1-2. Ta eo juon armej ej aikuj kõm̦m̦ane m̦okta jãn an peptaij?

 ILOWAAN iiõ ko l̦alem rej kab mootl̦o̦k, elõñl̦o̦k jãn 1 milien armej rar peptaij im erom Ri-Kõnnaan ro an Jeova. Ãinwõt ri-kal̦oor Timote, elõñ iaan rein rar katak kõn m̦ool eo “jãn ke [rar] niñniñ.” (2 Tim. 3:​14, 15) Jet iaan rein rar katak kõn Jeova ilo iien eo rej rũtto, im ro jet rar katak ãlikin aer tõpar iiõ ko rerũttol̦o̦k. Juon lel̦l̦ap me ear katak Baibõl̦ ippãn Ri-Kõnnaan ro an Jeova, ear peptaij ke ear 97 an iiõ!

² El̦aññe kwõj juon rũkkatak ak kwõj katak ippãn rũtto ro jem̦am̦ im jinõm̦ me rej ri-karejeran Jeova, kwõj ke l̦õmn̦ak kõn am̦ nãj peptaij? Men in ej juon mejãnkajjik elukkuun em̦m̦an! Bõtab m̦okta jãn am̦ maroñ peptaij, kwõnaaj aikuj ajel̦o̦k mour eo am̦ ñan Jeova. Katak in enaaj kõnono kõn ta mel̦el̦ein ñan ajel̦o̦k mour eo am̦ ñan E. Enaaj bareinwõt kõnono kõn etke kwõjjab aikuj jenliklik in bõk buñtõn ne in innem peptaij, ñe kwõj kile bwe kwõpojakin kõm̦m̦ani men kein ruo.

TA MEL̦EL̦EIN ÑAN AJEL̦O̦K MOUR EO AM̦?

3. Kwal̦o̦k waanjoñak ko kõn jet iaan ro ilo Baibõl̦ me kar ajel̦o̦k er ñan Jeova.

³ Ilo Baibõl̦, juon eo me ear ajel̦o̦k mour eo an ñan Jeova ej juon eo me kar kããlõte ak kõjenolo̦ke bwe en kõm̦m̦ane juon jerbal eokkwõjarjar. Aelõñin Israel ear juon aelõñ me em̦õj kar ajel̦o̦k ñan Jeova. Meñe ãindein, ak ewõr jet iaan ri-Israel ro me kar ajel̦o̦k er ilo juon wãween ejejuwaan. Ñan waanjoñak, Aron ear kõn̦ak juon “kein kainõknõk . . . eokkwõjarjar,” ak juon aen gold me kar likũt itum̦aanin at eo an. Aen gold in ear kaalikkar bwe em̦õj kõjenolo̦ke bwe en kõm̦m̦ane juon jerbal ejejuwaan—jerbalin bũrij l̦apl̦ap ñan aelõñin Israel. (Liv. 8:​9, UBS) Kar bareinwõt ajel̦o̦k ri-Nazerait ro ñan Jeova ilo juon wãween ejejuwaan. Naan eo “Nazerait” ej itok jãn naanin Hibru eo nazirʹ, im ej mel̦el̦ein “Eo Em̦õj Kõjenolo̦ke,” ak “Eo Em̦õj Ajel̦o̦k.”  Ewõr kakien ko ilo Kien Moses me Ri-Nazerait ro rar aikuj l̦oori.—Bõn. 6:​2-8, UBS.

4. (1) Ñe kwõj ajel̦o̦k mour eo am̦ ñan Jeova, ta men eo eaorõktata ilo mour eo am̦? (2) Ta mel̦el̦ein ñan “kaarmejjeteik” eok make? (Bar lale pija eo.)

⁴ Ñe kwõj ajel̦o̦k mour eo am̦ ñan Jeova, kwõj kããlõt ñan erom juon ri-kal̦ooran Jesus Christ im ñan kõm̦m̦an bwe ankilaan Anij en men eo eaorõktata ilo mour eo am̦. Men kein rej kitibuj ta? Jesus ear ba: “Jabdewõt eo ekõn̦aan l̦oor eõ, en kaarmejjeteik e make.” (Matu 16:24) Naanin Grik ko me kar ukoti ñan naan kein “en kaarmejjeteik e make,” emaroñ bar ukok ilo wãween in, “juon eo ejako an mour ñan e make.” Kõnke em̦õj am̦ ajel̦o̦k mour eo am̦ ñan Jeova, kwõnaaj aikuj jum̦ae jabdewõt men me enaaj kabũrom̦õje. (2 Kor. 5:​14, 15) Men in ekitibuj am̦ jum̦aik “jerbal ko an kanniõk,” ãinwõt mourin l̦õñ. (Gal. 5:​19-21; 1 Kor. 6:18) Ijoke, am̦ pokake kakien kein enaaj ke kõm̦m̦an bwe en kanooj pen mour eo am̦? Eban. Eban pen el̦aññe kwõj yokwe Jeova im kwõj lukkuun tõmak bwe kakien ko an rej ñan tokjãn eo am̦. (Sam 119:97; Ais. 48:​17, 18) Juon jeid im jatid em̦m̦aan etan Nicholas ej ba: “Kwõmaroñ watõk kakien ko an Jeova ãinwõt juon kõjãm aen ilo jikin kalbuuj me ej bõbraik eok jãn am̦ kõm̦m̦ani men ko kokõn̦aan kõm̦m̦ani ak ãinwõt juon wõrwõrin l̦aiõn me ej kõjparok eok jãn am̦ jorrããn.”

5. (1) Ewi wãween am̦ ajel̦o̦k mour eo am̦ ñan Jeova? (2) Ta oktak eo ikõtaan am̦ ajel̦o̦k mour eo am̦ ñan Jeova im am̦ peptaij? (Bar lale pija eo.)

⁵ Ewi wãween am̦ ajel̦o̦k mour eo am̦ ñan Jeova? Kwõj jar im kallim̦ur ñane bwe kwõnaaj kabuñ ñan E wõt im kõm̦m̦an bwe ankilaan en men eo eaorõktata ilo mour eo am̦. Mel̦el̦ein bwe kwõj kallim̦ur ñan Jeova bwe kwõnaaj wõnm̦aanl̦o̦k wõt im yokwe E “kõn aolepen bũruom̦, im kõn aolepen am̦ mour, im kõn aolepen am̦ l̦õmn̦ak, im kõn aolepen am̦ kajoor.” (Mark 12:30) Kwõj ajel̦o̦k mour  eo am̦ ñan Jeova ilo jar, im men in ej kõtaamiro wõt. Ijoke, ñe kwõj peptaij kwõj kõm̦m̦ane men in ilo̦bwilej; ej kaalikkar ñan ro jet bwe em̦õj am̦ ajel̦o̦k mour eo am̦ ñan Jeova. Am̦ ajel̦o̦k mour eo am̦ ñan E ej juon kallim̦ur ekanooj in aorõk. Kwõj aikuj kate eok ñan kajejjete kallim̦ur in am̦, im Jeova ej kõtmãne bwe kwõn kõm̦m̦ane men in.—Ekl. 5:​4, 5.

ETKE EAORÕK ÑAN AJEL̦O̦K MOUR EO AM̦ ÑAN JEOVA?

6. Ta eo ej kõm̦akũt juon armej ñan ajel̦o̦k mour eo an ñan Jeova?

⁶ Un eo el̦aptata unin am̦ ajel̦o̦k mour eo am̦ ñan Jeova ej kõnke kwõj yokwe E. Yokwe eo am̦ ejjab pedped ioon eñjake ko am̦ wõt. Ijello̦kun men in, ear eddekl̦o̦k yokwe eo am̦ ñan Jeova itok wõt jãn am̦ kar bõk “jel̦ãl̦o̦kjen̦ eo ejim̦we” kõn E im karõk ko an. (Kol. 1:9) Men ko kwaar katak jãn Baibõl̦ rar kõm̦akũt eok ñan lukkuun tõmak bwe (1) em̦ool an Jeova pãd, (2) Baibõl̦ eo ej Naanin Anij, im (3) ej kõjerbal doulul eo an ñan kajejjet ankilaan.

7. Ta ko jej aikuj kõm̦m̦ani m̦okta jãn ad ajel̦o̦k mour eo ad ñan Anij?

⁷ Ro me em̦õj aer ajel̦o̦k mour ko aer ñan Jeova rej aikuj mel̦el̦e kõn katak ko jinointata ilo Naanin Anij im mour ekkar ñan l̦õmn̦ak ko an Jeova ikijjeen ta ko rem̦m̦an im ta ko renana. Rej kate er joñan wõt aer maroñ ñan kwal̦o̦k kõn tõmak eo aer ñan ro jet. (Matu 28:​19, 20) Yokwe eo aer ñan Jeova em̦õj an eddekl̦o̦k im relukkuun kõn̦aan kabuñ ñan E wõt kõn aolepen bũrueer. Ãindein ke bar kwe? El̦aññe kwõj yokwe Jeova kõn aolepen bũruom̦, kwõban ajel̦o̦k mour eo am̦ ñan E im peptaij bwe kwõn kabuñbũruon eo ej katak Baibõl̦ ippam̦ ak rũtto ro jinõm̦ im jem̦am̦.  Bareinwõt, kwõban kõm̦m̦ani men kein kõnke kokõn̦aan baj l̦oori wõt ta ko ro m̦õttam̦ rej kõm̦m̦ani.

8. Ñe el̦ap am̦ kam̦m̦oolol Jeova kõn aolep men ko ear kõm̦m̦ani ñan kwe, ewi wãween an men in maroñ jipañ eok ñan ajel̦o̦k mour eo am̦ ñane? (Sam 116:​12-14)

⁸ Ñe kwõj l̦õmn̦ak kõn aolep men ko em̦õj an Jeova kõm̦m̦ani ñan kwe, men in enaaj kõm̦akũt eok ñan kam̦m̦oolol e im kõn̦aan ajel̦o̦k mour eo am̦ ñane. (Riit Sam 116:​12-14.) Baibõl̦ eo ej kwal̦o̦k bwe Jeova ej letok “aolep menin letok ko rem̦m̦an im reweeppãn.” (Jem. 1:17) Menin letok eo an el̦aptata ñan kõj ej katok in mour eo an eo Nejin, Jesus. Baj l̦õmn̦ak m̦õk. Katok in mour eo an Jesus ear kõmaroñ eok ñan ejaake juon jem̦jerã epaak ippãn Jeova. Bareinwõt, em̦õj an Anij lewaj ñan kwe kõjatdikdik eo ñan mour ñan indeeo. (1 Jon 4:​9, 10, 19) Am̦ ajel̦o̦k mour eo am̦ ñan Jeova ej juon iaan wãween ko rem̦m̦antata kwõmaroñ kwal̦o̦k am̦ kam̦m̦oolol kõn menin letok in an el̦aptata me ej kaalikkar yokwe eo an el̦ap. Ak ejjab kõn men in wõt, ak bareinwõt kõn aolep jeraam̦m̦an ko jet me em̦õj an liwaj ñan kwe. (Dut. 16:17; 2 Kor. 5:15) Kar kaalikkar boin in ilo katak 46 boin 4, ilo bok eo etan M̦õn̦õn̦õ kõn Mour ñan Indeeo!, eo me ekitibuj pijain alwõj eo me jilu minit aetokin etan Presenting Your Gifts to God.

KWÕPOJAK KE ÑAN AJEL̦O̦K MOUR EO AM̦ IM PEPTAIJ?

9. Etke juon armej ejjab aikuj l̦õmn̦ak bwe ej aikuj ajel̦o̦k mour eo an ñan Jeova meñe ejjañin pojak?

⁹ Kwõmaroñ kile bwe kwõjjab pojak in ajel̦o̦k mour eo am̦ ñan Jeova im peptaij. Bõlen ej wõr wõt oktak ko kwõj aikuj kõm̦m̦ani bwe kwõn maroñ mour ekkar ñan l̦õmn̦ak ko an Jeova, ak bõlen kwõj aikuj iien ñan kõkajoorl̦o̦k tõmak eo am̦. (Kol. 2:​6, 7) Ilo m̦ool, ejjab joñan wõt juon an aolep rũkkatak ro eddekl̦o̦k ilo yokwe eo aer ñan Jeova, im eoktak dettan aolep jo̦dikdik ro jãn doon ke rar pojakin ajel̦o̦k mour ko aer im peptaij. Kajjioñ etale eok make ñan lale ta ko kwõj aikuj kakõm̦anm̦anl̦o̦k, innem kate eok ñan kõm̦m̦ani men kein im jab keidi eok make ñan ro jet.—Gal. 6:​4, 5.

10. Ta ko kwõmaroñ kõm̦m̦ani ñe kwõj kile bwe kwõjjañin pojak ñan ajel̦o̦k mour eo am̦ ñan Jeova im peptaij? (Bar lale bo̦o̦k eo etan “ Ñan Ro Rar Dik im Rũttol̦o̦k ilo M̦ool Eo.”)

¹⁰ Meñe kwõj kile bwe kwõjjañin pojak ñan ajel̦o̦k mour eo am̦ ñan Jeova, ak kwõn wõnm̦aanl̦o̦k wõt im kajjioñ kõttõpare men in ãinwõt juon am̦ mejãnkajjik. Jar im kajjitõk bwe Jeova en jipañ eok ñan kõm̦m̦ani oktak ko kwõj aikuj kõm̦m̦ani. (Pil. 2:13; 3:16) Kwõmaroñ lõke bwe enaaj eo̦roñ jar in am̦ im jipañ eok.—1 Jon 5:14.

UNIN AN JET JENLIKLIK

11. Ewi wãween an Jeova naaj jipañ kõj ñan dãpij wõt ad tiljek ñane?

¹¹ Ewõr ro me rej jenliklik in ajel̦o̦k mour ko aer ñan Jeova im peptaij meñe repojakin kõm̦m̦ani men kein. Remaroñ l̦õmn̦ak im ba, ‘Ta el̦aññe ãlikin aõ peptaij ikõm̦m̦ane juon jerawiwi el̦ap innem ibukwel̦o̦k?’ El̦aññe kwõj bõk l̦õmn̦ak rot in, kwõmaroñ bõk kaenõm̦m̦an ilo am̦ jel̦ã bwe Jeova enaaj lewaj aolep men ko kwõj aikuji bwe kwõn maroñ “mour ekkar ñan wãween eo [me] ej m̦õn̦õn̦õ kake.” (Kol. 1:10) Enaaj bareinwõt lewaj kajoor bwe kwõn maroñ kõm̦m̦ani men ko rejim̦we. Em̦õj an kadede jipañ elõñ iaan ro jeid im jatid bwe ren kõm̦m̦ane men in. (1 Kor. 10:13) Eñin juon iaan un ko unin an jejjo wõt armej bukwel̦o̦k jãn eklejia ko ad. Jeova ej jipañ armej ro an bwe ren dãpij wõt aer tiljek ñane.

12. Ewi wãween ad maroñ kõjparok bwe jen jab kõm̦m̦ane juon jerawiwi el̦ap?

¹² Ewõr ippãn aolep armej ro rejjab weeppãn kõn̦aan eo ñan kõm̦m̦ani men ko renana. (Jem. 1:14) Ijoke, kwõj aikuj kããlõt ta  eo kwõnaaj kõm̦m̦ane ñe men in ej wal̦o̦k. Ilo m̦ool, kwe eo kwõj peek ta ko kwõnaaj kõm̦m̦ani ilo mour n̦e am̦. Jet armej rej ba bwe jejjab maroñ irooj ioon eñjake ko ad im kõm̦m̦an ko ad. Bõtab men in ejjab m̦ool. Kwõmaroñ katak ñan irooj ioon kõn̦aan ko am̦ renana. Innem meñe kwõmaroñ kõn̦aan kõm̦m̦ane juon men enana, ak kwõmaroñ kããlõt ñan jab kõm̦m̦ane men in. Bwe kwõn maroñ kõm̦m̦ane men in, jar ñan Jeova kajjojo raan. Keini am̦ katak Naanin Anij ippam̦ make. Kobal̦o̦k ilo iien kweilo̦k ko ad. Im kwal̦o̦k naan ñan ro jet kõn tõmak eo am̦. Ñe kwõnaaj niknik ilo am̦ kõm̦m̦ani men kein enaaj lujur eok ñan dãpij wõt am̦ tiljek ñan Jeova. Bareinwõt, jab mel̦o̦kl̦o̦k bwe Jeova enaaj jipañ eok ñan dãpij am̦ tiljek.—Gal. 5:16.

13. Joñak ta eo em̦m̦an Josep ear likũt ñan kõj?

¹³ Kwõnaaj lo bwe epidodol̦o̦k am̦ dãpij am̦ tiljek ñan Jeova ñe em̦õj am̦ pepel̦o̦k im̦aan kõn ta eo kwõnaaj kõm̦m̦ane ñe kwõj iioon juon menin kapo. Baibõl̦ eo ej kwal̦o̦k kõn jet iaan ro me rar kõm̦m̦ane men in, meñe rein rar jab bar weeppãn ãinwõt kõj. Ñan waanjoñak, elõñ alen an kar lio pãleen Potipar kajjioñ kapo Josep bwe en babu ippãn. Ijoke, em̦õj an kar Josep jel̦ã kadede ta eo enaaj kõm̦m̦ane. Baibõl̦ ej ba bwe “ear m̦akoko,” im ear ba: “Ekõjkan aõ maroñ kõm̦m̦an nana in el̦ap, im jerawiwi n̦ae Anij?” (Jen. 39:​8-10, UBS) Alikkar bwe Josep ear jel̦ã ta eo enaaj kar kõm̦m̦ane m̦okta jãn an kar lio kajjioñ kapoiki. An Josep kar ãindein ear kõm̦m̦an bwe en pidodo an kõm̦m̦ane men eo ejim̦we ke kar kapoiki.

14. Ewi wãween jemaroñ katak ñan jum̦aik menin kapo ko?

¹⁴ Ewi wãween kwõmaroñ anõke Josep im dãpij wõt am̦ tiljek ñan Jeova ñe kwõj iioon menin kapo ko? Kwõmaroñ pepe kiiõ kõn ta eo kwõnaaj kõm̦m̦ane ñe kwõnaaj iioon juon menin kapo. Katak ñan m̦õkaj im jum̦aik men ko Jeova ej diki, im kwõn m̦akoko in l̦õmn̦ak kaki. (Sam 97:10; 119:165) Ñe kwõnaaj ãindein, kwõban po im jerawiwi ñe kwõj iioon menin kapo ko kõnke em̦õj am̦ jek ippam̦ make kõn ta eo kwõnaaj kõm̦m̦ane.

15. Ewi wãween an juon armej maroñ kwal̦o̦k bwe ej “kanooj kappukote” Jeova? (Hibru 11:6)

¹⁵ Bõlen em̦õj am̦ jel̦ã bwe em̦õj am̦ lo m̦ool eo im bwe kokõn̦aan karejar ñan Jeova kõn aolepen bũruom̦, bõtab kwõj l̦õmn̦ak wõt bwe kwõjjañin pojak ñan ajel̦o̦k mour eo am̦ ñan E im peptaij. Ñe ãindein am̦ eñjake, kwõmaroñ  anõk joñak eo an Kiiñ Devid. Kwõmaroñ akwel̦ap ñan Jeova im ba: “O Anij, kwõn etale eõ im jel̦ã bũruõ; Kwõn mãlejjoñe eõ im kile l̦õmn̦ak ko aõ. Kwõn lale el̦aññe ewõr m̦on̦ ilo ña, im kwõn tõl eõ ilo ial̦ eo ej ñan indeeo.” (Sam 139:​23, 24, UBS) Jeova ej kõjeraam̦m̦an ro rej “kanooj kappukote.” Ilo am̦ kate eok bwe kwõn tõpar mejãnkajjik eo am̦ ñan ajel̦o̦k mour eo am̦ ñan E im peptaij, kwõj kwal̦o̦k ñan Jeova bwe kwõj kanooj kappukote.—Riit Hibru 11:6.

WÕNM̦AANL̦O̦K WÕT IM EPAAKEL̦O̦K JEOVA

16-17. Ewi wãween an Jeova karuwaakl̦o̦k ro me rar dik im rũttol̦o̦k ilo m̦ool eo ñane? (Jon 6:44)

¹⁶ Jesus ear ba bwe Jeova ej karuwaakl̦o̦k aolep ri-kal̦oor ro an ñane. (Riit Jon 6:44.) L̦õmn̦ak m̦õk kõn ewi joñan an kabwilõñlõñ men in im wãween an men in jitõñwaj ñan kwe. Jeova ej lo men ko rem̦m̦an ippãn kajjojo armej ej karuwaakl̦o̦k ñane. Ej watõk kajjojo iaaer ãinwõt “armej [ro] raorõk.” (Dut. 7:6) Eñin wãween an watõk kwe.

¹⁷ Ijoke, bõlen kwõj juon jo̦dikdik me rũtto ro jemãn im jinen rej Ri-Kõnnaan ro an Jeova. Kwõmaroñ l̦õmn̦ak bwe un eo wõt unin am̦ karejar ñan Jeova ej kõnke jem̦am̦ im jinõm̦ rej karejar ñane, im ejjab kõnke Jeova ear karuwaakl̦o̦k kwe ñan E. Bõtab Baibõl̦ ej ba: “Kom̦win kõm̦m̦an bwe kom̦win epaake Anij, im enaaj epaake waj kom̦.” (Jem. 4:8; 1 Kro. 28:9) Ñe kwõj em̦m̦akũt m̦okta im epaakel̦o̦k Jeova, enaaj epaake waj kwe. Jeova ejjab watõk eok ãinwõt juon eo ej baj uwaan juon kumi. Ijoke, ej karuwaakl̦o̦k kajjojo armej ñan e make—ekoba kajjojo iaan ro rar dik im rũttol̦o̦k ilo m̦ool eo. Ñe juon iaan rein ej em̦m̦akũt m̦okta im epaakel̦o̦k Jeova, E bareinwõt enaaj em̦m̦akũt im epaakel̦o̦k e, ãinwõt an Jemes 4:8 kwal̦o̦k kake.—Keidi 2 Tessalonika 2:13.

18. Ta eo jenaaj etale ilo katak eo tok juon? (Sam 40:8)

¹⁸ Ñe kwõj ajel̦o̦k mour eo am̦ ñan Jeova im peptaij, kwõj kõm̦m̦ane ejja men eo wõt Jesus ear kõm̦m̦ane. Ear m̦õn̦õn̦õ in kõm̦m̦ane jabdewõt men me Jemãn ear kajjitõk bwe en kõm̦m̦ane. (Riit Sam 40:8; Hib. 10:7) Ilo katak eo tok juon, jenaaj etale ta eo enaaj jipañ eok ñan wõnm̦aanl̦o̦k wõt im karejar ñan Jeova ilo tiljek ãlikin am̦ peptaij.