1. Ewi wãween ad jel̦ã bwe jerbalin kõm̦m̦an ri-kal̦oor ej juon jerbal me ej lo̦mo̦o̦ren armej ro?

JERBALIN kõm̦m̦an ri-kal̦oor ej juon jerbal me ej lo̦mo̦o̦ren armej ro! Ewi wãween ad jel̦ã men in? Ke Jesus ear lel̦o̦k naanin jiroñ eo me ej pãd ilo Matu 28:19, 20, ear ba: “Kom̦win ilo̦k . . . im kõm̦m̦an . . . ri-kal̦oora, im peptaiji er.” Ewi joñan an aorõk bwe juon en peptaij? Jej aikuj in peptaij el̦aññe jekõn̦aan bõk lo̦mo̦o̦r. Eo ej pojakin peptaij ej aikuj tõmak bwe unin an maroñ bõk lo̦mo̦o̦r ej kõn wõt an kar Jesus katok kõn mour eo an im tokãlik jerkakpeje. Eñin unin an rijjilõk Piter kar ba ñan Kũrjin ro m̦õttan im ba: “Peptaij ej . . . lo̦mo̦o̦ren kom̦ kiiõ ikijjeen jerkakpeje eo an Jesus Christ.” (1 Pit. 3:21) Innem ñe juon ri-kal̦oor ekããl ej peptaij, men in ej kõm̦m̦an bwe en wõr an kõjatdikdik in bõk lo̦mo̦o̦r.

2. Ta eo 2 Timote 4:1, 2 ej jiroñ kõj, ro me rej ri-katakin?

² Ñan kõm̦m̦an ri-kal̦oor, jej aikuj erom juon “ri-katakin eo em̦m̦an.” (Riit 2 Timote 4:1, 2.) Etke? Kõnke Jesus ear jiroñ kõj im ba: “Kom̦win ilo̦k . . . im kõm̦m̦an . . . ri-kal̦oora, im . . . katakin er.” Rijjilõk Paul ear ba bwe jen “kate” kõj ilo jerbal in, ‘kõnke ilo ad ãindein, jenaaj lo̦mo̦o̦ren kõj im ro rej roñjake kõj.’ Innem eñin unin Paul ear ba: “Kwõn kanooj kõjparok . . . am̦ katakin.” (1 Tim. 4:16) Kõnke ad katakin ej ekkejell̦o̦k ippãn ad kõm̦m̦an ri-kal̦oor, jekõn̦aan bwe jen katakin ilo wãween eo em̦m̦antata.

3. Ilo katak in, ta eo jenaaj etale ikijjeen ad katak Baibõl̦ ippãn rũkkatak ro?

³ Ilo pel̦aakin lal̦ in, jej keini ad katakin elõñ milien armej ro kõn katak ko rem̦ool ilo Baibõl̦. Bõtab ãinwõt kar kwal̦o̦k kake ilo katak eo l̦o̦k, jekõn̦aan jel̦ã ewi wãween ad maroñ jipañ elõñ iaan armej rein ñan erom ri-kal̦oor ro an Jesus Christ me em̦õj aer peptaij. Ilo katak in, jenaaj etale bar l̦alem wãween ko jet me aolep ri-­katakin ro rej aikuj in kõm̦m̦ani ñan jipañ juon rũkkatak ñan kõm̦m̦an wõnm̦aanl̦o̦k ko innem peptaij.

4. Etke juon ri-katakin ej aikuj in jel̦ã irooj ioon make ñe ej katak Baibõl̦ ippãn juon rũkkatak? (Bar lale kõmel̦el̦e eo itulal̦.)

⁴ Jej kaorõk men ko jej katakin ro jet kaki jãn Naanin Anij. Innem jemaroñ kõn̦aan kallõñlõñ ad kõnnaan kõn katak kein jej kaorõki. Ijoke, ñe juon ej kõm̦m̦ane katak in Naan in Keeañ eo, Katak Baibõl̦ an Eklejia, ak katak Baibõl̦ ippãn juon ilo m̦weo im̦õn, armej in ej aikuj in kõjparok bwe en jab l̦e jãn joñan an kõnnaan. Bwe ri-katakin eo en kõtl̦o̦k bwe Baibõl̦ eo en katakin, ej aikuj in jel̦ã irooj ioon make im jab kajjioñ in kõmel̦el̦eik aolep men ko ejel̦ã kaki kõn juon eoon ak kõn juon men. * (Jon 16:12) Keidi joñan mel̦el̦e eo ekar wõr ippam̦ kõn Baibõl̦ eo ke kwaar peptaij ñan joñan eo kwõjel̦ã kake kiiõ. Ilo kar iien eo, kwõmaroñ kar mel̦el̦e wõt kõn katak ko raorõk me juon ej aikuj in jel̦ã ilo jinoin an katak Baibõl̦. (Hib. 6:1) Ekar bõk elõñ iiõ ñan am̦ katak kõn aolep men ko kwõjel̦ã kake kiiõ, kõn men in jab kajjioñ in katakin juon rũkkatak ekããl kõn aolep men ko kwõjel̦ã kaki ilo juon wõt iien.

5. (1) Ekkejell̦o̦k ippãn 1 Tessalonika 2:13, ta eo jekõn̦aan bwe rũkkatak eo ad en mel̦el̦e ikijjeen men ko ej katak kaki? (2) Ewi wãween ad maroñ rõjañ juon rũkkatak ñan kwal̦o̦k kõn men ko ej katak kaki?

⁵ Jekõn̦aan bwe rũkkatak eo ad en mel̦el̦e bwe men ko ej katak kaki rej itok jãn Naanin Anij. (Riit 1 Tessalonika 2:13.) Ewi wãween ad maroñ kõm̦m̦ane men in? Rõjañ rũkkatak eo ñan kwal̦o̦k kõn men ko ej katak kaki. Ijello̦kun am̦ kõmel̦el̦eik eoon ko ñan rũkkatak eo am̦ aolep iien, kajjitõk ippãn bwe en kõmel̦el̦eik jet iaaer ñan kwe. Jipañ rũkkatak eo ñan lo wãween an Naanin Anij jerbal ñan e. Kwal̦o̦k kajjitõk ko me renaaj jipañe ñan kwal̦o̦k eñjake im l̦õmn̦ak ko an kõn eoon ko ej riiti. (Luk 10:25-28) Ñan waanjoñak, kajjitõk ippãn: “Ewi wãween an eoon in kar jipañ eok ñan lo juon iaan kadkad ko kadkadin Jeova?” “Ewi wãween am̦ maroñ bõk tokjãn jãn katak in em̦ool jãn Baibõl̦?” “Ewi wãween am̦ eñjake kõn men ko ej kab m̦õj am̦ katak kaki?” (JK. 20:5) Men eo me el̦aptata an aorõk, ejjab kõn joñan men ko juon rũkkatak ejel̦ã kaki, ak ej kõn joñan an yokwe im jerbali katak ko ejel̦ã kaki.

6. Etke em̦m̦an ñan bõk juon ri-katakin el̦ap imminene ko ippãn ñe jej katak ippãn rũkkatak ro ad?

⁶ Ñe kwõj katak Baibõl̦ ippãn ro jet, kwõj ke bõk ippam̦ ri-kwal̦o̦k naan ro me el̦ap ­imminene ko ippãer? El̦aññe kwõj kõm̦m̦ane men in, kwõmaroñ kajjitõk ippãer kõn ta ko rar kile ilo wãween am̦ kar katakin im ñe em̦m̦an am̦ kar kõtl̦o̦k bwe Baibõl̦ eo en katakin. Ej aikuj in ettã bũruom̦ el̦aññe kokõn̦aan kakõm̦anm̦anl̦o̦k wãween am̦ katakin. (Keidi Jerbal 18:24-26.) Tokãlik, kajjitõk ippãn ri-kwal̦o̦k eo el̦ap imminene ippãn el̦aññe ej kile bwe rũkkatak eo emel̦el̦e kõn men ko ej katak kaki. Ñe kwõnaaj jako ium̦win juon wiik ak lõñl̦o̦k, kwõmaroñ bar kajjitõk ippãn ejja ri-kwal̦o̦k eo wõt ñan katak ippãn rũkkatak eo. Men in enaaj kõm̦m̦an bwe rũkkatak eo en wõnm̦aanl̦o̦k wõt ilo an katak im enaaj kaalikkar ñane aorõkin an katak. Jab l̦õmn̦ak bwe “am̦” rũkkatak eo im bwe ejjel̦o̦k bar juon emaroñ katak ippãn. Ejjel̦o̦k pere kokõn̦aan men eo em̦m̦antata ñan e, kokõn̦aan bwe en maroñ kõm̦m̦an wõnm̦aanl̦o̦k ko ilo an katak kõn m̦ool eo.

7.Ta eo enaaj jipañ juon rũkkatak bwe en itoklimo kõn men ko ej katak kaki?

⁷ Juon rũkkatak ej aikuj in lo joñan am̦ itoklimo kõn katak ko im roñ am̦ lukkuun tõmake katak ko rem̦ool me rej pãd ilo Baibõl̦. (1 Tes. 1:5) Innem, enaaj l̦apl̦o̦k an itoklimo kõn men ko ej katak kaki. Im ñe ekkar, kwal̦o̦k ñane kõn wãween an kar Baibõl̦ eo jipañ eok ilo mour eo am̦. Innem, enaaj kile bwe ewõr naanin tõl ko ilo Baibõl̦ me emaroñ bar bõk tokjãn jãni.

8. Ta ko jet kwõmaroñ kõm̦m̦ani ñan jipañ rũkkatak eo am̦, im etke kwõj aikuj in kõm̦m̦ane men in?

⁸ Ilo iien am̦ katak ippãn rũkkatak eo, kwal̦o̦k ñane kõn bwebwenatoun ro rar iioon wãween ko reppen me rej ãinl̦o̦kwõt apañ ko ej bar iiooni im an rein kar maroñ anjo̦ ioer. Ilo iien eo komiro enaaj katak, kwõmaroñ bõkwaj juon jãn eklejia eo me joñak eo an emaroñ jipañ rũkkatak eo. Ak kwõmaroñ kappok waanjoñak ko rekõketak ilo jw.org. (Epãd ium̦win ijo ej ba “The Bible Changes Lives,” ilo kajin Pãlle.) * Kain bwebwenato im pijain alwõj rot kein renaaj jipañ rũkkatak eo am̦ ñan loe bwe ej juon menin mãlõtlõt ñan l̦oore naanin kakapilõk ko jãn Baibõl̦ ilo mour eo an.

9. Ewi wãween am̦ maroñ rõjañ rũkkatak eo am̦ ñan kõnono kõn men ko ear katak kaki ippãn baam̦le eo an im ro m̦õttan?

⁹ El̦aññe rũkkatak eo ej juon eo em̦õj an m̦are, eo pãleen ej ke bar katak Baibõl̦? El̦aññe ejjab, kũrwaj eo pãleen ñan kobawaj ilo iien eo kom̦ij katak. Rõjañ rũkkatak eo am̦ ñan kõnono kõn men ko ej katak kaki ippãn baam̦le eo an im ro m̦õttan. (Jon 1:40-45) Ewi wãween? Kwõmaroñ kajjitõk ippãn: “En kar ewi wãween am̦ kõmel̦el̦eik boin in ñan baam̦le eo am̦?” ak “Eoon ta eo kwõn kar kõjerbale ñan kam̦oole men in ñan juon m̦õttam̦?” Ilo wãween in, kwõnaaj kammineneik rũkkatak eo am̦ bwe en juon ri-katakin. Innem, ñe epojak im ekkar bwe en juon ri-kwal̦o̦k, emaroñ jino bõk kun̦aan ilo jerbalin kwal̦o̦k naan ãinwõt juon ri-kwal̦o̦k naan ejjañin peptaij. Kwõmaroñ kajjitõk ippãn rũkkatak eo el̦aññe ewõr en̦ ejel̦ã kajjien me ekõn̦aan katak Baibõl̦. El̦aññe ewõr en̦ ejel̦ã kake, kajjioñ tõpar armej eo ilo m̦õkaj im kajjitõk ñe ekõn̦aan katak. Kaalwõje pija eo etan Ta ko Rej Wal̦o̦k Ñe Kõmij Katak Baibõl̦ Ippãn Armej? *

10. Ãinwõt an 1 Tessalonika 2:7, 8 kõmel̦el̦e, ewi wãween an juon ri-katakin maroñ anõke joñak eo an Paul?

¹⁰ Ri-katakin ro rej aikuj kwal̦o̦k bwe el̦ap aer kea im itoklimo kõn rũkkatak ro aer. Kõn men in, watõk er ãinwõt ro me renaaj uwaan ro jeim̦ im jatũm̦ ilo tõmak ilju jekl̦aj. (Riit 1 Tessalonika 2:7, 8.) Ejjab juon men epidodo ñan er ñan bõjrak jãn aer jem̦jerãiki ro m̦õttaer ilo lal̦ in im kõm̦m̦an aolep oktak ko rej aikuj in kõm̦m̦ani bwe ren karejar ñan Jeova. Kõn men in, jej aikuj jipañ er kappok ro jerãer rem̦ool ilo eklejia eo. Kwõn m̦õttãik rũkkatak eo am̦ ilo am̦ jol̦o̦k iien ippãn, ejjab ilo iien amiro katak wõt ak ilo bar iien ko jet. Ilo am̦ call, jilkinl̦o̦k text, ak lol̦o̦ke ilo raan ko jet komiro ejjab katak ej kaalikkar am̦ lukkuun kea kake e.

11. Ta eo jekõn̦aan bwe rũkkatak ro ad ren loe ilo eklejia eo, im etke?

¹¹ Ewõr juon jabõn kõnnaan me ej ba: “Ej menin aikuj bwe aolep ro ilo juon bukwõn ren jipañ doon kõkkaajiririik juon ajri.” Innem jemaroñ ba: “Ej menin aikuj bwe aolep ro ilo eklejia eo ren jipañ doon kõm̦m̦an juon ri-­kal̦oor.” Eñin unin, ro me em̦m̦an aer katakin kõn Baibõl̦ rej kwal̦o̦k kajjien rũkkatak ro aer ñan ro jet ilo eklejia eo me enaaj em̦m̦an aer jipañ er kõm̦m̦an wõnm̦aanl̦o̦k ko im ruwaakl̦o̦k ñan Jeova. Innem rũkkatak ro renaaj maroñ m̦õn̦õn̦õ ilo aer kobal̦o̦k ippãn armej ro an Anij, im rein jeid im jatid remaroñ jipañ er bwe en em̦m̦anl̦o̦k kõtaan eo aer ippãn Jeova im jipañ er ñe rej iioon apañ ko. Jekõn̦aan bwe kajjojo iaan rũkkatak ro ad ren kile im eñjake bwe rej uwaan eklejia eo im bwe rej m̦õttan baam̦le eo ad ilo tõmak. Jekõn̦aan bwe en wõr aer kõn̦aan ñan epaake Kũrjin ro jeid im jatid me el̦ap aer yokwe. Innem enaaj pidodo ñan aer bõjrak jãn aer aetõl ro me rejjab jipañ er ñan yokwe Jeova. (JK. 13:20) El̦aññe ro ekõn m̦õttãik er rej kõjekdo̦o̦n e, enaaj jel̦ã bwe emaroñ lo ro jeran rem̦ool ilo doulul eo an Jeova.​—Mark 10:29, 30; 1 Pit. 4:4.

12. Etke jej aikuj kõnnaan ippãn rũkkatak eo ad kõn joñan an aorõk an juon ajel̦o̦k mour eo an im peptaij?

¹² Keini am̦ bwebwenato ippãn kõn joñan an aorõk bwe juon en ajel̦o̦k mour eo an ñan Jeova im peptaij. Ilo m̦ool, mejãnkajjik eo ad ñe jej katak Baibõl̦ ippãn juon ej ñan jipañe bwe en erom juon ri-kal̦oor me em̦õj an peptaij. Ãlikin jejjo allõñ in am̦ keini am̦ katak Baibõl̦ ippãn im el̦aptata ãlikin an jino pãd ilo kweilo̦k ko, rũkkatak eo ej aikuj mel̦el̦e bwe unin an katak ej ñan jipañe ñan jino karejar ñan Jeova ãinwõt juon iaan Ri-Kõnnaan ro an.

13. Ta buñtõn ne ko juon rũkkatak ej aikuj kõm̦m̦ani bwe en maroñ peptaij?

¹³ Jidik kõn jidik, juon rũkkatak me em̦ool bũruon emaroñ tõpar mejãnkajjik eo ñan peptaij! M̦oktata, rũkkatak eo enaaj jel̦ã kajjien Jeova im yokwe e im kwal̦o̦k an tõmak ilo E. (Jon 3:16; 17:3) Innem, rũkkatak eo enaaj ejaake juon an jem̦jerã ippãn Jeova im jino m̦õttãik ro ilo eklejia eo. (Hib. 10:24, 25; Jem. 4:8) Ejjabto, rũkkatak eo enaaj jol̦o̦k kõm̦m̦an ko renana im ukel̦o̦k jãn jerawiwi ko an. (Jrb. 3:19) Bareinwõt, tõmak eo an enaaj kõm̦akũti ñan kwal̦o̦k kõn m̦ool eo ñan ro jet. (2 Kor. 4:13) Innem, enaaj ajel̦o̦k mour eo an ñan Jeova im ej kam̦oole men in ikijjeen an peptaij. (1 Pit. 3:21; 4:2) Ej baj naaj juon iien ekalañlõñ ñan aolep! Ilo an rũkkatak eo kõm̦m̦ani kajjojo buñtõn ne ko bwe en tõpar mejãnkajjik eo an, jen ekkeini ad nõbare im rõjañe ñan jab bõjrak jãn an kõm̦m̦an wõnm̦aanl̦o̦k ko ilo ial̦ eo ejim̦we.

14. Ewi wãween an juon ri-katakin maroñ etale ejet an juon rũkkatak kõm̦m̦an wõnm̦aanl̦o̦k?

¹⁴ Jej aikuj in kijenmej ñe jej jipañ juon rũkkatak ñan kõm̦m̦an wõnm̦aanl̦o̦k ko ñan an ajel̦o̦k mour eo an innem peptaij. Bõtab, ewõr juon iien jenaaj aikuj lale el̦aññe ewõr ippãn kõn̦aan eo ñan karejar ñan Jeova Anij. Ewõr ke men ko kwõj kile ippãn rũkkatak eo me rej kaalikkar bwe ej kate ñan pokaki naanin tõl ko an Jesus? Ak ekõn̦aan baj katak wõt kõn mel̦el̦e ko jãn Baibõl̦ eo?

15. Ñan lale ejet an juon rũkkatak kõm̦m̦an wõnm̦aanl̦o̦k, ta ko ri-katakin eo ej aikuj lale ippãn rũkkatak eo?

¹⁵ Ekkeini am̦ etale wõnm̦aanl̦o̦k ko rũkkatak eo ej kõm̦m̦ani. Ñan waanjoñak, ej ke kõnono kake eñjake ko an kõn Jeova? Ej ke jar ñan Jeova? (Sam 116:1, 2, UBS) Ewõr ke an itoklimo in riiti Baibõl̦ eo? (Sam 119:97) Ej ke ekkeini an pãd ilo iien kweilo̦k ko? (Sam 22:22) Em̦õj ke an kõm̦m̦an oktak ko me rej menin aikuj ilo mour eo an? (Sam 119:112) Em̦õj ke an jino kwal̦o̦k kõn men ko ej katak kaki ippãn baam̦le eo an im ro m̦õttan? (Sam 9:1) Men eo eaorõktata, ekõn̦aan ke erom juon iaan Ri-Kõnnaan ro an Jeova? (Sam 40:8) Ñe rũkkatak eo ejjab kõm̦m̦an wõnm̦aanl̦o̦k ko ilo jabdewõt iaan wãween kein, ilo jouj kajjioñ lale etke ãindein innem kõnono ippãn kake ilo juon wãween ejouj ak ebar alikkar men eo kwõj kajjioñ ba ñane. *

16. Ta ko remaroñ kaalikkar bwe jej aikuj bõjrak jãn ad katak ippãn juon rũkkatak?

¹⁶ Jãn iien ñan iien, etale rũkkatak eo am̦ im lale el̦aññe ekkar bwe kwõn wõnm̦aanl̦o̦k wõt im katak ippãn. Kajjitõk ippam̦ make: ‘Rũkkatak eo ej ke likjab in kõpooje katak eo an? Ej ke juon eo me ejjab lukkuun itoklimo in kobatok ilo iien kweilo̦k ko? Ej wõr wõt ke imminene ko renana ippãn? Ej ke wõnm̦aanl̦o̦k wõt im uwaan juon kabuñ ewaan?’ El̦aññe uwaak eo ej aet, am̦ wõnm̦aanl̦o̦k wõt im katak ippãn armej eo, ej ãinwõt juon eo me ej kajjioñ in katakini juon armej ñan jel̦ã kilen aõ ak armej in ejjab kõn̦aan bwe en tutu! El̦aññe rũkkatak eo ejjab lukkuun kaorõk men ko ej katak kaki im ejjab kõn̦aan kõm̦m̦an oktak ko, ta unin am̦ wõnm̦aanl̦o̦k wõt im katak ippãn?

17. Ekkar ñan 1 Timote 4:16, ta ko me aolep ri-katakin ro kõn Baibõl̦ rej aikuj in kõm̦m̦ani?

¹⁷ El̦ap an aorõk ippãd ñan kajejjete eddo eo ad ñan kõm̦m̦an ri-kal̦oor, im jekõn̦aan jipañ rũkkatak ro ad bwe ren kõm̦m̦an wõnm̦aanl̦o̦k ko innem peptaij. Eñin unin jenaaj kõtl̦o̦k bwe Baibõl̦ eo en katakin, im jenaaj katakin ilo juon wãween ekãitoktoklimo im ealikkar bwe jej lukkuun tõmak men ko jej kõnono kaki. Jenaaj rõjañ rũkkatak eo ñan kappok m̦õttan ilo eklejia eo. Im jenaaj kaalikkar ñane kõn mejãnkajjik eo ñan ajel̦o̦k e make im peptaij, im jãn iien ñan iien etale ejet an rũkkatak eo kõm̦m̦an wõnm̦aanl̦o̦k. (Lale bo̦o̦k eo ilo peij 13 etan, “ Men ko Ri-Katakin ro Rej Aikuj Kõm̦m̦ani ñan Jipañ Rũkkatak ro ñan Kõm̦m̦an Wõnm̦aanl̦o̦k ko Innem Peptaij.”) Jej lañlõñ bwe jemaroñ bõk kun̦aad ilo jerbal in me ej lo̦mo̦o̦ren armej! Jen jek ippãd make ñan kate kõj joñan wõt ad maroñ ñan jipañ rũkkatak Baibõl̦ ro ad ñan kõm̦m̦an wõnm̦aanl̦o̦k ko innem peptaij.