Meñe ri-kal̦oor ro 70 rar jako ke Jesus ear ejaake Kõjota eo an Irooj, men in ejjab mel̦el̦ein bwe Jesus ear jab buñbũruon ippãer ak bwe ri-kal̦oor rein rar ilo̦k jãne. Ilo m̦ool, Jesus ear baj kõn̦aan pãd ippãn rijjilõk ro an ilo kar iien in.

Rijjilõk ro 12 im kumi eo me 70 uwaaer rar jim̦or ri-kal̦ooran Christ. Jesus ear m̦oktata kããlõt iaan aolep ri-kal̦oor ro an, 12 em̦m̦aan ro me ear n̦aetaer rijjilõk ro. (Luk 6:​12-16) Ear pãd ilo Galili ke ear “kũrtok rijjilõk ro 12” im “ear jilkinl̦o̦k er bwe ren kwal̦o̦k naan kõn Aelõñ eo an Anij im kõmour armej.” (Luk 9:​1-6) Tokãlik, ilo kar Judia, Jesus “ear kããlõt 70 iaan ri-kal̦oor ro an, im ear jilkinl̦o̦k er, ruo iaan ruo iaan.” (Luk 9:51; 10:1) Kõn men in, ear lõñ an Jesus ri-kal̦oor ilo elõñ jikin ko me ennaan eo an ear ajeeded ie.

Ri-Ju ro me rar erom ri-kal̦oor renaaj kar wõnm̦aanl̦o̦k wõt im kõm̦m̦ane Kwõjkwõjin Kijoone eo me kar kõm̦m̦ane kajjojo iiõ, bõlen ippãn baam̦le ko aer. (Ex. 12:​6-11, 17-20) Ke ear epaaktok iien an mej, Jesus im ri-kal̦oor ro an rar etal ñan Jerusalem. Bõtab, ear jab kajjitõk bwe aolep ri-kal̦oor ro an jãn Judia, Galili, im Perea ren itok im kõm̦m̦ane Kwõjkwõjin Kijoone eo ippãn. Alikkar bwe ear kõn̦aan pãd ippãn rijjilõk ro an ilo kar iien in. Ear ba ñan er: “El̦ap aõ kar kõn̦aan m̦õñã ippemi ilo iien Kwõjkwõjin Kijoone in m̦okta jãn aõ eñtaan.”—Luk 22:15.

Ewõr unin an kar kõn̦aan kõm̦m̦ane men in. M̦õttan jidik Jesus enaaj kar mej ãinwõt “L̦aam̦ eo an Anij im ej jol̦o̦k jerawiwi ko an lal̦.” (Jon 1:29) Men in enaaj kar wal̦o̦k ilo Jerusalem, ijo me eto an kar juon jikin katok kõn menin katok ko ñan Anij. L̦aam̦ in Kijoone eo ear kakeememej ri-Israel ro bwe Jeova ear kadiwõjl̦o̦k er jãn Ijipt. Bõtab, elõñl̦o̦k men ko katok in mour eo an Jesus enaaj kõm̦m̦ane. Enaaj kanemkwõj aolep armej ro jãn jerawiwi im mej! (1 Kor. 5:​7, 8) Men eo Jesus ear kõm̦m̦ane ear kõm̦m̦an bwe rijjilõk ro 12 ren erom pedped eo an eklejia eo an Kũrjin ro. (Eps. 2:​20-22) Ilo jikin kweilo̦k eo eokkwõjarjar etan Jerusalem, ewõr “12 dekã ko raorõk” me kar je ioer “ãt ko 12 etan rijjilõk ro 12 an L̦aam̦ eo.” (Rev. 21:​10-14) Aet, rijjilõk ro retiljek renaaj kar bõk juon eddo eaorõk ñan kajejjet karõk eo an Anij. Eñin unin jemaroñ mel̦el̦e etke Jesus ear kõn̦aan bwe ren pãd ippãn ilo Kwõjkwõjin Kijoone eo ãliktata im ñan bar men eo enaaj wal̦o̦k tokãlik—Kõjota eo an Irooj.

Kumi eo 70 uwaaer im ri-kal̦oor ro jet rar jab pãd ilo m̦õñã eo ippãn Jesus. Meñe ãindein, ak aolep ri-kal̦oor ro me rar kwal̦o̦k aer tiljek renaaj kar bõk tokjãn jãn men eo Jesus ear ejaake—Kõjota eo an Irooj. Aolep ro tokãlik me renaaj erom rũkkapit renaaj del̦o̦ñ ilo bujen eo kõn aer naaj kiiñ ilo juon aelõñ, eo me Jesus ear kõnono kake ñan rijjilõk ro an ilo boñõn in ear pãd ippãer.—Luk 22:​29, 30.