1. Ta jokãlõt eo eaorõk aolep armej rej aikuj in kõm̦m̦ane?

 EWÕR juon jokãlõt eaorõk armej ro rainin rej aikuj kõm̦m̦ane. Renaaj rejetak Jeova Anij ãinwõt eo me ekkar bwe en aer ri-Tõl ipel̦aakin lañ im lal̦ ke, ak renaaj jutak ilikin ri-kõjdat eo an elãj, Setan Tepil̦ eo? Aolep renãj aikuj in kããlõt juon wõt jait ikõtaan jait kein ruo. Jabdewõt jokãlõt eo renaaj kõm̦m̦ane enaaj jelõt ilju im jekl̦aj eo aer kõn el̦aññe renaaj mour ñan indeeo ke ak jaab. (Matu 25:31-33, 46) Ilo naaj “eñtaan eo el̦ap,” naaj kõkal̦l̦eiki armej ro; jet renaaj bõk kõkal̦l̦e eo ñan aer bõk lo̦mo̦o̦r, im jet renaaj bõk kõkal̦l̦e eo ñan aer bõk ko̦kkure.​—Rev. 7:14; 14:9-11; Ezk. 9:4, 6.

2. (1) Ta eo Hibru 10:35-39 ej rõjañ kõj ñan kõm̦m̦ane? (2) Ewi wãween an bokin Revelesõn maroñ jipañ kõj?

² Riit Hibru 10:35-39. El̦aññe em̦õj am̦ kããlõt ñan rejetak tõl eo an Jeova, alikkar em̦õj am̦ kõm̦m̦ane juon jokãlõt emãlõtlõt. Kiiõ kwõj kijooror in jipañ ro jet ñan aer kõm̦m̦ane jokãlõt eo ejim̦we. Ñan katõprak men in, kwõmaroñ kõjerbal mel̦el̦e ko ilo bokin Revelesõn ñan jipañ er. Bok in me elukkuun em̦m̦an ej kwal̦o̦k ta eo enaaj wal̦o̦k ñan ro rej jum̦aik Jeova, bõtab ej bar kwal̦o̦k kõn jeraam̦m̦an ko me ro rej tiljek ilo aer rejetak tõl eo an renaaj bũki. Jej aikuj katak kõn men kein rem̦ool me raorõk. Ad kõm̦m̦ane men in enaaj kõkajoorl̦o̦k kõn̦aan eo ad ñan karejar wõt ñan Jeova. Bareinwõt, jemaroñ kõjerbal men ko em̦õj ad katak kaki ñan jipañ ro jet kõm̦m̦ane jokãlõt eo ejim̦we im eddãp ñane.

3. Ta ko jenaaj etali ilo katak in?

³ Ilo katak in, jenaaj etale kajjitõk kein: Ta ko repãd im̦aan  ñan ro rej rejetak tõl eo an Anij? Ijo iturãjet, ta eo enaaj wal̦o̦k ñan ro rej kããlõt ñan rejetak menninmour awiia eo ebũrõrõ me bokin Revelesõn ej kwal̦o̦k kake?

4. Kumi ta eo rijjilõk Jon ej lo aer jutak ippãn Jesus ilo lañ?

⁴ Ilo juon pijen, rijjilõk Jon ear lo ruo kumi me rej rejetake tõl eo an Jeova im rej bõk jeraam̦m̦an eo ñan mour ñan indeeo. Kumi eo m̦oktata, oraer ej 144,000. (Rev. 7:4) Kar bõk er jãn lal̦ in ñan ejaake juon kien ak Aelõñ ilo lañ ippãn Jesus. Im rej tõl aolepen lal̦ in ippãn Jesus. (Rev. 5:9, 10; 14:3, 4) Ilo pijen eo, Jon ej loe aer jutak ilo lañ ioon Tol̦ Zaion.​—Rev. 14:1.

5. Ta eo me m̦õttan jidik enaaj wal̦o̦k ñan bween rũkkapit ro ilo lal̦ in?

⁵ Jãn kar iien ko an rijjilõk ro tok ñan rainin, elõñ to̦ujin ro me em̦õj kããlõt er bwe ren uwaan ro me oraer ej 144,000. (Luk 12:32; Rom 8:17) Ijoke, kar jiroñ Jon bwe enaaj wõr wõt juon oran edik me renaaj mour ilo lal̦ in ilo naaj raan ko ãliktata. Rein me rej “bween” rũkkapit ro renaaj bõk “jiil̦” eo aer ãliktata me ej kwal̦o̦k an Jeova buñbũruon ippãer, m̦okta wõt jãn an naaj buñ eñtaan eo el̦ap. (Rev. 7:2, 3; 12:17) Innem ilowaan wõt iien in me enaaj wal̦o̦k eñtaan eo el̦ap, naaj bõk bween rũkkapit rein jãn lal̦ in ñan aer kobal̦o̦k ippãn ro jet uwaan 144,000 ilo lañ me rar tiljek ñan mej. Im ilo ijin, rein renaaj tõl ippãn Jesus ilo Aelõñ eo an Anij.​—Matu 24:31; Rev. 5:9, 10.

6-7. (1) Kumi ta eo juon Jon ear loe, im ta eo jej katak kõn er? (2) Etke bween rũkkapit ro kab ‘jar eo el̦ap’ rej aikuj in itoklimo kõn Revelesõn jebta 7?

⁶ Ãlikin an Jon lo kumi eo me renaaj mour ilañ, ej lo “juon jar el̦ap.” Kumi in eoktakl̦o̦k jãn kumi eo me 144,000 kõnke ejjel̦o̦k emaroñ bwine joñan oraer. (Rev. 7:9, 10) Ta eo jej katak kõn ro ilo kumi in? Kar jiroñl̦o̦k Jon im ba: “Errein ro rar el̦l̦ã jãn eñtaan eo el̦ap, im rar kwal̦i nuknuk ko aer im kõmouji kõn bõtõktõkin L̦aam̦ eo.” (Rev. 7:14) Ãlikin an ro uwaan ‘jar eo el̦ap’ naaj el̦l̦ã im mour jãn eñtaan eo el̦ap, renaaj mour ijin ioon lal̦ im m̦õn̦õn̦õ kõn elõñ jeraam̦m̦an ko rekabwilõñlõñ.​—Sam 37:9-11, 27-29; JK. 2:21, 22; Rev. 7:16, 17.

⁷ Meñe jenaaj uwaan ro em̦õj kããlõt er ñan mour ilañ ak uwaan ro im renaaj mour wõt ijin ioon lal̦, ak jej ke loe kõj make ilo men ko Revelesõn jebta 7 ej kõnono kaki? Jej aikuj. Enaaj juon iien ekanooj kãitoktoklimo ñan aolep ro ilo kumi kein ruo me rej karejar ñan Anij! Jenaaj lukkuun lañlõñ bwe jaar kããlõt ñan rejetake tõl eo an Jeova. Ta ko jet bokin Revelesõn ej kwal̦o̦k ñan kõj kõn eñtaan eo el̦ap?​—Matu 24:21.

8. Ewi wãween an nãj ijjino eñtaan eo el̦ap, im ewi wãween an nãj elõñ armej em̦m̦akũt?

⁸ Ãinwõt an kar kwal̦o̦k kake ilo katak eo l̦o̦k juon, m̦õttan jidik kien ko an lal̦ renaaj ko̦kkure Babil̦on El̦ap, ak doulul in kabuñ ko reriab ipel̦aakin lal̦ in. (Rev. 17:16, 17) Em̦m̦akũt in enaaj jinoin eñtaan eo el̦ap. Men in enaaj ke kõm̦m̦an bwe elõñ ren ibebtok im kããlõt ñan aer kabuñ ñan Jeova? Jaab. Revelesõn jebta 6 ej kwal̦o̦k bwe ilo iien in me ekanooj kauwõtata, ro im rejjab karejar ñan Jeova renaaj kappok kõjparok jãn kien im peejnej ko an lal̦ in me kar keidi er ñan tol̦ ko. Kõnke armej rein reban rejetake Aelõñ eo an Anij, Jeova enaaj watõk er bwe rej ri-jum̦ae.​—Luk 11:23; Rev. 6:15-17.

9. Ewi wãween an naaj lukkuun alikkar an ri-karejar ro retiljek an Jeova oktak ilo naaj eñtaan eo el̦ap, im ta eo enaaj wal̦o̦k itok wõt jãn men in?

 ⁹ Em̦ool men in bwe enaaj lukkuun alikkar an ri-karejar ro retiljek an Jeova oktak jãn ro jet ilo tõre in me enaaj kanooj in pen ilo eñtaan eo el̦ap. Enaaj l̦akkar er wõt ijin ioon lal̦ me rej karejar ñan Jeova Anij im rem̦akoko in rejetake “menninmour eo eawiia.” (Rev. 13:14-17) Aer jutak wõt pen enaaj lukkuun kalluuk ro im rej jum̦aik Jeova. Kõn men in, juon kumi me ej ejaakin elõñ aelõñ ko renaaj jino tõn ko̦kkure aolep armej ro an Anij ipel̦aakin lal̦ in. Kar kanaan kake bwe eñin ej em̦m̦akũt eo an Gog jãn Megog n̦ae armej ro an Anij.​—Ezk. 38:14-16.

10. Ãinwõt an wal̦o̦k ilo Revelesõn 19:19-21, ewi wãween an Jeova naaj em̦m̦akũt kõn aer itõn ko̦kkure armej ro an?

¹⁰ Ewi wãween an Jeova naaj em̦m̦akũt kõn aer itõn ko̦kkure armej ro an? Ej jiroñ kõj im ba: “Aõ illu ebwil enaaj urur.” (Ezk. 38:18, 21-23) Revelesõn jebta 19 ej kwal̦o̦k ta eo tok juon enãj wal̦o̦k. Jeova ej jilkintok Nejin bwe en kõjparok armej ro An im anjo̦ ioon ri-kõjdat ro aer. “Jarin tarin̦ae ko ilañ,” ak enjel̦ ro retiljek ekoba ro uwaan 144,000, renaaj kobal̦o̦k ippãn Jesus ilo tarin̦ae in. (Rev. 17:14; 19:11-15) Enãj ta jem̦l̦o̦kin tarin̦ae in? Naaj to̦o̦rl̦o̦kboke aolep armej ro im doulul ko me rej jum̦aik Jeova!—Riit Revelesõn 19:19-21.

11. Ta iien eo ej make wõt aorõktata ilo bokin Revelesõn?

¹¹ Baj pijaikl̦o̦k m̦õk wãween an nãj ro retiljek ilo lal̦ in eñjake ilo aer nãj el̦l̦ã jãn iien eo naaj ko̦kkure aolep ri-kõjdat ro an Anij! Enaaj juon iien el̦ap an kalañlõñ! Meñe enaaj juon iien lañlõñ el̦ap ilo lañ ñe Babil̦on El̦ap enaaj jeepepl̦o̦k, ak ebar wõr juon men me enaaj bõktok el̦apl̦o̦k lañlõñ. (Rev. 19:1-3) Ej iien eo el̦ap an aorõk ilo bokin Revelesõn—“iien m̦are eo an L̦aam̦ eo.”—Rev. 19:6-9.

12. Ãinwõt an wal̦o̦k ilo Revelesõn 21:1, 2, ñããt eo enaaj jejjet iien m̦are eo an L̦aam̦ eo?

¹² Ñããt eo enaaj jejjet iien m̦are in? Aolep ro uwaan 144,000 renaaj pãd ilañ m̦okta wõt jãn an jino tarin̦ae in Armagedon. Ijoke, ejjab iien eo in me enaaj jejjet iien m̦are eo an L̦aam̦ eo. (Riit Revelesõn 21:1, 2.) Iien m̦are eo an L̦aam̦ eo enaaj bõk jikin ãlikin tarin̦ae in Armagedon ñe enaaj jako aolep ri-kõjdat ro an Anij.​—Sam 45:3, 4, 13-17.

13. Ta eo enaaj wal̦o̦k ilo iien m̦are eo an L̦aam̦ eo?

¹³ Ta eo enaaj wal̦o̦k ilo iien m̦are eo an L̦aam̦ eo? Eokwe, ãinwõt an mourin m̦are kakobaik juon em̦m̦aan im juon kõrã, m̦are in ilo kõkkar ej kakobaik Kiiñ eo Jesus Christ, im “kõrã [eo] ej pojakin m̦are,” ro uwaan 144,000. Iien in el̦ap an aorõk enaaj kajutak juon kien ekããl me enaaj tõl lal̦ in ium̦win 1,000 iiõ ko.​—Rev. 20:6.

14-15. Ta eo Revelesõn jebta 21 ej keidi ro uwaan 144,000 ñane? (Lale pija eo ilo kilin bok in.)

¹⁴ Kiiõ, Revelesõn jebta 21 ej keidi ro uwaan 144,000 ñan juon jikin elukkuun aiboojoj etan “Jerusalem eo Ekããl.” (Rev. 21:2, 9) Kar kalõke ioon 12 dekã ko me rej pedped eo an jikin in im ioer em̦õj je “ãt ko 12 etan rijjilõk ro 12 an L̦aam̦ eo.” Etke men in ear juon men ekãitoktoklimo ñan Jon? Kõnke ear lo etan ilo juon iaan dekã ko. Men in ej juon jeraam̦m̦an ekanooj in l̦ap!—Rev. 21:10-14; Eps. 2:20.

¹⁵ Ejjel̦o̦k bar juon jikin ãinwõt jikin in.  Ial̦leplep eo an jikin in ej kõm̦m̦an jãn gold erreo, kõjãm ko an 12 rej kõm̦m̦an jãn pearl, wõrwõr im pedped ko an reinõknõk kõn dekã ko raorõk—im joñak ko aer relukkuun jejjet im jokkun wõt juon. (Rev. 21:15-21) Meñe ãindein, ak ej wõr wõt men en̦ ejako jãne! Eñin men eo tok juon Jon ej ba: “Iar jab ellolo tampel̦ ie kõnke tampel̦ eo an jikin in ej Jeova Anij, eo Ekajoor Bõtata, im bareinwõt L̦aam̦ eo. Im jikin in ear jab aikuj al̦ im allõñ ñan rome ioon, kõnke aiboojoj eo an Anij ej rome, im kein kameram eo ej L̦aam̦ eo.” (Rev. 21:22, 23) Ro me rej jutak kõn Jerusalem eo Ekããl renaaj pãd ippãn Jeova. (Hib. 7:27; Rev. 22:3, 4) Innem Jeova im Jesus rej tampel̦ eo an jikin in.

16. Ta eo enaaj wal̦o̦k ñan armej ro ium̦win Juon To̦ujin Iiõ ko in an Aelõñ eo an Anij Irooj?

¹⁶ Ej juon men elukkuun kam̦õn̦õn̦õ ñan rũkkapit ro ilo aer l̦õmn̦ak kõn jikin in. Ak ro me kõjatdikdik eo aer ej ñan mour ilo lal̦ in, ebar wõr unin aer itoklimo kõn men in. Ilo naaj ium̦win Juon To̦ujin Iiõ ko in an Aelõñ eo an Anij Irooj, Jerusalem eo Ekããl enaaj bõktok elõñ jeraam̦m̦an ko. Jon ear lo an jeraam̦m̦an kein ibebtok ãinwõt “reba in dãnnin mour.” Im ilo aolep jait ko ruo iturin reba in, “elõñ wõjke in mour” me bwilikeer rej “ñan kãjmour aelõñ ko.” (Rev. 22:1, 2) Kõn men in, aolep armej ro renaaj maroñ bõk tokjãn jãn aolep men kein rem̦m̦an. Im jidik kõn jidik, aolep ro im rej pokake renaaj etal ñan aer lukkuun weeppãn. Enaaj ejjel̦o̦k bar nañinmej, eñtaan, im dãnnin kõmjaal̦al̦in bũrom̦õj.​—Rev. 21:3-5.

17. Ãinwõt an Revelesõn 20:11-13 kaalikkare, wõn ro renaaj bõk tokjãn ilo naaj Juon To̦ujin Iiõ Ko?

¹⁷ Wõn ro renaaj bõk tokjãn jãn aolep men kein rem̦m̦an? M̦okta, jar eo el̦ap me renaaj el̦l̦ã im mour ãlikin Armagedon, ekoba jabdewõt ajri ro me remaroñ naaj l̦otak ilo lal̦ eo ekããl. Ijoke, Revelesõn jebta 20 ej bareinwõt kallim̦ur bwe ro remej renaaj jerkakpeje. (Riit Revelesõn 20:11-13.) Ro “rewãnõk” me retiljek im rar mej ilo iien ko m̦okta, ekoba ro “rejjab wãnõk” me rar jab maroñ katak kõn Jeova, rein aolep renaaj jerkaktok im mour ilo lal̦ in. (Jrb. 24:15; Jon 5:28, 29) Mel̦el̦ein ke bwe aolep renaaj jerkakpeje im mour ilo lal̦ in ium̦win Juon To̦ujin Iiõ Ko? Ejjab. Ro rar jum̦ae im m̦akoko in karejar ñan Jeova m̦okta jãn  aer mej reban jerkak im mour. Ear pel̦l̦o̦k iien ñan er, ak rar kaalikkar an jab tõllo̦kier ñan mour ilo naaj Pedetaij eo ijin ioon lal̦.​—Matu 25:46; 2 Tes. 1:9; Rev. 17:8; 20:15.

18. Ta eo enaaj wal̦o̦k ilo lal̦ in ilo naaj jem̦l̦o̦kin 1,000 iiõ ko?

¹⁸ Ilo naaj jem̦l̦o̦kin 1,000 iiõ ko, aolep ro rej mour ilo lal̦ in renaaj weeppãn. Jerawiwi eo me jaar jolõte jãn Adam eban bar jelõt jabdewõt armej. (Rom 5:12) Jorrããn in elukkuun nana me jaar bõke jãn Adam enaaj lukkuun jako. Ilo wãween in, ro ilo lal̦ in renaaj “mour” ãinwõt ro reweeppãn ilo jem̦l̦o̦kin 1,000 iiõ ko.​—Rev. 20:5.

19. Etke enaaj aikuj wõr juon iien mãlejjoñ ãliktata?

¹⁹ Jejel̦ã bwe meñe Setan ekar kajjioñ kate ñan kõm̦m̦an bwe Jesus en jol̦o̦k an tiljek ñan Anij, ak Jesus ear dãpij wõt an tiljek. Ak ta kõn aolep armej ro me renaaj weeppãn, ren ke m̦õn̦õn̦õ in kõm̦m̦ane ejja wãween in wõt ñe enaaj pel̦l̦o̦k iien ñan an Setan mãlejjoñe er? Eokwe kajjojo armej enaaj make uwaake kajjitõk in ñe naaj karõl̦o̦k Setan jãn abyss eo ilo jem̦l̦o̦kin 1,000 iiõ ko. (Rev. 20:7) Ro renaaj kwal̦o̦k aer tiljek ilo naaj mãlejjoñ in ãliktata renaaj bõk mour indeeo, im renaaj kiiõ m̦õn̦õn̦õ ilo aer lukkuun m̦oolin anemkwõj. (Rom 8:21) Ro rej jum̦ae, naaj ko̦kkure er bwe ren jako ñan indeeo ippãn Tepil̦ eo im tim̦on̦ ro an.​—Rev. 20:8-10.

20. Ta eñjake eo am̦ kõn kanaan kein rekãitoktoklimo ilo bokin Revelesõn?

²⁰ Ta eñjake eo am̦ ãlikin am̦ kar etale ilo tukadu jet iaan men ko ilo bokin Revelesõn? Ejjab ke kãitoktoklimo ñan pijaikl̦o̦k eok make ilo an jejjet kũtien kanaan kein rekabwilõñlõñ? Ekõm̦m̦an ke am̦ kõn̦aan kũrtok ro jet ñan kobatok im kabuñ ilo wãween eo erreo ñan Anij eo ad? (Rev. 22:17) Kiiõ ke em̦õj ad etali men kein me renaaj wal̦o̦k ilo raan ko repãd im̦aan, men in el̦ap an lujur im kõm̦akũt kõj ñan kwal̦o̦k ejja naan ko wõt rijjilõk Jon ear kwal̦o̦ki ke ear ba: “Amen! Kwõn itok Irooj Jesus.”—Rev. 22:20.