Jet ro me rar ekkaiuriur ilo aer riiti bwebwenato in rar kõl̦mãnl̦o̦kjen̦ kake men in. Bõtab ilo m̦ool, ewõr ruo em̦m̦aan ilo bwebwenato in me rej jim̦or bõk ãt in, im ewõr men ko jemaroñ ekkatak jãn ad etale ta ko rar wal̦o̦k.

Saul, kiiñ eo an Israel, ear wõr jiljilimjuon nejin l̦addik im ruo nejin leddik. M̦aanje eo nejin Saul kar etan in Jonetan. Tokãlik ekar bar wõr juon nejin kiiñ in l̦addik etan Mipiboshet ippãn juon iaan kõrã ro pãleen etan Rizpa. Im ear bareinwõt wõr juon nejin Jonetan l̦addik etan Mipiboshet. Innem mel̦el̦ein bwe ear wõr nejin im jibwin Kiiñ Saul l̦addik me erro jim̦or kar bõk ãt in Mipiboshet.

Juon iien, Kiiñ Saul ear dike an ri-Gibeon ro jokwe ibwiljin ri-Israel ro im ear kajjioñ m̦an er aolep. Ilo m̦ool, emaroñ kar m̦õj aer m̦an elõñ iaaer. Men in ekar juon men ebõd. Etke? Kõnke ilo kar tõre ko an Joshua, ri-tõl ro an Israel rar kõm̦m̦an bujen ippãn ri-Gibeon ro bwe en wõr aenõm̦m̦an ikõtaer.​—Jos. 9:3-27.

Ear jerbal wõt bujen in tok ñan tõre ko an Kiiñ Saul. Meñe ekar wõr aer bujen ippãn doon, ak kiiñ eo ear kajjioñ m̦ane aolepen ri-Gibeon ro. Men in ear kõm̦m̦an bwe “Saul im nukũn eo an [ren] jerawiwi kõn aer kar uror” ak en wõr rueer kõn kato̦o̦rl̦o̦k bõtõktõk. (2 Sa. 21:1, UBS) Tokãlik, Devid ear erom kiiñ. Ri-Gibeon ro me rar mour wõt rar kõnono ippãn Devid kõn bõd in el̦ap me ear wal̦o̦k. Devid ear kajjitõk ippãer kõn ta eo emaroñ kõm̦m̦ane ñan kõllaajrak ak n̦aon̦ããn bõd eo el̦ap me Saul ear kõm̦m̦ane im bwe men in en kõpel̦l̦o̦k juon ial̦ ñan an Jeova kõjeraam̦m̦ane ãneo. Ijello̦kun an ri-Gibeon ro kajjitõk kõn jããn, rar kajjitõk bwe en lel̦o̦k jiljilimjuon iaan em̦m̦aan ro nejin em̦m̦aan eo me “ear pepe n̦ae” er im bwe ren m̦an er ñan mej. (Bõn. 35:30, 31, UBS) Devid ear kõm̦m̦ane men eo rar kajjitõk kake.​—2 Sa. 21:2-6.

Ilo kar tõre in, Saul im Jonetan rar mej ilo tarin̦ae, bõtab l̦eo nejin Jonetan etan Mipiboshet ear mour wõt. Ear wõr utam̦we ilo ãnbwinnin jãn ke ear dik jãn juon ãkjitõn, innem ear jab bõk kun̦aan ilo pepe eo an jim̦m̦aan ñan kajjioñ m̦ane ri-Gibeon ro. Devid ear kõm̦m̦an kallim̦ur ippãn Jonetan bwe ren jem̦jerãik doon, im ro ineen Jonetan rar bõk tokjãn jãn men in, ekoba l̦eo nejin etan Mipiboshet. (1 Sa. 18:1; 20:42) Baibõl̦ ej ba: ‘Kiiñ Devid ear kõjparok Mipiboshet, nejin Jonetan, nejin Saul, kõnke kallim̦ur an Jeova ej ikõtaerro.’​—2 Sa. 21:7.

Meñe ãindein, ak Devid ear katõprak kajjitõk eo an ri-Gibeon ro. Ear lel̦o̦k ruo iaan l̦õm̦aro nejin Saul, juon iaaer kar etan in Mipiboshet, ekoba l̦alem iaan l̦õm̦aro jibwin Saul. (2 Sa. 21:8, 9) Men eo Devid ear kõm̦m̦ane ear kõm̦m̦an bwe en jako an wõr rueer kõn kato̦o̦rl̦o̦k bõtõktõk.

Men in ejjab baj juon bwebwenato me ear wal̦o̦k. Kien eo an Anij ear lukkuun alikkar. Ear ba: “En jab mej ro nejier kõn ro jemãer.” (Dut. 24:16) Jeova eban kar kõtl̦o̦k an wal̦o̦k men ko kar kõm̦m̦ani ñan l̦õm̦aro ruo nejin Saul im l̦õm̦aro l̦alem jibwin el̦aññe en kar ejjel̦o̦k rueer. Kien in ear bareinwõt ba: “Ren m̦an jabdewõt armej kõn jerawiwi eo an.” L̦õm̦arein jiljilimjuon ineen Saul me rar mej remaroñ kar bõk kun̦aaer ilo pepe eo an Saul ñan kajjioñ m̦an aolep ri-Gibeon ro. Eñin unin, l̦õm̦arein jiljilimjuon rar n̦aon̦ããn ak uwaak kõn bõd ko aer.

Bwebwenato in ej kwal̦o̦k bwe juon ejjab maroñ jekpen kõn juon bõd ear kõm̦m̦ane ilo an l̦õmn̦ak ak ba bwe ear baj l̦oor wõt naanin tõl. Juon jabõn kõnnaan em̦m̦an ej ba: “Kwõn kanooj lale ial̦an neem̦, innem ial̦ ko am̦ otemjej renaaj jim̦we.”​—JK. 4:24-27; Eps. 5:15.