Jeova emaroñ jeorl̦o̦k jerawiwi ko ad ikijjeen wõt katok in mour eo me Jesus ear kõl̦l̦ãiki kõn bõtõktõkin. (Eps. 1:7) Meñe ãindein, ak Baibõl̦ eo ej ba: “Anij . . . ear jol̦o̦k bõd ko an ro rar jerawiwi ilo iien ko remootl̦o̦k kõn wõt an kõmmaanwa,” mel̦el̦ein bwe ear kõm̦m̦ane men in m̦okta jãn an Jesus kar katok kõn mour eo an. (Rom 3:​25, ftn.) Ewi wãween an kar Jeova maroñ kõm̦m̦ane men in im ilo ejja iien eo wõt wõnm̦aanl̦o̦k wõt im kwal̦o̦k ekajet jim̦we?

Jeova ear kallim̦ur bwe enaaj wõr juon ‘ine’ me enaaj lo̦mo̦o̦ren ro rej likũt aer tõmak ilo E im kallim̦ur ko an. Ke ear kõm̦m̦ane kallim̦ur in, ear ãinwõt ñe em̦õj an kar kõl̦l̦ãiki kadede men eo Adam ear luuji. (Jen. 3:15; 22:18) Anij ear lukkuun jel̦ã bwe eo Nejin me ej make wõt enaaj m̦õn̦õn̦õ in katok kõn mour eo an ilo iien eo me Anij ekõn̦aan. (Gal. 4:4; Hib. 10:​7-10) Ke Jesus ear pãd ioon lal̦ ãinwõt juon eo ej jutak kõn Aelõñ eo an Anij, Jeova ear lel̦o̦k ñane maroñ eo ñan jeorl̦o̦k an armej ro jerawiwi m̦okta jãn an kar katok kõn mour eo an. Jesus ear maroñ jeorl̦o̦k jerawiwi ko an ro ewõr aer tõmak kõnke ear jel̦ã bwe katok in mour eo an enaaj tokãlik kalbubuuk jerawiwi kein aer.—Matu 9:​2-6.