Riit Jenesis 37:​23-28; 39:​17-23 ñan katak jãn bwebwenato eo an Josep kõn an kar kijenmej ium̦win wãween ko rejjab jim̦we.

Etale aolepen bwebwenato eo. Etke ear jab jim̦we wãween an ro jet kar kõm̦m̦an ñan Josep? (Jen. 37:​3-11; 39:​1, 6-10) Ewi toon an kar Josep aikuj kijenmej ium̦win wãween ko rejjab jim̦we? (Jen. 37:2; 41:46) Ilo kar iien en̦, ta eo Jeova ear kõm̦m̦ane ñan jipañ Josep, im ta eo Ear jab kõm̦m̦ane?—Jen. 39:​2, 21; w23.01 17 pãr. 13.

Kam̦wilal̦l̦o̦k am̦ mel̦el̦e. Baibõl̦ eo ejjab kwal̦o̦k bwe Josep ear jojomare make ke lio ippãn Potipar ear n̦aruon. Ewi wãween an eoon kein maroñ jipañ kõj ñan mel̦el̦e kõn unin an Josep maroñ kar kããlõt ñan jab ba jabdewõt ak kõn etke jejjab aikuj kõtmãne bwe Baibõl̦ eo en kwal̦o̦k aolep mel̦el̦e ko? (JK. 20:2; Jon 21:25; Jrb. 21:37) Ta kadkad ko ippãn Josep me remaroñ kar jipañe bwe en kijenmej ium̦win wãween ko rejjab jim̦we?—Mai. 7:7; Luk 14:11; Jem. 1:​2, 3.

L̦õmn̦ak kõn ta ko kwõmaroñ katak. Kajjitõk ippam̦ make:

• ‘Wãween ta ko rejjab jim̦we imaroñ kõtmãne bwe inaaj iiooni kõnke ij juon ri-kal̦ooran Jesus?’ (Luk 21:​12, 16, 17; Hib. 10:​33, 34)

• ‘Ta ko imaroñ kõm̦m̦ani kiiõ me renãj jipañ eõ ñan lo tõprak ilo aõ naaj kijenmej ium̦win wãween ko rejjab jim̦we?’ (Sam 62:​7, 8; 105:​17-19; w19.07 2-7)