EPEN ke am̦ ekkeini am̦ katak Baibõl̦ ippam̦ make im kõm̦m̦an bwe en juon iien ekãitoktoklimo? Eokwe, jet iien epen ñan kõj aolep. Ak l̦õmn̦ak kõn men ko jej ekkeini ad kõm̦m̦ani, ãinwõt ad tutu. Ñe jej tutu ebõk iien im maroñ ko ad, bõtab ãlikin ad tutu jelukkuun emmourur im em̦m̦an ad mour! Ãindein ñe jej katak Baibõl̦, men in emaroñ kõm̦m̦an bwe jen emmourur im em̦m̦an ad mour “kõn dãn, eo ej naanin Anij.” (Eps. 5:26) Jen etale jet iaan wãween ko im remaroñ jipañ:

• Kõm̦m̦an juon jikejuul̦. Ad katak ippãd make ej juon iaan “[men] ko raorõkl̦o̦k” juon Kũrjin en jab kõjekdo̦o̦ni. (Pil. 1:10) Ñan jipañ eok l̦oore jikejuul̦ eo am̦, kwõmaroñ ke likũti ilo juon jikin enaaj pidodo am̦ loe, ãinwõt ilo juon board in jeje ak kaddãpe ilo kiin icebox eo am̦? Ak kwõmaroñ lo bwe el̦ap an jipañ ñe kwõj kõm̦m̦an juon alarm ñan iien am̦ katak ilo talboon ak tablet eo nejũm̦.

• Kõm̦m̦an ukoktak ekkar ñan aikuj ko am̦. Epidodo ke am̦ katak ium̦win juon iien aetok ak ium̦win juon iien ekadu? Eokwe, kwõjel̦ã ta eo kwõj aikuji im ta eo em̦m̦antata ñan kwe. Kõm̦m̦an ukoktak kõn wãween am̦ katak ekkar ñan aikuj ko am̦. Ñe kwõloe bwe kwõjjab lukkuun kõn̦aan katak ilo iien eo kwaar karõke, kwõmaroñ kõm̦m̦an ukoktak im katak ium̦win 10 wõt minit. Meñe kwõj katak ium̦win jidik wõt iien, ak enaaj l̦apl̦o̦k tõprak ko kwõnaaj bõki jãn ñe kwaar jab katak. Ilo m̦ool ãlikin am̦ jino katak, kwõmaroñ kõn̦aan kaetokl̦o̦k iien am̦ katak.—Pil. 2:13.

• Pojakl̦o̦k im̦aan kõn ta eo kwõnaaj katak kake. Ñe ej iien am̦ katak ak kwõj kab jino l̦õmn̦ak kõn ta eo kwõnaaj katak kake, eokwe bõlen kwõjjab lukkuun ‘kõjerbal iien ko am̦ ilo mãlõtlõt.’ (Eps. 5:16) Kwõmaroñ ke je juon laajrak kõn aolep katak ko kokõn̦aan katak kaki? Ñe ewanlõñtak juon kajjitõk ilo l̦õmn̦ak eo am̦, kajju jeiki. Im ilo jem̦l̦o̦kin kajjojo iien am̦ katak, emaroñ wõr mel̦el̦e ko jet kokõn̦aan katak kaki im kwõmaroñ kobaiki ñan laajrak eo am̦.

• Jel̦ã ukoktak. Kajjioñ kõm̦m̦an ukoktak ilo jikejuul̦ eo am̦ ñe emenin aikuj. Ñan waanjoñak, kwõmaroñ kõm̦m̦an ukoktak kõn joñan aetokin am̦ katak ak kõn ta eo kwõnaaj katak kake. Innem men eo eaorõktata, ejjab ñããt, ejjab aetokin, im ejjab ta eo kwõnaaj katak kake ak ej am̦ ekkeini am̦ katak.

El̦ap ad bõk tokjãn jãn ad ekkeini ad katak Baibõl̦ ippãd make. Jej ruwaakl̦o̦k ñan Jeova, jej katak ñan kõm̦m̦ani pepe ko remãlõtlõt, im el̦ap ad bõk kõkajoor.—Jos. 1:8.