1. Etke elõñ armej rej pok?

EMAROÑ wõr elõñ to̦ujin kabuñ ko rej ba bwe er Kũrjin im bwe rej kabuñ ñan Anij ilo juon wãween me ej kabuñbũruon. Eñin unin jej lo bwe elõñ armej repok! Rej kajjitõk im ba, “Ewõr ke juon kabuñ me em̦ool, ak aolep kabuñ ko rej ke kabuñbũruon Anij?” Jej ke lukkuun tõmak bwe men ko jej katakin ro jet kaki rem̦ool im bwe wãween an Ri-Kõnnaan ro an Jeova kabuñ ilo raan kein ej wãween eo me ej kabuñbũruon Jeova? Jemaroñ ke lukkuun tõmak bwe em̦ool men kein? Jen etale kein kam̦ool ko.

2. Ekkar ñan 1 Tessalonika 1:5, etke rijjilõk Paul ear lukkuun tõmak bwe men ko ej tõmaki rem̦ool?

² Rijjilõk Paul ear lukkuun tõmak bwe men ko ej tõmaki rem̦ool. (Riit 1 Tessalonika 1:5.) Tõmak eo an ear jab pedped ioon eñjake ko an. Paul ear juon eo me ear tiljek ilo an katak kõn Naanin Anij. Ear tõmak bwe “aolep Jeje ko rej kakũrm̦ool in Anij.” (2 Tim. 3:16) Ta ko ear loi ilo an kar katak? Ilo Baibõl̦ eo, Paul ear lo kein kam̦ool ko me rar kaalikkar bwe Jesus ej Messaia eo me kar kallim̦ur kake​—kein kam̦ool ko me ri-tõlin kabuñ ro an ri-Ju ro rar m̦akoko in tõmaki. Ri-jum̦ae rein rar ba bwe rej jutak ikijjeen Anij, ak rar kõjekdo̦o̦ne ikijjeen kõm̦m̦an ko aer. (Tai. 1:16) Paul ear oktak jãn rein kõnke ear jab kããlõt ewi iaan katak ko ilo Naanin Anij enaaj tõmaki im jab tõmaki. Ear pojakin katakin ro jet im jerbali “aolep naanin kakapilõk ko an Anij.”​—Jrb. 20:27.

3. Bwe jen maroñ lukkuun tõmak bwe em̦õj ad lo m̦ool eo, jej aikuj in ke lo aolep uwaakin kajjitõk ko ad? (Bar lale bo̦o̦k eo etan “ Jerbal im L̦õmn̦ak ko an Jeova​—‘Rellõñ jãn Maroñ in Bwini.’”)

 ³ Jet rej l̦õmn̦ak bwe kabuñ eo em̦ool ej aikuj maroñ uwaaki aolep kajjitõk ko, ekoba kajjitõk ko me Baibõl̦ ejjab lukkuun kwal̦o̦k kaki. Ejim̦we ke ñan bõk kain l̦õmn̦ak rot in? L̦õmn̦ak kõn waanjoñak eo an Paul. Ear rõjañe rũttõmak ro m̦õttan bwe ren “kanooj etale men otemjej,” ak ear bareinwõt ba bwe elõñ men ko ear jab mel̦el̦e kaki. (1 Tes. 5:21) Ear je im ba: “Ejjab likiio jel̦ãl̦o̦kjen̦ ko ippãd,” im ear bar ba: “Men ko jej loi kiiõ rej ãinwõt men ko jej loi ilo juon kilaaj etab.” (1 Kor. 13:9, 12) Paul ear jab mel̦el̦e kõn aolep men, im kõj bareinwõt. Bõtab Paul ear lo mel̦el̦e ko raorõk me rem̦ool kõn Jeova. Joñan men ko ear jel̦ã kaki ear bwe ñan an tõmak im kile bwe em̦õj an lo m̦ool eo!

4. Ewi wãween ad maroñ kõkajoor ad tõmak bwe em̦õj ad lo m̦ool eo, im ta ko jenaaj etali kõn Kũrjin ro rem̦ool?

⁴ Juon wãween jemaroñ kõkajoorl̦o̦k ad tõmak bwe em̦õj ad lo m̦ool eo ej ilo ad keidi joñak eo Jesus ear likũti kõn wãween kabuñ ippãn men ko Ri-Kõnnaan ro an Jeova rej kõm̦m̦ani rainin. Ilo katak in, jenaaj lo bwe Kũrjin ro rem̦ool rej (1) jum̦ae kabuñ ñan ekjab, (2) kautiej etan Jeova, (3) yokwe ak kaorõk m̦ool eo, im (4) lukkuun yokwe doon.

5. Ta eo jej katak jãn Jesus ikijjeen wãween eo ejim̦we ñan ad kabuñ ñan Anij, im ewi wãween jemaroñ jerbale men ko ear katakin?

⁵ Kõn an m̦wilal̦ yokwe eo an Jesus ñan Jeova, men in ear kõm̦akũt e ñan karejar ñan Jeova wõt ke ear pãd ilañ im ioon lal̦ in. (Luk 4:8) Ear katakin ri-kal̦oor ro an  ñan bar ãindein. Ejjel̦o̦k juon iien me Jesus, ekoba ri-kal̦oor ro an retiljek, rar kõjerbal ekjab ko ilo aer kabuñ. Kõnke Anij ej juon Jetõb, ejjel̦o̦k men en̦ me armej remaroñ ãeiki ak kõm̦m̦ane me emaroñ kwal̦o̦k aiboojoj eo An! (Ais. 46:5) Ak ta kõn kõm̦m̦an ekjab ak annañin armej ro me jet rej watõk er rekkwõjarjar im an armej jar ñan er? Ilo kien eo kein karuo ilo Kien ko Joñoul, Jeova ear ba: “Kwõn jab kõm̦anm̦an im jekjek ekjab ñan eok, ak jabdewõt men me ej ilo wãween men ko ilõñ, ak ilal̦ ium̦win . . . Kwõn jab badikdik . . . ñan er.” (Ex. 20:4, 5) Naan kein ralikkar ñan ro me rekõn̦aan kabuñbũruon Anij.

6. Wõn ro Ri-Kõnnaan ro an Jeova rej l̦oore joñak eo aer ilo wãween aer kar kabuñ?

⁶ Armej ro me rej ekkatak kõn bwebwenatoun armej rej ba bwe Kũrjin ro ilo kar tõre ko an rijjilõk ro rar kabuñ ñan Anij wõt. Ñan waanjoñak, juon bok (History of the Christian Church) ej ba bwe Kũrjin ro ilo tõre ko an rijjilõk ro “ren kar dike” l̦õmn̦ak eo kõn illik ekjab ko ilo jikin kabuñ ko. Ilo raan kein, Ri-Kõnnaan ro an Jeova rej l̦oore joñak eo an Kũrjin ro ilo tõre ko an rijjilõk ro kõn wãween kabuñ. Jejjab jar ñan ekjab ak annañin armej ro me jet rej watõk er bwe “rekkwõjarjar,” ak enjel̦ ro; joñan jejjab jar ñan Jesus. Im jejjab kabuñ ñan ak kautiej jabdewõt menin kõm̦anm̦an ko an armej me rej jutak kõn juon aelõñ ak jikin. Jekdo̦o̦n ta eo enaaj wal̦o̦k, ak jej jek ilo bũruod ñan l̦oore naan ko an Jesus me ear ba: “Kwõn kabuñ ñan Jeova am̦ Anij.”​—Matu 4:10.

7. Ta oktak eo ikõtaan Ri-Kõnnaan ro an Jeova im kabuñ ko jet?

⁷ Rainin, elõñ rej l̦oore ak roñjake ri-tõlin kabuñ ro me rebuñbuñ. Joñan aer lukkuun itoklimo kõn ri-tõlin kabuñ rein ej ãinwõt ñe rej kabuñ ñan er. Armej ro rej koobrak im̦õn jar ko aer, wiaik bok ko aer, im rej jabawõt kõn elõñ jããn ko ñan rejetake ri-tõl rein ak doulul ko me rej jipañi. Jet rej lukkuun tõmak aolep naan ko rej ba. Joñan an l̦ap an armej rein buñbũrueer kõn em̦m̦aan rein, emaroñ kar bar joñan wõt juon eñjake eo rej bõke ñe ren kar lo Jesus! Ijoke, ñan ro me rej kabuñ ñan Jeova ilo wãween eo ejim̦we, rejjab l̦oor armej. Meñe jej kautiej ro me rej tõl kõj, ak jej errã im jerbale naan ko an Jesus ralikkar me ear ba: “Kom̦ aolep kom̦ij jemjein jemjati.” (Matu 23:8-10) Jejjab kabuñ ñan armej, jekdo̦o̦n ñe er ri-tõlin kabuñ ak ri-tõlin kien. Im jejjab rejetake kõttõpar ko aer. Jejjab bõk kun̦aad ilo aitwerõk ko ilo lal̦ in im jej jenolo̦k jãn lal̦ in. Ilo wãween kein, jej oktak jãn kabuñ ko jet me rej ba bwe er Kũrjin.​—Jon 18:36.

8. Etke jejel̦ã bwe Jeova ekõn̦aan bwe jen kaiboojoje etan im bwe aolep armej ren jel̦ã kake?

⁸ Juon iien Jesus ear jar im ba: “Jema, kwõn kaiboojoj etam̦.” Jeova make ear uwaake jar in kõn juon ainikien el̦ap jãn lañ im ear kallim̦ur bwe enaaj kaiboojoje etan. (Jon 12:28) Ke Jesus ear kwal̦o̦k naan ijin ioon lal̦, ear kaiboojoje etan Jemãn. (Jon 17:26) Kõn men in, ejjel̦o̦k pere bwe Kũrjin ro rem̦ool renaaj watõk bwe ej juon jeraam̦m̦an ñan kõjerbale etan Anij im ñan kwal̦o̦k kake ñan aolep armej.

9. Ewi wãween an kar Kũrjin ro ilo tõre ko an rijjilõk ro kam̦ool bwe rar kautiej etan Anij?

⁹ Ilo tõre ko an rijjilõk ro, ãlikin an kar jutak eklejia eo an Kũrjin ro, ejjabto tokãlik Jeova ear “oktakl̦o̦k ñan ri-aelõñ ko im ebbõk armej jãn ibwiljier bwe ren jutak kõn ãt  eo etan.” (Jrb. 15:14) Kũrjin ro ilo tõre kein rar watõk bwe ej juon jeraam̦m̦an ñan kõjerbal etan Anij im ñan kwal̦o̦k kake ñan ro jet. Rar kõjerbale ãt eo etan Anij ke rar kwal̦o̦k naan im ilo aer kar je bok ko ilo Baibõl̦. * Ilo aer kar ãindein, rar kam̦ool bwe rar ro wõt me rar kwal̦o̦k kõn etan Anij.​—Jrb. 2:14, 21.

10. Ta kein kam̦ool ko rej kwal̦o̦k bwe Ri-Kõnnaan ro an Jeova rej armej ro wõt me rej kwal̦o̦k kõn etan Jeova?

¹⁰ Ri-Kõnnaan ro an Jeova rej ke armej ro wõt me rej kwal̦o̦k kõn etan Jeova? L̦õmn̦ak kõn kein kam̦ool kein. Rainin, elõñ ri-tõlin kabuñ ko rej lukkuun kate er joñan wõt aer maroñ ñan n̦ooje etan Anij. Em̦õj aer jol̦o̦ke jãn ukokin Baibõl̦ ko aer, im jet rar kõmo̦ aer kõjerbale etan Anij ilo m̦õn jar ko aer. * Elukkuun alikkar bwe Ri-Kõnnaan ro an Jeova rej armej ro wõt me rej kautiej ãt eo etan Jeova ilo wãween eo me ej tõllo̦kũn ñan an bõke. El̦ap ad kajeedede etan Anij jãn jabdewõt kabuñ! Kõn men in, jej kate kõj joñan wõt ad maroñ ñan mour ekkar ñan ãt eo etad, Ri-Kõnnaan ro an Jeova. (Ais. 43:10-12) Em̦õj ad kõm̦m̦an elõñl̦o̦k jãn 240 milien kaape in New World Translation of the Holy Scriptures me epãd etan Jeova ilo jikin ko me em̦õj an ri-ukokin Baibõl̦ ro jet jol̦o̦k jãne. Im jej kõm̦m̦an bok ko me rej pedped ioon Baibõl̦ me rej kõjerbale  etan Jeova im rej pãd ilo elõñl̦o̦k jãn 1,000 kajin ko!

11. Ewi wãween an kar Kũrjin ro ilo tõre ko an rijjilõk ro kaalikkar yokwe eo aer ñan m̦ool eo?

¹¹ Jesus ej yokwe m̦ool eo, mel̦el̦ein m̦ool eo kõn Anij im karõk ko An. Jesus ear mour ekkar ñan m̦ool eo, im ear kwal̦o̦k kake ñan ro jet. (Jon 18:37) Ri-kal̦oor ro rem̦ool an Jesus rar bareinwõt lukkuun yokwe m̦ool eo. (Jon 4:23, 24) Ilo m̦ool, rijjilõk Piter ear ba bwe tõmak eo an Kũrjin ro ej “ial̦ eo em̦ool.” (2 Pit. 2:2) Kõn an kajoor yokwe eo an Kũrjin ro ilo tõre ko an rijjilõk ro ñan m̦ool eo, rar jum̦aik katak ko an kabuñ ko, m̦anit ko an armej, im l̦õmn̦ak ko an armej me rar jab pedped ioon m̦ool eo. (Kol. 2:8) Ejja ãindeinl̦o̦k wõt ilo raan kein, Kũrjin ro rem̦ool rej lukkuun kate er ñan “wõnm̦aanl̦o̦k im etetal ilo m̦ool eo” ilo aer kõm̦m̦an bwe aolep men ko rej tõmaki im wãween aer mour ren pedped wõt ioon Naan ko an Jeova.​—3 Jon 3, 4.

12. Ta eo ej wal̦o̦k ñe ro rej tõl kõj rej kile bwe jej aikuj kõm̦m̦an oktak ilo mel̦el̦e ko ad ilo juon katak, im etke rej kõm̦m̦ane men in?

¹² Armej ro an Anij rainin rejjab ba bwe el̦ap aer jel̦ã ak ewõr ippãer aolep mel̦el̦e ko kõn m̦ool eo. Ewõr iien, ear bõd aer mel̦el̦e kõn jet katak ko im aer kar lel̦o̦k naanin tõl ko ilo doulul eo. Men in ejjab aikuj kabwilõñ kõj. Baibõl̦ ej kaalikkar bwe jel̦ãl̦o̦kjen̦ eo ejim̦we enaaj l̦apl̦o̦k wõt ilo an mootl̦o̦k iien. (Kol. 1:9, 10) Jeova ej jidik kõn jidik kaalikkarl̦o̦k m̦ool eo ñan kõj, im jej aikuj in m̦õn̦õn̦õ in kijenmej ilo ad kõttar an meraml̦o̦k wõt meramin m̦ool eo. (JK. 4:18) Ñe ro rej tõl kõj rej kile bwe ej menin aikuj ñan kaalikkarl̦o̦k mel̦el̦e eo ad kõn juon katak jãn Baibõl̦, rejjab ãliklik in kõm̦m̦an oktak. Kabuñ ko me rej ba bwe er Kũrjin rej kõm̦m̦an oktak ko bwe ren maroñ kabuñbũruon armej ro dooer ak bwe ren epaakel̦o̦k wõt lal̦ in, ijoke oktak ko doulul eo an Jeova ej kõm̦m̦ani rej ñan jipañ kõj ñan epaakel̦o̦k Anij im bwe en l̦apl̦o̦k ad l̦oore joñak eo Jesus ear likũti kõn wãween kabuñ. (Jem. 4:4) Oktak ko me jej kõm̦m̦ani rejjab ekkar ñan l̦õmn̦ak ko rekããl an armej ak l̦õmn̦ak ko rebuñbuñ, ak jej kõm̦m̦ani oktak kein kõnke ealikkarl̦o̦k ad mel̦el̦e kõn katak ko jãn Baibõl̦. Jej yokwe m̦ool eo!​—1 Tes. 2:3, 4.

13. Ta kadkad eo eaorõktata me Kũrjin ro rem̦ool rej kwal̦o̦ke, im ewi wãween an alikkar kadkad in ippãn Ri-Kõnnaan ro an Jeova rainin?

¹³ Iaan aolep kadkad ko me armej ro rar kile ippãn Kũrjin ro ilo jinoin, yokwe ej kadkad eo eaorõktata rar kile ippãer. Jesus ear ba: “El̦aññe kom̦ij yokwe doon, innem aolep renaaj jel̦ã bwe kom̦ij ri-kal̦oora.” (Jon 13:34, 35) Rainin, Ri-Kõnnaan ro an Jeova ipel̦aakin lal̦ in rej lo yokwe eo em̦ool ibwiljier im rej bõrokuk ippãn doon. Doulul in ad ejjab ãinwõt doulul ko jet kõnke el̦ap ad epaake doon meñe eoktak aelõñ, kajin, ak bõnbõnid jãn doon. Jej lo m̦oolin yokwe ilo iien kweilo̦k ko ad im iien kweilo̦k el̦ap ko ad. Men kein rej kõkajoorl̦o̦k ad tõmak bwe wãween ad kabuñ ej wãween eo me ej kabuñbũruon Jeova.

14. Ekkar ñan Kolosse 3:12-14, ta juon iaan wãween ko raorõk me jemaroñ kwal̦o̦k ad lukkuun yokwe doon?

¹⁴ Baibõl̦ ej lukkuun rõjañ kõj ñan “lukkuun yokwe doon.” (1 Pit. 4:8) Juon wãween jej kwal̦o̦k kain yokwe rot in ej ilo ad jol̦o̦k an doon bõd im kijenmej wõt ippãn doon kõn likjab ko ad. Jej bar pukot iien ko repel̦l̦o̦k ñan ad m̦õn̦õn̦õ in lel̦o̦k im karwaineneik aolep ro ilo eklejia eo, ekoba ro me remaroñ  kar kainepataik kõj. (Riit Kolosse 3:12-14.) Ilo ad kwal̦o̦k yokwe rot in jej kam̦ool bwe jej Kũrjin ro rem̦ool.

15. Ta wãween ko jet me jej l̦oore wãween an kar Kũrjin ro ilo tõre ko an rijjilõk ro kabuñ?

¹⁵ Ewõr bar wãween ko jet me jej l̦oore wãween an kar Kũrjin ro ilo tõre ko an rijjilõk ro kabuñ. Ñan waanjoñak, wãween laajrakin doulul in ad​—me ej kitibuj em̦m̦aan ro rej lol̦o̦k eklejia ko, em̦m̦aan ro rej lale eklejia, im rijjipañ ro—​ej ãinwõt laajrak eo me rijjilõk ro rar kõm̦m̦ane ilo kar tõre ko aer. (Pil. 1:1; Tai. 1:5) Wãween ad watõk an juon em̦m̦aan im kõrã babu ippãn doon im mourin m̦are, ad kautiej aorõkin bõtõktõk kõn an kwõjarjar, im ad kõn̦aan kõjparok eklejia eo jãn rijjerawiwi ro rejjab ukel̦o̦k, aolep men kein rej pedped ioon wãween an kar Kũrjin ro ilo tõre ko an rijjilõk ro kar kabuñ.​—Jrb. 15:28, 29; 1 Kor. 5:11-13; 6:9, 10; Hib. 13:4.

16. Ta eo jej katak jãn naan ko ilo Epesõs 4:4-6?

¹⁶ Jesus ear ba bwe elõñ renaaj ba bwe rej ri-kal̦ooran, bõtab ejjab aolep renaaj m̦ool ilo aer l̦oore. (Matu 7:21-23) Baibõl̦ ej bareinwõt kakkõl kõj bwe ilo raan ko ãliktata, elõñ “renaaj ãinwõt ñe rej tiljek ñan Anij.” (2 Tim. 3:1, 5) Meñe ãindein, ak Baibõl̦ eo ej kaalikkar ñan kõj bwe ewõr “juon wõt tõmak” me Anij ej buñbũruon kake.​—Riit Epesõs 4:4-6.

17. Wõn ro rej l̦oore Jesus im l̦oore wãween kabuñ eo me em̦ool?

¹⁷ Wõn ro rej l̦oore wãween kabuñ eo me em̦ool? Em̦õj ad etale kein kam̦ool ko. Jaar etale wãween an kar Jesus kabuñ im wãween an Kũrjin ro ilo tõre ko an rijjilõk ro kar l̦oore wãween in. Ewõr juon wõt uwaak​—Ri-Kõnnaan ro an Jeova. Ej juon jeraam̦m̦an el̦ap bwe jej juon iaan ro doon Jeova im jemaroñ jel̦ã kõn m̦ool eo kõn Jeova im kõn karõk ko an! Jen wõnm̦aanl̦o̦k wõt im dãpij wõt m̦ool eo im lõke bwe epãd ippãd.