1. Ewi wãween an 2 Korint 3:1-3 jipañ kõj ñan kaorõk jeraam̦m̦an eo ewõr ippãd ñan jipañ rũkkatak Baibõl̦ eo ad ñan kõm̦m̦an wõnm̦aanl̦o̦k ko im peptaij? (Lale pija eo ilo kilin bok in.)

EWI wãween am̦ eñjake ñe kwõj lo an juon iaan rũkkatak Baibõl̦ ro ilo eklejia eo am̦ peptaij? Ejjel̦o̦k pere bwe men in ekõm̦m̦an an lañlõñ bũruom̦. (Matu 28:19) Im el̦aññe kwe eo kwaar katak ippãn ri-kal̦oor in ekããl, ej juon men ekam̦õn̦õn̦õ ñan eok ilo am̦ lo an armej in peptaij! (1 Tes. 2:19, 20) Ri-kal̦oor rein rekããl me rej kab peptaij, rej “lõta in ijjitõñ” ko rem̦m̦an, ak kein kam̦ool ko bwe jej ri-kwal̦o̦k naan ro, ejjab ñan ro wõt rar katak ippãer ak ñan bar aolep ro ilo eklejia eo.​—Riit 2 Korint 3:1-3.

2. (1) Ta kajjitõk eo eaorõk jej aikuj in l̦õmn̦ak kake, im etke? (2) Ta mel̦el̦ein ñe kwõj katak Baibõl̦ ippãn juon? (Lale kõmel̦el̦e eo itulal̦.)

² Elukkuun em̦m̦an ad loe bwe ium̦win emãn iiõ ko remootl̦o̦k, kar kwal̦o̦k bwe ewõr enañin 10,000,000 rũkkatak Baibõl̦ ro * ipel̦aakin lal̦ in me rej katak kajjojo allõñ. Im ilo kar ejja iiõ kein wõt, ekar wõr elõñl̦o̦k jãn 280,000 rũkkatak ro rar peptaij kajjojo iiõ ãinwõt juon iaan Ri-Kõnnaan ro an Jeova im ri-kal̦oor ro rekããl an Jesus Christ. Ewi wãween ad maroñ jipañ rũkkatak Baibõl̦ rein jet me milien uwaaer ñan peptaij? Toon wõt an Jeova kijenmej wõt ilo an lel̦o̦k iien im ial̦ ñan armej ro bwe ren maroñ erom ri-kal̦ooran Christ, jekõn̦aan kate kõj joñan wõt ad maroñ ñan jipañ er kõm̦m̦an wõnm̦aanl̦o̦k ko bwe ren maroñ peptaij ilo  iien eo em̦õkajtata. Ekadu iien kiiõ im m̦õttan jidik emaat iien!​—1 Kor. 7:29a; 1 Pit. 4:7.

3. Ilo katak in, ta ko jenaaj etali ikijjeen ad katak ippãn rũkkatak ro ad?

³ Kõnke elukkuun aorõk ñan kõm̦m̦an ri-kal̦oor kiiõ, Kumi eo Ej Lale Aolep Eklejia ko an Ri-Kõnnaan ro an Jeova ear kajjitõk ippãn ra ko ta ko jemaroñ kõm̦m̦ani bwe jen jipañ rũkkatak Baibõl̦ ro jet ñan kõm̦m̦an wõnm̦aanl̦o̦k ko innem peptaij. Ilo katak in im ilo katak eo tok juon, jenaaj etale ta ko jemaroñ katak jãn ro el̦ap imminene ko ippãer ãinwõt bainier ro, mijinede ro, im em̦m̦aan ro rej lol̦o̦k eklejia ko. * (JK. 11:14; 15:22) Rein rej kwal̦o̦k ta ko ri-katakin Baibõl̦ ro im rũkkatak ro aer remaroñ kõm̦m̦ani bwe ren bõk el̦ap tokjãn ilo iien aer katak. Ilo katak in, jenaaj etali l̦alem men ko me rũkkatak ro kajjojo rej aikuj in kõm̦m̦ani bwe ren maroñ kõm̦m̦an wõnm̦aanl̦o̦k ko innem peptaij.

4. Ta eo jej aikuj in kile ikijjeen ad katak ippãn armej ro ilo im̦aan kõjãm ko aer?

⁴ Elõñ iaan ro jeid im jatid rej katak Baibõl̦ ippãn armej ro ilo im̦aan kõjãmin m̦õko im̦weer. Meñe ej juon wãween em̦m̦an ñan jipañ juon armej ñan kal̦apl̦o̦k an itoklimo kõn Baibõl̦ eo, ak ekkã an kadu iien ad bwebwenato ippãer im emaroñ jab aolep wiik jej katak. Ñan jipañ bwe en l̦apl̦o̦k aer itoklimo, jet rej kajjitõk nõm̦ba ko aer ak men ko ãierl̦o̦k wõt bwe ren maroñ tõpar er, innem kobal̦o̦k ippãn iien ko rej lol̦o̦k er rej bar call ak jejel̦o̦k ñan kwal̦o̦k jidik mel̦el̦e ko jãn Baibõl̦. Iien kein me rej bwebwenato jidik ippãer remaroñ wõnm̦aanl̦o̦k ium̦win elõñ allõñ ko ak ri-m̦weo ejjañin kõm̦m̦an wõnm̦aanl̦o̦k ilo an katak Baibõl̦. Kõn men in, juon rũkkatak emaroñ ke kõm̦m̦an wõnm̦aanl̦o̦k ko ñan ajel̦o̦k mour eo an innem peptaij el̦aññe joñan eo de in ej jol̦o̦k ñan an katak kõn Naanin Anij? Emaroñ jab.

5. Ekkar ñan Luk 14:27-33, ta eo Jesus ear kwal̦o̦k bwe emaroñ jipañ kõj ilo jerbal eo ad ñan kõm̦m̦an ri-kal̦oor?

⁵ Ekar wõr juon iien, Jesus ear kwal̦o̦k ta eo juon ej aikuj in kõm̦m̦ane bwe en maroñ erom ri-kal̦ooran. Ear kwal̦o̦k kõn juon armej me ekõn̦aan kalõk juon em̦ eutiej im kõn juon kiiñ me ear kõn̦aan kajju etal im tarin̦ae. Jesus ear ba bwe ri-ekkal eo ej aikuj “m̦okta jijet im lale joñan jããn eo ej aikuji” bwe en kam̦õje em̦ utiej eo im bwe kiiñ eo ej aikuj “jijet m̦okta im pepe ippãn ri-kakapilõk ro an” bwe en lale el̦aññe e im kumi in rũttarin̦ae ro an renaaj maroñ kajejjete men eo rej itõn kõm̦m̦ane. (Riit Luk 14:27-33.) Ãindeinl̦o̦k wõt, Jesus ear jel̦ã bwe armej eo ekõn̦aan bwe en erom juon ri-kal̦oor, ej aikuj lukkuun lale ta eo ej aikuj in kõm̦m̦ane bwe en l̦oore Jesus. Kõn men in, jej aikuj in  rõjañ ro remaroñ erom ri-kal̦oor bwe ren katak ippãd kajjojo wiik. Ewi wãween ad maroñ kõm̦m̦ane men in?

6. Ta eo jemaroñ kajjioñ kõm̦m̦ane bwe en wõr ad rũkkatak me ej kõm̦m̦an wõnm̦aanl̦o̦k?

⁶ Jinoe ilo am̦ kaetokl̦o̦k iien am̦ katak ippãer ilo nabõjin kõjãm ko aer. Kajjojo iien kwõj lol̦o̦k er, bõlen kwõmaroñ kobaik bar juon eoon im bwebwenato ippãer kake. Ñe em̦m̦an ippãn ri-m̦weo an tol̦o̦k am̦ pãd, kajjitõk ippãn el̦aññe ewõr juon jikin komiro maroñ jijet ippãn doon im kal̦apl̦o̦k amiro bwebwenato. Uwaak eo an ri-m̦weo enaaj kwal̦o̦k ewi joñan an kaorõk an katak Baibõl̦. Innem tokãlik, ñan jipañe kõm̦m̦an wõnm̦aanl̦o̦k ko ilo an katak, kwõmaroñ kajjitõk ippãn rũkkatak eo el̦aññe ekõn̦aan katak ruo alen kajjojo wiik. Ijoke, ewõr bar men ko ej aikuj kõm̦m̦ani ijello̦kun an katak wõt juon ak ruo alen kajjojo wiik.

7. Ewi wãween an eo ej katakin maroñ lukkuun kõppojakl̦o̦k im̦aan ñan kajjojo iien ej katak Baibõl̦ ippãn juon?

⁷ Ãinwõt eo me ej ri-katakin, kwõj aikuj lukkuun kõppojakl̦o̦k im̦aan ñan kajjojo iien kwõj itõn katak Baibõl̦ ippãn juon. Kwõmaroñ jinoe ilo am̦ riiti katak eo im etali eoon ko ie. Kajjioñ mel̦el̦e ta boin ko rel̦l̦ap ilo katak eo. L̦õmn̦ak kõn taitõl̦ eo an katak eo, unin tõl jiddik ko, kajjitõk ko, eoon in “riit” ko, pija ko, im jabdewõt pijain alwõj ko me remaroñ jipañ kõmel̦el̦eik men eo komiro ej katak kake. Innem, l̦õmn̦ak kõn rũkkatak eo am̦ im kõl̦mãnl̦o̦kjen̦ l̦o̦k im̦aan kõn wãween am̦ naaj kõmel̦el̦eiki mel̦el̦e ko ilo juon wãween epidodo im ealikkar bwe en maroñ pidodo an rũkkatak eo am̦ mel̦el̦e im jerbale.​—Nih. 8:8; JK. 15:28a.

8. Ta ko naan ko an rijjilõk Paul ilo Kolosse 1:9, 10 rej katakin kõj kõn wãween ad jar kõn rũkkatak Baibõl̦ ro ad?

⁸ Kobal̦o̦k ippãn am̦ kõppojakl̦o̦k im̦aan, kwõmaroñ jar ñan Jeova kõn rũkkatak eo im kõn aikuj ko an. Kajjitõk ippãn Jeova bwe en jipañ eok ñan katakin jãn Baibõl̦ ilo juon wãween me enaaj tõpar bũruon rũkkatak eo. (Riit Kolosse 1:9, 10.) Innem, kajjitõk ippam̦ make kõn jabdewõt men me emaroñ pen ñan an rũkkatak eo mel̦el̦e ak errã kaki. Keememej bwe mejãnkajjik eo am̦ ej ñan jipañ rũkkatak eo bwe en kõm̦m̦an wõnm̦aanl̦o̦k ko innem peptaij.

9. Ewi wãween an eo ej katakin maroñ jipañ rũkkatak eo an ñan kõpooje katak eo an? Jouj im kõmel̦el̦e.

⁹ Jej kõjatdikdik bwe ilo ad keini ad katak ippãn rũkkatak eo ad, men in enaaj kõm̦m̦an bwe en kaorõk men ko em̦õj an Jeova im Jesus kõm̦m̦ani im enaaj kõn̦aan kal̦apl̦o̦k an jel̦ã. (Matu 5:3, 6) Bwe rũkkatak eo en maroñ lukkuun  bõk tokjãn jãn an katak, ej aikuj kate e ñan lukkuun kõl̦mãnl̦o̦kjen̦ kõn men eo ej katak kake. Bwe en maroñ kõm̦m̦ane men in, kwal̦o̦k ewi joñan an aorõk bwe en kõppojakl̦o̦k im̦aan ikijjeen an riiti katak eo komiro enaaj etale m̦oktal̦o̦k jãn amiro katak im ilo an l̦õmn̦ak kõn ewi wãween an katak eo jelõt mour eo an. Ewi wãween an ri-katakin eo maroñ jipañe rũkkatak eo? Komiro maroñ kõpooje katak eo ippãn doon bwe kwõn maroñ kwal̦o̦k kilen an nãj kõpooje katak eo an. * Kõmel̦el̦eiki ewi wãween an maroñ lo uwaakin kajjitõk ko, im kwal̦o̦k ñane ewi wãween an naan ko ak jãntõj ko raorõk me ear kõkal̦l̦eiki naaj jipañe keememeje uwaak eo. Innem kajjitõk ippãn bwe en uwaak ilo naan ko an make. Ilo an naaj ãindein, kwõnaaj maroñ jel̦ã ewi joñan an mel̦el̦e kõn katak eo. Bõtab, ebar wõr men ko jet kwõmaroñ rõjañ rũkkatak eo am̦ ñan kõm̦m̦ani.

10. Etke eaorõk ñan riiti Baibõl̦ eo kajjojo raan, ta eo rũkkatak eo ej aikuj in kõm̦m̦ane bwe en maroñ bõk el̦ap tokjãn jãn an riit Baibõl̦?

¹⁰ Kobal̦o̦k ippãn an rũkkatak eo katak ippãn ri-katakin eo kajjojo wiik, enaaj bõk tokjãn jãn an bar kõm̦m̦ani men ko jet ippãn make kajjojo raan. Ej aikuj kõnono ippãn Jeova. Ewi wãween? Ikijjeen an roñjake im kõnnaan ippãn Jeova. Emaroñ roñjake Anij ilo an riiti Baibõl̦ eo kajjojo raan. (Jos. 1:8; Sam 1:1-3) Kwal̦o̦k l̦o̦k kilen an kõjerbale “Jikejuul̦ in Riit Baibõl̦” eo ilo jw.org me jemaroñ bũriini. * Em̦ool bwe ñan ad maroñ jipañe ñan bõk el̦ap tokjãn jãn an riit Baibõl̦, jemaroñ rõjañe ñan kõl̦mãnl̦o̦kjen̦ kõn ta eo Baibõl̦ ej katakin e kõn Jeova im kõn ewi wãween an maroñ jerbale men ko ej katak kaki ilo mour eo an.​—Jrb. 17:11; Jem. 1:25.

11. Ewi wãween an juon rũkkatak maroñ katak kilen jar ilo juon wãween ejim̦we, im etke eaorõk bwe en keini an jar ñan Jeova?

¹¹ Rõjañ rũkkatak eo am̦ ñan kõnnaan ippãn Jeova ikijjeen an jar kajjojo raan. Jar jãn bũruom̦ ilo jinoin im jem̦l̦o̦kin kajjojo iien kwõj katak ippãn, jar ippãn im jar kõn e. Ilo an roñjake am̦ jar, enaaj katak kilen jar jãn bũruon im an jar ñan Jeova Anij ilo etan Jesus Christ. (Matu 6:9; Jon 15:16) Baj l̦õmn̦ak m̦õk kõn ewi wãween an men kein, riit Baibõl̦ kajjojo raan (ej roñjake Jeova) im jar (ej kõnnaan ippãn Jeova) naaj lukkuun jipañ rũkkatak eo am̦ ñan ruwaakl̦o̦k ñan Anij! (Jem. 4:8) Ilo an keini an kõm̦m̦ani men kein, men in enaaj jipañ rũkkatak eo am̦ ñan kõm̦m̦an wõnm̦aanl̦o̦k bwe en  ajel̦o̦k mour eo an innem peptaij. Ta eo enaaj jipañe?

12. Ewi wãween an juon ri-katakin maroñ jipañ rũkkatak eo an ñan ejaake juon jem̦jerã ippãn Jeova?

¹² Men ko rũkkatak eo ej katak kaki ilo iien an katak Baibõl̦, ren jab baj kareel wõt l̦õmn̦ak eo an ak ren bar tõpar bũruon. Etke? Kõnke bũruod, me ej kitibuj kõn̦aan ko ad im wãween ad eñjake, ej kõm̦m̦an bwe jen kõn̦aan em̦m̦akũt. Jesus ear kõmel̦el̦e ilo juon wãween epidodo ñan mel̦el̦e im ekareel l̦õmn̦ak ko an armej ro. Bõtab armej ro rar l̦oore kõnke ear bar jel̦ã tõpar bũrueer. (Luk 24:15, 27, 32) Rũkkatak eo am̦ ej aikuj in watõk Jeova ãinwõt juon Eo me ej lukkuun mour, juon eo me emaroñ ejaak juon jem̦jerã ippãn, im juon eo me emaroñ watõke ãinwõt juon Jemãn, an Anij, im M̦õttan. (Sam 25:4, 5) Ilo iien eo jej katak ippãn rũkkatak eo ad, jen kõm̦m̦ane ilo wãween eo me enaaj lukkuun alikkar kadkad ko kadkadin Anij. (Ex. 34:5, 6; 1 Pit. 5:6, 7) Jekdo̦o̦n katak ta eo komiro ej etale, ak en l̦ap am̦ kwal̦o̦k kõn kain Anij rot Jeova. Jipañ rũkkatak eo am̦ ñan jel̦ã kam̦m̦oolol kõn kadkad ro rem̦m̦an kadkadin Jeova ãinwõt yokwe, jouj, im tũriam̦o. Jesus ear ba bwe “kien eo m̦oktata im eaorõktata” ej ñan “yokwe Jeova am̦ Anij.” (Matu 22:37, 38) Kajjioñ in jipañ rũkkatak eo am̦ ñan kaddek juon yokwe em̦wilal̦ ilo bũruon ñan Anij.

13. Kwal̦o̦k juon waanjoñak kõn wãween ad maroñ jipañ juon rũkkatak ñan katak kõn kadkad ko kadkadin Jeova.

¹³ Ilo am̦ bwebwenato ippãn rũkkatak eo am̦, kwal̦o̦k ñane kõn joñan am̦ yokwe Jeova. Men in emaroñ jipañ rũkkatak eo am̦ ñan kile bwe ej aikuj in ejaak juon an make jem̦jerã epaak ippãn Anij. (Sam 73:28) Ñan waanjoñak, ewõr ke juon jãntõj ilo bok eo komiro ej katak kake ak ilo juon eoon me ej kaalikkar kõn yokwe eo an Jeova, an mãlõtlõt, ekajet jim̦we, im kajoor, me etõpar bũruom̦? Kõnono kake men in ippãn rũkkatak eo am̦, im kwal̦o̦k ñane bwe eñin ej juon iaan un ko rellõñ unin am̦ yokwe Jemãdwõj ilañ. Ebar wõr juon men me aolep ro rej katak Baibõl̦ rej aikuj in kõm̦m̦ane bwe ren maroñ kõm̦m̦an wõnm̦aanl̦o̦k ko innem peptaij.

14. Ta eo Hibru 10:24, 25 ej ba kõn kweilo̦k ko an eklejia eo me emaroñ jipañ juon rũkkatak ñan kõm̦m̦an wõnm̦aanl̦o̦k ko?

¹⁴ Kõj aolep im kõn̦aan bwe rũkkatak ro ad ren kõm̦m̦an wõnm̦aanl̦o̦k ko im peptaij. Juon wãween eaorõk jemaroñ kõm̦m̦ane ñan jipañ er ej ikijjeen ad rõjañ er ñan itok ñan kweilo̦k ko. Ri-katakin ro el̦ap imminene ko ippãer, rej ba bwe rũkkatak ro me em̦õkaj aer kobal̦o̦k ilo  iien kweilo̦k ko, em̦õkajl̦o̦k aer kõm̦m̦an wõnm̦aanl̦o̦k. (Sam 111:1, UBS) Jet ri-katakin ro rej kõmel̦el̦eik rũkkatak ro aer bwe elõñ men ko renaaj katak kaki kõn Baibõl̦ eo ilo iien kweilo̦k ko, me remaroñ jab katak kaki ilo iien aerro katak. Riit Hibru 10:24, 25 ippãn rũkkatak eo am̦, im kõmel̦el̦eiki kõn tokjãn ko enaaj bũki ñe enaaj itok ñan iien kweilo̦k ko. Kõjo̦e pija eo etan, Ta ko Rej Wal̦o̦k ilo Im̦õn Kweilo̦k ko Ammim? * Jipañ rũkkatak eo am̦ ñan kõm̦m̦an bwe an pãd ilo kweilo̦k ko kajjojo wiik, en juon men eaorõk ilo mour eo an.

15. Ta ko jemaroñ kõm̦m̦ani ñan rõjañ juon rũkkatak bwe en niknik ilo an pãd ilo iien kweilo̦k ko?

¹⁵ Ta ko kwõmaroñ kõm̦m̦ani el̦aññe rũkkatak eo am̦ ejjañin pãd ilo juon iien kweilo̦k ak ejjab niknik ilo an pãd ilo kweilo̦k ko? Ilo juon wãween ekãitoktoklimo, kwal̦o̦k ñane kõn juon men kwaar katak kake ilo juon iaan kweilo̦k ko rej kab mootl̦o̦k. Men in enaaj l̦apl̦o̦k an kõm̦akũti ijello̦kun ad baj kũrtok wõt e ñan iien kweilo̦k ko. Lel̦o̦k juon an Naan in Keeañ ak Jerbal eo Ad im Wãween Ad Mour​—Kein Katak me jej kõjerbale ñan katak ilo iien kweilo̦k ko. Kwal̦o̦k ta ko jenaaj etali ilo iien kweilo̦k eo tok juon, im kajjitõk ippãn m̦õttan ta eo ilo katak eo me el̦apl̦o̦k an kãitoktoklimo ñane. Men ko me rũkkatak eo am̦ enaaj loi im roñ ilo iien eo kein kajuon in an kweilo̦k, enaaj em̦m̦anl̦o̦k jãn jabdewõt men ko em̦õj an loi ak roñ ilo iien m̦akũtkũt ko an bar juon kabuñ. (1 Kor. 14:24, 25) Enaaj iioone ro jet me emaroñ l̦oore joñak ko aer rem̦m̦an im remaroñ jipañe ñan kõm̦m̦an wõnm̦aanl̦o̦k ko innem peptaij.

16. Ta ko jej aikuj in kõm̦m̦ani ñan jipañ rũkkatak Baibõl̦ ro ad ñan kõm̦m̦an wõnm̦aanl̦o̦k ko innem peptaij, im ta eo jenaaj etale ilo katak eo tok juon?

¹⁶ Ewi wãween ad maroñ jipañ rũkkatak Baibõl̦ ro ad bwe ren kõm̦m̦an wõnm̦aanl̦o̦k ko innem peptaij? Jemaroñ jipañ kajjojo iaan rũkkatak ro ad ñan kile aorõkin aer katak ikijjeen ad rõjañ er ñan katak kajjojo wiik im kõppojakl̦o̦k im̦aan ñan kajjojo iien aer katak. Jekõn̦aan bar rõjañ er ñan roñjake im kõnono ippãn Jeova aolep raan im ñan ejaake juon aer make jem̦jerã Ippãn. Jekõn̦aan kõm̦akũt rũkkatak eo ñan pãd ilo iien kweilo̦k ko an eklejia eo. (Lale bo̦o̦k eo ilo peij 12, etan “ Men ko Rũkkatak ro Rej Aikuj in Kõm̦m̦ani ñan Kõm̦m̦an Wõnm̦aanl̦o̦k ko Innem Peptaij.”) Ijoke, ãinwõt an katak eo juon naaj kõmel̦el̦eiki, ewõr bar l̦alem wãween ko me ri-katakin Baibõl̦ ro remaroñ kõm̦m̦ani ñan jipañ rũkkatak ro aer bwe ren kõm̦m̦an wõnm̦aanl̦o̦k ko innem peptaij.