1. Ta eo Kũrjin ro me em̦õj aer peptaij rej aikuj in wõnm̦aanl̦o̦k wõt im kõm̦m̦ane?

KWÕJ ke juon eo me em̦õj an peptaij? El̦aññe aet, em̦õj am̦ kaalikkar im̦aan mejãn ro jet kõn tõmak eo am̦ ilo Jeova im kõn̦aan eo am̦ ñan karejar ilo doulul eo an. * Alikkar bwe tõmak eo am̦ ilo Jeova ej aikuj wõnm̦aanl̦o̦k wõt im eddekl̦o̦k. Im kwõj aikuj in kal̦apl̦o̦k am̦ lõke bwe Jeova ej kõjerbale doulul eo an rainin.

2-3. Ewi wãween an Jeova tõl doulul eo an ilo raan kein? Kwal̦o̦k jet waanjoñak.

² Ilo raan kein, Jeova ej tõl doulul eo an ilo juon wãween me ej kaalikkar kain Anij rot e, ta ankilaan, im ta l̦õmn̦ak ko an ikijjeen men ko rem̦m̦an im men ko renana. Jen etale jilu iaan kadkad ko kadkadin Jeova me rej alikkar ilo doulul eo an.

³ Kein kajuon, “Anij ejjab kalijekl̦o̦k.” (Jrb. 10:34) Yokwe ear kõm̦akũt Jeova ñan katok kõn Nejin bwe en “kõl̦l̦ãik joñan on̦ããn eo kar aikuji ñan karõl̦o̦k aolep.” (1 Tim. 2:6; Jon 3:16) Jeova ej kõjerbale armej ro an ñan kwal̦o̦k naan kõn ennaan eo em̦m̦an ñan aolep ro rem̦õn̦õn̦õ in roñjake, ilo an ãindein ej jipañ aolep armej ro bwe ren maroñ bõk tokjãn jãn katok in mour eo an Jesus. Kein karuo, Jeova ej juon Anij in laajrak im aenõm̦m̦an. (1 Kor. 14:33, 40) Kõn men in, jemaroñ kõtmãne bwe ri-karejar ro an rej karejar ñane ãinwõt juon kumi elaajrak im raenõm̦m̦an. Kein kajilu, Jeova ej “ri-Kaki [eo em̦m̦antata, NW].” (Ais. 30:20, 21) Eñin unin doulul eo an ej lukkuun kate ñan katakin ro jet kõn Naan eo an, ilo eklejia eo im ilo jerbalin kwal̦o̦k naan. Ewi wãween an kadkad kein jilu an Jeova alikkar ilo kar  eklejia eo an Kũrjin ro jinoin? Ewi wãween aer alikkar ilo raan kein? Im ewi wãween an jetõb kwõjarjar maroñ jipañ eok ilo am̦ karejar ippãn doulul eo an Jeova ilo raan kein?

4. Ãinwõt an Jerbal 1:8 kwal̦o̦k kake, ta eo Jesus ear jiroñ ri-kal̦oor ro an bwe ren kõm̦m̦ane, im kain jipañ rot eo renaaj bõke?

⁴ Ilo tõre ko an rijjilõk ro. Ennaan eo Jesus ear kwal̦o̦k naan kake ear lel̦o̦k kõjatdikdik ñan armej otemjej. (Luk 4:43) Ear jiroñ ri-kal̦oor ro an bwe ren wõnm̦aanl̦o̦k wõt kõn jerbal eo ear jinoe, ilo aer kwal̦o̦k naan “ñan ãne ko rettol̦o̦ktata ilo lal̦.” (Riit Jerbal 1:8.) Alikkar bwe rar jab maroñ kõm̦m̦ane jerbal in kõn kajoor ko aer make. Renaaj kar aikuj jetõb kwõjarjar​—“rijjipañ eo” me Jesus ear kallim̦uri er kake.​—Jon 14:26; Zek. 4:6.

5-6. Ilo wãween et jetõb kwõjarjar ear jipañ ri-kal̦oor ro an Jesus?

⁵ Kar lel̦o̦k jetõb kwõjarjar ñan ri-kal̦oor ro an Jesus ilo Pentekost 33 C.E. eo. Ikijjeen jipañ eo jãn jetõb kwõjarjar, rar kajju jino kwal̦o̦k naan, im ium̦win jidik iien ear wõr to̦ujin armej ro me rar eo̦roñ ennaan eo em̦m̦an. (Jrb. 2:41; 4:4) Ke rar iioon matõrtõr, ri-kal̦oor ro rar jab ebbweer im bõjrak ak rar reilo̦k ñan Anij im kajjitõk bwe en jipañ er. Rar jar im ba: “Jipañ kõm ro karejeram̦ bwe kõmin wõnm̦aanl̦o̦k wõt im kõnnaan kõn naan eo am̦ ilo peran.” Innem, rar obrak kõn jetõb kwõjarjar im rar wõnm̦aanl̦o̦k wõt im “kõnono kõn naanin Anij ilo peran.”​—Jrb. 4:18-20, 29, 31.

⁶ Ri-kal̦oor ro an Jesus rar bar iioon wãween ko jet reppen. Ñan waanjoñak, ear wõr wõt jejjo kaape in Jeje ko. Ear ejjel̦o̦k ippãer kein jipañ ko ñan katak Baibõl̦ ãinwõt an wõr ippãd ilo raan kein. Im ri-kal̦oor ro rar aikuj in kwal̦o̦k naan ñan elõñ kain armej ro me rej kõnono ilo kajin ko jet. Meñe rar iioon wãween kein reppen, ak ri-kal̦oor rein rekijejeto rar kõm̦m̦ane juon men me ear ãinwõt ñe eban tõprak—ium̦win enañin 30 iiõ ko, rar maroñ kwal̦o̦k kõn ennaan eo em̦m̦an “ñan aolep menin kõm̦anm̦an ko ium̦win lañ.”​—Kol. 1:6, 23.

7. Ilo elõñl̦o̦k jãn 100 iiõ ko remootl̦o̦k, ewi wãween an kar ri-karejar ro an Jeova jel̦ã kõn ta eo Anij ear kõtmãne jãn er, im ewi wãween aer kar em̦m̦akũt?

⁷ Ilo raan kein. Jeova ej wõnm̦aanl̦o̦k wõt im tõl im lel̦o̦k kajoor eo an ñan jipañ armej ro an. El̦aptata an tõl kõj ikijjeen Naan ko an ilo Baibõl̦ me jetõb kwõjarjar ear kõm̦akũt em̦m̦aan ro ñan jei. Ilo Baibõl̦ eo, jemaroñ riiti bwebwenatoun an kar Jesus kwal̦o̦k naan im kõn naanin jiroñ eo an ñan ri-kal̦oor ro an ñan wõnm̦aanl̦o̦k wõt im kõm̦m̦ane jerbal eo ear jino kõm̦m̦ane. (Matu 28:19, 20) Joñan, ilo juon magazine in jem̦aan me an Jul̦ae 1881 eo, ej ba: “Jeova ear jab jitõñe kõj bwe jen bõk nõbar jãn armej ro ak bwe jen m̦weiie, bõtab ear kõm̦m̦ane men in bwe jen kõjerbale aolepen ad ñan kwal̦o̦k naan kõn ennaan eo em̦m̦an.” Ilo juon bok (etan To Whom the Work Is Entrusted) me kar kõm̦m̦ane ilo 1919 eo, ej ba: “Jerbalin kwal̦o̦k naan ej juon jerbal el̦ap, bõtab jerbal in ej an Irooj, im ikijjeen kajoor eo an jenaaj maroñ kõm̦m̦ane jerbal in.” Aet, ãinwõt Kũrjin ro ilo jinoin, rein jeid im jatid rar peran ilo aer kate er joñan wõt aer maroñ ilo jerbal in, im rar lõke im tõmak bwe jetõb kwõjarjar enaaj jipañ er ñan kwal̦o̦k naan ñan jabdewõt armej. Jej wõnm̦aanl̦o̦k wõt im kwal̦o̦k ejja kain lõke im tõmak rot in ilo raan kein.

8-9. Ta kõl ko me doulul eo an Jeova ear kõjerbali ñan kajeededl̦o̦k jerbalin kwal̦o̦k naan?

⁸ Doulul eo an Jeova ear kõjerbal kein jerbal ko rem̦m̦antata ñan kajeeded ennaan eo em̦m̦an. Kein jerbal kein rej kitibuj men ko ãinwõt pija eo etan “Photo-Drama of Creation,” phonograph ak juon kain kein kõjañjañ me rar kõjerbale ñan kõjo̦ katak ko em̦õj rekooti, wa ko me rar kõjañe ainikien katak ko ie, retio station eo ad me rar kõm̦m̦ani broadcast ko, im ilo raan  kein rej kõjerbale kampiutõr ko im internet. Doulul eo an Anij ej kõm̦m̦ane juon men me ejjel̦o̦k juon enañin kar kõm̦m̦ane, ilo an ukok bok ko ilo elõñl̦o̦k kajin ko! Etke? Bwe aolep armej ren maroñ roñ kõn ennaan eo em̦m̦an ilo kajin ko aer make. Jeova ejjab kalijekl̦o̦k; ear kanaan l̦o̦k im̦aan bwe naaj kwal̦o̦k kake ennaan eo em̦m̦an “ñan aelõñ otemjej, bwij, kajin im ñan armej otemjej.” (Rev. 14:6, 7) Ekõn̦aan bwe ennaan eo kõn Aelõñ eo en tõpar aolep armej.

⁹ Ak ta kõn ro me epen tõpar er, bõlen kõn aer jokwe ilo m̦õko me jejjab maroñ del̦o̦ñ ie kõn an wõr ri-waj ak kõn an wõr wõrwõr ie? Kõnke doulul eo an Jeova ear kõn̦aan tõpar elõñ iaan armej rein, men in ear kõm̦akũt er ñan l̦õmn̦ak kõn kõl ko jet remaroñ kõm̦m̦ani ilo jerbalin kwal̦o̦k naan ilo̦bwilej. Ñan waanjoñak, ilo 2001 eo, Kumi eo Ej Lale Aolep Eklejia ko an Ri-Kõnnaan ro an Jeova ear kamãlim an doulul in kõjerbal wa bwilbwil ko im bar men ko jet me kein illik bok ko ad ie. Rar kamãlim aer kõm̦m̦ane men in ilo aelõñin France im tokãlik ilo bar jikin ko jet. Ear lukkuun l̦ap tõprak. Ilo 2011 eo, kar jinoe juon kõl ekããl ñan kwal̦o̦k naan ilo Amedka ilo juon iaan jikin ko ilo New York City me el̦ap m̦akũtkũt ko ie. Ilo iiõ eo kein kajuon me rar kõjerbale kõl in, kar leto letak 102,129 bok ko im 68,911 magazine ko. Im ear wõr 4,701 armej ro me rar kajjitõk bwe juon en katak Baibõl̦ ippãer! Ealikkar bwe jetõb kwõjarjar ear rejetake jerbal in. Kõn men in, Kumi eo Ej Lale Aolep Eklejia ko an Ri-Kõnnaan ro an Jeova ear kamãlim ñan kõjerbal wa bwilbwil ko im men ko jet me kein illik bok ad ie ilo jerbalin kwal̦o̦k naan eo ipel̦aakin lal̦ in.

10. Ta ko jemaroñ kõm̦m̦ani ñan kakõm̦anm̦anl̦o̦k wãween ad kwal̦o̦k naan?

¹⁰ Men ko kwõmaroñ kõm̦m̦ani. Lukkuun kortokjãn kein kamminene ko Jeova ej litok ñan kõj ilo iien kweilo̦k ko me rej ñan jipañ kakõm̦anm̦anl̦o̦k wãween ad kwal̦o̦k naan. Niknik ilo am̦ kwal̦o̦k naan ippãn ro ilo kumi in kwal̦o̦k naan eo am̦. Ilo iien kein, kwõmaroñ bõk jipañ ilo wãween ko me kwõj aikuj jipañ ie ilo am̦ katakin, im kwõmaroñ bar bõk kõketak jãn joñak ko rem̦m̦an an ro jet. Kijenmej ilo am̦ kwal̦o̦k naan. Ãinwõt an unin tõl in katak in kakeememej kõj, jej maroñ in kajejjet ankilaan Anij, ejjab kõn kajoor eo ad make ak kõn jetõb kwõjarjar.  (Zek. 4:6) Jemaroñ lukkuun tõmak bwe Anij enaaj letok kajoor eo jej aikuji, kõnke jej kõm̦m̦ane jerbal eo an.

11. Ewi wãween an kar kumi eo me ear lale aolep eklejia ko jerbal ippãn doon ilo bõrokuk bwe en wõr wõt laajrak ippãn armej ro an Anij ilo tõre ko an rijjilõk ro?

¹¹ Ilo tõre ko an rijjilõk ro. Kumi eo ilo Jerusalem me ear lale aolep eklejia ko, rar jerbal ippãn doon ilo bõrokuk bwe en wõr wõt laajrak im aenõm̦m̦an ippãn armej ro an Anij. (Jrb. 2:42) Ñan waanjoñak, ke ear wanlõñtak apañ eo kõn m̦wijm̦wij ilo iiõ eo 49 C.E., ikijjeen tõl eo jãn jetõb kwõjarjar, kumi in ear kweilo̦k kõn apañ in. El̦aññe eklejia eo en kar wõnm̦aanl̦o̦k wõt im bõro jepel kõn apañ in, men in en kar jelõte jerbalin kwal̦o̦k naan. Meñe rijjilõk ro kab em̦m̦aan ro rerũtto kar er ri-Ju, ak rar jab kõtl̦o̦k bwe m̦anit ko an ri-Ju ro ak ro me el̦ap aer rõjañ ro jet ñan l̦oore m̦anit ko aer en jelõt l̦õmn̦ak ko aer. Ijoke, rar etale Naanin Anij im kajjitõk kõn jetõb kwõjarjar eo an Anij ñan jipañ er kõm̦m̦ane pepe eo ejim̦we. (Jrb. 15:1, 2, 5-20, 28) Ta eo ear wal̦o̦k itok jãn aer kar ãindein? Jeova ear kõjeraam̦m̦an pepe eo aer, ear wõr wõt aenõm̦m̦an im bõrokuk, im jerbalin kwal̦o̦k naan eo ear wõnm̦aanl̦o̦k wõt im ajeededl̦o̦k.​—Jrb. 15:30, 31; 16:4, 5.

12. Ta eo ej kaalikkar bwe ewõr laajrak im aenõm̦m̦an ilo doulul eo an Jeova ilo raan kein?

¹² Ilo raan kein. Doulul eo an Jeova ej kõm̦m̦an bwe en wõr wõt laajrak im aenõm̦m̦an ippãn armej ro an Jeova. Ilo 1895 eo, ilo kar juon Naan in Keeañ (me kar n̦aetan Zion’s Watch Tower and Herald of Christ’s Presence) me an Nobõm̦ba 15, ear wõr juon katak me ej pedped ioon 1 Korint 14:40 (etan “Decently and in Order”). Katak eo ear ba: “Elõñ men ko rijjilõk ro rar je ñan eklejia ko jinoin ikijjeen laajrak . . . El̦ap an aorõk ñan wõnm̦aanl̦o̦k wõt im l̦oore ‘men ko kar jei m̦oktal̦o̦k [me] kar jei ñan katakin kõj.’” (Rom 15:4) Aet, kõn̦aan eo ippãn Kũrjin ro jinoin ñan kõm̦m̦an bwe en wõr wõt laajrak im aenõm̦m̦an, ej bar kõn̦aan eo wõt an doulul eo an Jeova rainin. Ñan waanjoñak: Jen ba bwe kwaar etal im kweilo̦k ilo bar juon eklejia, bõlen ilo bar juon aelõñ, im rej katak kõn Naan in Keeañ eo, ejjel̦o̦k pere bwe kwõnaaj kar jel̦ã kadede kõn wãween aer nãj etale bok eo im  katak ta eo rej etale. Kwoban l̦õmn̦ak bwe kwõj juon ruwamãejet! Ebar ke wõr men en̦ ijello̦kun jetõb kwõjarjar eo an Anij me emaroñ kõm̦m̦an bwe en wõr kain bõrokuk rot in?​—Zep. 3:9.

13. Kajjitõk ta ko me Jemes 3:17 enaaj kõm̦m̦an bwe jen kajitũkin kõj make?

¹³ Men ko kwõmaroñ kõm̦m̦ani. Jeova ekõn̦aan bwe armej ro an ren ‘dãpij wõt bõrokuk eo rej bõke ikijjeen jetõb kwõjarjar kõn aenõm̦m̦an eo ej lukwõj er ippãn doon.’ (Eps. 4:1-3) Innem, kajjitõk ippam̦ make: ‘Ij ke jipañ kõm̦m̦an bwe en wõr bõrokuk im aenõm̦m̦an ilo eklejia eo? Ij ke juon eo ej pokake ro rej tõl? Ro jet remaroñ ke atartar ioõ, el̦aptata ñe ewõr aõ eddo ilo eklejia eo? Ij ke juon eo me ej m̦õkaj ñan iien, el̦ap an jipañ, im em̦õn̦õn̦õ in bõk kun̦aan?’ (Riit Jemes 3:17.) El̦aññe kwõj kile bwe ewõr men ko kwõj aikuj kakõm̦anm̦anl̦o̦k, jar im kajjitõk kõn jetõb kwõjarjar. Ñe el̦apl̦o̦k am̦ kõtl̦o̦k bwe en jipañ ãeik eok im jipañ eok ilo kõm̦m̦an ko am̦, enaaj l̦apl̦o̦k an ro jeim̦ im jatũm̦ yokwe im kaorõk eok.

14. Ekkar ñan Kolosse 1:9, 10, ewi wãween an kar Jeova katakin armej ro an ilo tõre ko an rijjilõk ro?

¹⁴ Ilo tõre ko an rijjilõk ro. El̦ap an Jeova itoklimo in katakin armej ro an. (Sam 32:8) Ekõn̦aan bwe ren jel̦ã kajjien, yokwe e, im mour ñan indeeo ãinwõt ro nejin me rejitõnbõro ippãn. En kar pen ñan kõttõpar men kein ñe en kar jab katakin er. (Jon 17:3) Jeova ear kõjerbal eklejia eo an Kũrjin ro jinoin ñan katakin armej ro an. (Riit Kolosse 1:9, 10.) Jetõb kwõjarjar​—“rijjipañ eo” me Jesus ear kallim̦ur kake—​elukkuun l̦ap an kar jipañ. (Jon 14:16) Ear jipañ ri-kal̦oor ro bwe en l̦apl̦o̦k aer mel̦el̦e kõn Naanin Anij, im men in ear kõm̦m̦an bwe ren keememej elõñ men ko Jesus ear ba im kõm̦m̦ani, me kar je tokãlik ilo bokin Gospel ko. Jel̦ãl̦o̦kjen̦ in ear kõkajoor tõmak eo an Kũrjin ro jinoin im bareinwõt yokwe eo aer ñan Anij, eo Nejin, im ñan doon.

15. Ilo wãween et ko em̦õj am̦ lo an Jeova kajejjet kallim̦ur eo an ilo Aiseia 2:2, 3?

¹⁵ Ilo raan kein. Jeova ear kanaan bwe “ilo  raan ko ãliktata,” armej ro jãn aolep aelõñ renaaj kuk tok ippãn doon ñan tol̦ eo an ilo kõkkar bwe ren katak kõn ial̦ ko An. (Riit Aiseia 2:2, 3.) Jej lo an jejjet kũtien kanaan in. Jemaroñ lo bwe kabuñ eo em̦ool em̦m̦anl̦o̦k im epãd ilõñin jabdewõt kabuñ ko rewaan. Im elukkuun lõñ m̦õñã ko ilo kõkkar me Jeova ej kõpooji! (Ais. 25:6) Ikijjeen “ri-karejar eo etiljek im mãlõtlõt,” ej letok ñan kõj kein jipañ ko rellõñ, ejjab men in wõt ak rej itok ilo elõñ wãween ko, ewõr bok ko im katak ko l̦o̦k ñan pijain cartoon ko im pijain alwõj ko. (Matu 24:45) Jej bar bõk ejja eñjake eo wõt an kar l̦eo m̦õttan Job etan Ilaihu, me ear ba: ‘Ewõr ke juon ri-kaki ãinwõt [Anij]?’​—Job 36:22.

16. Ta ko kwõmaroñ kõm̦m̦ani bwe kwõn rũttol̦o̦k ilo tõmak?

¹⁶ Men ko kwõmaroñ kõm̦m̦ani. Jetõb kwõjarjar eo an Anij enaaj jipañ eok ñan jerbali men ko kwõj riiti im katak kaki jãn Naanin Anij. Kwõmaroñ jar ãinwõt kar ri-jeje Sam eo, ke ear ba: “Kwõn tõl eõ, O Jeova ilo am̦ ial̦; inaaj etal ilo m̦ool eo am̦; kwõn kõm̦m̦an bwe en juon wõt kõttõpar an bũruõ bwe in mijak etam̦.” (Sam 86:11) Innem, wõnm̦aanl̦o̦k wõt im bõk m̦õñã ko ilo l̦oor jetõb me Jeova ej litok ñan kõj ikijjeen Naan eo an im doulul eo. Aet, mejãnkajjik eo am̦ ejjab ñan baj kal̦apl̦o̦k wõt am̦ jel̦ã. Bõtab, kokõn̦aan bwe m̦ool eo en pãd ilo bũruom̦, im kokõn̦aan jerbale ilo mour eo am̦. Jetõb kwõjarjar eo an Jeova emaroñ jipañ eok ñan kõm̦m̦ane men in. Im kokõn̦aan bareinwõt rõjañ ro jeim̦ im jatũm̦. (Hib. 10:24, 25) Etke? Kõnke rein rej baam̦le eo am̦ ilo tõmak. Jar im kajjitõk kõn jetõb kwõjarjar eo an Anij ñan jipañ eok uwaak jãn bũruom̦ ilo iien kweilo̦k ko im ñan jipañ eok ilo iien ko ewõr kun̦aam̦ bwe en em̦m̦an wãween am̦ kõm̦m̦ane katak eo joñan wõt am̦ maroñ. Ilo am̦ kõm̦m̦ani men kein, kwõj kaalikkar ñan Jeova im eo Nejin bwe kwõj yokwe “jiip” ko aer raorõk.​—Jon 21:15-17.

17. Ilo wãween et ko me kwõmaroñ kaalikkar bwe kwõj lukkuun rejetake doulul eo an Jeova?

¹⁷ Ejjabto jãn kiiõ, doulul eo me enaaj pãd wõt ijin ioon lal̦ enaaj doulul eo me Jetõb kwõjarjar eo an Anij ej tõle. Kõn men in, kwõn kijejeto ilo am̦ jerbal ippãn doulul eo an Jeova. Anõke yokwe eo an Anij me ejjel̦o̦k kalijekl̦o̦k ie, ikijjeen am̦ kwal̦o̦k naan kõn ennaan eo em̦m̦an ñan aolep ro kwõj iioone er. Anõke yokwe eo an kõn laajrak im aenõm̦m̦an, ikijjeen am̦ kõm̦m̦an bwe en wõr wõt bõrokuk ilo eklejia eo. Im roñjake ri-Kaki eo am̦ Em̦m̦antata, ikijjeen am̦ lukkuun kortokjãn m̦õñã lõñlõñ ko ilo l̦oor jetõb me ej litok. Innem, ilo an lal̦ in an Setan etal ñan an jako, kwoban mijak. Ijello̦kun am̦ ãindein, ilo peran kwõnaaj jutak ibwiljin ro me rej tiljek ilo aer jerbal ippãn doulul eo an Jeova.