1. Ewi wãween ad aikuj watõk jeraam̦m̦an eo ñan jar ñan Jeova?

 EM̦ÕJ letok ñan kõj juon jeraam̦m̦an ekanooj in em̦m̦an—maroñ eo ñan kepaak ri-Kõm̦anm̦an eo an lañ im lal̦ ilo jar. Baj l̦õmn̦ak m̦õk: Jemaroñ lutõkl̦o̦k bũruod ñan Jeova ilo jabdewõt iien im ilo jabdewõt kajin, im jejjab aikuj kõm̦m̦an appointment ippãn. Jemaroñ jar ñane jãn juon peet ilo aujpitõl̦ ak jãn kalbuuj, im jemaroñ lõke bwe eo Jemãd ilañ me el̦ap yokwe ippãn enaaj roñjake kõj. Jejjab kajejtokjãn jeraam̦m̦an in.

2. Ewi wãween an kar Kiiñ Devid kwal̦o̦k bwe ej kaorõk jeraam̦m̦an eo ñan jar?

² Kiiñ Devid ear kaorõk jeraam̦m̦an eo ñan jar. Ear al ñan Jeova im ba: “Aõ jar en ãinwõt kaijurjur im̦aam̦.” (Sam 141:1, 2) Ilo raan ko an Devid, bũrij ro rar lukkuun kõjparok ke rar kõpooje menin kaijurjur eo eokkwõjarjar ñan aer kabuñ ñan Jeova. (Ex. 30:34, 35) Ilo an kar Devid jitõñl̦o̦k ñan menin kaijurjur eo, men in ej kwal̦o̦k bwe ear lukkuun kõn̦aan l̦õmn̦ak kõn men ko enaaj ba ñan eo Jemãn ilañ. Eñin ej bar juon men jelukkuun kõn̦aan. Jekõn̦aan bwe jar ko ad ren kabuñbũruon Jeova.

3. Ta eo jej aikuj in kõm̦m̦ane ñe jej jar ñan Jeova, im etke?

³ Ñe jej jar ñan Jeova, jej aikuj lukkuun kwal̦o̦k kautiej. L̦õmn̦ak kõn pijen ko an Aiseia, Ezekiel, Daniel, im Jon. Meñe pijen kein reoktak jãn doon, bõtab ewõr juon men ej ãinl̦o̦kwõt juon ilo kajjojo iaaer. Rej aolep kwal̦o̦k kõn  Jeova ãinwõt juon Kiiñ me eutiej im eaiboojoj. Aiseia ear ‘lo an Jeova jijet ioon juon tũroon eutiej.’ (Ais. 6:1-3) Ezekiel ear lo an Jeova jijet ioon juon jariot, im “ear wõr meram el̦ap ipel̦aakin. Ãinwõt juon jemãluut,” ak iia. (Ezk. 1:26-28) Daniel ear lo an “Eo jãn indeeo” kõn̦ak nuknuk ko remouj, im tũroon eo an ear bwil kõn kijeek. (Dan. 7:9, 10) Im Jon ear lo an Jeova jijet ioon juon tũroon im ewõr juon iia ej kaapool̦e me kõl̦arin ej ãinwõt dekã eo eaorõk etan emerald. (Rev. 4:2-4) Ilo ad kõl̦mãnl̦o̦kjen̦ kõn an Jeova lukkuun utiej im aiboojoj, men in ej kakeememej kõj kõn jeraam̦m̦an eo ekanooj in em̦m̦an ñan kepaake ilo jar im aorõkin ad aikuj kõm̦m̦ane men in ilo kautiej. Bõtab ewi wãween jemaroñ jar?

4. Ta eo jej katak jãn naanin ijjino ko ilo jar eo an Jesus me ej wal̦o̦k ilo Matu 6:9, 10?

⁴ Riit Matu 6:9, 10. Ilo Katak eo Ioon Tol̦ Eo, Jesus ear katakin ri-kal̦oor ro an kõn wãween aer maroñ jar ilo juon wãween me ej kabuñbũruon Anij. Ãlikin an kar ba “innem en wãween dein ami jar,” Jesus ear m̦okta jar kõn men ko raorõk me rej ekkejell̦o̦k ippãn karõk eo an Jeova: an kwõjarjar ãt eo Etan; an itok Aelõñ eo, eo me enaaj ko̦kkure aolep ri-jum̦ae ro an Anij; im jeraam̦m̦an ko em̦õj An kõpooji ñan lal̦ in im armej ro ilo ilju im jekl̦aj. Ñe jej jar kaki men kein, jej kaalikkar bwe aorõk ankilaan Anij ippãd.

5. Ekkar ke ñan jar kõn men ko ilo mour ko ad?

⁵ Ilo m̦õttan eo tok juon ilo jar eo an, Jesus ear kwal̦o̦k bwe ekkar ñan ad jar kõn men ko ilo mour ko ad. Jemaroñ kajjitõk ippãn Jeova bwe en letok kijed m̦õñã ñan raan eo, ñan jol̦o̦k ad bõd kõn jerawiwi ko ad, ñan kõjparok kõj jãn menin kapo ko, im ñan lo̦mo̦o̦ren kõj jãn ri-nana eo. (Matu 6:11-13) Ñe jej kajjitõk ippãn Jeova kõn men kein, jej kaalikkar bwe jej atartar ioon im jekõn̦aan kabuñbũruon.

6. Jej aikuj ke jar wõt kõn men ko em̦õj kõllaajraki ilo jar eo an Jesus? Jouj im kõmel̦el̦e.

⁶ Jesus ear jab kõtmãne bwe ri-kal̦oor ro an ren kõjerbale ejja naan ko ear kõjerbali  ilo jar eo an. Ke Jesus ear jar ilo iien ko jet, ear jar kõn men ko jet me rar menin aikuj ñane ilo iien eo. (Matu 26:39, 42; Jon 17:1-26) Ãindeinl̦o̦k wõt, jemaroñ jar kõn jabdewõt men me jej inepata kake. Ñe jej aikuj in kõm̦m̦ane juon pepe, jemaroñ jar kõn mãlõtlõt im jel̦ãl̦o̦kjen̦. (Sam 119:33, 34) Ñe jej itõn kõm̦m̦ane juon jerbal me epen, jemaroñ jar kõn lol̦o̦kjen̦ im jipañ ñan jel̦ã kilen kõm̦m̦ane jerbal eo. (JK. 2:6) Ro jemãn im jinen remaroñ jar kõn ajri ro nejier, ajri ro remaroñ jar kõn ro jemãer im jineer, im kõj aolep jemaroñ im jej aikuj jar kõn rũkkatak Baibõl̦ ro ad im ro jej kwal̦o̦k naan ñan er. Ijoke, jejjab aikuj jar wõt kõn men ko jej aikuji.

7. Etke jej aikuj nõbar Jeova ilo jar ko ad?

⁷ Jej aikuj keememej ñan nõbar Jeova ilo jar ko ad. Ejjel̦o̦k en̦ el̦apl̦o̦k ad aikuj nõbare jãn Anij eo ad. Ej juon eo ‘em̦m̦an im ekõn̦aan jol̦o̦k bõd.’ “Ekanooj tũriam̦o im jouj, erum̦wij [An] illu, im [eobrak] kõn yokwe im m̦ool.” (Sam 86:5, 15) Alikkar bwe ewõr un ko rem̦m̦an unin ad aikuj nõbar Jeova kõn kain Anij rot e im men ko ej kõm̦m̦ani.

8. Ta jet iaan men ko jemaroñ kam̦m̦oolol Jeova kaki? (Sam 104:12-15, 24, UBS)

⁸ Kobal̦o̦k ilo ad nõbar Jeova ilo jar ko ad, jekõn̦aan kam̦m̦oolole kõn men ko rekanooj in em̦m̦an ej litoki ñan kõj. Ñan waanjoñak, jemaroñ kam̦m̦oolole kõn kõl̦ar ko raiboojoj ilo wũt ko, an wõr elõñ kain m̦õñã ko renno̦, im ad maroñ m̦õn̦õn̦õ ippãn ro m̦õttad me rejitõnbõro ippãd. Eo Jemãd ilañ me el̦ap yokwe ippãn ej letok men kein im men ko jet bwe jen maroñ m̦õn̦õn̦õ. (Riit Sam 104:12-15, 24, UBS.) Men eo eaorõkl̦o̦k, jej kam̦m̦oolol Jeova kõn an lukkuun lõñ m̦õñã ko l̦oor jetõb ej litok im kõn kõjatdikdik eo ad em̦m̦an ñan ilju im jekl̦aj.

9. Ta eo emaroñ jipañ kõj bwe jen keememej ñan kam̦m̦oolole Jeova? (1 Tessalonika 5:17, 18)

⁹ Emaroñ lukkuun pidodo ñan ad mel̦o̦kl̦o̦k in kam̦m̦oolole Jeova kõn aolep men ko ej kõm̦m̦ani ñan kõj. Ta eo kwõmaroñ kõm̦m̦ane ñan jipañ eok keememej? Kwõmaroñ je juon laajrakin men ko em̦õj am̦ kajjitõk  ippãn kaki, im jãn iien ñan iien, etali ñan lale ewi wãween an Jeova uwaaki jar ko am̦. Innem, jar ñane im kam̦m̦oolole kõn jipañ eo an. (Riit 1 Tessalonika 5:17, 18.) L̦õmn̦ak kõn men in: Ñe ro jet rej kwal̦o̦k aer kam̦m̦oolole kõj, jej m̦õn̦õn̦õ im eñjake aer yokwe kõj. Ãindeinl̦o̦k wõt, ñe jej keememej ñan kam̦m̦oolole Jeova kõn an uwaake jar ko ad, men in ej kam̦õn̦õn̦õik bũruon. (Kol. 3:15) Bõtab ta un eo juon eaorõk ñan kam̦m̦oolol Anij eo ad?

10. Ekkar ñan 1 Piter 2:21, etke jej aikuj kam̦m̦oolol Jeova kõn an kar jilkintok Jesus ñan lal̦ in?

¹⁰ Riit 1 Piter 2:21. Jej aikuj kam̦m̦oolol Jeova kõn an kar jilkintok eo Nejin ejitõnbõro ñan katakin kõj. Elukkuun l̦ap ad katak kõn Jeova im wãween ad maroñ kabuñbũruon ikijjeen ad katak kõn mour eo an Jesus. El̦aññe jej kwal̦o̦k ad tõmak ilo katok in mour eo an Jesus, emaroñ wõr juon ad kõtaan epaak ippãn Jeova Anij im jemaroñ mour ilo aenõm̦m̦an Ippãn.​—Rom 5:1.

11. Etke jej jar ilo etan Jesus?

¹¹ Jej kam̦m̦oolol Jeova bwe jemaroñ jar ñane ikijjeen eo Nejin. Jeova ej kõjerbal Jesus ñan letok ñan kõj men ko jej kajjitõk kaki. Jeova ej roñjake im uwaake jar ko me rej ilo etan Jesus. Jesus ear kõmel̦el̦e im ba: “Jabdewõt men ko kom̦ij kajjitõk kaki ilo eta, inaaj kõm̦m̦ani bwe Jema en maroñ bõk aiboojoj kõn Nejin.”—Jon 14:13, 14.

12. Ta un eo juon unin ad aikuj kam̦m̦oolol Jeova kõn eo Nejin?

¹² Jeova ej jeorl̦o̦k jerawiwi ko ad ikijjeen katok in mour eo an Jesus. Jeje ko rej kwal̦o̦k kõn Jesus ãinwõt “bũrij l̦apl̦ap [eo ad me] ej jijet ituanbwijmaroñin tũroon eo an eo Eutiejtata ijoko ilañ.” (Hib. 8:1) Jesus ej “rijjipañ [eo ad me] ej pãd ippãn Jemãdwõj ilañ.” (1 Jon 2:1) El̦ap ad kam̦m̦oolol Jeova kõn an kar letok ñan kõj juon Bũrij L̦apl̦ap me emel̦el̦e kõn m̦õjn̦o̦ ko ad im ej “akwel̦ap kõn kõj”! (Rom 8:34; Hib. 4:15) Kõnke kõj armej jejjab weeppãn, jeban kar maroñ kepaake Jeova ilo jar el̦aññe ejjab kõn katok in mour eo an Jesus. Ejjel̦o̦k pere kwõmaroñ errã bwe jejjab maroñ lukkuun kwal̦o̦k ewi joñan ad kam̦m̦oolol Jeova kõn menin letok eo an eaorõk ñan kõj—eo Nejin ejitõnbõro!

13. Ilo boñõn eo m̦okta jãn an kar mej, ewi wãween an kar Jesus kwal̦o̦k an yokwe ri-kal̦oor ro an?

¹³ Ilo boñõn eo m̦okta jãn an kar Jesus mej, ear jar ium̦win juon iien aetok kõn ri-kal̦oor ro an, ear kajjitõk ippãn Jemãn bwe en “kõjparok er jãn ri-nana eo.” (Jon 17:15) Alikkar bwe Jesus ear lukkuun yokwe er! Meñe ear pojakin iioon juon mãlejjoñ elukkuun pen, ak ear inepata kõn rijjilõk ro an.

14. Ewi wãween ad kwal̦o̦k bwe jej yokwe ro jeid im jatid?

¹⁴ Jej anõke Jesus ilo ad jab l̦õmn̦ak wõt kõn aikuj ko ad make. Ijello̦kun ad ãindein, jej keini ad jar kõn ro jeid im jatid. Ñe jej kõm̦m̦ane men in, jej pokake kien eo an Jesus ñan yokwe doon im jej kwal̦o̦k ñan Jeova ewi joñan ad yokwe rũttõmak ro m̦õttad. (Jon 13:34) Ad jar kõn ro jeid im jatid ejjab juon men eo ejjel̦o̦k tokjãn. Naanin Anij ej jiroñ kõj bwe “jar in akwel̦ap eo an juon eo ewãnõk ekanooj in kajoor im l̦ap tokjãn.”—Jem. 5:16.

15. Etke rũttõmak ro jeid im jatid rej aikuji ad jar kõn er?

¹⁵ Rũttõmak ro jeid im jatid rej aikuji ad  jar kõn er kõnke rej iioon elõñ apañ ko. Jemaroñ kajjitõk ippãn Jeova bwe en jipañ er ñan kijenmej ilo aer iioon nañinmej, l̦añ ko rel̦l̦ap, tarin̦ae, an ro jet jum̦ae im kaeñtaan er, im apañ ko jet. Jemaroñ bar jar kõn ro jeid im jatid me rej kate er ñan jipañ ro rej pãd ilo aikuj. Kwõmaroñ jel̦ã kajjien jet iaan ro rej iioon apañ kein. Kwõmaroñ ke kwal̦o̦k etaer ilo jar ko am̦ make? Jej kwal̦o̦k m̦oolin yokwe ñan rũttõmak ro jeid im jatid ikijjeen ad kajjitõk ippãn Jeova bwe en jipañ er ñan kijenmej wõt.

16. Etke jej aikuj jar kõn em̦m̦aan ro jeid im jatid me rej tõl?

¹⁶ Ro me rej tõl ilo eklejia eo rej lukkuun kam̦m̦oolol ñe jej likũt er ilo jar ko ad, im rej bõk tokjãn jãn jar kein. Kar ãindein ippãn rijjilõk Paul. Ear je im ba: “Bareinwõt, jar kõn ña bwe en letok naan ko ñan ña ñe ij kõnono, bwe in maroñ kõnnaan ilo peran ñe ij kwal̦o̦k kõn men eo ettino im eokkwõjarjar kõn ennaan eo em̦m̦an.” (Eps. 6:19) Rainin, elukkuun lõñ em̦m̦aan ro rej tõl ibwiljid me el̦ap aer kate er jerbal. Jej kwal̦o̦k ad yokwe er ikijjeen ad kajjitõk ippãn Jeova bwe en kõjeraam̦m̦an jerbal ko aer.

17-18. Iien ta ko me ro jet remaroñ kajjitõk ippãd ñan jar, im ta ko jej aikuj keememeji?

¹⁷ Ewõr iien ro jet remaroñ kajjitõk ippãd ñan jar ñan aolep. Ñan waanjoñak, juon jeid im jatid kõrã me ej katak Baibõl̦ ippãn juon rũkkatak emaroñ kajjitõk ippãn bar juon jeid im jatid kõrã me ear etal ippãnl̦o̦k ñe emaroñ jar ñan er. Kõrã eo jeid im jatid me ej rijjipañ emaroñ jab lukkuun jel̦ã kajjien rũkkatak eo, innem emaroñ kõn̦aan jar ilo jem̦l̦o̦kin katak eo. Ilo wãween in, emaroñ jel̦ã ta ko emaroñ jar kaki ekkar ñan aikuj ko an rũkkatak eo.

¹⁸ Ilo juon iien kweilo̦k in kwal̦o̦k naan ak juon iien kweilo̦k an eklejia, remaroñ kajjitõk ippãn juon jeid im jatid em̦m̦aan ak likao bwe en jar. Em̦m̦aan ak likao rein me ewõr ippãer jeraam̦m̦an in rej aikuj keememej unleplepin kweilo̦k eo. Iien jar eo ejjab iien kauweik eklejia eo ak ñan kõm̦m̦an kõjjel̦ã ko. Ilo enañin aolep iien kweilo̦k ko an  eklejia, em̦õj kõjenolo̦k l̦alem minit ñan al im jar jim̦or, innem em̦m̦aan eo jeid im jatid me enaaj jar ejjab aikuj “aetok [an] jar,” el̦aptata ilo jar in ijjino eo.​—Matu 6:7.

19. Ta eo enaaj jipañ kõj ñan pojak ñan raanin ekajet eo an Jeova?

¹⁹ Ilo ad epaakel̦o̦k raanin ekajet eo an Jeova, el̦apl̦o̦k an aorõk ñan ad kõm̦m̦an bwe jar en juon iaan men ko raorõktata ilo mour ko ad. Ikijjeen men in, Jesus ear ba: “Kom̦win ruj wõt, im kom̦win akwel̦ap ñan Anij iien otemjej bwe kom̦win maroñ el̦l̦ã jãn men kein renaaj aikuj in wal̦o̦k.” (Luk 21:36) Aet, ñe jenaaj niknik ilo ad jar, men in enaaj jipañ kõj ñan ruj wõt ilo tõmak im jenaaj pojak ñe raanin ekajet eo an Anij enaaj itok.

20. Ewi wãween an jar ko ad maroñ ãinwõt menin kaijurjur ko rebwiin mãlu?

²⁰ Ta ko em̦õj ad kõnono kaki? Jej lukkuun kaorõk jeraam̦m̦an eo ewõr ippãd ñan jar. Men ko raorõktata me jej aikuj jar kaki ej men ko me rej ekkejell̦o̦k ñan karõk eo an Jeova. Jej bareinwõt kam̦m̦oolol kõn eo Nejin Anij im an tõl kõj ikijjeen Aelõñ eo, im jej jar kõn rũttõmak ro jeid im jatid. Jemaroñ bar jar kõn aikuj ko ad ilo jetõb im ilo kanniõk. Ñe jej lukkuun kõl̦mãnl̦o̦kjen̦ kõn ta ko jenaaj ba ilo jar ko ad, jej kwal̦o̦k bwe jej kaorõk jeraam̦m̦an in ad ekanooj in em̦m̦an. Naan ko ad renaaj ãinwõt menin kaijurjur ko rebwiin mãlu ñan Jeova—juon “menin m̦õn̦õn̦õ ippãn.”—JK. 15:8.