Kokõn̦aan ke kal̦apl̦o̦k am̦ bõk tokjãn jãn am̦ katak ippam̦ make? Kwõmaroñ kajjioñ wãween kein ñan jipañ eok kõm̦m̦an bwe en em̦m̦an am̦ katak ippam̦ make:

• Kããlõt juon jikin ekkar im em̦m̦an. Ñe kwõmaroñ, pukot juon jikin emel̦ak im emeram ñan am̦ loe im riit. Kwõmaroñ jijet ilo juon tebõl̦, ak kwõmaroñ kããlõt juon jikin em̦m̦an ippam̦ inabõj.

• Pukot juon jikin kwõmaroñ make iaam̦. Jesus ear kããlõt ñan jar ilo ‘jibboñ . . . ke ej emmarokrok wõt’ ilo “juon jikin bwe en make iaan.” (Mark 1:35) Ñe ejelok jikin ñan am̦ maroñ make iaam̦, kwõmaroñ kwal̦o̦k iien ko kwõnaaj katak ippam̦ make ñan baam̦le eo am̦ ak ñan ro kwõj jokwe ippãer, bwe en ejjel̦o̦k kein kapañ am̦ katak.

• Kate eok ñan jab m̦ad. Ñe kwõj kõjerbal talboon ak tablet eo nejũm̦ ñan katak ippam̦ make, kune ainikien device eo nejũm̦ ak likũti ilo juon wãween eban ko̦kkure am̦ katak. Ñe ejiktok ilo l̦õmn̦ak eo am̦ kõn juon men kwõj aikuj kõm̦m̦ane, jei ilo juon peba bwe kwõn jab mel̦o̦kl̦o̦ke innem wõnm̦aanl̦o̦k im katak. Ñe kwõj jino m̦ad jãn am̦ katak, kwõmaroñ bõjrak jidik im jutak im erl̦o̦ke ãnbwinnũm̦.