Kajjitõk ko jãn Ro Rej Riit
Naan ko ilo Sam 12:7 me rej ba “Kwõnaaj lale er,” rej ke jitõñl̦o̦k ñan ro rej “eñtaan” (eoon 5) ak ñan “naan ko an Jeova” (eoon 6)?
Eoon ko ilo Sam jebta 12 rej kaalikkar bwe ej jitõñl̦o̦k ñan armej ro.
Ilo Sam 12:1-4, ej ba bwe “ri-tiljek rejako jãn ro nejin armej.” Innem ilo Sam 12:5-7 ej ba:
“Jeova e ba, ‘Kiiõ Inaaj jutak kõn eñtaan an ri-jorrããn,
Kõn jañ an ri-jeram̦õl;
Inaaj likũt e ijo ejjel̦o̦k uwõta ie, ãinwõt ekõn̦aan.
Naan ko an Jeova rerreo,
Ãinwõt jelba em̦õj karreo e ilo juon upaaj bwidej, karreo e alen jiljilimjuon.
O Jeova, Kwõnaaj lale er,
Kwõnaaj kõjparok er jãn epepen in ñan indeeo.”
Eoon 5 ej kwal̦o̦k kõn ta eo Anij enaaj kõm̦m̦ane ñan ro rej iioon eñtaan—enaaj lo̦mo̦o̦ren er.
Eoon 6 ej wõnm̦aanl̦o̦k im ba bwe “naan ko an Jeova rerreo, ãinwõt jelba em̦õj karreo e.” Ejjel̦o̦k pere bwe aolep Kũrjin ro retiljek rej errã ippãn naan kein.—Sam 18:30, UBS; 119:140.
Kiiõ l̦õmn̦ak kõn eoon eo tok juon, ilo Sam 12:7: “O Jeova, Kwõnaaj lale er, Kwõnaaj kõjparok er jãn epepen in ñan indeeo.” Ta mel̦el̦ein an eoon in ba “er”?
Kõnke naan ko ilo eoon 7 rej wal̦o̦k ãlikin wõt eoon 6 me ej kõnono kõn “naan ko an Jeova rerreo,” jet remaroñ l̦õmn̦ak bwe “er” ej jitõñl̦o̦k ñan naan ko an Anij. Im em̦ool bwe Anij ear kõjparoke Baibõl̦ eo meñe ri-jum̦ae ro rar lukkuun kate er ñan ko̦kkure ak kõm̦m̦an bwe en mo̦ an armej ro kõjerbale.—Ais. 40:8; 1 Pit. 1:25.
Ijoke, naan ko ilo eoon 5 rej bar jejjet im m̦ool. Em̦õj an Jeova jipañ ro rej “eñtaan” im “jorrããn,” im ej wõnm̦aanl̦o̦k wõt im kõm̦m̦ane men in.—Job 36:15; Sam 6:4; 31:1, 2; 54:7, UBS; 145:20.
Kõn men in, ta ak wõn eo me eoon 7 ej kõnono kake ilo an ba “er”?
Ñe jenaaj etale aolepen jebta 12, jenaaj kile bwe “er” ej jitõñl̦o̦k ñan armej ro.
Ilo jinoin Sam jebta 12, ej kõnono kõn ‘ro retiljek’ me ro renana rar riabe er. Innem tokãlik, jej riit kõn an Jeova naaj em̦m̦akũt n̦ae ro rej kõjerbal loer ilo juon wãween ejjab jim̦we. Jebta in ej kaenõm̦m̦an kõj im kaalikkar bwe jemaroñ lõke bwe Anij enaaj em̦m̦akũt im jipañ armej ro an kõnke naan ko an rerreo.
Kõn men in, eoon 7 ej ba bwe Jeova enaaj lale im kõjparok “er,” mel̦el̦ein ro me rar iioon eñtaan kõn ro renana.
Naan in me kar ukote ñan “er” ear bar wal̦o̦k ilo kaape ko an Jeje ko jãn Kajin Hibru (Hebrew Masoretic text). Im ke kar ukote Jeje ko ilo Kajin Hibru ñan kajin Grik (Greek Septuagint), kar kõjerbale “kõm” ruo alen ilo eoon 7. Kõn men in, alikkar bwe ej kõnono kõn ro retiljek me rej iioon eñtaan im jorrããn. Bareinwõt, eoon 7 ej ba bwe kajjojo iaan ro retiljek renaaj bõk kõjparok jãn “epepen in,” ak ro rej “kautiej nana.” (Sam 12:7, 8) Ke kar ukote Jeje ko jãn Kajin Hibru ñan kajin Aramaic (Aramaic Targums), jinoin eoon 7 ilo ukok in ej bar kõjerbale naan eo “kõm.” Ej ba: “Kwe, O Irooj, kwõnaaj kõjparok ro rewãnõk, kwõnaaj kõjparok kõm jãn epepen in enana ñan indeeo.” Ukok kein rej bar kam̦ool bwe Sam 12:7 ejjab kõnono kõn naan ko an Anij.
Innem alikkar bwe eoon in ej lel̦o̦k kõjatdikdik ñan ‘ro retiljek.’ Remaroñ lõke bwe Anij enaaj em̦m̦akũt im kõjparok er.
