1-2. Ewi wãween an mour eo am̦ em̦m̦anl̦o̦k ãlikin am̦ peptaij?

 ÃLIKIN ad peptaij, el̦ap ad m̦õn̦õn̦õ kõnke em̦õj ad erom uwaan baam̦le eo an Jeova. Ro ewõr ippãer jeraam̦m̦an in remaroñ errã ippãn naan ko an ri-jeje sam eo Devid, me ear ba: “Em̦õn̦õn̦õ armej eo Kwõj kããlõte im kepaakwaj e, bwe en jokwe ilowaan wõrwõr ko Am̦.”—Sam 65:4.

² Jeova ejjab kadel̦o̦ñ jabdewõt armej ñan ilowaan baam̦le eo an. Ilo ad kar etale ilo katak eo l̦o̦k juon, ej kããlõt ñan ruwaakl̦o̦k ñan ro rej kam̦ool bwe rekõn̦aan juon jem̦jerã epaak ippãn. (Jem. 4:8) Ñe kwõj ajel̦o̦k mour eo am̦ ñan Jeova im peptaij, kwõj epaakel̦o̦k e ilo juon wãween ejejuwaan. Kwõmaroñ lõke bwe ãlikin am̦ peptaij enaaj ‘lutõkwaj jeraam̦m̦an ñan kwe m̦ae iien enaaj ejjel̦o̦k aikuj.’—Mal. 3:10; Jrm. 17:​7, 8.

3. Ta eo Kũrjin ro me em̦õj aer ajel̦o̦k mour ko aer im peptaij rej aikuj in kõm̦m̦ane? (Ekklisiastis 5:​4, 5)

³ Ilo m̦ool, am̦ peptaij ej jinoin am̦ jerbal ñan Jeova. Ãlikin am̦ bõk buñtõn ne in, kwõnaaj kate eok joñan wõt am̦ maroñ ñan kajejjete kallim̦ur eo am̦ ñan Jeova im dãpij wõt am̦ tiljek ñane, jekdo̦o̦n ñe kwõj iioon menin kapo ko ak mãlejjoñ ko. (Riit Ekklisiastis 5:​4, 5.) Ãinwõt juon ri-kal̦ooran Christ, kwõnaaj l̦oore joñak eo an Jesus im pokake kien ko an joñan wõt am̦ maroñ. (Matu 28:​19, 20; 1 Pit. 2:21) Katak in enaaj jipañ eok ñan kõm̦m̦ane men in.

 ‘JAB BÕJRAK JÃN AM̦ L̦OOR’ JESUS MEÑE KWÕJ IIOON MÃLEJJOÑ IM MENIN KAPO KO

4. Ewi wãween an ri-kal̦oor ro an Jesus ineeke juon “al̦al̦ in eñtaan” ilo kõkkar? (Luk 9:23)

⁴ Ãlikin am̦ peptaij, ewõr apañ ko kwõnaaj iiooni. Ilo m̦ool, Jesus ear kaalikkar bwe ri-kal̦oor ro an renaaj ineeke juon “al̦al̦ in eñtaan.” Im renaaj kõm̦m̦ane men in “jãn raan ñan raan.” (Riit Luk 9:23.) Mel̦el̦ein ke bwe ri-kal̦oor ro an renaaj eñtaan aolep iien? Ejjab. Jesus ej kaalikkar bwe kobal̦o̦k ippãn jeraam̦m̦an ko renaaj bũki, renaaj iioon mãlejjoñ ko. Joñan, jet iaan mãlejjoñ kein remaroñ kaeñtaanan.—2 Tim. 3:12.

5. Ta jeraam̦m̦an ko Jesus ear kallim̦ur bwe ro rej kõm̦m̦an kaarmejjete renaaj bũki?

⁵ Bõlen baam̦le eo am̦ rar jum̦ae im kaeñtaane kwe, ak bõlen em̦õj am̦ kaarmejjeteiki juon jerbal el̦ap bwe kwõn maroñ likũt Aelõñ eo an Jeova m̦oktata ilo mour eo am̦. (Matu 6:33) El̦aññe em̦õj am̦ iioon wãween kein, kwõmaroñ lõke bwe Jeova ej lo jerbal ko am̦ rem̦m̦an. (Hib. 6:10) Ejjel̦o̦k pere bwe em̦õj am̦ lo an m̦ool naan kein an Jesus ke ear ba: “Jabdewõt eo ear ilo̦k jãn m̦weo im̦õn ak ro jein ak ro jatin, jinen ak jemãn, ak ro nejin, ak wãto eo an kõn wõt ña im ennaan eo em̦m̦an, 100 alen an naaj l̦apl̦o̦k jeraam̦m̦an ko ej bũki kiiõ. Enaaj lõñl̦o̦k im̦õn, ro jein im jatin, jinen, nejin, im an wãto. Bõtab ilo ejja iien eo wõt, enaaj iioon eñtaan. Innem ilo jukjukun pãd eo ej itok wõt, armej in enaaj bõk mour indeeo.” (Mark 10:​29, 30) Jeraam̦m̦an ko kwõj bũki relukkuun l̦ap jãn jabdewõt men em̦õj am̦ kaarmejjeteiki.—Sam 37:4.

6. Etke kwõnaaj aikuj wõnm̦aanl̦o̦k wõt im jum̦ae “m̦õm̦ ko an kanniõk” ãlikin am̦ peptaij?

⁶ Kwõnaaj aikuj wõnm̦aanl̦o̦k wõt im jum̦ae “m̦õm̦ ko an kanniõk” ãlikin am̦ peptaij. (1 Jon 2:16) Kwõnaaj aikuj kõm̦m̦ane men in kõnke kwõj nejin Adam im kwõjjañin weeppãn. Enaaj wõr iien ko kwõmaroñ bõk ejja eñjake ko wõt an rijjilõk Paul, eo ear je im ba: “Bũruõ elukkuun m̦õn̦õn̦õ kõn kien eo an Anij, bõtab ij bar lo juon kien ilo ãnbwinnũ ej jum̦aik kien eo ilo l̦ol̦ãtãt e aõ, im ej tõll̦o̦k eõ bwe in ri-kõm̦akoko ñan kien jerawiwi, eo ej pãd ilo ãnbwinnũ.” (Rom 7:​22, 23) Kwõmaroñ ebbweer kõn wõt am̦ aikuj jum̦ae kõn̦aan ko renana. Bõtab, ilo am̦ l̦õmn̦ak kõn kallim̦ur eo am̦ ñan Jeova ke kwaar aje mour eo am̦, men in enaaj jipañ eok ñan jum̦ae menin kapo ko. Ilo m̦ool, kallim̦ur in enaaj jipañ eok ilo iien ko kwõj iioon menin kapo ko. Ewi wãween?

7. Ilo am̦ ajel̦o̦k mour eo am̦ ñan Jeova, ewi wãween an men in naaj jipañ eok ñan dãpij wõt am̦ tiljek ñan E?

⁷ Ñe kwõj ajel̦o̦k mour eo am̦ ñan Jeova, kwõj kõjekdo̦o̦n kwe make. Men in ej mel̦el̦ein bwe kwõj jum̦ae kõn̦aan im mejãnkajjik ko me rejjab kabuñbũruon Jeova. (Matu 16:24) Innem ñe kwõj iioon juon menin kapo, kwõban aikuj aepedped kõn ta eo kwõnaaj kõm̦m̦ane kõnke em̦õj am̦ jel̦ã bwe kwõnaaj kããlõt ñan dãpij am̦ tiljek ñan Jeova. Em̦õj am̦ jek ippam̦ make kadede bwe kwõnaaj kabuñbũruon Jeova wõt. Kwõnaaj ãinwõt Job. Meñe ear iioon wãween ko relukkuun pen, ak ear jek ippãn make im ba: “Ñan iien aõ mej ijãmin jol̦o̦k aõ jim̦we jãn ña.”—Job 27:5.

8. Ilo am̦ kõl̦mãnl̦o̦kjen̦ kõn am̦ kar ajel̦o̦k mour eo am̦ ñan Jeova ikijjeen jar, ewi wãween an men in maroñ jipañ eok ñan jum̦ae menin kapo ko?

⁸ Ilo am̦ kõl̦mãnl̦o̦kjen̦ kõn am̦ kar ajel̦o̦k mour eo am̦ ñan Jeova ikijjeen jar, kwõnaaj maroñ jum̦ae jabdewõt menin kapo. Ñan waanjoñak, kwõnaaj ke kattoojoj ñan eo pãleen bar juon? Alikkar kwõban! Em̦õj am̦ kar kallim̦ur ñan Jeova bwe kwõban kõm̦m̦an kõl rot in. Ñe kwõnaaj lukkuun kõjparok kiiõ bwe jabdewõt kõn̦aan ko renana ren jab ejaak ippam̦, kwõban aikuj eñtaan tokãlik ilo am̦  kajjioñ julo̦ki. Kwõnaaj ‘ilo̦k jãn’ “ial̦ an ro ri-nana.”—JK. 4:​14, 15.

9. Ilo am̦ kõl̦mãnl̦o̦kjen̦ kõn am̦ kar ajel̦o̦k mour eo am̦ ñan Jeova ikijjeen jar, ewi wãween an men in maroñ bar jipañ eok ñan likũt am̦ kabuñ ñan E m̦oktata ilo mour eo am̦?

⁹ Ak ta el̦aññe ewõr en̦ ej kajjioñ lewaj juon jerbal me emaroñ bõbraik eok jãn am̦ pãd ilo aolep iien kweilo̦k ko? Kwõnaaj jel̦ã kadede ta eo kwõj aikuj in kõm̦m̦ane. M̦okta jãn an kar wõr jerbal rot in, em̦õj am̦ kar jek ippam̦ make kadede bwe kwõban bõk juon jerbal me enaaj ko̦kkure am̦ pãd ilo iien kweilo̦k ko. Kõn men in, kwõban bõk jerbal rot in innem tokãlik pukot wõt kilen ñan likũt Jeova m̦oktata. Keememej an kar Jesus lukkuun jek ippãn make ñan kabuñbũruon Jemãn. Ñe kwõnaaj kõl̦mãnl̦o̦kjen̦ kõn joñak in an, kwõnaaj m̦õkaj im jum̦ae jabdewõt men kwõjel̦ã bwe enaaj kabũrom̦õje Jeova, eo me kwaar ajel̦o̦k mour eo am̦ ñane.—Matu 4:10; Jon 8:29.

10. Ãlikin am̦ peptaij, ewi wãween an nãj Jeova jipañ eok ñan ‘jab bõjrak jãn am̦ l̦oor’ Jesus?

¹⁰ Mãlejjoñ ko im menin kapo ko rej kõpel̦l̦o̦k juon iien ñan am̦ kwal̦o̦k bwe em̦õj am̦ jek ippam̦ make ñan ‘jab bõjrak jãn am̦ l̦oor’ Jesus. Ilo am̦ ãindein, kwõmaroñ lõke bwe Jeova enaaj jipañ eok. Baibõl̦ ej ba: “Anij etiljek, im ejjãmin kõtl̦o̦k bwe en wal̦o̦k menin kapo ko ñan kom̦ el̦apl̦o̦k jãn joñan eo kom̦ maroñe, ijoke ñe ewal̦o̦k menin kapo, enaaj kõm̦m̦an ial̦an ami jo̦o̦r im jipañ kom̦ bwe kom̦win kijenmej.”—1 Kor. 10:13.

WÃWEEN ÑAN L̦OORE WÕT JESUS

11. Ta juon iaan wãween ko rem̦m̦antata ñan l̦oore wõt Jesus? (Bar lale pija eo.)

¹¹ Jesus ear lukkuun kijejeto im ear epaake wõt Jeova ikijjeen an kar jar ñane. (Luk 6:12) Juon iaan wãween ko rem̦m̦antata ñan l̦oore wõt Jesus ãlikin am̦ peptaij, ej ikijjeen am̦ wõnm̦aanl̦o̦k wõt im kõm̦m̦ani men ko me renaaj  kepaakel̦o̦k eok ñan Jeova. Baibõl̦ ej ba: “Ijo jaar tõpare ilo ad kar kõm̦m̦an wõnm̦aanl̦o̦k, jen wõnm̦aanl̦o̦k wõt im etetal ilo ejja wãween in wõt.” (Pil. 3:16) Jãn iien ñan iien, kwõnaaj roñ bwebwenato ko an ro jeid im jatid me rar kal̦apl̦o̦k ijo kun̦aaer ñan Jeova. Bõlen rar pãd ilo Jikuul̦ eo ñan Ri-Kwal̦o̦k Naan ro an Aelõñ Eo ak rar em̦m̦akũt ñan jikin ko rej aikuj ri-kwal̦o̦k naan ro ie. Ñe kwõmaroñ kõm̦m̦an am̦ mejãnkajjik rot in, kwõn wõnm̦aanl̦o̦k wõt im kõm̦m̦ane. Armej ro an Jeova relukkuun kõn̦aan kal̦apl̦o̦k ijo kun̦aaer ñan Jeova. (Jrb. 16:9) Bõtab, ta el̦aññe kwõjjab maroñ kõm̦m̦ane men in ilo tõre in? Jab l̦õmn̦ak bwe kwõj juon eo ettãl̦o̦k jãn ro remaroñ kõm̦m̦ani men kein. Men eo eaorõk ej am̦ kijenmej wõt. (Matu 10:22) Jab mel̦o̦kl̦o̦k bwe kwõj kabuñbũruon Jeova ñe kwõj kõmaat joñan am̦ maroñ ñane. Eñin ej juon wãween eaorõk kwõmaroñ wõnm̦aanl̦o̦k wõt im l̦oore Jesus ãlikin am̦ peptaij.—Sam 26:1.

12-13. Ta eo kwõmaroñ kõm̦m̦ane ñe ej jino dikl̦o̦k am̦ kijejeto ilo am̦ karejar ñan Jeova? (1 Korint 9:​16, 17) (Bar lale bo̦o̦k eo etan “ Pãdwõt ilo Iãekwõj Eo.”)

¹² Ta eo kwõmaroñ kõm̦m̦ane ñe kwõj lo bwe ejakol̦o̦k am̦ jar jãn bũruom̦, ak ejjab lukkuun wõr am̦ itoklimo ilo kwal̦o̦k naan ãinwõt kar m̦okta? Ak ta el̦aññe ejjab lukkuun em̦m̦an ippam̦ riit Baibõl̦ ãinwõt kar m̦okta? Ñe kwõj bõk l̦õmn̦ak rot in ãlikin am̦ peptaij, jab bõk l̦õmn̦ak eo bwe ejako an Jeova lewaj jetõb kwõjarjar eo an. Kõnke jejjab weeppãn, eñjake ko ad rej oktak jãn iien ñan iien. Ñe ejakol̦o̦k am̦ kijejeto, kõl̦mãnl̦o̦kjen̦ kõn waanjoñak eo an rijjilõk Paul. Meñe ear kate ñan anõke Jesus, ak ear jel̦ã bwe enaaj wõr iien ko ejjab lukkuun kõn̦aan kõm̦m̦ane men in. (Riit 1 Korint 9:​16, 17.) Ej ba: “Meñe ejjab itok jãn kõn̦aan e aõ, jekdo̦o̦n ak inaaj kõm̦m̦ane wõt kõnke kar letoke eddo in ñan ña.” Ak ilo bar juon wãween, Paul ear jek ippãn make ñan  kajejjete jerbalin kwal̦o̦k naan eo an jekdo̦o̦n eñjake ta ko ear bũki.

¹³ Ejja ãindeinl̦o̦k wõt, jab kõm̦m̦ani jokãlõt ko ekkar ñan eñjake ko am̦. Kwõn jek ippam̦ make ñan kõm̦m̦ani men ko rejim̦we jekdo̦o̦n ta eñjake ko kwõj bũki. Ñe kwõnaaj wõnm̦aanl̦o̦k wõt im kõm̦m̦ani men ko rejim̦we, jidik kõn jidik enaaj oktak wãween am̦ eñjake. M̦ae iien in, kwõmaroñ wõnm̦aanl̦o̦k wõt im kõkajoore jem̦jerã eo am̦ ippãn Jeova ikijjeen am̦ katak ippam̦ make, jar, pãd ilo iien kweilo̦k ko, im kwal̦o̦k naan. Ilo am̦ kõm̦m̦ani men kein, enaaj jipañ eok ñan wõnm̦aanl̦o̦k wõt im l̦oore Jesus ãlikin am̦ peptaij. Am̦ kate eok ilo am̦ kijenmej wõt im tiljek wõt ñan Jeova enaaj bareinwõt kõkajoore ro jeim̦ im jatũm̦.—1 Tes. 5:11.

“WÕNM̦AANL̦O̦K WÕT IM LALE . . . IM ETALE”

14. Ta ko kwõj aikuj etali aolep iien im etke? (2 Korint 13:5)

¹⁴ Enaaj bareinwõt juon menin jipañ ñe kwõj aolep iien etale eok make ãlikin am̦ peptaij. (Riit 2 Korint 13:5.) Jãn iien ñan iien, kwõmaroñ etale mour eo am̦ make im imminene ko am̦ ñan lale el̦aññe kwõj jar aolep raan, kwõj riit im katak Baibõl̦, pãd ilo iien kweilo̦k ko, im bõk kun̦aam̦ ilo jerbalin kwal̦o̦k naan. Kajjioñ pukot wãween ko emaroñ l̦apl̦o̦k am̦ m̦õn̦õn̦õ im bõk tokjãn jãn men kein. Ñan waanjoñak, kajjitõk ippam̦ make: ‘Imaroñ ke kõmel̦el̦eik katak ko rel̦l̦ap ilo Baibõl̦ ñan ro jet? Ewõr ke wãween ko jet imaroñ kõm̦m̦an bwe in m̦õn̦õn̦õl̦o̦k ilo jerbalin kwal̦o̦k naan eo aõ? Ewi joñan aõ kaalikkar aikuj ko aõ ñan Jeova im rej ke kaalikkar joñan aõ atartar ioon? Ij ke ekkeini aõ pãd ilo iien kweilo̦k ko? Ewi wãween imaroñ kõm̦m̦an bwe en em̦m̦anl̦o̦k aõ roñjake im bõk kun̦aõ ilo iien kweilo̦k ko?’

15-16. Ta eo kwõj katak jãn bwebwenato eo an em̦m̦aan eo jeid im jatid ikijjeen jum̦ae menin kapo ko?

¹⁵ Kwõmaroñ bareinwõt m̦ool ñan kwe make ilo am̦ etale eok im lale ta m̦õjn̦o̦ ko am̦. Juon jeid im jatid em̦m̦aan etan Robert, ej kwal̦o̦k juon bwebwenato kõn e ñan kaalikkar aorõkin men in. Ej ba: “Ke ear tarrin 20 aõ iiõ, ekar wõr aõ part-time jerbal. Juon raan ãlikin aõ kar jerbal, juon leddik me ij jerbal ippãn ekar kũrl̦o̦k eõ ñan m̦weo im̦õn. Ear ba kom̦ro naaj make iaam̦ro im kom̦ro naaj ‘limo ippãn doon.’ Ilo kar m̦okta iar kõm̦m̦an jekpen, bõtab tokãlik iar ba jaab im iar kõmel̦el̦e etke.” Robert ear jum̦ae menin kapo eo im ej juon men elukkuun em̦m̦an. Bõtab, el̦ak reilikl̦o̦k ej kile bwe en kar oktak an uwaake ledik eo. Ej kwal̦o̦k m̦ool im  ba: “Ekar jab m̦õkaj aõ uwaake im ba jaab ãinwõt kar Josep ke ear jum̦ae lio ippãn Potipar. (Jen. 39:​7-9) Ilo m̦ool, iar lukkuun bwilõñ ke ear pen aõ ba jaab ñane. Men in ear jipañ eõ ñan kile ia eo ij aikuj in kakõm̦anm̦anl̦o̦ke bwe en kajoor wõt jem̦jerã eo aõ ippãn Jeova.”

¹⁶ Kwõmaroñ bõk tokjãn jãn am̦ lukkuun etale eok make ãinwõt kar Robert. Meñe kwaar lo tõprak ilo am̦ kar jum̦ae juon menin kapo ak, kwõmaroñ kajjitõk ippam̦ make, ‘Ewi aetokin aõ kar uwaak im ba jaab?’ Ñe kwõj lo bwe ewõr men en̦ kwõj aikuj kakõm̦anm̦anl̦o̦ke, kwõn jab ebbweer. Kwõmaroñ m̦õn̦õn̦õ bwe kwõj kiiõ kile m̦õjn̦o̦ in am̦. Jar kake, im bõk buñtõn ne ko kwõj aikuj kõm̦m̦ani ñan kal̦apl̦o̦k am̦ jek ippam̦ make ñan mour ekkar ñan kien ko an Jeova.—Sam 139:​23, 24.

17. Ekkar ñan bwebwenato eo an Robert, ñe jej tiljek wõt ñan Jeova, ewi wãween an men in jelõte ãt eo etan?

¹⁷ Ewõr bar juon men jemaroñ katak jãn bwebwenato eo an Robert. Ej ba: “Ãlikin aõ kar jum̦ae ledik eo iar jerbal ippãn, ear ba ‘Kwõpããje test eo!’ Innem iar kajjitõk ippãn ta mel̦el̦ein an ba men in. Ear kõmel̦el̦e im ba bwe juon m̦õttan l̦addik me ekar juon iaan Ri-Kõnnaan ro an Jeova m̦okta, ear ba ñane bwe aolep jo̦dikdik ro me rej Ri-Kõnnaan ro an Jeova epidodo aer po im rej kõm̦m̦ani men ko renana ilo ettino. Kõn men in, ear ba ñan l̦adik in bwe enaaj mãlejjoñe eõ im lale ñe m̦ool men in. Ke ej ba men in, joñan aõ kar m̦õn̦õn̦õ kõnke iar nõbar etan Jeova.”

18. Ta eo kwõj jek ippam̦ make ñan kõm̦m̦ane ãlikin am̦ peptaij? (Bar lale bo̦o̦k eo etan “ Jet Katak ko Renaaj Em̦m̦an Ippam̦.”)

¹⁸ Ñe kwõj ajel̦o̦k mour eo am̦ ñan Jeova im peptaij, kwõj kwal̦o̦k bwe kokõn̦aan kokkwõjarjare etan jekdo̦o̦n ta. Im kwõmaroñ lõke bwe Jeova ejel̦ã apañ ko kwõj iiooni im menin kapo ko kwõj jum̦aiki. Enaaj kõjeraam̦m̦ane eok ilo am̦ kate eok ñan dãpij wõt am̦ tiljek ñane. Kwõmaroñ lõke bwe ikijjeen jetõb kwõjarjar eo an, emaroñ lewaj kajoor bwe kwõn maroñ kõm̦m̦ane men in. (Luk 11:​11-13) Ikijjeen jipañ eo jãn Jeova, kwõnaaj maroñ wõnm̦aanl̦o̦k wõt im l̦oore Jesus ãlikin am̦ peptaij.