1. Ewi wãween an kar rijjilõk Paul l̦õmn̦ak kõn rijjipañ ro?

 RIJJIPAÑ ro rej kõm̦m̦ani jerbal ko relukkuun aorõk ilo eklejia eo. Rijjilõk Paul ear kaorõk em̦m̦aan im likao rein retiljek. Ñan waanjoñak, ke ear jejel̦o̦k ñan Kũrjin ro ilo Pilippai, ear yokyokwe rijjipañ ro ekoba em̦m̦aan ro rej lale eklejia.—Pil. 1:1.

2. Ewi wãween an juon jeid im jatid em̦m̦aan etan Luis eñjake kõn jerbal ko an ãinwõt juon rijjipañ?

² Meñe kwõrũtto ak kwõdik, ak elõñ em̦m̦aan ro jeid im jatid me em̦õj aer peptaij rej lo el̦ap lañlõñ ilo aer jerbal ãinwõt juon rijjipañ. Ñan waanjoñak, Devan ekar 18 an iiõ ke kar jitõñe bwe en juon rijjipañ. Ijoke, juon jeid im jatid em̦m̦aan etan Luis ear erom juon rijjipañ ke ear 50 jim̦a an iiõ. Ewi wãween an eñjake kõn an kar erom juon rijjipañ? Ear ba: “Ilukkuun m̦õn̦õn̦õ in jerbal ñan ro jeiũ im jatũ ilo eklejia eo ilo wãween in. El̦ap aer kwal̦o̦k yokwe ñan ña, im kiiõ imaroñ kwal̦o̦k yokwe eo aõ ñan er.” Elõñ rijjipañ ro rej bõk ejja eñjake in wõt.

3. Ta kajjitõk ko jenaaj etali ilo katak in?

³ El̦aññe kwõj juon jeid im jatid em̦m̦aan ak likao me em̦õj an peptaij im kwõjjañin erom juon rijjipañ, kwõmaroñ ke kõm̦m̦an bwe men in en am̦ mejãnkajjik? Ta eo emaroñ kõm̦akũt eok ñan kõm̦m̦ane men in? Im ta ko Baibõl̦ ej ba kwõj aikuj kõm̦m̦ani bwe kwõn maroñ erom juon rijjipañ? Ilo katak in, jenaaj etali uwaak ko ñan kajjitõk kein. Bõtab m̦oktata, jen etale ta jerbal ko juon rijjipañ ej kõm̦m̦ani.

TA JERBAL KO AN JUON RIJJIPAÑ?

4. Ta jerbal ko an juon rijjipañ? (Bar lale pija eo.)

⁴ Juon rijjipañ ej juon jeid im jatid em̦m̦aan ak likao me em̦õj an peptaij im jetõb kwõjarjar ear jitõñe bwe en jipañ em̦m̦aan ro rej lale eklejia kõn elõñ jerbal raorõk. Jet rijjipañ ro rej lale bwe  en wõr an ri-kwal̦o̦k naan ro teretore im bok ko ñan aer maroñ kwal̦o̦k naan. Ro jet rej jipañ karreo im kõjparok Im̦õn Kweilo̦k eo. Rijjipañ ro rej bareinwõt kõm̦m̦ane jerbalin lale kõjãm im lale jikin kõjañjañ eo im pijain alwõj ko ilo iien kweilo̦k ko an eklejia. Jerbal ko rijjipañ ro rej kõm̦m̦ani el̦ap aer jipañ. Ak men eo el̦aptata an aorõk ej bwe rijjipañ ro rej em̦m̦aan im likao ro me rej yokwe Jeova im kate er ñan mour ilo juon wãween ej kabuñbũruon. Bareinwõt, relukkuun yokwe ro jeier im jatier ilo tõmak. (Matu 22:​37-39) Ewi wãween an juon em̦m̦aan ak juon likao me em̦õj an peptaij maroñ kal̦apl̦o̦k ijo kun̦aan im erom juon rijjipañ?

5. Ewi wãween an juon jeid im jatid em̦m̦aan ak likao maroñ kate e bwe en tõpar mejãnkajjik eo an ñan erom juon rijjipañ?

⁵ Baibõl̦ eo ej kwal̦o̦k kõn ta ko juon em̦m̦aan ak likao ej aikuj kõm̦m̦ani bwe en maroñ erom juon rijjipañ. (1 Tim. 3:​8-10, 12, 13) El̦aññe kokõn̦aan jipañ ro jet ãinwõt juon rijjipañ, kwõmaroñ katak kõn ta eo Baibõl̦ ej ba juon rijjipañ ej aikuj kõm̦m̦ani, innem kate eok ñan kõm̦m̦ani men kein. Bõtab m̦oktata, kwõj aikuj l̦õmn̦ak kõn unin am̦ kõn̦aan kal̦apl̦o̦k ijo kun̦aam̦ im erom juon rijjipañ.

ETKE KOKÕN̦AAN EROM JUON RIJJIPAÑ?

6. Ta eo ej aikuj kõm̦akũt eok ñan kõm̦m̦ane jabdewõt kain jerbal ñan ro jeim̦ im jatũm̦? (Matu 20:28; Bar lale pija eo.)

⁶ L̦õmn̦ak m̦õk kõn joñak eo ad el̦aptata, Jesus Christ. Aolep men ko ear kõm̦m̦ani, ear kõm̦m̦ani kõnke ear yokwe Jemãn im armej ro. Yokwe in ear lukkuun kõm̦akũt Jesus ñan jerbal ñan ro jet im kõm̦m̦ani jerbal ko rettã. (Riit Matu 20:28; Jon 13:​5, 14, 15) El̦aññe yokwe ej men eo ej kõm̦akũt eok, Jeova enaaj kõjeraam̦m̦an eok im jipañ eok ñan tõpar mejãnkajjik eo am̦ ñan erom juon rijjipañ.—1 Kor. 16:14; 1 Pit. 5:5.

7. Etke juon jeid im jatid em̦m̦aan ak likao ej aikuj kõjparok bwe en jab lelõñl̦o̦k e make ak kappukot bwe en utiej?

⁷ Ilo lal̦ in, el̦ap an armej ro reilo̦k im kautiej armej ro me rej lelõñl̦o̦k er make. Ak ejjab ãindein ilo doulul eo an Jeova. Juon jeid im jatid em̦m̦aan ak likao me ej yokwe ro jet ãinwõt kar Jesus ejjab kõn̦aan irooj ioon ro jet, im ejjab kõn̦aan bwe ro jet ren kautieje im l̦õmn̦ak bwe ej em̦m̦anl̦o̦k jãn ro jet. El̦aññe kar jitõñ juon em̦m̦aan ak likao bwe en juon rijjipañ ak ej kappukot bwe en utiej, emaroñ jab kõn̦aan kõm̦m̦ani jerbal ko rettã me rej menin  aikuj ñan lale jiip ro raorõk an Jeova. Emaroñ l̦õmn̦ak bwe elukkuun aorõk ñan an kõm̦m̦ani jerbal kein rettã. (Jon 10:12) Jeova eban kõjeraam̦m̦an juon armej me ej kappukot bwe en utiej im ej lelõñl̦o̦k e jãn ro jet.—1 Kor. 10:​24, 33; 13:​4, 5.

8. Ta naanin kakapilõk eo Jesus ear lel̦o̦k ñan rijjilõk ro an?

⁸ Jet iien, meñe ro rar lukkuun epaake Jesus ak rar bar kõn̦aan bõk jet jerbal ko kõn un ko rejjab jim̦we. L̦õmn̦ak kõn men eo rijjilõk Jemes im Jon rar kõm̦m̦ane. Rar kajjitõk ippãn Jesus bwe en lel̦o̦k ñan er juon jikin eutiej ilo Aelõñ eo an. Jesus ear jab nõbar er kõn kõttõpar in aer. Ijello̦kun an kar ãindein, ear kõmel̦el̦eik aolep rijjilõk ro an 12 im ba: “El̦aññe jabdewõt iaami ekõn̦aan bwe en utiej, ej aikuj ri-jerbal ñan kom̦. Im el̦aññe jabdewõt iaami ekõn̦aan bwe en m̦oktata, ej aikuj jerbal ñan aolep ãinwõt juon ri-karejar.” (Mark 10:​35-37, 43, 44) Em̦m̦aan im likao ro jeid im jatid me rej kal̦apl̦o̦k ijo kun̦aaer kõn un ko rejim̦we—bwe ren maroñ karejar ñan ro jet—renaaj juon jeraam̦m̦an ñan eklejia eo.—1 Tes. 2:8.

TA EO EMAROÑ KÕKAJOORL̦O̦K KÕN̦AAN EO AM̦ ÑAN KAL̦APL̦O̦K IJO KUN̦AAM̦?

9. Ewi wãween kwõmaroñ kõkajoorl̦o̦k kõn̦aan eo am̦ ñan kal̦apl̦o̦k ijo kun̦aam̦?

⁹ Ejjel̦o̦k pere bwe kwõj yokwe Jeova im kokõn̦aan karejar ñan ro jet. Meñe ãindein, ak bõlen kwõmaroñ jab kõn̦aan kõm̦m̦ani aolep jerbal ko juon rijjipañ ej aikuj kõm̦m̦ani. Ewi wãween kwõmaroñ kõkajoor kõn̦aan eo am̦ ñan kal̦apl̦o̦k ijo kun̦aam̦? L̦õmn̦ak kõn joñan am̦ naaj m̦õn̦õn̦õ ñan karejar im jipañ ro jeim̦ im jatũm̦. Jesus ear ba: “El̦apl̦o̦k m̦õn̦õn̦õ ilo lel̦o̦k jãn bõk.” (Jrb. 20:35) Jesus ear jab baj ba wõt naan kein, ak ear bar mour ekkar ñan naanin kakapilõk in. Ear lo m̦õn̦õn̦õ eo em̦ool ilo an karejar ñan ro jet, im kwõnaaj bareinwõt lo m̦õn̦õn̦õ ilo am̦ ãindein.

10. Ewi wãween an kar Jesus kwal̦o̦k bwe ear m̦õn̦õn̦õ in jerbal ñan ro jet? (Mark 6:​31-34)

¹⁰ L̦õmn̦ak kõn juon waanjoñak ikijjeen wãween an kar Jesus kwal̦o̦k bwe ear m̦õn̦õn̦õ in jerbal ñan ro jet. (Riit Mark 6:​31-34.) Juon iien, Jesus im rijjilõk ro an rar m̦õk. Rar etal ñan juon jikin ettol̦o̦k bwe ren maroñ kakkije. Bõtab juon jarlepju ear ettõr im̦aaerl̦o̦k kõnke rar kõjatdikdik bwe Jesus enaaj katakin er. Ilo m̦ool, emaroñ kar ba jaab ñan er kõnke e im rijjilõk ro an ekar “ejjel̦o̦k iien aer kakkije im m̦õñã.” Ak Jesus emaroñ kar jilkinl̦o̦k armej ro ãlikin an katakin er juon ak ruo men. Bõtab kõnke yokwe ej men eo ear kõm̦akũt e, “ear jino katakin er kõn elõñ men.” Innem ear wõnm̦aanl̦o̦k wõt im katakin er m̦ae iien “ear jotal̦o̦k.” (Mark 6:35) Ear kõm̦m̦ane men in, ejjab kõnke ekar aikuj kõm̦m̦ane ak kõnke “ear tũriam̦okake er.” Ear kõn̦aan katakin er kõnke ear yokwe er. Jesus ear lo el̦ap lañlõñ ilo an karejar im jerbal ñan ro jet.

11. Ewi wãween an kar Jesus jipañ armej ro ilo wãween ko jet? (Bar lale pija eo.)

¹¹ Jesus ear jipañ armej ro ilo an kar katakin er kõn Anij, ak ear bar jipañ er ilo wãween ko jet. Ear lel̦o̦k kijeer m̦õñã ilo kabwilõñlõñ im kajjitõk bwe ri-kal̦oor ro an ren ajeji m̦õñã kein ñan armej ro. (Mark 6:41) Ilo an kar kõm̦m̦ane men in, ear katakin ri-kal̦oor ro an kilen aer karejar ñan ro jet. Ear bareinwõt kwal̦o̦k ñan er bwe jerbal ko jet—ãinwõt jerbal ko rijjipañ ro remaroñ kõm̦m̦ani—relukkuun aorõk. Pijaikl̦o̦k lañlõñ eo an rijjilõk ro ke rar jerbal ippãn Jesus ñan ajeji m̦õñã ko ilo kabwilõñlõñ m̦ae iien eo “aolep armej ro rar m̦õñã im mat”! (Mark 6:42) Eñin ej juon wõt waanjoñak kõn wãween an kar Jesus likũt aikuj ko an ro jet m̦okta jãn aikuj ko an make. Ear kõjerbale aolepen mour eo an ijin ioon lal̦ ñan karejar ñan armej. (Matu 4:23; 8:16) Jesus ear lo lañlõñ im ear jubũruon ilo an kar katakin ro jet im lale im  kea kõn aikuj ko aer. Ejjel̦o̦k pere bwe kwõnaaj bareinwõt lo el̦ap lañlõñ ilo am̦ m̦õn̦õn̦õ in karejar ñan ro jet im kate eok ñan erom juon rijjipañ.

12. Etke ejjel̦o̦k juon iaad ej aikuj l̦õmn̦ak bwe ejjel̦o̦k ad kapeel im maroñ ñan jipañ eklejia eo?

¹² El̦aññe kwõj l̦õmn̦ak bwe ejjel̦o̦k kapeel im maroñ ko rel̦l̦ap ippam̦, eokwe jab ebbweer. Ejjel̦o̦k pere bwe ewõr wãween ko ippam̦ me kwõmaroñ kõjerbali ñan jipañ eklejia eo. Kwõmaroñ bõk tokjãn jãn am̦ jar im kõl̦mãnl̦o̦kjen̦ kõn l̦õmn̦ak ko an Paul ilo 1 Korint 12:​12-30. Naan ko an Paul rej kaalikkar bwe kwe, im aolep ri-karejar ro jet an Jeova, kom̦ kajjojo lukkuun aorõk im ewõr kun̦aami ilo eklejia eo. El̦aññe kwõjjab maroñ jerbal ãinwõt juon rijjipañ ilo tõre in kõnke kwõj aikuj kakõm̦anm̦anl̦o̦k jet wãween ko ippam̦, eokwe jab ebbweer. Ijoke, kate wõt eok ñan kõm̦m̦ane jabdewõt men ñan karejar ñan Jeova im jipañ ro jeim̦ im jatũm̦. Kwõmaroñ tõmak im lõke bwe em̦m̦aan ro rej lale eklejia renaaj l̦õmn̦ak kõn maroñ ko am̦ im lewaj ñan kwe jerbal ko kwõmaroñ kajejjeti.—Rom 12:​4-8.

13. Ta eo em̦ool kõn enañin aolep men ko juon em̦m̦aan ak likao ej aikuj kõm̦m̦ani bwe en maroñ erom juon rijjipañ?

¹³ L̦õmn̦ak kõn bar juon un em̦m̦an unin am̦ kate eok ñan kal̦apl̦o̦k ijo kun̦aam im erom juon rijjipañ: Enañin aolep men ko juon em̦m̦aan ak likao ej aikuj kõm̦m̦ani bwe en maroñ erom juon rijjipañ im kadkad ko ej aikuj ejaaki rej jerbal ñan aolep Kũrjin ro. Ilo m̦ool, aolep Kũrjin ro rej aikuj ruwaakl̦o̦k ñan Jeova, m̦õn̦õn̦õ in lel̦o̦k ñan ro jet, im likũt juon joñak em̦m̦an kõn mourin Kũrjin. Innem, ta eo juon jeid im jatid em̦m̦aan ak likao emaroñ kõm̦m̦ane bwe en maroñ erom juon rijjipañ?

MEN KO KWÕMAROÑ KÕM̦M̦ANI ÑAN EROM JUON RIJJIPAÑ

14. Ta mel̦el̦ein an juon jeid im jatid em̦m̦aan ak likao ‘rũtto ilo l̦õmn̦ak’? (1 Timote 3:​8-10, 12)

¹⁴ Jen kiiõ etale kadkad ko im men ko juon em̦m̦aan ak likao ej aikuj kõm̦m̦ani bwe en maroñ erom juon rijjipañ ilo 1 Timote 3:​8-10, 12. (Riit.) Juon rijjipañ ej aikuj juon eo ‘erũtto ilo l̦õmn̦ak.’ Remaroñ bar ukote naan kein ñan mel̦el̦ein bwe armej eo “ej kõm̦m̦an ilo juon wãween ro jet renaaj kautieje” im bwe ej “juon eo ro jet remaroñ lõke im atartar ioon.” Men in ejjab mel̦el̦ein bwe kwõjjab maroñ ettõñ, limo, im kõm̦m̦an kõjak. (Ekl. 3:​1, 4) Bõtab, ej mel̦el̦ein bwe kwõj aikuj lukkuun kate eok ñan kajejjete eddo ko am̦. El̦aññe kwõj juon eo ej kajejjete eddo ko am̦ im ro jet remaroñ lõke im atartar  ioom̦, ro jeim̦ im jatũm̦ ilo eklejia eo renaaj kautiej eok.

15. Ta mel̦el̦ein an Baibõl̦ eo ba bwe rijjipañ ro rejjab “jet ro reriab” im “jet ro rej arõk ñan koorl̦o̦k men ko ippãer”?

¹⁵ Baibõl̦ ej ba bwe juon rijjipañ ‘en jab juon eo eriab.’ Men in ej mel̦el̦ein bwe kwõj lukkuun kwal̦o̦k m̦ool im bwe kwõj juon eo ro jet remaroñ lõke. Kwõj kajejjet naan ko am̦, im kwõjjab m̦on̦e ro jet. (JK. 3:​32, UBS) Juon rijjipañ ejjab juon eo ej “arõk ñan koorl̦o̦k men ko ippãer.” Men in ej mel̦el̦ein bwe kwõj kwal̦o̦k m̦ool ilo am̦ kõm̦m̦an peejnej ippãn ro jet im ñe kwõj jerbal kõn jããn. Kwõban kõjerbale jem̦jerã ko am̦ ippãn Kũrjin ro jeim̦ im jatũm̦ ilo juon wãween ekũbbon̦ ñan koorl̦o̦k jããn.

16. (1) Ta mel̦el̦ein an rijjipañ ro “jab jet ro em̦m̦an ippãer idaak wain el̦e jãn joñan”? (2) Ta mel̦el̦ein an juon rijjipañ aikuj wõr juon an “bõklõkõt erreo”?

¹⁶ Juon rijjipañ en jab juon eo em̦m̦an ippãn “idaak wain el̦e jãn joñan.” Men in ej mel̦el̦ein bwe en jab l̦e jãn joñan am̦ idaak arkool̦ ak kwõn jab juon eo ro jet rejel̦ã bwe el̦ap am̦ idaak. “Juon bõklõkõt erreo” ej mel̦el̦ein bwe juon rijjipañ ej mour ekkar ñan kien ko an Jeova. Meñe kwõjjab weeppãn, ak kwõj m̦õn̦õn̦õ kõn aenõm̦m̦an eo ej itok jãn juon jem̦jerã em̦m̦an ippãn Anij.

17. Ta mel̦el̦ein an Baibõl̦ eo ba, “etale m̦okta ñe rein rekkar”? (1 Timote 3:10; bar lale pija eo.)

¹⁷ Baibõl̦ ej bareinwõt ba:“Etale m̦okta ñe rein rekkar.” Men in ej mel̦el̦ein bwe em̦õj an em̦m̦aan ro rej lale eklejia lo bwe em̦m̦an am̦ kajejjet eddo ko am̦ im bwe remaroñ atartar ioom̦. Kõn men in, ñe em̦m̦aan ro rej lale eklejia eo rej lewaj juon jerbal ñan kwe, lukkuun kate eok ñan l̦oore naanin tõl ko aer im naanin tõl ko jãn doulul eo. Lukkuun lale bwe kwõn jel̦ã kõn ta ko kwõj aikuj kõm̦m̦ani im ñããt eo kwõj aikuj kam̦õje jerbal in. Ilo am̦ lukkuun lõt im kajejjete kajjojo jerbal kar lewaj ñan kwe, ro jet ilo eklejia eo renaaj kile im kam̦m̦oolol eok kõn am̦ kõm̦m̦an wõnm̦aanl̦o̦k. Em̦m̦aan ro rej lale eklejia, kom̦win kate kom̦ ñan kammineneik em̦m̦aan ak likao ro jeid im jatid me em̦õj aer peptaij. (Riit 1 Timote 3:10.) Ewõr ke likao ro em̦õj aer peptaij ilo eklejia eo am̦ me rej jo̦dikdik ak redikl̦o̦k? Rej ke juon joñak em̦m̦an ilo aer katak ippãer make? Rej ke ekkeini aer uwaak ilo iien kweilo̦k ko im bõk kun̦aaer ilo jerbalin kwal̦o̦k naan? El̦aññe aet, lel̦o̦k ñan er jerbal ko rekkar ñan joñan iiõ ko aer im wãween ko ippãer. Ilo wãween in, likao rein jeid im jatid remaroñ kaalikkar el̦aññe rej jet ‘ro rekkar’ ñan kõm̦m̦ani jerbal kein. Innem ãlikin  aer rũttol̦o̦k jidik ak rej jo̦dikdik wõt, remaroñ erom rijjipañ.

18. Ta mel̦el̦ein an Baibõl̦ eo ba bwe rijjipañ ro en “ejjel̦o̦k n̦otaer”?

¹⁸ Baibõl̦ ej ba bwe juon rijjipañ en ‘ejjel̦o̦k n̦otaan.’ Men in ej mel̦el̦ein bwe ejjel̦o̦k juon emaroñ n̦aruom̦ im ba bwe kwaar kõm̦m̦ane juon men elukkuun nana. Bõtab, em̦ool bwe armej ro remaroñ riab im n̦aruon Kũrjin ro. Armej ro rar riab im n̦aruon Jesus, im ear kanaan bwe ri-kal̦oor ro an renaaj bar iioone ejja wãween in wõt. (Jon 15:20) Ijoke, el̦aññe kwõj dãpij wõt m̦wil ko rem̦m̦an im rerreo ãinwõt kar Jesus, enaaj em̦m̦an etam̦ ilo eklejia eo.—Matu 11:19.

19. Ta mel̦el̦ein an Baibõl̦ eo ba bwe juon rijjipañ “ej aikuj juon wõt pãleen”?

¹⁹ Baibõl̦ eo ej ba bwe “ej aikuj juon wõt pãleen” juon rijjipañ. El̦aññe em̦õj am̦ m̦are, kwõj aikuj l̦oore wõt karõk eo jinointata an Jeova kõn mourin m̦are ikõtaan juon em̦m̦aan im juon kõrã. (Matu 19:​3-9) Juon Kũrjin em̦m̦aan ejjab aikuj l̦õñ. (Hib. 13:4) Men in ej bareinwõt mel̦el̦ein bwe ej aikuj tiljek wõt aolep iien ñan lio pãleen. Kõn men in, eban kwal̦o̦k an itoklimo kõn bar juon kõrã.—Job 31:1.

20. Ewi wãween juon jeid im jatid em̦m̦aan emaroñ lale baam̦le eo an ilo juon wãween em̦m̦an?

²⁰ Baibõl̦ eo ej ba bwe juon rijjipañ “ej aikuj em̦m̦an an lale ro nejin im ro ilo m̦weo im̦õn.” El̦aññe kwõj juon bõran baam̦le, kwõj aikuj lukkuun tiljek im kate eok ilo eddo ko am̦. Ekkeini am̦ kõm̦m̦ane iien kabuñ an baam̦le eo am̦. Ekkeini am̦ kwal̦o̦k naan ippãn lio pãleem̦ im ajri ro nejũm̦ joñan wõt am̦ maroñ. Jipañ ajri ro nejũm̦ ñan ejaake juon aer make jem̦jerã ippãn Jeova. (Eps. 6:4) Juon em̦m̦aan me ej lale baam̦le eo an, ej kaalikkar bwe emaroñ bar lale im jipañ ro ilo eklejia eo.—Keidi 1 Timote 3:5.

21. El̦aññe kwõjjañin erom juon rijjipañ, ta ko kwõmaroñ kõm̦m̦ani?

²¹ Em̦m̦aan im likao ro jeid im jatid, el̦aññe kwõjjañin erom juon rijjipañ, jouj im jar im kõl̦mãnl̦o̦kjen̦ kõn mel̦el̦e ko ilo katak in. Katak kõn kadkad ko im men ko kwõj aikuj kõm̦m̦ani ñan erom juon rijjipañ, im kate eok ñan kõm̦m̦ani men kein. L̦õmn̦ak kõn joñan am̦ yokwe Jeova im ro jeim̦ im jatũm̦. Kam̦wilal̦l̦o̦k kõn̦aan eo am̦ ñan jipañ im karejar ñan er. (1 Pit. 4:​8, 10) Lo lañlõñ eo ej itok jãn am̦ karejar ñan rũttõmak ro m̦õttam̦. Jeova en lukkuun kõjeraam̦m̦an eok ilo am̦ kate eok ñan erom juon rijjipañ!—Pil. 2:13.