1. Ewi wãween an elõñ armej rainin em̦m̦akũt ñe rej roñ an mãlõtlõt lam̦õj tok? (Jabõn Kõnnaan 1:20, 21)

 ILO elõñ aelõñ ko, ekkã ad kar loe an ro jeid im jatid kwal̦o̦k naan ilo̦bwilej ilo jikin ko elõñ armej ie. Ekkã aer jutak im lel̦o̦k bok ko ad ñan armej ro rej etetal im pãd ilo ial̦ eo. Em̦õj ke am̦ bõk kun̦aam̦ ilo wãween in ñan kwal̦o̦k naan? El̦aññe aet, bõlen em̦õj am̦ l̦õmn̦ak kõn eoon ko ilo Jabõn Kõnnaan me ej ba bwe mãlõtlõt ej lam̦õj ilo jikin ko elõñ armej ie bwe ren roñ naanin jipañ ko an. (Riit Jabõn Kõnnaan 1:20, 21.) Baibõl̦ eo im bok ko ad rej kwal̦o̦k kõn “mãlõtlõt” eo em̦ool—mãlõtlõt eo an Jeova. Eñin mãlõtlõt eo armej rej aikuji bwe ren maroñ mour ñan indeeo. El̦ap ad m̦õn̦õn̦õ ñe juon ekõn̦aan bõk juon iaan bok ko ad, bõtab ejjab aolep rem̦õn̦õn̦õ in kõm̦m̦ane men in. Jet armej rej m̦akoko in jel̦ã ta eo Baibõl̦ ej ba. Ro jet remaroñ ettõñ im kajjirere kake kõj. Rej l̦õmn̦ak bwe ejjel̦o̦k tokjãn Baibõl̦ eo kõnke ej juon bokin etto. Im jet armej rej kõrraate katak ko ilo Baibõl̦ kõn ta ko rem̦m̦an im ta ko renana, rej ba bwe ro rej l̦oore katak kein ilo Baibõl̦ relukkuun kõwãnõknõk im rejjab jouj. Meñe ãindein, ak ejjab bõjrak an Jeova letok ñan aolep armej maroñ eo ñan roñjake im bõk tokjãn jãn mãlõtlõt eo an. Ilo wãween et?

2. Rainin ia eo jemaroñ bõk mãlõtlõt eo em̦ool jãne, bõtab ta eo elõñ armej rej kããlõt ñan kõm̦m̦ane?

² Juon wãween Jeova ej kõm̦m̦an bwe armej ro ren maroñ roñ kõn mãlõtlõt eo em̦ool, ej ikijjeen Naan eo an, Baibõl̦ eo. Enañin aolep armej ewõr aer maroñ ñan riiti Baibõl̦ eo ak ebbõk aer Baibõl̦. Ak ta kõn bok ko ad me rej pedped ioon Baibõl̦? Eokwe, kam̦m̦oolol Jeova bwe bok kein repãd ilo elõñl̦o̦k jãn 1,000 kajin ko. Ro rej roñjake, mel̦el̦ein ro rej riit im jerbali men ko rej katak kaki, renaaj bõk tokjãn. Meñe ãindein, ak  enañin aolep armej rej kããlõt ñan kõjekdo̦o̦n ainikien eo ej letok mãlõtlõt eo em̦ool. Ñe rej aikuj kõm̦m̦an pepe, rekõn̦aan atartar wõt ioer make ak roñjake armej ro jet. Joñan, remaroñ reilal̦tak ñan kõj kõnke jej kããlõt ñan l̦oore ta eo Baibõl̦ ej ba. Katak in enaaj kõmel̦el̦e unin an armej em̦m̦akũt ilo wãween in. Ak m̦okta, jen lale ewi wãween jemaroñ bõk mãlõtlõt jãn Jeova.

3. Ta eo jej aikuj kõm̦m̦ane bwe jen kwal̦o̦k mãlõtlõt eo em̦ool?

³ Mãlõtlõt emaroñ jitõñl̦o̦k ñan maroñ eo ñan kõjerbale jel̦ãl̦o̦kjen̦ eo ad ñan kõm̦m̦ani pepe ko rem̦m̦an. Ijoke, mãlõtlõt eo em̦ool ej kitibuj men ko rel̦l̦apl̦o̦k. Baibõl̦ ej ba: “Mijak Jeova, jinoin mãlõtlõt; im jel̦ã kõn Eo eokkwõjarjar, jel̦ãl̦o̦kjen̦.” (JK. 9:10) Innem ñe ewõr juon pepe eaorõk jej aikuj kõm̦m̦ane, jej aikuj kõm̦m̦an bwe l̦õmn̦ak ko an Jeova—ad “jel̦ã kõn Eo Eokkwõjarjar”—en pedpedin pepe eo ad. Jemaroñ kõm̦m̦ane men in ilo ad katak kõn Baibõl̦ im bok ko ad me rej pedped ioon Baibõl̦. Ñe jej kõm̦m̦ane men in, jej kwal̦o̦k mãlõtlõt eo em̦ool.​—JK. 2:5-7.

4. Etke Jeova wõt emaroñ letok ñan kõj mãlõtlõt eo em̦ool?

⁴ Jeova wõt emaroñ letok ñan kõj mãlõtlõt eo em̦ool. (Rom 16:27) Etke ej Wũnjãn mãlõtlõt? M̦oktata, ãinwõt ri-Kõm̦anm̦an eo, ejjel̦o̦k jem̦l̦o̦kin jel̦ãl̦o̦kjen̦ im mel̦el̦e ko ewõr ippãn kõn menin kõm̦anm̦an ko an. (Sam 104:24) Kein karuo, aolepen m̦akũtkũt im kõm̦m̦an ko an Jeova rej kwal̦o̦k bwe ej mãlõtlõt. (Rom 11:33) Kein kajilu, naanin kakapilõklõk ko remãlõtlõt an Jeova rej aolep iien jipañ im rej ñan tokjãn eo an eo ej jerbali. (JK. 2:10-12) El̦aññe jekõn̦aan bõk mãlõtlõt eo em̦ool, jej aikuj in jerbali mel̦el̦e kein raorõk im kõtl̦o̦k bwe ren tõl kõj ilo pepe im kõm̦m̦an ko ad.

5. Ta ko rej wal̦o̦k ñe armej rem̦akoko in kile im tõmak bwe Jeova ej Wũnjãn mãlõtlõt eo em̦ool?

⁵ Elõñ ro jej iioon er ilo kwal̦o̦k naan rej kwal̦o̦k m̦ool im ba bwe el̦ap aer bwilõñ kõn joñan an aiboojoj men ko rej loi ipel̦aakier; meñe ãindein, ak rej ba bwe ejjel̦o̦k ri-Kõm̦anm̦an im bwe menin kõm̦anm̦an ko rar make jide im wal̦o̦k. Ro jet jej iioone er rej ba bwe rej tõmak ilo Anij, ijoke rej tõmak bwe kien ko an Baibõl̦ rem̦or im rekõn̦aan mour ekkar ñan kõn̦aan ko aer make. Ta ko rej wal̦o̦k itok jãn aer ãindein? Em̦m̦anl̦o̦k ke lal̦ in itok jãn an armej ro atartar ioon jel̦ãl̦o̦kjen̦ ko aer make ijello̦kun Anij? Rej ke lo m̦õn̦õn̦õ eo em̦ool ak juon kõjatdikdik em̦ool kõn ilju im jekl̦aj? Men ko jej loi ipel̦aakid rej kam̦ool ñan kõj men in em̦ool: “Ejjel̦o̦k mãlõtlõt ak jel̦ãl̦o̦kjen̦ ak pepe [emaroñ] n̦ae Jeova.” (JK. 21:30) Ejjel̦o̦k pere bwe men in ej kõm̦akũt kõj ñan reilo̦k ñan Jeova im bõk mãlõtlõt eo em̦ool! Ekabũrom̦õjm̦õj bwe eitõn aolep rejjab kõm̦m̦ane men in. Etke?

6. Ekkar ñan Jabõn Kõnnaan 1:22-25, wõn ro rej kajeorl̦o̦k lo̦jilñier jãn aer eo̦roñ mãlõtlõt eo em̦ool?

⁶ Elõñ armej rej kajeorl̦o̦k lo̦jilñier ñe rej eo̦roñ an mãlõtlõt “lam̦õj inabõj ilo ial̦ eo.” Ekkar ñan Baibõl̦ eo, ewõr jilu kumi in armej me rej kõjekdo̦o̦n mãlõtlõt: ‘ro ri-jajel̦o̦kjen̦,’ “ro ri-kajjirere,” im “ro ri-bwebwe.” (Riit Jabõn Kõnnaan 1:22-25.) Jen kal̦apl̦o̦k ad jel̦ã kõn unin an armej rein kõjekdo̦o̦n mãlõtlõt eo an Anij, im jen bar lale wãween eo jemaroñ kõjparok bwe jen jab kaddeke kadkad kein.

7. Etke jet rej kããlõt ñan wõnm̦aanl̦o̦k im ãinwõt juon “ri-jajel̦o̦kjen̦”?

⁷ ‘Ro ri-jajel̦o̦kjen̦’ rej ro me em̦õkaj aer tõmak jabdewõt men rej roñ im epidodo an armej ro jet m̦on̦e er. (JK. 14:15, UBS) Ekkã ad iioone armej rot rein ilo jerbalin kwal̦o̦k naan. Ñan waanjoñak, l̦õmn̦ak kõn elõñ milien armej  ro me em̦õj an ri-tõlin kabuñ ak ri-tõlin kien ro m̦on̦e er. Jet armej relukkuun bwilõñ im nana aer mour ñe rej kile bwe ri-tõl rein rar riabe er. Bõtab ro me Jabõn Kõnnaan 1:22 ej kwal̦o̦k kake er rej kããlõt ñan wõnm̦aanl̦o̦k im ãinwõt juon ri-jajel̦o̦kjen̦ kõnke em̦m̦an ippãer wãween in. (Jrm. 5:31) Em̦m̦an ippãer kõm̦m̦ani men ko rekõn̦aan, im rejjab kõn̦aan katak kõn ta eo Baibõl̦ ej ba ak pokake kien ko ie. Elõñ rej bõk ejja eñjake eo wõt an juon kõrã me elukkuun pen ilo tõmak eo an ilo Quebec, Canada. Kõrã in ear ba ñan juon jeid im jatid me ear lol̦o̦k e ilo m̦weo im̦õn im ba: “El̦aññe bũrij eo ammim ear m̦on̦e im riabe kõm, eokwe enãj an bõd, ejjab ammim!” Alikkar, jejjab kõn̦aan anõke ro rej kããlõt ñan kõjekdo̦o̦n mãlõtlõt eo an Anij!—JK. 1:32; 27:12.

8. Ta eo enaaj jipañ kõj ñan bõk jel̦ãl̦o̦kjen̦ eo ejim̦we?

⁸ Jej lo juon un em̦m̦an unin an Baibõl̦ eo rõjañ kõj ñan jab wõnm̦aanl̦o̦k wõt ãinwõt juon ri-jajel̦o̦kjen̦, ak bwe jen ‘rũttol̦o̦k ilo kõl̦mãnl̦o̦kjen̦.’ (1 Kor. 14:20) Jemaroñ bõk jel̦ãl̦o̦kjen̦ eo ejim̦we ikijjeen ad jerbali naanin kakapilõklõk ko jãn Baibõl̦ ilo mour ko ad. Ilo ad kõm̦m̦ane men in, jidik kõn jidik jenaaj katak im kile wãween an naanin kakapilõklõk kein jipañ kõj ñan kõjparok kõj jãn apañ ko im ñan kõm̦m̦ani pepe ko rem̦m̦an. Ej juon men em̦m̦an ñan etale im l̦õmn̦ak kõn pepe ko em̦õj ad kõm̦m̦ani. El̦aññe ebwe an to ad katak Baibõl̦ im pãd ilo iien kweilo̦k ko, jemaroñ kajjitõk ippãd make etke jejjañin bõk buñtõn ne ko jej aikuj kõm̦m̦ani bwe jen ajel̦o̦k mour eo ad ñan Jeova im peptaij. Ak el̦aññe em̦õj ad peptaij, jej ke kõm̦m̦an wõnm̦aanl̦o̦k ko ãinwõt juon ri-kwal̦o̦k naan im ri-katakin kõn ennaan eo em̦m̦an? Jokãlõt ko ad rej ke kaalikkar bwe jej jerbale naanin kakapilõklõk ko ilo Baibõl̦? Jej ke kwal̦o̦k kadkad ko an juon Kũrjin ilo wãween ad kõm̦m̦an ñan ro jet? El̦aññe jej kile bwe jemaroñ kakõm̦anm̦anl̦o̦k jet wãween ko ippãd, jen lukkuun kõl̦mãnl̦o̦kjen̦ kõn naan ko an Jeova, me rej “letok mãlõtlõt ñan ro ri-jajel̦o̦kjen̦.”—Sam 19:7, UBS.

9. Ewi wãween an “ri-kajjirere” ro kwal̦o̦k aer kõjekdo̦o̦n mãlõtlõt?

⁹ Kumi eo kein karuo me rej kõjekdo̦o̦n mãlõtlõt eo an Anij ej “ri-kajjirere” ro. Ewõr iien jej iioon armej rot rein ilo jerbalin kwal̦o̦k naan. Em̦m̦an ippãer kajjirere kake ro jet. (Sam 123:4) Baibõl̦ eo ear kakkõl kõj bwe ilo raan ko ãliktata, enaaj lõñ ri-kajjirere ro. (2 Pit. 3:3, 4) Ãinwõt l̦õm̦aro pãleen lim̦aro nejin em̦m̦aan eo ewãnõk, etan Lot, jet armej ilo raan kein rejjab roñjake naanin kakkõl ko jãn Jeova. (Jen. 19:14, UBS) Elõñ armej rej ettõñ kake ro rej mour ekkar ñan naanin kakapilõklõk ko ilo Baibõl̦. Men eo ej kõm̦akũt ri-kajjirere ro ej “kõn̦aan ko aer renana.” (Jud 7, 17, 18) Wãween an Baibõl̦ eo kõmel̦el̦e kõn ri-kajjirere ro elukkuun jejjet ñan ro rar karejar ñan Anij ak rar oktak im erom ri-jum̦ae, ekoba ro jet me rej jum̦ae Jeova!

10. Ãinwõt an wal̦o̦k ilo Sam 1:1, ewi wãween jemaroñ kõjparok kõj make jãn ial̦ eo an ri-kajjirere ro?

¹⁰ Ewi wãween jemaroñ kõjparok kõj make jãn ad l̦oore ial̦ eo an ri-kajjirere ro? Juon wãween ej ilo ad kõjparok bwe jen jab kobal̦o̦k ippãn ro rej kwal̦o̦k l̦õmn̦ak rot kein im rej ellotaan kõn aolep men. (Riit Sam 1:1.) Men in ej mel̦el̦ein bwe jejjab roñjake ak riiti jabdewõt men jãn rein rar karejar ñan Jeova ak rar oktak im erom ri-jum̦ae. Jej kile bwe el̦aññe jejjab kõjparok, emaroñ pidodo ad bõk jitũbõn ellotaan im jino pere Jeova im naanin tõl ko jej bũki jãn doulul eo an. Bwe jen kõjparok jãn ad kõm̦m̦ane men in, jemaroñ kajjitõk ippãd make: ‘Ekkã aõ ke kõrraat ak ellotaan ñe ewõr naanin tõl ak kõmel̦el̦e ko rekããl jãn doulul in? Eitok wõt ke bwe in pukot im lo bõd ko an ro rej tõl kõj?’ Ñe jej m̦õkaj im kajim̦weiki l̦õmn̦ak  kein ad, Jeova enaaj buñbũruon ippãd.​—JK. 3:34, 35.

11. Ewi wãween an “ro ri-bwebwe” watõk kien ko an Jeova ikijjeen ta ko rem̦m̦an im ta ko renana?

¹¹ Kumi eo kein kajilu me rej kõjekdo̦o̦n mãlõtlõt eo an Anij ej “ro ri-bwebwe.” Armej rein rebwebwe kõnke rem̦akoko in mour ekkar ñan kien ko an Anij ikijjeen ta ko rem̦m̦an im ta ko renana. Rej kõm̦m̦ani men ko rejim̦we im̦aan mejãer make. (JK. 12:15) Armej rot rein rej kõjekdo̦o̦n im jum̦ae Jeova, eo ej Wũnjãn mãlõtlõt. (Sam 53:1) Ñe jej iioone armej rein ilo jerbalin kwal̦o̦k naan, ekkã aer kõnanaik im lukkuun kõrraate kõj kõn ad kautiej kien ko ilo Baibõl̦. Bõtab rejjab maroñ letok ñan kõj juon mour em̦m̦anl̦o̦k. Baibõl̦ eo ej ba: “Mãlõtlõt [eo em̦ool, NW] eutiej jãn juon ri-bwebwe; ejjab kõpel̦l̦o̦k lo̦ñiin ilo kõjãm eo.” (JK. 24:7) Ejjel̦o̦k jabdewõt naanin jipañ me ro ri-bwebwe remaroñ letok ñan kõj. Eñin unin Jeova ej kakkõl kõj bwe jen “ilo̦k jãn juon armej ebwebwe”!—JK. 14:7.

12. Ta eo enaaj jipañ kõj bwe jen jab ãinwõt ro ri-bwebwe?

¹² Jejjab ãinwõt ro rej dike naanin tõl ko an Jeova. Ijello̦kun ad ãindein, jej katak ñan yokwe l̦õmn̦ak ko an Anij ekoba aolep kien ko an kõn ta ko rem̦m̦an im ta ko renana. Jemaroñ kõkajoorl̦o̦k yokwe in ad ilo ad keidi men ko rej wal̦o̦k jãn ad pokake kien ko an Anij ippãn men ko rej wal̦o̦k ñe jejjab pokake. Kõl̦mãnl̦o̦kjen̦ kõn kain apañ ko armej rej iiooni kõn wõt aer kõjekdo̦o̦n naanin tõl ko remãlõtlõt an Jeova. Innem kõl̦mãnl̦o̦kjen̦ kõn joñan an em̦m̦anl̦o̦k mour eo am̦ kõnke kwõj pokake Anij.​—Sam 32:8, 10.

13. Jeova ej ke iuuni kõj ñan pokake naanin tõl ko an remãlõtlõt?

¹³ Jeova ej kõm̦m̦an bwe aolep armej ren maroñ roñ kõn mãlõtlõt eo em̦ool, ak ejjab iuuni jabdewõt bwe ren roñjake im pokake. Ijoke, Ej kwal̦o̦k ta ko renaaj wal̦o̦k ñan ro rejjab kõn̦aan roñjake mãlõtlõt eo an. (JK. 1:29-32, UBS) Ro rej kããlõt ñan jab pokake Jeova renaaj “bõk leen kõm̦m̦an ko aer.” Tokãlik, armej rein renaaj eñtaan im iioon apañ ko itok wõt jãn wãween aer mour, im ilo jem̦l̦o̦kin Jeova enaaj ko̦kkure er. Ijoke, ikijjeen ro rej roñjake naanin tõl ko remãlõtlõt an Jeova im jerbali, em̦õj an Baibõl̦ eo kallim̦ur im ba: “Jabdewõt eo ej eo̦roñ eõ enaaj lo jokwane. Enaaj mour ilo aenõm̦m̦an im ejjel̦o̦k an lõl̦ño̦ñ.”—JK. 1:33, UBS.

14-15. Ta eo jej katak jãn Jabõn Kõnnaan 4:23?

¹⁴ Ñe jej roñjake im jerbale mãlõtlõt eo an Anij, jenaaj aolep iien bõk tokjãn. Ãinwõt ad kar katak kake, Jeova ej kõm̦m̦an bwe aolep ren maroñ roñ kõn naanin jiroñ ko an remãlõtlõt. Ñan waanjoñak, ilo aolepen bokin Jabõn Kõnnaan, Jeova ej letok naanin tõl ko me renaaj aolep iien jipañ kõj ilo mour ko ad, el̦aññe jej jerbali. Jen etale emãn iaan naanin jiroñ kein remãlõtlõt.

 ¹⁵ Kõjparok bũruom̦. Baibõl̦ ej ba: “Kwõn kanooj kõjparok bũruom̦ el̦ap jãn men otemjej, bwe jãn e ej wal̦o̦k men ko menin mour.” (JK. 4:23) L̦õmn̦ak kõn ta ko jej aikuj kõm̦m̦ani ñan kõjparoke menono eo ad. Jej aikuj kañi m̦õñã ko reuõne, ekjerjaij, im jab kõm̦m̦ani imminene ko me rej ko̦kkure ãjmour eo ad. Ejja ãindeinl̦o̦k wõt, eñin men eo jej kõm̦m̦ane ñan kõjparok bũruod. Jej ekkeini ad bõk m̦õñã ko ilo kõkkar, ak riiti Naanin Anij. Jej kõpooji katak ko ad ñan iien kweilo̦k ko, pãd ilo kweilo̦k kein, im jej bar bõk kun̦aad ie. Jej ekjerjaij ilo kõkkar ikijjeen ad kate kõj im ekkeini ad bõk kun̦aad ilo jerbalin kwal̦o̦k naan. Im jej kõjparok jãn ad ejaake imminene ko renana ikijjeen ad jum̦aik jabdewõt men emaroñ ko̦kkure l̦õmn̦ak ko ad, ãinwõt menin kam̦õn̦õn̦õ ko renana im rettoon, im aetõl ko renana.

16. Etke naan ko ilo Jabõn Kõnnaan 23:4, 5 el̦ap aer jipañ kõj ilo raan kein?

¹⁶ Jokwane wõt kõn men ko ewõr ippam̦. Baibõl̦ ej letok naanin rõjañ in im ba: “Kwõn jab kaeñtaan eok make bwe kwõn m̦weiie . . . Emaroñ jidimkij an jako m̦ani ko am̦, ãinwõt ñe ear wõr peier bwe ren kãlo̦k ãinwõt juon ikõl̦.” (JK. 23:4, 5, UBS) Epidodo an jako m̦weiuk im jããn. Meñe ãindein, ak ro rem̦weiie im ro rejeram̦õl el̦ap wõt aer kõn̦aan koorl̦o̦k aer jããn. Kõn aer poub im l̦õmn̦ak wõt kõn men in, ekkã an men in kõm̦m̦an bwe ren kõm̦m̦ani men ko rej ko̦kkure etaer, kõtaan eo aer ippãn ro jet, ekoba ãjmour ko aer. (JK. 28:20; 1 Tim. 6:9, 10) Ijo iturãjet, mãlõtlõt ej jipañ kõj bwe en pel̦an wãween ad watõk jããn. Ad bõk l̦õmn̦ak rot in ej kõjparok kõj jãn kũbbon̦ im ej jipañ kõj bwe jen jokwane im m̦õn̦õn̦õ.​—Ekl. 7:12.

17. Ewi wãween jemaroñ bõk “loon rimmãlõtlõt” ãinwõt an Jabõn Kõnnaan 12:18 kõnono kake?

¹⁷ L̦õmn̦ak m̦okta jãn am̦ kõnono. Ñe jejjab kõjparok, jemaroñ kõm̦m̦an el̦ap jorrããn kõn naan ko ad. Baibõl̦ ej ba: “Naan ko an juon ri-jajel̦o̦kjen̦ remaroñ ko̦kkure juon armej ãinwõt juon jãje; ak naan ko an juon ri-jel̦ãl̦o̦kjen̦ remaroñ kãjmour juon armej.” (JK. 12:18, UBS) Jej kõjparok kõtaan eo ad ippãn ro jet ñe jej kõjparok jãn ad ruruwe ro jet im kõnnaan kõn likjab ko aer. (JK. 20:19) Bwe naan ko ad ren kãjmour ro jet im jab ko̦kkure er, jej aikuj in koobrak  bũruod kõn jel̦ãl̦o̦kjen̦ eo jãn Naanin Anij. (Luk 6:45) Ñe jej kõl̦mãnl̦o̦kjen̦ kõn ta eo Baibõl̦ ej ba, naan ko ad remaroñ ãinwõt “aebõj in mãlõtlõt” me ej kõketake ro jet.​—JK. 18:4.

18. Ñe jej jerbale naanin kakapilõklõk eo ilo Jabõn Kõnnaan 24:6, ewi wãween an men in jipañ kõj ilo jerbalin kwal̦o̦k naan?

¹⁸ L̦oori naanin tõl ko. Baibõl̦ eo ej letok juon naanin rõjañ me el̦ap an jipañ. Ej ba: “Kõn elõñ naanin kapilõk [ko remãlõtlõt, NW] kwõmaroñ in tarin̦ae, im ñe elõñ ri-pepe, kwõnaaj anjo̦ wõt.” (JK. 24:6) Ñe jej jerbale naanin kakapilõk in, l̦õmn̦ak kõn wãween an men in jipañ kõj ilo ad jerbalin kwal̦o̦k naan im katakin ro jet. Ijello̦kun ad kõm̦m̦ane jerbal in ilo wãween eo jekõn̦aan, jej kate kõj ñan l̦oore naanin tõl ko rej litok ñan kõj. Jej bõk naanin tõl ko remãlõtlõt ilo kweilo̦k ko ad. Ilo iien kweilo̦k kein, jej katak jãn ro el̦ap imminene ko ippãer ñe rej kõm̦m̦ani katak ko aer me rej pedped ioon Baibõl̦. Kobal̦o̦k ippãn men in, doulul eo an Jeova ej letok elõñ kein jerbal ko rem̦m̦an im el̦ap tokjãer, ãinwõt bok im pijain alwõj ko, me el̦ap aer jipañ armej mel̦el̦e kõn Baibõl̦ eo. Kwõj ke katak kilen kõjerbale kein jerbal kein ilo juon wãween em̦m̦an?

19. Ewi wãween am̦ eñjake kõn mãlõtlõt eo Jeova ej letok ñan kõj? (Jabõn Kõnnaan 3:13-18)

¹⁹ Riit Jabõn Kõnnaan 3:13-18. El̦ap ad kam̦m̦oolol kõn naanin kakapilõklõk ak jipañ ko rem̦m̦an ilo Naanin Anij! Ñe en kar jab kõn mãlõtlõt eo an Anij, jen kar lukkuun jebwãbwe im jeban kar m̦õn̦õn̦õ. Ilo katak in, jaar etale jet waanjoñak ko kõn naanin jipañ ko remãlõtlõt me jemaroñ loi ilo bokin Jabõn Kõnnaan. Alikkar bwe ejjab bokin Jabõn Kõnnaan wõt, ak Jeova ear likũt naanin mãlõtlõt ko ilo aolepen Baibõl̦ eo. Kõn men in, jen jek ippãd make ñan aolep iien jerbale naanin mãlõtlõt ko Jeova ej litok ilo wãween ad mour. Ejjab aorõk ippãd wãween an lal̦ in watõk mãlõtlõt eo an Anij; el̦ap ad tõmak bwe “em̦õn̦õn̦õ jabdewõt eo ej dãpij [mãlõtlõt]” eo an Jeova.