe jej lel̦o̦k ñan ro jet? (Luk 14:​12-14)

¹⁷ Naanin kakapilõk eo ilo Luk 14:​12-14 (Riit.) emaroñ jipañ kõj ñan bõk l̦õmn̦ak eo ejim̦we ñe jej lel̦o̦k ñan ro jet. Ejjab nana ñan kũrtok ak kwal̦o̦k jouj ñan ro me ewõr aer maroñ ñan ukottok jouj eo ad. Bõtab, ta el̦aññe jej kile bwe ekkã ad lel̦o̦k ñan ro jet kõnke jej kõjatdikdik bwe renaaj ukottok jouj eo ad? El̦aññe ãindein, kajjioñ jerbale men eo Jesus ear ba. Jemaroñ kũrtok juon eo me jejel̦ã bwe ejjel̦o̦k an maroñ ñan ukottok jouj eo ad. Ilo ad ãindein, jenaaj m̦õn̦õn̦õ kõnke jej anõke Jeova. Ad jab kõtmãne jabdewõt ñe jej lel̦o̦k ñan ro jet enaaj bareinwõt jipañ kõj ñan dãpij wõt ad lañlõñ ñe ro jet rejjab kwal̦o̦k aer kam̦m̦oolol kõn jipañ ko ad.

18. Ta eo jej aikuj kõjparok bwe jen jab kõm̦m̦ane, im etke?

¹⁸ Kõjparok ñan jab pere ro jet. (1 Kor. 13:7) El̦aññe juon armej ejjab kwal̦o̦k an kam̦m̦oolol, jemaroñ kajjitõk ippãd make: ‘Em̦ool ke bwe armej in ejjab kam̦m̦oolol ñan jidik, ak emaroñ ke mel̦o̦kl̦o̦k in kar kwal̦o̦k an kam̦m̦oolol?’ Bõlen ewõr un ko jet unin an kar jab kwal̦o̦k an kam̦m̦oolol ãinwõt ad kar kõtmãne. Ewõr jet emaroñ lukkuun l̦ap aer kam̦m̦oolol ijoke epen aer kwal̦o̦ke men in. Bõlen rejook in bõk jipañ, el̦aptata ñe m̦oktal̦o̦k er eo rekõn jipañ ro jet. Jekdo̦o̦n ta un eo, ak yokwe eo ad enaaj kõm̦akũt kõj ñan kijenmej ippãn ro jeid im jatid ñe rej kõm̦m̦an likjab im ñan wõnm̦aanl̦o̦k wõt im lel̦o̦k ilo m̦õn̦õn̦õ.—Eps. 4:2.

19-20. Etke eaorõk ñan kwal̦o̦k meanwõd ñe jej lel̦o̦k ñan ro jet? (Bar lale pija eo.)

¹⁹ Kwal̦o̦k meanwõd. Ke rimmãlõtlõt eo Kiiñ Solomon ear kõnono kõn ad lel̦o̦k ñan ro jet, ear ba: “Kwõn jol̦o̦k kijõm̦ n̦a ioon dãn ko, bwe kwõnaaj loe ãlikin elõñ raan.” (Ekl. 11:1) Ãinwõt an naan kein kaalikkar, jet armej remaroñ kwal̦o̦k aer kam̦m̦oolol “ãlikin elõñ raan” ak ãlikin juon iien aetok. Eñin men eo ear wal̦o̦k ñan juon jeid im jatid kõrã.

 ²⁰ Elõñ iiõ ko remootl̦o̦k, juon jeid im jatid kõrã me ej pãleen juon em̦m̦aan ej lol̦o̦k eklejia, ear jejel̦o̦k juon lõta ekõketak ñan juon jeid im jatid kõrã me ej kab peptaij. Ilo lõta in, ear lukkuun rõjañe ñan dãpij wõt an tiljek ñan Jeova. Enañin ralitõk iiõ ko tokãlik, kõrã eo ear peptaij ear jejel̦o̦k ñan kõrã eo pãleen em̦m̦aan eo ej lol̦o̦k eklejia, im ba: “Iar kõn̦aan jeje waj im kwal̦o̦k kõn ewi joñan am̦ kar jipañ eõ ilo iiõ kein m̦aantak meñe kwõjjab lukkuun jel̦ã kake.” Ear wõnm̦aanl̦o̦k wõt im ba: “Naan ko am̦ rar lukkuun jouj, bõtab men eo me ear lukkuun tõpar bũruõ ej eoon eo kwaar jeiki, im ij keememeje wõt tok ñan rainin.” a Ãlikin an kar kõrã in jeid im jatid kõmel̦el̦e jidik kõn jet iaan apañ ko ear iiooni, ear ba: “Ewõr iien ko iar kõn̦aan bõjrak jãn aõ kõm̦m̦ani aolep eddo ko aõ im jol̦o̦k aõ karejar ñan Jeova. Bõtab ikõn keememeje eoon eo kwaar jeiki im ebar kõkajoor eõ bwe in wõnm̦aanl̦o̦k wõt im jab ebbweer.” Innem ear ba: “Ilo kar aolepen ralitõk iiõ ko me rej kab mootl̦o̦k, ejjel̦o̦k juon men me ear lukkuun jipañ eõ ãinwõt lõta eo am̦ im eoon eo kwaar jeiki tok.” Baj pijaikl̦o̦k m̦õk ewi joñan an kar kõrã eo pãleen em̦m̦aan eo ej lol̦o̦k eklejia kar lukkuun m̦õn̦õn̦õ ãlikin an kar bõk lõta in “ãlikin elõñ raan”! Ãindeinl̦o̦k wõt, ro jet remaroñ kam̦m̦oolol kõj kõn jipañ ko ad ãlikin juon iien aetok.

21. Etke kwõj jek ippam̦ make ñan wõnm̦aanl̦o̦k wõt im anõke an Jeova m̦õn̦õn̦õ in lel̦o̦k ñan ro jet?

²¹ Ãinwõt ad kar etale, Jeova ear kõm̦anm̦an kõj ilo juon wãween em̦m̦an. Ewi wãween? Meñe jem̦õn̦õn̦õ ñe jej bõk, ak el̦apl̦o̦k ad m̦õn̦õn̦õ ñe jej lel̦o̦k ñan ro jet. Jelukkuun m̦õn̦õn̦õ ñe jemaroñ jipañ rũttõmak ro jeid im jatid. Im em̦m̦an ad mour ñe rej kam̦m̦oolole kõj. Ijoke, meñe armej eo jaar jipañe ej kwal̦o̦k an kam̦m̦oolol ak jaab, jemaroñ m̦õn̦õn̦õ kõnke jaar kõm̦m̦ane men eo ejim̦we. Jab mel̦o̦kl̦o̦k bwe jabdewõt men kwõj lel̦o̦k ñan ro jet, “Jeova emaroñ in lewaj ekanooj lõñ jãn men kein.” (2 Kro. 25:9) Aet, aolep iien enaaj l̦apl̦o̦k an Jeova kõjeraam̦m̦an eok jãn joñan eo kwõj lel̦o̦k ñan ro jet! Im ñe Jeova ej kõjeraam̦m̦an kõj, eñin ej jeraam̦m̦an eo em̦m̦antata jemaroñ bõke. Kõn men in, jen jek ippãd make ñan wõnm̦aanl̦o̦k wõt im anõke eo Jemãd ilañ me em̦õn̦õn̦õ in lel̦o̦k im el̦ap an jouj.