1-2. Wõn ro remaroñ jipañ juon rũkkatak Baibõl̦ ñan kõm̦m̦an wõnm̦aanl̦o̦k ko im peptaij?

AMY, eo im ej jokwe ilo Fiji, ej ba: “Ear lukkuun em̦m̦an ippa men ko iar katak kaki ilo iien aõ katak Baibõl̦. Iar jel̦ã bwe eñin ej m̦ool eo. Bõtab ãlikin wõt aõ kar jino kobal̦o̦k ippãn ro jeid im jatid, ij kab tõn lukkuun kõm̦m̦an oktak ko im kõm̦m̦an wõnm̦aanl̦o̦k ñan peptaij.” Bwebwenato in an Amy ej kwal̦o̦k kõn juon men eaorõk im em̦ool, eñin bwe: Ekkã an em̦m̦an an juon rũkkatak Baibõl̦ kõm̦m̦an wõnm̦aanl̦o̦k ko ñe ej bõk jipañ jãn ro jet ilo eklejia eo.

² Kajjojo ri-kwal̦o̦k naan ro remaroñ jipañ ro rekããl bwe ren erom ro uwaan eklejia eo. (Eps. 4:16) Juon bainier etan Leilani, eo im ej jokwe ilo Vanuatu, ej ba: “Ewõr juon jabõn kõnnaan ej ba: Ej juon menin aikuj bwe aolep ro ilo juon bukwõn ren jipañ doon kõkkaajiririik juon ajri. Il̦ak lale, men in ej bar m̦ool ñe ej itok ñan jerbalin kõm̦m̦an ri-kal̦oor; ekkã an aolep ro ilo eklejia eo aikuj jipañ ko an doon ñan bõktok juon armej ñan m̦ool eo.” Innem, juon ajri ej aikuji rũtto ro jemãn im jinen, ro jet nukũer, ro rej m̦õttãik baam̦le eo an, im ri-kaki ro ilo jikuul̦, ñan jipañe bwe en rũttol̦o̦k. Rej kõm̦m̦ane men in ikijjeen aer rõjañ ajri eo im katakini men ko raorõk. Ãindeinl̦o̦k wõt, ri-kwal̦o̦k naan ro remaroñ lel̦o̦k naanin jipañ, rõjañ, im likũt juon joñak em̦m̦an ñan rũkkatak Baibõl̦ ro, bwe ren maroñ jipañ er ñan kõm̦m̦an wõnm̦aanl̦o̦k ko im peptaij.​—JK. 15:22.

3. Ta eo kwõj katak jãn naan ko an Ana, Dorin, im Leilani?

³ Etke ri-katakin eo ej aikuj m̦õn̦õn̦õ ñe ri-kwal̦o̦k naan ro jet rej jipañ rũkkatak Baibõl̦ eo an? L̦õmn̦ak kõn naan ko an juon jipejel̦ bainier ilo Moldova etan Ana, ej ba, “Elukkuun pen ñan an  juon armej make kajejjete aolep aikuj ko an juon rũkkatak Baibõl̦ ilo iien eo ej jino kõm̦m̦an wõnm̦aanl̦o̦k ko.” Dorin, juon jipejel̦ bainier me ej bar jokwe ilo ejja aelõñ in wõt, ej ba, “Elõñ iien ko ri-kwal̦o̦k naan ro jet rej ba juon men me ej tõpar bũruon rũkkatak eo, juon men iban kar l̦õmn̦ake.” Leilani ej bar kwal̦o̦k juon un ke ej ba, “Ilo an ro jet kwal̦o̦k yokwe im aer kea kõn rũkkatak eo, men in enaaj jipañe ñan kile wõn ro rej armej ro an Jeova.”​—Jon 13:35.

4. Ta ko jenaaj etali ilo katak in?

⁴ Bõtab, kwõmaroñ l̦õmn̦ak, ‘Ewi wãween aõ maroñ jipañ juon rũkkatak Baibõl̦ ñan kõm̦m̦an wõnm̦aanl̦o̦k ko ñe ejjab ña eo ij katak ippãn?’ Jen lale ta eo jemaroñ kõm̦m̦ane ñe juon ej kũr kõj ñan kobal̦o̦k ippãer ilo iien aer katak Baibõl̦ ippãn juon, im ta ko jemaroñ kõm̦m̦ani ñe rũkkatak Baibõl̦ eo ej jino itok ñan iien kweilo̦k ko. Jenaaj bareinwõt lale ewi wãween an em̦m̦aan ro rej lale eklejia maroñ jipañ rũkkatak Baibõl̦ ro ñan kõm̦m̦an wõnm̦aanl̦o̦k ko im peptaij.

5. Ta ijo kun̦aam̦ ñe juon ej kũr eok ñan kobal̦o̦k ilo iien an katak Baibõl̦ ippãn juon?

⁵ Ilo iien an juon katak Baibõl̦, ej an ri-katakin eo eddo ñan jipañ rũkkatak eo mel̦el̦e Naanin Anij. El̦aññe ri-katakin eo ej kũr eok ñan kobal̦o̦k ippãn, kwõj aikuj watõk eok make ãinwõt rijjipañ eo an. Ijo kun̦aam̦ ej ñan jipañe. (Ekl. 4:9, 10, UBS) Bõtab ta eo kwõmaroñ kõm̦m̦ane ñan jipañ bwe en l̦ap tõprak ilo iien katak Baibõl̦ eo?

6. Ñe kwõj itõn kobal̦o̦k ilo iien eo juon ej katak Baibõl̦, ewi wãween am̦ maroñ l̦oore naanin kakapilõk eo ilo Jabõn Kõnnaan 20:18?

⁶ Kõppojakl̦o̦k im̦aan ñan iien katak eo. M̦okta, kajjitõk ippãn eo ej katakin bwe en kwal̦o̦k jidik kõn rũkkatak eo an. (Riit Jabõn Kõnnaan 20:18, UBS.) Kwõmaroñ kajjitõk: “Ta men ko kwõjel̦ã kõn rũkkatak Baibõl̦ eo? Ta eo kwõnaaj katak kake ippãn? Ta ko kokõn̦aan bwe rũkkatak eo en katak jãn men in? Ewõr ke men en̦ ij aikuj kõm̦m̦ane ak jab kõm̦m̦ane ak ba ilo iien ad katak? Ta ko remaroñ jipañ rũkkatak eo ñan kõm̦m̦an wõnm̦aanl̦o̦k?” Ejjel̦o̦k pere bwe ri-katakin eo eban kõnono kõn men ko me ejjab tõllo̦kũn an ro jet jel̦ã kaki, bõtab men ko ej kwal̦o̦ki remaroñ jipañ. Eñin ej men ko juon mijinede etan Joy ej kõnono kaki ippãn ro rej kobal̦o̦k ippãn ilo iien an katak Baibõl̦ ippãn rũkkatak ro an. Ej ba: “Ad kõnono kõn men kein ej jipañ eo m̦õtta bwe en itoklimo kõn rũkkatak eo im ñan jel̦ã ewi wãween an maroñ jipañ ilo iien ad katak.”

7. Etke kwõj aikuj kõppojakl̦o̦k im̦aan ñe kwõnaaj kobal̦o̦k ilo iien an juon katak Baibõl̦?

⁷ El̦aññe juon ej kajjitõk ippam̦ ñan kobal̦o̦k ilo iien an katak Baibõl̦ ippãn juon, enaaj juon men em̦m̦an ñe kwõmaroñ kõpooje katak eo kom̦ naaj etale. (Ezra 7:10) Dorin, em̦m̦aan eo jeid im jatid me kar kwal̦o̦k kake m̦oktal̦o̦k, ej ba: “El̦ap aõ kam̦m̦oolol ñe eo m̦õtta ej  kõppojakl̦o̦k im̦aan ñan katak eo. Ilo an ãindein, emaroñ l̦ap tokjãn naanin kakkobaba ko an.” Bareinwõt, rũkkatak eo emaroñ kile bwe em̦m̦an amiro kar jim̦or kõppojakl̦o̦k im̦aan, im men in enaaj juon joñak em̦m̦an ñan e. Meñe kwõjjab maroñ lukkuun kõpooje katak eo, ak em̦m̦an ñe kwõj kõm̦m̦an jidik iien ñan lale ta boin ko rel̦l̦ap ilo katak eo.

8. Ewi wãween am̦ maroñ lale bwe en jejjet im l̦ap mel̦el̦ein jar eo am̦ ilo juon iien katak Baibõl̦?

⁸ Jar ej m̦õttan juon iaan men ko raorõk ilo iien katak Baibõl̦, kõn men in l̦õmn̦ak kõn ta ko kwõnaaj ba ñe kar kajjitõk ippam̦ bwe kwõn jar. Ilo am̦ ãindein, enaaj jejjet im l̦ap mel̦el̦ein jar eo am̦ ñan rũkkatak eo. (Sam 141:2) Hanae, eo ej jokwe ilo Japan, ej keememej wõt jar ko an juon jeid im jatid kõrã me ear kobal̦o̦k ippãn eo ear katakini ilo iien ko ej katak Baibõl̦. Ej ba: “Iar kile an lukkuun epaak jem̦jerã eo an ippãn Jeova, im iar kõn̦aan bwe in ãinwõt e. Iar bareinwõt eñjake an yokwe eõ ke ear kitibuj eta ilo jar ko an.”

9. Ekkar ñan Jemes 1:19, ta ko kwõmaroñ kõm̦m̦ani bwe kwõn juon eo el̦ap an jipañ ri-katakin eo ilo iien an katak Baibõl̦ ippãn juon?

⁹ Jipañ ri-katakin eo ilo iien katak eo. Omamuyovbi, juon jipejel̦ bainier ilo Nigeria, ej ba: “Eo m̦õttam̦ me el̦ap an jipañ, enaaj lukkuun roñjake ilo iien katak eo. Ej kwal̦o̦k kakkobaba ko el̦ap aer jipañ, bõtab ejjab l̦e jãn joñan an kõnnaan kõnke ej kile bwe ej kun̦aan ri-katakin eo ñan tõle katak eo.” Ewi wãween am̦ maroñ jel̦ã ñããt eo kwõmaroñ kwal̦o̦k kakkobaba im kilen am̦ kõm̦m̦ane men in ilo iien katak eo? (JK. 25:11) Lukkuun roñjake an ri-katakin eo im rũkkatak eo kõnnaan. (Riit Jemes 1:19.) Eñin wãween eo wõt kwõnaaj maroñ pojakin jipañ ilo iien eo ekkar. Bõtab, alikkar bwe kwõj aikuj kwal̦o̦k lol̦o̦kjen̦. Ñan waanjoñak, kwoban kõn̦aan bwe en l̦e jãn joñan am̦ kõnnaan, kwoban kabõjrake ri-katakin eo ilo iien eo ej kõmel̦el̦eik juon men, ak jino kõnnaan kõn bar juon men eoktak jãn katak eo. Ijoke, ilo am̦ kwal̦o̦k juon boin ilo tukadu, juon waanjoñak, ak juon kajjitõk, kwõnaaj maroñ jipañ kaalikkarl̦o̦k boin eo me rej kõnono kake. Ewõr iien, kwõmaroñ l̦õmn̦ak bwe kwõjjab maroñ lukkuun kakkobaba ilo iien katak eo. Bõtab el̦aññe kwõnaaj nõbare rũkkatak eo im kwal̦o̦k am̦ itoklimo kake e, men in enaaj l̦ap an jipañe bwe en kõm̦m̦an wõnm̦aanl̦o̦k ko.

10. Ewi wãween an bwebwenato eo am̦ kõn wãween ko kwaar iiooni maroñ jipañ juon rũkkatak Baibõl̦?

¹⁰ Kwal̦o̦k kõn jet wãween ko kwaar iiooni ilo mour eo am̦. El̦aññe ekkar, kwõmaroñ kwal̦o̦k ñan rũkkatak eo ilo tukadu kõn wãween am̦ kar jel̦ã kõn m̦ool eo, wãween am̦ kar anjo̦ ioon juon wãween epen, ak wãween am̦ kar lo an Jeova jipañ eok ilo mour eo am̦. (Sam 78:4, 7) Bwebwenato in am̦ emaroñ men eo me rũkkatak eo ej aikuji. Emaroñ kõkajoore tõmak eo an ak kõm̦akũti ñan kõm̦m̦an wõnm̦aanl̦o̦k ko bwe en maroñ peptaij. Im emaroñ jipañe ñan jel̦ã kilen anjo̦ ioon juon apañ me ej jelm̦aiki. (1 Pit.  5:9) Gabriel, eo ej jokwe ilo Brazil im ej kiiõ jerbal ãinwõt juon bainier, ej ememejtok men ko rar jipañe ilo iien eo ear katak Baibõl̦. Ej ba: “Ke iar roñ bwebwenato ko an ro jeid im jatid, iar katak bwe Jeova ej loi wãween ko reppen jej jelm̦aiki. Im el̦aññe rein rar maroñ anjo̦ ioon apañ ko aer, innem ña bareinwõt imaroñ kõm̦m̦ane men in.”

11-12. Etke jej aikuj in lukkuun karwaineneik juon rũkkatak Baibõl̦ me ej itok ñan iien kweilo̦k ko?

¹¹ Bwe juon rũkkatak Baibõl̦ en maroñ kõm̦m̦an wõnm̦aanl̦o̦k ko im peptaij, ej aikuj in niknik ilo an etal ñan iien kweilo̦k ko an eklejia im bõk tokjãn jãni. (Hib. 10:24, 25) Ejjel̦o̦k pere bwe ri-katakin eo enaaj kũrtok e ñan kweilo̦k eo an kein kajuon. Ñe ej kobatok, kõj aolep jemaroñ rõjañe bwe en wõnm̦aanl̦o̦k wõt im itok ñan Im̦õn Kweilo̦k eo. Ewi wãween ad maroñ kõm̦m̦ane men in?

¹² Lukkuun karwaineneik rũkkatak eo. (Rom 15:7) El̦aññe rũkkatak eo ej eñjake an ruwainene ilo iien kweilo̦k ko, emaroñ naaj kõn̦aan wõnm̦aanl̦o̦k wõt im itok ñan Im̦õn Kweilo̦k eo. Ilo juon wãween me ejjab kõm̦m̦an an jook, kwõmaroñ yokyokwe rũkkatak eo, im kwal̦o̦k kajjien ñan ro jet. Jab kajju l̦õmn̦ak bwe ri-katakin eo ej loloodjake e, kõnke bõlen ej itok wõt ak emaroñ wõr eddo ko ej kõm̦m̦ani. Lukkuun roñjake ta ko rũkkatak eo ej ba, im kwal̦o̦k am̦ itoklimo kõn e. Ta tokjãn ko remaroñ wal̦o̦k itok jãn am̦ lukkuun kwal̦o̦k karwainene? L̦õmn̦ak kõn bwebwenato in an Dmitrii, eo ej kab peptaij jejjo iiõ ko remootl̦o̦k im ej kiiõ jerbal ãinwõt juon rijjipañ ilo eklejia eo. Ke ej ememejtok iien eo jinointata in an kar etal im kweilo̦k, ej ba: “Juon jeid im jatid em̦m̦aan ear lo aõ ikkũm̦kũm̦ ke ij kõttar inabõjin Im̦õn Kweilo̦k eo im ilo jouj ear ãñinl̦o̦k eõ ñan ilowaan Im̦õn Kweilo̦k eo. Elõñ rar itok im yokyokwe eõ. Iar lukkuun bwilõñ. Joñan an kar lukkuun em̦m̦an ippa, iar kõn̦aan bwe en wõr kweilo̦k aolep raan. Iar eñjake juon men me ijjañin kar iioone ilo jabdewõt jikin.”

13. Ewi wãween an kõm̦m̦an ko am̦ maroñ jelõt juon rũkkatak Baibõl̦?

¹³ Likũt juon joñak em̦m̦an. Kõm̦m̦an ko am̦ remaroñ jipañ rũkkatak Baibõl̦ eo ñan kile bwe em̦õj an lo m̦ool eo. (Matu 5:16) Vitalii, eo me ej kiiõ jerbal ãinwõt juon bainier ilo Moldova, ej ba: “Iar lo wãween an ro ilo eklejia eo mour, l̦õmn̦ak, im kõm̦m̦an. Men in ear kam̦ool ñan eõ bwe Ri-Kõnnaan ro an Jeova rej lukkuun m̦ool ilo aer etetal ippãn Anij.”

14. Ewi wãween an joñak eo am̦ maroñ jipañ juon bwe en kõm̦m̦an wõt wõnm̦aanl̦o̦k ko?

¹⁴ Ñan an juon rũkkatak maroñ peptaij, ej aikuj m̦okta jerbali men ko ej katak kaki. Ejjab aolep iien enaaj pidodo ñan kõm̦m̦ane men in. Bõtab, ñe rũkkatak eo ej lo wãween am̦ bõk tokjãn jãn am̦ jerbali naanin kakapilõk ko jãn Baibõl̦, men in emaroñ kõm̦akũti ñan  kõn̦aan anõke eok. (1 Kor. 11:1) L̦õmn̦ak kõn bwebwenato eo an Hanae, eo kar kwal̦o̦k kake m̦oktal̦o̦k. Ej ba: “Ro jeid im jatid rar juon waanjoñak kõn ro me rar jerbali men ko iar katak kaki. Iar lo wãween aõ maroñ kõketak ro jet im jel̦ã jeorl̦o̦k bõd im wãween aõ maroñ kwal̦o̦k yokwe. Aolep iien em̦m̦an men ko rej kõnono kaki kõn ro jet. Iar kõn̦aan anõke er.”

15. Ewi wãween an Jabõn Kõnnaan 27:17 jipañ kõj ñan kile etke jej aikuj m̦õttãik juon rũkkatak Baibõl̦ me ej wõnm̦aanl̦o̦k wõt im itok ñan iien kweilo̦k ko?

¹⁵ M̦õttãik rũkkatak eo. Ilo an rũkkatak eo itok wõt ñan iien kweilo̦k ko, wõnm̦aanl̦o̦k wõt im kwal̦o̦k am̦ itoklimo kõn e. (Pil. 2:4) Etke kwõjjab bwebwenato ippãn? Kwõmaroñ nõbare kõn jabdewõt oktak ko rem̦m̦an em̦õj an kõm̦m̦ani ilo mour eo an im kajjitõk ippãn kõn ejet an katak Baibõl̦, kõn baam̦le eo an, im kõn jerbal eo an. Bõtab, kõjparok ñan jab kajjitõk kõn men ko ejekkar ad jel̦ã kaki. Iien kein komiro ej bwebwenato ippãn doon, remaroñ kõm̦m̦an bwe komiro en epaakel̦o̦k doon. Ilo am̦ m̦õttãik rũkkatak eo, kwõj jipañe ñan kõm̦m̦an wõnm̦aanl̦o̦k ko ñan an peptaij. (Riit Jabõn Kõnnaan 27:17.) Hanae ej kiiõ jerbal ãinwõt juon rekũl̦ar bainier. Ilo an keememejtok jinoin an kar etal ñan iien kweilo̦k ko, ej ba: “Ke iar jino m̦õttãik ro ilo eklejia eo, iar jino kijooror in etal ñan iien kweilo̦k ko, im joñan iar etal wõt im kweilo̦k jekdo̦o̦n ñe iar m̦õk. Elukkuun em̦m̦an aõ kar kobal̦o̦k ippãn rein m̦õtta rekããl, im men in ear jipañ eõ ñan jol̦o̦k aõ m̦õttãik ro rejjab karejar ñan Jeova. Iar kõn̦aan epaakel̦o̦k Jeova im ro jeid im jatid. Kõn men in, iar pepe ñan peptaij.”

16. Bar ta ko jet kwõmaroñ kõm̦m̦ani ñan jipañ juon rũkkatak Baibõl̦ ñan eñjake bwe ej m̦õttan eklejia eo?

¹⁶ Ilo an rũkkatak eo wõnm̦aanl̦o̦k wõt im kõm̦m̦an oktak ko, jipañe ñan eñjake bwe ej m̦õttan eklejia eo. Kwõmaroñ kõm̦m̦ane men in ilo am̦ kwal̦o̦k karwainene ñane. (Hib. 13:2) Denis, eo ej jerbal ilo Moldova, ej reilikl̦o̦k ñan iien ko ear juon rũkkatak Baibõl̦, ej ba: “Ewõr iien kar kũr eõ im lio ippa bwe kõm̦ro en kobal̦o̦k ippãn ro jeid im jatid. Kõm̦ro ear roñ kõn wãween aer kar lo an Jeova jipañ er. Im men in ear kõketak kõm̦ro. Iien kein, rar jipañ kõm̦ro ñan lukkuun lo bwe kõm̦ro kõn̦aan karejar ñan Jeova im bwe ewõr juon mour em̦m̦an ej kõttare kõm̦ro.” Ñe rũkkatak Baibõl̦ eo ej erom juon ri-kwal̦o̦k naan, kwõmaroñ bar kũri bwe en jerbal ippam̦ ilo jerbalin kwal̦o̦k naan. Diego, juon ri-kwal̦o̦k naan jãn Brazil, ej ba: “Elõñ iaan ro jeid im jatid rar kũr eõ ñan jerbal ippãer ilo kwal̦o̦k naan. Eñin kar wãween eo em̦m̦antata ñan aõ jel̦ãl̦o̦k kajjier. Ilo aõ kar ãindein, elukkuun lõñ men ko iar katak, im iar eñjake aõ epaakel̦o̦k Jeova im Jesus.”

17. Ewi wãween an em̦m̦aan ro rej lale eklejia maroñ jipañ rũkkatak Baibõl̦ ro?

¹⁷ Kõm̦m̦an iien ñan rũkkatak Baibõl̦ ro. Em̦m̦aan ro rej lale eklejia, ami kwal̦o̦k yokwe im itoklimo kõn rũkkatak ro, emaroñ jipañ er ñan  kõm̦m̦an wõnm̦aanl̦o̦k ko im peptaij. Kwõmaroñ ke keini am̦ bwebwenato ippãn rũkkatak Baibõl̦ ro ilo iien kweilo̦k ko? Renaaj eñjake am̦ itoklimo kake er ñe kwõj keememej etaer, el̦aptata ñe rej jino bõk kun̦aaer im uwaak. Kwõmaroñ ke kõm̦m̦an ukoktak ilo jikejuul̦ eo am̦ jãn iien ñan iien bwe kwõn maroñ etal ippãn juon ri-kwal̦o̦k naan ñe ej itõn katak Baibõl̦ ippãn juon? Emaroñ lukkuun l̦ap am̦ jipañ rũkkatak eo jãn joñan eo kwõj kõtmãne. Juon jeid im jatid etan Jackie, eo ej jokwe ilo Nigeria, ej ba: “Elõñ iaan rũkkatak ro aõ rej bwilõñ ñe rej jel̦ã bwe em̦m̦aan eo ear itok ippatok ñan iien aer katak Baibõl̦ ej juon em̦m̦aan ej lale eklejia. Juon rũkkatak Baibõl̦ ear ba: ‘Ri-tõlin kabuñ eo aõ elukkuun ban kõm̦m̦ane men in. Ej lol̦o̦k wõt ro rem̦weiie im ñe renaaj kõl̦l̦ãiki!’” Rũkkatak in ej kiiõ etal ñan iien kweilo̦k ko.

18. Ewi wãween an em̦m̦aan ro rej lale eklejia maroñ kajejjete eddo eo kar lel̦o̦k ñan er me ej pãd ilo Jerbal 20:28?

¹⁸ Kammineneik im kõketak ro rej katakin kõn Baibõl̦. Em̦m̦aan ro rej lale eklejia, epãd eddo eo ippam̦ ñan jipañ ri-kwal̦o̦k naan ro bwe ren kate er ñan lo tõprak ilo aer kwal̦o̦k naan im katakin. (Riit Jerbal 20:28.) Ñe juon ej ikkũm̦kũm̦ in tõl ilo iien katak eo ilo iien eo kwõj pãd, kwõmaroñ ba bwe kwõmaroñ tõl. Jackie, eo kar kwal̦o̦k kõn naan ko an m̦oktal̦o̦k, ej ba: “Ekkã an em̦m̦aan ro rej lale eklejia kajjitõk ippa kõn rũkkatak Baibõl̦ ro aõ. Ñe ej wõr men en̦ epen ij iioone ilo aõ katak Baibõl̦ ippãn juon, rej letok naanin jipañ ko.” Elõñ men ko em̦m̦aan ro rej lale eklejia remaroñ kõm̦m̦ani ñan kõketak im ñan kõkajoor ri-katakin ro bwe ren wõnm̦aanl̦o̦k wõt im kate er. (1 Tes. 5:11) Jackie ej wõnm̦aanl̦o̦k wõt im ba: “Em̦m̦an ippa ñe em̦m̦aan ro rej lale eklejia rej kõketak eõ im ba bwe el̦ap aer kam̦m̦oolol eõ kõn jerbal ko aõ rel̦l̦ap. Naan rot kein rej kõm̦m̦an an em̦m̦an aõ mour, ãinwõt juon kab in aebõj m̦õl̦o me ej kaim̦õl̦ol̦o ilo juon raan ebwil. Naan kein aer el̦ap aer kõkajoor eõ im kõm̦m̦an bwe en l̦apl̦o̦k aõ lañlõñ ilo aõ katakin ro jet kõn Baibõl̦.”—JK. 25:25.

19. Kain lañlõñ rot eo emaroñ wõr ippãd aolep?

¹⁹ Meñe jet iaad ejjel̦o̦k an rũkkatak Baibõl̦ ilo tõre in, ak ej wõr wõt ad maroñ ñan jipañ juon ñan kõm̦m̦an wõnm̦aanl̦o̦k ko im peptaij. Ijello̦kun an l̦ap ad kõnnaan, jemaroñ jipañ ri-katakin eo ilo iien katak eo ikijjeen ad kwal̦o̦k kakkobaba ko jaar kõpoojel̦o̦k im̦aan. Jemaroñ jipañ rũkkatak ro ñe rej itok ñan Im̦õn Kweilo̦k eo, im jemaroñ ro me rej kõm̦m̦an joñak em̦m̦an ñan er. Im em̦m̦aan ro rej lale eklejia remaroñ kõketak rũkkatak ro ilo aer kõm̦m̦an iien ippãer, im bar kõketak ri-katakin ro ilo aer katakin im nõbar er. Ñe jej l̦õmn̦ak kake, ewõr ke bar juon men el̦apl̦o̦k an kalañlõñ jãn ad jel̦ã bwe jaar maroñ bõk kun̦aad meñe ilo juon wãween edik, ñan jipañ juon ñan yokwe im karejar ñan eo Jemãdwõj, Jeova?