Etke em̦m̦aan eo me Baibõl̦ ej ãñinñini “L̦eiõ” ear ba bwe naaj “ko̦kkure” l̦ãm̦oran eo an ñe enaaj m̦areik Rut? (Rut 4:1, 6)

Ilo tõre ko ilo Baibõl̦, el̦aññe juon em̦m̦aan me em̦õj an m̦are ear mej ak ejjel̦o̦k nejin, ewõr jet men ko kar aikuj etali, ãinwõt: Ta eo enaaj wal̦o̦k ñan bwidej eo an? Enaaj ke bõjrak l̦ain in baam̦le eo an ñan indeeo? Kien Moses ear uwaake kajjitõk kein.

Ta eo enaaj wal̦o̦k ñan bwidej eo an juon em̦m̦aan emej ak juon eo ear oktak im jeram̦õl im wiakake bwidej eo an? Juon jein ak jatin, ak juon nukũn me epaak kadkad eo an ñane, emaroñ bar wiaiki bwidej eo. Ilo an ãindein, ej kõm̦m̦an bwe bwidej eo en pãdwõt ilo etan baam̦le eo.​—Liv. 25:23-28; Bõn. 27:8-11.

Ewi wãween kar kowõnm̦aanl̦o̦k l̦ain in baam̦le eo an em̦m̦aan eo emej? Ikijjeen an kõrã eo me kar pãleen m̦areiki juon iaan l̦õm̦aro jein ak jatin l̦eo; eñin kar wãween eo ippãn Rut. Kõrã in enaaj m̦areiki l̦eo jein ak jatin l̦eo ippãn me emej bwe erro en neji, im ajri eo enaaj kowõnm̦aanl̦o̦k etan l̦eo emej im jolõte bwidej eo an. Karõk in em̦m̦an ear bar juon wãween ñan lale im kõjparok kõrã eo emej l̦eo pãleen.​—Dut. 25:5-7, UBS; Matu 22:23-28.

L̦õmn̦ak kõn waanjoñak eo kõn Neomi. Ear m̦areiki juon em̦m̦aan etan Elimelek. Ke Elimelek im l̦õm̦aro ro ruo nejierro rar mej, ear ejjel̦o̦k em̦m̦aan ilo baam̦le eo ñan lale im kõjparok e. (Rut 1:1-5) Ke ear bar ro̦o̦l ñan Juda, Neomi ear ba ñan Rut, lio pãleen l̦eo nejin emej, bwe en kajjitõk ippãn Boaz ñe emaroñ bar wiaiki bwidej eo aer. L̦ein ear juon iaan ro nukũn Elimelek me epaake. (Rut 2:1, 19, 20; 3:1-4) Bõtab Boaz ear kile bwe ebar wõr juon nukwier, eo me Baibõl̦ ej ãñinñini “L̦eiõ,” me epaakl̦o̦k kadkad eo an ñan Elimelek. Kõn men in, e eo m̦oktata ewõr an maroñ ñan wiaik ak kõjparok er.​—Rut 3:9, 12, 13.

Ilo jinoin, “L̦eiõ” ear m̦õn̦õn̦õ in jipañ. (Rut 4:1-4) Meñe ejel̦ã bwe enaaj aikuj jol̦o̦k jããn, ak l̦ein ear kile bwe Neomi ejjab maroñ keotak juon ajri me enaaj jolõte bwidej eo an Elimelek. Kõn men in, bwidej eo enaaj erom m̦õttan l̦ãm̦oran eo an. Innem emaroñ kar l̦õmn̦ak bwe enaaj bõk tokjãn jãn karõk in.

Bõtab ear oktak an l̦ein l̦õmn̦ak ke ear kile bwe enaaj aikuj m̦areik Rut. Ear ba: “Iban wiaik e ñan eõ, ñe I ab ko̦kkure l̦ãm̦oran eo aõ.” (Rut 4:5, 6) Etke ear oktak an l̦õmn̦ak?

El̦aññe l̦ein ak bar juon em̦m̦aan ear m̦areik Rut im tokãlik Rut ear keotak juon l̦adik, innem l̦adik in enaaj jolõte bwidej eo an Elimelek. Ewi wãween an naaj men in “ko̦kkure l̦ãm̦oran” eo an l̦ein? Baibõl̦ ejjab ba, bõtab erkein ej jet iaan un ko unin an maroñ kar ba men in.

• Kein kajuon, enaaj ãinwõt ñe ejjel̦o̦k tokjãn an kar jol̦o̦k jããn kõnke eban jolõte bwidej eo an Elimelek, ak enaaj etal ñan l̦adik eo nejin Rut.

• Kein karuo, enaaj kar an eddo ñan naajdik im kõjparok Neomi im Rut.

• Kein kajilu, ñe ebar wõr nejierro Rut ajri im ebar wõr nejin l̦ein make ajri, eokwe aolep ajri rein renaaj bõk jolõt eo.

• Kein keemãn, el̦aññe ear ejjel̦o̦k nejin l̦ein make im Rut ear keotak juon nejierro l̦addik, innem ajri in enaaj jolõte bwidej eo an Elimelek im an l̦ein jim̦or. Kõn men in, enaaj luuji bwidej eo an ñan juon ajri me ear l̦otak ilo etan Elimelek, im jab ilo ãt eo etan. L̦ein ear jab jipañ Neomi kõnke ear jab kõn̦aan luuji jolõt eo an. Ear kõtl̦o̦k bwe Boaz en bõk eddo eo ñan wiaik bwidej eo an Elimelek kõnke Boaz ej eo ãlikin e me ewõr an maroñ ñan kõm̦m̦ane in. Im eñin men eo Boaz ear kõm̦m̦ane kõnke ear kõn̦aan “kõm̦m̦an bwe wãto eo an l̦eo emej en jab ilo̦k jãn ro nukũn.”—Rut 4:10, UBS.

Alikkar bwe emaroñ kar l̦apl̦o̦k an l̦ein l̦õmn̦ak kõn an kowõnm̦aanl̦o̦k ãt eo etan im kõjparok jolõt eo an. El̦ap wõt an kar l̦ein l̦õmn̦ak kõn e make. Bõtab meñe ear lukkuun kate ñan kowõnm̦aanl̦o̦k ãt eo etan, ak ejjel̦o̦k en̦ ejel̦ã etan ilo raan kein. Ear bareinwõt jab bõk jeraam̦m̦an eo ejejuwaan me Boaz ear bõke. Ta in? Epãd etan Boaz ilo menmenbwij eo an Messaia eo, Jesus Christ. Ekabũrom̦õjm̦õj men in ear wal̦o̦k ñan L̦ein kõn wõt an kar l̦õmn̦ak wõt kõn e make im jab kõn̦aan jipañ juon eo ear pãd ilo aikuj!—Matu 1:5; Luk 3:23, 32.