1. Ta eo me ej ankilaan Jeova rainin?

 RAININ, ej ankilaan Anij bwe ennaan eo em̦m̦an kõn Aelõñ eo en ajeeded ipel̦aakin lal̦ in. (Mark 13:10; 1 Tim. 2:3, 4) Jerbal in ej an Jeova, im joñan an aorõk, em̦õj an kõm̦m̦an bwe en pãd ium̦win tõl eo an eo Nejin me ejitõnbõro. Innem kõnke jerbal in ej pãd ium̦win tõl eo an Jesus, jemaroñ lõke bwe naaj kadedeikl̦o̦k ekkar ñan kõn̦aan eo an Jeova m̦okta jãn an itok jem̦l̦o̦kin.​—Matu 24:14.

2. Ta ko jenaaj kõnono kaki ilo katak in?

² Ilo katak in, jenaaj loe wãween an Jesus kõjerbal “ri-karejar eo etiljek im mãlõtlõt” ñan litok ekkan ko ilo jetõb im ñan kõm̦m̦an bwe en laajrak ri-kal̦oor ro an ñan campaign eo ej make wõt l̦aptata ilo jerbalin kwal̦o̦k naan. (Matu 24:45) Jenãj bareinwõt lale ta eo kõj kajjojo jemaroñ kõm̦m̦ane ñan rejetak Jesus im ri-karejar eo etiljek.

3. Ta maroñ eo kar lel̦o̦k ñan Jesus?

³ Jesus ej tõl jerbalin kwal̦o̦k naan eo. Etke jemaroñ tõmak men in? M̦oktal̦o̦k wõt jãn an kar wanlõñl̦o̦k ñan lañ, Jesus ear kobal̦o̦k ippãn jet iaan ri-kal̦oor ro an retiljek ilo ioon juon tol̦ ilo Galili. Ear jiroñl̦o̦k er im ba: “Em̦õj kõmaroñ eõ ioon men otemjej ilo lañ im ioon lal̦.” Im lale ta eo ear ba tokãlik, ear ba: “Kom̦win ilo̦k ñan ippãn armejin aelõñ otemjej im kõm̦m̦an bwe ren erom ri-kal̦oora.” (Matu 28:18, 19) Innem alikkar bwe kobal̦o̦k ippãn elõñ men ko jet, em̦õj lel̦o̦k ñan Jesus maroñ eo ñan tõl jerbalin kwal̦o̦k naan.

4. Etke jemaroñ tõmak bwe Jesus ej wõnm̦aanl̦o̦k wõt im tõl jerbalin kwal̦o̦k naan eo?

⁴ Jesus ear ba bwe jerbalin kwal̦o̦k naan eo im kõm̦m̦an  ri-kal̦oor enaaj tõpar “armejin aelõñ otemjej” im bwe enaaj pãd ippãn ri-kal̦oor ro an “iien otemjej, ñan jem̦l̦o̦kin jukjukun pãd in.” (Matu 28:20) Naan kein rej kaalikkar bwe jerbalin kwal̦o̦k naan eo enaaj wõnm̦aanl̦o̦k wõt im pãd ium̦win tõl eo an Jesus tok ñan raan kein ad.

5. Ta ijo kun̦aad me ej kajejjet kũtien naan ko ilo Sam 110:3?

⁵ Jesus ear jab inepata el̦aññe enaaj jabwe ri-jerbal ro ilo jem̦l̦o̦kin jukjukun pãd in. Ear jel̦ã bwe enaaj kar jejjet kũtien kanaan eo an juon ri-jeje sam, me ej ba: “Ro doom̦ rej m̦õn̦õn̦õ im lewaj er make ilo raanin Am̦ kajoor.” (Sam 110:3) El̦aññe kwõj bõk kun̦aam̦ ilo jerbalin kwal̦o̦k naan eo, innem alikkar bwe kwõj rejetak Jesus im ri-karejar eo etiljek, im kwõj jipañ kajejjet kũtien kanaan in. Jerbal in em̦õj an bõk jikin im ej wõnm̦aanl̦o̦k wõt, bõtab ewõr mãlejjoñ ak wãween ko reppen rej wal̦o̦k.

6. Ta juon iaan mãlejjoñ ko me ri-kwal̦o̦k naan ro an Aelõñ eo rej iioone rainin?

⁶ Juon iaan mãlejjoñ ko me ri-kwal̦o̦k naan ro an Aelõñ eo rej iioone, ej aer iioon jum̦ae. Ro rar oktak im erom ri-jum̦ae, ri-tõl ro an kabuñ, im ro reutiej ilo kien, em̦õj aer kõm̦m̦an bwe en bõd wãween an elõñ armej l̦õmn̦ak kõn jerbal eo ad. El̦aññe em̦õj tõlpilouk ro nukũd, ro jejel̦ã kajjier, im ri-jerbal ro m̦õttad kõn mel̦el̦e kein rejjab m̦ool, innem rein remaroñ kajjioñ iuun kõj ñan bõjrak jãn ad karejar ñan Jeova im jãn ad kwal̦o̦k naan. Ilo jet aelõñ ko, ro rej kõjdate kõj rej jum̦aik kõj ikijjeen aer kaamijak rũttõmak ro jeid im jatid, itõn m̦an ak ko̦kkure er, im kalbuuji er ak likũt er ilo jikin kalbuuj ko. Ijoke, jejjab bwilõñ kõn wãween kein rej kõm̦m̦ani. Jesus ear kanaan im ba: “Armej otemjej renaaj dike kom̦ kõn wõt eta.” (Matu 24:9) Ilo an wal̦o̦k kain kõjdat rot kein n̦ae kõj, men in ej kam̦ool bwe Jeova ej buñbũruon ippãd. (Matu 5:11, 12) Tepil̦ eo ej jutak ilikin jum̦ae kein me jej iiooni. Bõtab el̦apl̦o̦k an Jesus kajoor jãne! Ikijjeen jipañ eo an Jesus, ennaan eo em̦m̦an ej tõpar armejin aelõñ otemjej. L̦õmn̦ak kõn kein kam̦ool ko.

7. Ta kein kam̦ool ko kwõj loi me rej kaalikkar bwe ejejjet kũtien naan ko ilo Revelesõn 14:6, 7?

⁷ Bar juon mãlejjoñ ak wãween epen me kõj ri-kwal̦o̦k naan ro kõn Aelõñ eo jej iioone, ej kõn an oktak kajin ko an armej jãn doon. Ilo ennaan eo me Jesus ear lel̦o̦k ñan rijjilõk Jon, ear kanaan im ba bwe ilo raan kein ad, ennaan eo em̦m̦an enaaj el̦l̦ã ioon apañ in. (Riit Revelesõn 14:6, 7.) Ewi wãween? Jej kõpel̦l̦o̦k ial̦an an elõñ armej ro em̦m̦akũt kõn ennaan eo an Aelõñ eo. Rainin, armej ro ipel̦aakin lal̦ in remaroñ riiti bok im men ko jet rej pedped ioon Baibõl̦ eo ilo weepjait eo ad jw.org kõnke mel̦el̦e ko ie remaroñ riiti ilo elõñl̦o̦k jãn 1,000 kajin ko! Em̦õj kamãlim an ukok bok eo M̦õn̦õn̦õ kõn Mour ñan Indeeo! me ej kein jerbal eo ad el̦ap ñan katak ippãn armej im kõm̦m̦an ri-kal̦oor ilo elõñl̦o̦k jãn 700 kajin ko! Katak kein me rej pedped ioon Baibõl̦, em̦õj bar kõm̦m̦an bwe ren wal̦o̦k ilo pijain alwõj ko me rej ñan ro rejarroñroñ im bok ko me kar kõm̦m̦ani ñan ro repilo. Jej lo an jejjet kũtien kanaan ko ilo Baibõl̦. Armej ro “jãn aelõñ ko in kajin otemjej” rej katak ñan kõnono “kajin eo erreo,” ak m̦ool eo ilo Baibõl̦. (Zek. 8:23; Zep. 3:9, NW) Aolep men kein rej tõprak ak bõk jikier ium̦win tõl eo an Jesus Christ.

8. Ta tõprak ko em̦õj aer wal̦o̦k itok jãn jerbalin kwal̦o̦k naan eo ad?

⁸ Rainin, elõñl̦o̦k jãn 8,000,000 armej ro ilo 240 aelõñ ko rej m̦õttan doulul eo an Jeova, im kajjojo iiõ elõñ to̦ujin armej ro rej  peptaij! Ak men eo el̦apl̦o̦k an aorõk jãn joñan oraer ej kadkad ko kadkadin juon Kũrjin ak “mour eo ekããl,” me ri-kal̦oor rein rekããl rar kaddekl̦o̦k ippãer. (Kol. 3:8-10) Elõñ rar bõjrak jãn aer kõm̦m̦ani m̦anit ko renana, aer lãj, kalijekl̦o̦k, im l̦ap an utiej bũrueer kõn aelõñ eo aer. Ej jejjet kũtien kanaan eo ilo Aiseia 2:4 me ej ba “enaaj jako aer katak tarin̦ae.” Ilo ad lukkuun kate kõj ñan kõn̦ak mour eo ekããl, jej jipañ kõm̦m̦an bwe armej ro ren reel ak wõr aer itoklimo kõn doulul eo an Anij im jej kam̦ool bwe jej l̦oore eo ej tõl kõj, Jesus Christ. (Jon 13:35; 1 Pit. 2:12) Aolep men kein rar jab make jide im wal̦o̦k. Jesus eo ej letok jipañ eo jej aikuji.

9. Ekkar ñan Matu 24:45-47, ta eo kar kanaan kake kõn tõre ko ãliktata?

⁹ Riit Matu 24:45-47. Jesus ear kanaan bwe ilo tõre ko ãliktata, enaaj jitõñ juon kumi in ‘ri-karejar etiljek im mãlõtlõt’ ñan litok ekkan ko ilo jetõb. Innem jej kõtmãne bwe kumi in enaaj lukkuun kate er ilo aer jerbal ilo raan kein ad. Jej lo an lukkuun wal̦o̦k men in. Ri-tõl eo ad ej kõjerbale juon kumi jidikdik in em̦m̦aan ro me rej rũkkapit ñan letok ñan armej ro an Anij im ro ewõr aer itoklimo kõn m̦ool eo, “kijeer ilo iien eo ejejjet.” Em̦m̦aan rein rejjab watõk bwe rej irooj ioon tõmak eo an ro jet. (2 Kor. 1:24) Ijello̦kun aer ãindein, rej kile bwe Jesus Christ eo ej “ri-Tõl im Irooj” ioon armej ro an.​—Ais. 55:4.

10. Bok ta eo ilo pija ko ilo katak in ear kõm̦akũt eok ñan etetal ilo ial̦ eo ej tõll̦o̦k ñan mour indeeo?

¹⁰ Jãn kar 1919 eo, ri-karejar eo etiljek im mãlõtlõt ear letok elõñ kain bok ko me rar jipañ ro ewõr aer itoklimo ñan edjoñe m̦õñã ko ilo kõkkar me reuõne. Ilo 1921 eo, kumi in rar kõpooje juon bok etan The Harp of God  ñan jipañ ro ewõr aer itoklimo ñan katak kõn katak ko jãn Baibõl̦ me ekkã ad jino katak kaki. Ilo an mootl̦o̦k elõñ iiõ ko im oktakl̦o̦k wãween ko rej wal̦o̦k, ewõr bok ko jet me kar kõm̦m̦ani. Bok ta eo ear jipañ eok ñan jel̦ã kajjien im yokwe eo Jemãd ilañ? Kar ke “Let God Be True,” Mol Eo ej tellok ñõn Mour In Drio, Kwo Maroñ Mour Indrio ilo Paradise ion Lõl, Jelãlokjen Eo Ej Tellok ñan Mour Indio, Ta eo Baibõl̦ Ej Lukkuun Katakin Kõj?, ak M̦õn̦õn̦õ kõn Mour ñan Indeeo!, eo me ej bok eo ad ekããltata? Kar kõm̦m̦ani aolep bok kein ñan jipañ kõj kõm̦m̦an ri-kal̦oor. Im aolepeer rar wal̦o̦k ilo iien eo ejejjet me jaar aikuji.

11. Etke eaorõk bwe jen aolep bõk ekkan ko ilo jetõb?

¹¹ Ejjab ro wõt rekããl me ewõr aer itoklimo rej aikuj bõk ekkan ko ilo jetõb me reppen. Kõj aolep jej aikuj bõk ekkan kein. Rijjilõk Paul ear je: “Ekkan ko reppen rej ñan ro rerũtto.” Paul ear bar ba bwe ad jerbali men ko jej katak kaki jãn Baibõl̦ enaaj jipañ kõj ñan “jel̦ã oktak eo ikõtaan jim̦we im bõd.” (Hib. 5:14) Ilo tõre kein reppen me el̦ap an armej kõm̦m̦ani m̦anit ko renana, emaroñ kõm̦m̦an bwe en lukkuun pen ñan pokaki kien ko an Jeova. Bõtab Jesus ej lukkuun lale bwe en wõr ippãd kajoor eo jej aikuji ikijjeen ekkan ko renno̦ ilo kõkkar me jej bũki. Jej bõk ekkan kein ikijjeen Naanin Anij, Baibõl̦ eo. Ium̦win tõl eo an Jesus, ri-karejar eo etiljek im mãlõtlõt ej kõpooj im lito-litak ekkan ko ilo jetõb.

12. Ãinwõt Jesus, ewi wãween ad lel̦o̦k aiboojoj im nõbar ñan etan Anij?

¹² Ãinwõt Jesus, em̦õj ad lel̦o̦k aiboojoj im nõbar ñan ãt eo etan Anij, juon men me ej tõllo̦kun an bõke. (Jon 17:6, 26) Ñan waanjoñak, ilo 1931 eo, jaar bõk ãt eo Ri-Kõnnaan ro an Jeova me ej pedped ioon Baibõl̦. Ilo ad kõm̦m̦ane men in, jaar kaalikkar joñan an  aorõk etan Anij ippãd, im bwe jekõn̦aan bwe ro jet ren kile kõj ikijjeen ãt eo etan eo Jemãdwõj ilañ. (Ais. 43:10-12) Im jãn kar Oktoba eo ilo ejja iiõ in wõt, ãt in ear pãd ilo kilin kajjojo iaan Naan in Keeañ ko. Kobal̦o̦k ippãn men in, ilo ukokin Baibõl̦ eo New World Translation of the Holy Scriptures, kar karo̦o̦le etan Anij ñan jikin ko rar pãd ie ilo Naan eo an. Men in elukkuun oktak jãn kabuñ ko rewaan me rar jol̦o̦ke etan Jeova jãn elõñ iaan ukokin Baibõl̦ ko aer!

13. Ta eo ej kõm̦m̦an bwe kwõn tõmak bwe Jesus ej kõjerbal “ri-karejar eo etiljek im mãlõtlõt” rainin? (Jon 6:68)

¹³ Ikijjeen “ri-karejar eo etiljek im mãlõtlõt,” Jesus ear kajutak juon doulul ejejuwaan ilo lal̦ in ñan kowõnm̦aanl̦o̦k kabuñ eo erreo. Ta eñjake eo am̦ kõn doulul in? Bõlen kwõj l̦õmn̦ak kõn naan ko an rijjilõk Piter ñan Jesus ke ear ba: “Irooj, wõn eo kõm naaj etal ñan ippãn? Naan ko am̦ rej tõll̦o̦k ñan mour indeeo.” (Jon 6:68) Ia eo kõjwõj nãj kar pãd ie rainin el̦aññe jaar jab iioon im kobatok ippãn doulul in an Jeova? Ikijjeen doulul in, Christ ej lukkuun lale bwe en em̦m̦an ad bõk ekkan ko l̦oor jetõb. Ej bareinwõt letok kamminene ko bwe en em̦m̦an ad kajejjet jerbalin kwal̦o̦k naan eo ad. Im ej bar jipañ kõj ñan kõn̦ak “mour eo ekããl” bwe jen juon eo Jeova ej buñbũruon kake.​—Eps. 4:24.

14. Itok wõt jãn am̦ m̦õttan doulul in an Jeova, ta tokjãn ko rem̦m̦an kwaar bũki jãn ke ear wal̦o̦k nañinmejin COVID-19?

¹⁴ Jesus ej letok naanin tõl ko remãlõtlõt ilo iien ko elukkuun l̦ap apañ im jorrããn. Tokjãn ko rem̦m̦an me rar wal̦o̦k itok wõt jãn tõl eo an, rar alikkar ke ear jino wal̦o̦k nañinmej eo el̦ap, COVID-19. Meñe elõñ armej ro  ilo lal̦ in rar jaje ta eo ren kõm̦m̦ane, ak Jesus ear lukkuun lale bwe jen bõk naanin tõl ko ralikkar ñan ad maroñ bõk kõjparok. Kar rõjañ kõj ñan ekkõn̦ak mask ko ñe jej etal ñan ijoko elõñ armej ie im ñan kammineneik kõj ñan ettol̦o̦k jãn ro jet. Kar kakeememej em̦m̦aan ro rej lale eklejia ñan ekkeini aer lalel̦o̦k (contact) aolep ro ilo eklejia eo im ñan jel̦ã ejet aikuj ko aer ilo kanniõk im ilo jetõb jim̦or. (Ais. 32:1, 2) Jaar bareinwõt bõk naanin tõl im kõketak ko jet ikijjeen update ko jãn Kumi eo Ej Lale Aolep Eklejia Ko.

15. Ta naanin tõl ko kar litok ñan kõj kõn kilen ad kõm̦m̦ani iien kweilo̦k ko ad im jerbalin kwal̦o̦k naan ilo tõre in me ewal̦o̦k nañinmej eo el̦ap, im ta tokjãn ko rar wal̦o̦k?

¹⁵ Ilo tõre in me ej wal̦o̦k nañinmej eo el̦ap, jaar bareinwõt bõk naanin tõl ko ralikkar kõn kilen ad kõm̦m̦ani iien kweilo̦k ko ad im jerbalin kwal̦o̦k naan. Ilo m̦õkaj, jaar jino kõm̦m̦ani iien kweilo̦k ko an eklejia im kweilo̦k ko ad rel̦l̦ap ikijjeen kein jerbal ko ñan video call ak Internet. Im jaar jino kwal̦o̦k naan enañin aolep iien ikijjeen talboon kab jeje lõta. Jeova ear kõjeraam̦m̦an ad lukkuun kate kõj. Elõñ iaan ra ko ad rar kwal̦o̦k ripoot in an lõñl̦o̦k uwaan ri-kwal̦o̦k naan ro. Ilo m̦ool, elõñ iaan ro jeid im jatid rar iiooni men ko rekõketak ilo jerbalin kwal̦o̦k naan ilo tõre in me ewal̦o̦k nañinmej eo el̦ap.​—Lale bo̦o̦k eo etan, “ Jeova Ej Kõjeraam̦m̦an Ad Kwal̦o̦k Naan.”

16. Ta eo jemaroñ lõke im tõmake?

¹⁶ Jet remaroñ bõk l̦õmn̦ak eo bwe el̦ap an baj doulul eo l̦e jãn joñan an kõjparok ilo tõre in me ewal̦o̦k nañinmej eo el̦ap. Bõtab elõñ alen ad loe bwe naanin tõl ko rej litok rar lukkuun mãlõtlõt. (Matu 11:19) Im ilo ad kõl̦mãnl̦o̦kjen̦ kõn wãween an Jesus tõl armej ro an ilo yokwe, jej lõke im tõmak bwe jekdo̦o̦n ta ko renaaj wal̦o̦k ilju im jekl̦aj, ak Jeova im eo Nejin ejitõnbõro renaaj pãd ippãd.​—Riit Hibru 13:5, 6.

17. Ta eñjake eo am̦ kõn am̦ jerbal ium̦win tõl eo an Jesus?

¹⁷ El̦ap ad jeraam̦m̦an ñan jerbal ium̦win tõl eo an Jesus! Jej m̦õttan juon doulul me rejjab kõjenolo̦k er jãn doon kõn wõt m̦anit, aelõñ, ak kajin. Em̦m̦an ad bõk ekkan ko ilo jetõb im bõk jipañ im kamminene ko jej aikuji ñan wõnm̦aanl̦o̦k wõt ilo jerbalin kwal̦o̦k naan eo ad. Kajjojo iaad jej bõk jipañ ñan kõn̦ak mour eo ekããl im jej katak ñan yokwe doon. Elõñ un ko rem̦m̦an unin ad kõn̦aan kõmjãje kõn eo ej tõl kõj, Jesus!