1-2. El̦aññe kwõjjab pojakin peptaij, etke kwõjjab aikuj in ebbweer? (Lale pija eo ilo kilin bok in.)

 EL̦AÑÑE kokõn̦aan peptaij, em̦õj am̦ kããlõt juon mejãnkajjik elukkuun em̦m̦an. Kwõpojak in ke bõk buñtõn ne in kiiõ? El̦aññe kwõj tõmak bwe kwõpojak im em̦m̦aan ro rej lale eklejia rej bar errã, innem jab ãliklik in peptaij ilo iien eo tok juon epel̦l̦o̦k. El̦aññe kwõnaaj kõm̦m̦ane men in, kwõnaaj lo elõñ jeraam̦m̦an ko ilo am̦ karejar ñan Jeova.

² Ijoke, em̦õj ke an juon ba ñan eok bwe ewõr men ko jet kwõj aikuj kõm̦m̦ani m̦okta jãn am̦ maroñ peptaij? Ak kwõj ke kile men in kõn kwe make? El̦aññe aet, kwõn jab ebbweer. Kwõmaroñ kõm̦m̦an wõnm̦aanl̦o̦k ko im tõpar mejãnkajjik in eaorõk, meñe kwõj juon eo edik ak erũtto.

3. Ta eo ri-utiej eo jãn Itiopia ear kajjitõk ippãn Pilip, im kajjitõk ta eo emaroñ jiktok ilo l̦õmn̦ak eo ad? (Jerbal 8:36, 38)

³ Riit Jerbal 8:36, 38. Juon ri-utiej jãn Itiopia ear kajjitõk ippãn ri-kwal̦o̦k naan eo Pilip: “Ta eo ej bõbraik eõ jãn aõ peptaij?” Ri-Itiopia in ear kõn̦aan peptaij, bõtab ear ke lukkuun pojakin bõk buñtõn ne in aorõk?

4. Ewi wãween an kar ri-Itiopia eo kwal̦o̦k bwe ear lukkuun kõn̦aan wõnm̦aanl̦o̦k wõt im katak?

⁴ Ri-Itiopia eo ear “etal ñan Jerusalem bwe en kabuñ.” (Jrb. 8:27) Innem alikkar bwe em̦õj an kadede pãd ilo kabuñ eo an ri-Ju ro. Ejjel̦o̦k pere em̦õj an kar katak kõn Jeova jãn Jeje ko jãn Kajin Hibru. Meñe ãindein, ak ear kõn̦aan kal̦apl̦o̦k an jel̦ã. Ilo m̦ool, ke Pilip ear iioone em̦m̦aan in ilo juon ial̦, ta eo ear lo an em̦m̦aan in kõm̦m̦ane? Ear lo an riiti juon bok lemlem in jeje ko an ri-kanaan Aiseia. (Jrb. 8:28) Alikkar bwe ri-utiej in ear katak kõn katak ko rem̦wilal̦. Ear jab jubũruon kõn katak ko repidodo, ak ear kõn̦aan wõnm̦aanl̦o̦k wõt im katak.

5. Ta eo ri-Itiopia eo ear kõm̦m̦ane kõn men ko ear katak kaki?

⁵ Em̦m̦aan in ear juon ri-utiej me ear jerbal ñan lerooj eo an ri-Itiopia etan Lerooj Kandase; l̦ein ear “lale aolep jããn ko an lerooj in.” (Jrb. 8:27) Innem emaroñ kar juon eo el̦ap an poub im elukkuun lõñ an eddo. Meñe ãindein, ak ear kõm̦m̦an iien ñan an kabuñ ñan Jeova. Ear jab jubũruon kõn an katak wõt kõn m̦ool eo, ak ear bareinwõt jerbali men ko ear katak kaki. Kõn men in, ear itok jãn Itiopia, juon jikin ettol̦o̦k, bwe en maroñ kabuñ ñan Jeova ilo tampel̦ eo ilo Jerusalem. Ial̦ eo an l̦o̦k ñan Jerusalem emaroñ kar bõk el̦ap iien im jããn, bõtab em̦m̦aan in ear lale bwe en ejjel̦o̦k men en̦ ej bõbraiki jãn an etal ñan Jerusalem im kabuñ ñan Jeova.

6-7. Ewi wãween an kar yokwe eo an ri-Itiopia eo ñan Jeova kar wõnm̦aanl̦o̦k wõt im eddekl̦o̦k?

⁶ Ri-Itiopia eo ear katak jãn Pilip jet katak ko raorõk me rekããl, im juon iaan men ko ear katak ej bwe Jesus ej Messaia eo. (Jrb. 8:34, 35) Ejjel̦o̦k pere bwe ri-utiej eo ear lukkuun m̦õn̦õn̦õ in katak kõn men eo Jesus ear kõm̦m̦ane kõn e. Enaaj kar ewi wãween an em̦m̦akũt kõn men kein ear katak kaki? Eokwe, emaroñ kar pãdwõt ilo kabuñ eo an ri-Ju ro ãinwõt juon eo el̦ap an armej ro kautieje. Bõtab ijello̦kun an ãindein, yokwe eo an ñan Jeova im eo Nejin ear eddekl̦o̦k. Men in ear kõm̦akũt e ñan kõm̦m̦ane jokãlõt eo eaorõk ñan peptaij im erom juon iaan ri-kal̦oor ro an Jesus Christ. Ke Pilip ear lo bwe em̦m̦aan in ear pojak, ear peptaiji.

⁷ El̦aññe kwõnaaj l̦oore joñak eo an ri-Itiopia in, kwõmaroñ kõppojakl̦o̦k im̦aan ñan am̦ peptaij. Innem, kwe bareinwõt kwõnaaj maroñ ba ilo peran, “Ta eo ej bõbraik eõ jãn aõ peptaij?” Jen kiiõ etale ewi wãween kwõmaroñ kõm̦m̦ani ejja buñtõn ne ko ear kõm̦m̦ani: Ear wõnm̦aanl̦o̦k wõt im katak, ear jerbali men ko ear katak kaki, im ear wõnm̦aanl̦o̦k wõt im kaddekl̦o̦k yokwe eo an ñan Anij.

8. Ta eo Jon 17:3 ej ba bwe kwõn kõm̦m̦ane?

⁸ Riit Jon 17:3. Naan kein an Jesus rar ke kõm̦akũt eok ñan jino katak Baibõl̦? Eñin men eo ear wal̦o̦k ñan elõñ iaad. Bõtab naan kein rej ke bar ba bwe jen wõnm̦aanl̦o̦k wõt im katak? Aet. Eban jem̦l̦o̦k ad wõnm̦aanl̦o̦k wõt im “jel̦ã kõn . . . Anij eo wõt em̦ool.” (Ekl. 3:11) Jenaaj wõnm̦aanl̦o̦k wõt im katak kõn e ñan indeeo. El̦ak l̦apl̦o̦k ad katak kõn Jeova, enaaj l̦apl̦o̦k ad epaakel̦o̦k e.​—Sam 73:28.

9. Ta eo jej aikuj in kõm̦m̦ane ãlikin ad katak kõn katak ko jinoin ilo Baibõl̦?

⁹ Alikkar bwe ñe jej katak kõn Jeova, jej jino kõn katak ko raorõk me ekkã ad katak kaki ilo jinoin. Ilo lõta eo an ñan ri-Hibru ro, rijjilõk  Paul ear ba bwe katak kein rej “katak ko jinoin.” Ear jab kõjekdo̦o̦ne katak kein, ak ear keidi katak kein ñan milik eo me juon niñniñ ej m̦õñã ñan kõkajoore ãnbwinnin. (Hib. 5:12; 6:1) Ijoke ear bareinwõt lukkuun rõjañ aolep Kũrjin ro ñan jab katak wõt kõn katak kein jinoin ak bwe ren wõnm̦aanl̦o̦k wõt im katak kõn katak ko rem̦wilal̦ ilo Naanin Anij. Em̦õj am̦ ke ejaak juon kõn̦aan ñan katak kõn katak ko rem̦wilal̦ ilo Baibõl̦? Kokõn̦aan ke wõnm̦aanl̦o̦k wõt im katak kõn Jeova im karõk ko an?

10. Etke emaroñ pen an jet armej katak?

¹⁰ Ijoke, ñan elõñ iaad, ejjab juon men epidodo ñan katak Baibõl̦. Ak ta kõn kwe? Ilo jikuul̦, kwaar ke juon eo em̦m̦an an riit im katak? Ear ke em̦m̦an ippam̦ katak im kwaar ke lo bwe el̦ap am̦ bõk tokjãn jãne? Ak kwaar ke l̦õmn̦ak bwe kwõj juon eo epen an katak jãn bok ko? El̦aññe aet, kwõjjab make iaam̦. Meñe ãindein, ak Jeova emaroñ jipañ eok. Eweeppãn im ejjel̦o̦k bar juon ri-Kaki me em̦m̦an ãinwõt e.

11. Ewi wãween an Jeova kwal̦o̦k bwe ej ri-Kaki eo Em̦m̦antata?

¹¹ Jeova ej ba bwe ej ri-Kaki eo ad Em̦m̦antata. (Ais. 30:20, NW; 30:21) Ej juon ri-Kaki eo ejel̦ã kijenmej, ejouj, im el̦ap an mel̦el̦e. Ej kalimjek wõt men ko rem̦m̦an ilo ro rej katak jãne. (Sam 130:3) Im ejjab kõtmãne bwe jen kõm̦m̦ani men ko me ejjel̦o̦k ad maroñ ñan kõm̦m̦ani. Keememej bwe E eo ear kõm̦anm̦ane kõmãlij eo am̦, juon menin letok elukkuun em̦m̦an jãne. (Sam 139:14) Kõn men in, ej piktokid ñan kõn̦aan katak. Ri-Kõm̦anm̦an eo ad ekõn̦aan bwe jen wõnm̦aanl̦o̦k wõt im katak ñan indeeo, im ekõn̦aan bwe jen m̦õn̦õn̦õ ilo ad kõm̦m̦ane men in. Innem, ej juon menin mãlõtlõt bwe jen “ejaake juon kõn̦aan” ñan katak ko rem̦ool ilo Baibõl̦ kiiõ. (1 Pit. 2:2) Kõm̦m̦ani mejãnkajjik ko me kwõmaroñ tõpari, im keini am̦ riit im katak Baibõl̦. (Jos. 1:8) Kõn jipañ eo an Jeova, enaaj l̦apl̦o̦k an em̦m̦an ippam̦ riit im katak kõn e.

12. Etke jej aikuj katak kõn mour eo an Jesus im jerbalin kwal̦o̦k naan eo an?

¹² Keini am̦ kõl̦mãnl̦o̦kjen̦ kõn mour eo an Jesus im jerbalin kwal̦o̦k naan eo an. El̦ap an aorõk bwe jen anõke jenkwan neen Jesus joñan wõt ad maroñ el̦aññe jekõn̦aan karejar ñan Jeova, el̦aptata ilo iien kein relukkuun pen. (1 Pit. 2:21) Jesus ear kwal̦o̦k kõn wãween ko reppen me ri-kal̦oor ro an renaaj iiooni. (Luk 14:27, 28) Meñe ãindein, ak ear lõke bwe ri-kal̦oor ro an rem̦ool renaaj maroñ dãpij wõt aer tiljek ñan Anij, ãinwõt kar e. (Jon 16:33) Katak kõn tipdikin mour eo an Jesus, im kõm̦m̦ani mejãnkajjik ko ñan anõke ilo mour eo am̦ kajjojo raan.

13. Ta eo kwõj aikuj in wõnm̦aanl̦o̦k wõt im kajjitõk ippãn Jeova kake, im etke?

¹³ Ejabwe an wõr wõt ippãd jel̦ãl̦o̦kjen̦. Men eo eaorõktata kõn jel̦ãl̦o̦kjen̦ ej wãween an jipañ eok ñan kal̦apl̦o̦k am̦ jel̦ã kõn Jeova im ejaake kadkad ko, ãinwõt am̦ tõmak ilo e im yokwe E. (1 Kor. 8:1-3) Ilo am̦ wõnm̦aanl̦o̦k wõt im katak, jab bõjrak jãn am̦ kajjitõk ippãn Jeova bwe en jipañ eok ñan kal̦apl̦o̦k tõmak eo am̦. (Luk 17:5) Em̦õn̦õn̦õ in uwaake jar rot kein. Ñe ewõr ippam̦ tõmak eo em̦ool me ej pedped ioon mel̦el̦e ko rejim̦we kõn Anij eo ad, men in enaaj jipañ eok ñan kõm̦m̦an wõnm̦aanl̦o̦k ko.​—Jem. 2:26.

14. Ewi wãween an kar rijjilõk Piter kaalikkar ewi joñan an aorõk bwe jen jerbali men ko jej katak kaki? (Bar lale pija eo.)

¹⁴ Rijjilõk Piter ear kaalikkar ewi joñan an aorõk ñan an ri-kal̦oor ro an Christ wõnm̦aanl̦o̦k wõt im jerbali men ko rej katak kaki. Ear kwal̦o̦k kõn bwebwenato eo kõn Noa ilo Baibõl̦. Jeova ear ba ñan Noa bwe Enaaj ko̦kkure  armej ro renana ilo tõre eo ikijjeen juon ibwijleplep. An Noa jel̦ã bwe ej itok juon ibwijleplep, ear jabwe ñan lo̦mo̦o̦ren e im baam̦le eo an. Jej kile bwe Piter ear kõnono kõn tõre eo m̦okta jãn Ibwijleplep eo, tõre eo “ke kar jek wa eo.” (1 Pit. 3:20) Aet, Noa im baam̦le eo an rar jerbali men ko rar katak kaki jãn Anij ikijjeen aer jeke juon waan lo̦jet me elukkuun kilep. (Hib. 11:7) Innem Piter ear keidi men eo Noa ear kõm̦m̦ane ñan an juon peptaij, ilo an kar je: “Peptaij ej ekkejell̦o̦k ilo men in, im ej bareinwõt lo̦mo̦o̦ren kom̦ kiiõ.” (1 Pit. 3:21) Kõn men in, kwõmaroñ keidi men ko kwõj kõm̦m̦ani kiiõ bwe kwõn maroñ peptaij ñan men ko Noa im baam̦le eo an rar kõm̦m̦ani ium̦win elõñ iiõ ke rar jeke wa eo. Ta ko kwõj aikuj kõm̦m̦ani ñan kõppojakl̦o̦k im̦aan bwe kwõn maroñ peptaij?

15. Ewi wãween ad kwal̦o̦k bwe jej m̦oolin ukel̦o̦k?

¹⁵ Juon iaan men ko m̦oktata jej aikuj kõm̦m̦ani ej m̦oolin ukel̦o̦k jãn jerawiwi ko ad. (Jrb. 2:37, 38) Ñe jej m̦oolin ukel̦o̦k, innem jenaaj m̦oolin kõm̦m̦an oktak ko. Em̦õj ke am̦ bõjrak jãn am̦ kõm̦m̦ani m̦anit ko me rejjab kabuñbũruon Jeova, ãinwõt mour ettoon, kõjerbal tobacco, ak kõjerbal naan ko rettoon im reddo? (1 Kor. 6:9, 10; 2 Kor. 7:1; Eps. 4:29) El̦aññe kwõjjañin kõm̦m̦ane men in, kate wõt eok ñan kõm̦m̦an oktak ko. Kõnnaan ippãn eo ej katak Baibõl̦ ippam̦, ak kajjitõk ippãn em̦m̦aan ro rej lale eklejia ñan lewaj jipañ im naanin rõjañ. El̦aññe kwõj juon eo ej dik wõt im kwõj jokwe ippãn jem̦am̦ im jinõm̦, jab bõjrak jãn am̦ kajjitõk ippãer ñan jipañ eok ñan julo̦ki imminene ko renana me remaroñ bõbraik eok jãn am̦ peptaij.

16. Ta ko jej aikuj ekkeini ad kõm̦m̦ani ñan kõkajoore jem̦jerã eo ad ippãn Jeova?

¹⁶ Ebar lukkuun aorõk bwe jen keini ad kõm̦m̦ani men ko me rej kõkajoore jem̦jerã eo ad ippãn Jeova. Men in ej kitibuj ad pãd ilo iien kweilo̦k ko im ad bõk kun̦aad ie. (Hib. 10:24, 25) Im ilo iien eo kwõmaroñ bõk kun̦aam̦ ilo jerbalin kwal̦o̦k naan, kwõn bar ekkeini am̦ bõk kun̦aam̦ ilo jerbal in. Ilo am̦ kal̦apl̦o̦k am̦ bõk kun̦aam̦ ilo jerbal in me ej lo̦mo̦o̦ren armej, enaaj l̦apl̦o̦k an em̦m̦an ippam̦. (2 Tim. 4:5) El̦aññe kwõj juon eo edik im kwõj jokwe wõt ippãn baam̦le eo am̦, kajjitõk ippam̦ make: ‘Jinõ im jema rej aikuj ke kakeememej eõ ñan etal ñan kweilo̦k ko im bõk kun̦aõ ilo  jerbalin kwal̦o̦k naan? Ak ij ke make kõppojak im etal ñan iien kein?’ Ilo am̦ make kõm̦m̦ani men kein, kwõj kaalikkar tõmak eo am̦, im am̦ yokwe im kam̦m̦oolol Jeova Anij. Men kein “rej kaalikkar [am̦] mour ñan Anij,” rej menin lel̦o̦k ko me kwõj lil̦o̦k ñan Jeova. (2 Pit. 3:11; Hib. 13:15) Aolep menin lel̦o̦k ko me jej lil̦o̦k jãn bũruod, rej kabuñbũruon Anij eo ad. (Keidi 2 Korint 9:7.) Jej kõm̦m̦ani aolep men kein kõnke el̦ap ad m̦õn̦õn̦õ in lel̦o̦k men ko rem̦m̦antata ñan Jeova.

17-18. Ta kadkad eo eaorõk me enaaj jipañ eok ñan kõm̦m̦an wõnm̦aanl̦o̦k ko im peptaij, im etke? (Jabõn Kõnnaan 3:3-6)

¹⁷ Ilo am̦ kõm̦m̦an wõnm̦aanl̦o̦k ko bwe kwõn maroñ peptaij, kwõnaaj iioon wãween ko reppen. Jet armej remaroñ kajjirere kake eok kõn tõmak eo am̦ ekããl, im remaroñ bar jum̦aik ak kaeñtaan eok. (2 Tim. 3:12) Bõlen kwõj lukkuun kate eok ñan anjo̦ ioon juon imminene enana, bõtab ewõr iien ko kwõmaroñ buñ im bar kõm̦m̦ane imminene in. Ak bõlen kwõj inepata im epen am̦ kijenmej kõnke kwõl̦ak lale ej ãinwõt ñe epen am̦ tõpare mejãnkajjik eo am̦. Ta eo enaaj jipañ eok bwe kwõn kijenmej wõt? Juon kadkad eaorõk—yokwe ñan Jeova.

¹⁸ Yokwe eo am̦ ñan Jeova ej juon kadkad el̦ap an aorõk, ej men eo em̦m̦antata ewõr ippam̦. (Riit Jabõn Kõnnaan 3:3-6.) Ñe ekajoor yokwe eo am̦ ñan Anij, men in emaroñ jipañ eok ñan lo tõprak ñe kwõj jelm̦ae apañ ko ilo mour eo am̦. Ekkã an Baibõl̦ eo kwal̦o̦k kõn yokwe eo em̦ool an Jeova ñan ri-karejar ro an. Yokwe in ej mel̦el̦ein bwe eban kõjoole ri-karejar ro an ak bõjrak jãn an yokwe er. (Sam 100:5) Em̦õj kõm̦anm̦an eok ilo nemãmeen wõt Anij. (Jen. 1:26) Ewi wãween kwõmaroñ kwal̦o̦k yokwe rot in?

19. Ewi wãween kwõmaroñ kal̦apl̦o̦k am̦ kam̦m̦oolol Jeova kõn aolep men ko ear kõm̦m̦ani ñan kwe? (Galetia 2:20)

¹⁹ M̦oktata kwõmaroñ jino ilo am̦ kwal̦o̦k kam̦m̦oolol. (1 Tes. 5:18) Kajjojo raan, kajjitõk ippam̦ make, ‘Ewi wãween an kar Jeova kwal̦o̦k an yokwe eõ rainin?’ Innem kam̦m̦oolol Jeova ilo jar ko am̦, ilo am̦ kaalikkar men ko em̦õj an kõm̦m̦ani ñan kwe. Kile bwe unin an Jeova kõm̦m̦ani men ko rem̦m̦an ñan kwe ej kõnke ej yokwe eok, ãinwõt an kar rijjilõk Paul kar kile men in kõn Jeova. (Riit Galetia 2:20.) Kajjitõk ippam̦ make, ‘Ikõn̦aan ke kwal̦o̦k aõ bar yokwe E?’ Yokwe ñan Jeova enaaj jipañ eok ñan wõnm̦aanl̦o̦k wõt im jum̦ae menin kapo ko im ñan lo tõprak ñe kwõj iioon  wãween ko reppen. Enaaj kõm̦akũt eok ñan ekkeini am̦ kõm̦m̦ani men ko me rej kõkajoore jem̦jerã eo am̦ ippãn Jeova. Ilo am̦ kõm̦m̦ane men in, kwõj kwal̦o̦k yokwe eo am̦ ñan Jem̦am̦ ilañ aolep raan.

20. Ta ko kwõj aikuj kõm̦m̦ani ñe kwõj ajel̦o̦k mour eo am̦ ñan Jeova, im ewi joñan an aorõk jokãlõt in?

²⁰ Jidik kõn jidik, yokwe eo am̦ ñan Jeova enaaj kõm̦akũt eok ñan jar ñane juon jar ejejuwaan. Kwõnaaj jar im ajel̦o̦k mour eo am̦ ñan Anij. Keememej bwe ilo iien eo kwõj ajel̦o̦k mour eo am̦ ñan Jeova, ewõr kiiõ juon am̦ kõjatdikdik elukkuun em̦m̦an: Kwõmaroñ juon iaan ro doon ñan indeeo. Ñe kwõnaaj ajel̦o̦k mour eo am̦ ñan Jeova, kwõj kallim̦ur bwe kwõnaaj karejar ñane ilo iien ko rem̦m̦an im iien ko renana. Kwoban bar aikuj in kõm̦m̦ane kallim̦ur in. Em̦m̦ool bwe ñe jej ajel̦o̦k mour eo ad, jej bõk juon buñtõn ne elukkuun aorõk. Bõtab l̦õmn̦ak kõn men in: Kwõnaaj kõm̦m̦ani elõñ jokãlõt ko ilo mour eo am̦, im jet iaaer relukkuun em̦m̦an, ijoke ejjel̦o̦k bar juon jokãlõt em̦m̦anl̦o̦k jãn am̦ kããlõt ñan ajel̦o̦k mour eo am̦ ñan Jeova. (Sam 50:14) Setan enaaj kajjioñ kam̦õjn̦o̦ikl̦o̦k yokwe eo am̦ ñan eo Jem̦am̦ ilañ, ekõn̦aan bwe kwõn jol̦o̦k am̦ tiljek ñan Jeova. Jab kõtl̦o̦k bwe Setan en anjo̦! (Job 27:5) Ñe ekajoor yokwe eo am̦ ñan Jeova, men in enaaj jipañ eok ñan kajejjet kallim̦ur eo am̦ ñane im ñan epaakel̦o̦k wõt eo Jem̦am̦ ilañ.

21. Etke jemaroñ ba bwe peptaij ej buñtõn ne eo jinoin ilo ad karejar ñan Jeova, im jab buñtõn ne eo ãliktata?

²¹ Ãlikin am̦ ajel̦o̦k mour eo am̦ ñan Jeova, kõnono ippãn em̦m̦aan ro rej lale eklejia eo am̦ kõn am̦ bõk buñtõn ne eo tok juon eaorõk. Bõtab, em̦m̦an ñan keememej bwe peptaij ej buñtõn ne eo jinoin jej kõm̦m̦ane ilo ad karejar ñan Jeova. Ejjab jem̦l̦o̦k ijin, ak ad karejar ñan Jeova enaaj wõnm̦aanl̦o̦k wõt ñan indeeo. Kõn men in, kwõn kõkajoore yokwe eo am̦ ñan eo Jem̦am̦ ilañ kiiõ. Kõm̦m̦ani mejãnkajjik ko bwe yokwe eo am̦ en maroñ kajoorl̦o̦k jãn raan ñan raan. Am̦ kõm̦m̦ane men in enaaj tõll̦o̦k eok ñan am̦ peptaij. Ejjel̦o̦k pere bwe ilo naaj iien in, enaaj juon raan ekam̦õn̦õn̦õ. Bõtab eban jem̦l̦o̦k ijin. Kate wõt eok bwe yokwe eo am̦ ñan Jeova im eo Nejin en eddekl̦o̦k wõt ñan indeeo!