1-2. (1) Ta jet iaan men ko rej kõmman an ri-karejar ro an Jeova pere? (2) Ta ko jenaaj etali ilo katak in?

 EWÕR iien kõj aolep ewõr ad pere, a jekdo̦o̦n ewi dettad. Ñan waanjoñak, pijaikl̦o̦k an juon jo̦dikdik pere el̦aññe Jeova ej lukkuun kea kake e. Kõn men in, emaroñ jenliklik jãn an peptaij. Ak l̦õmn̦ak kõn juon jeid im jatid em̦m̦aan me ear kããlõt ñan likũt Aelõñ eo an Anij m̦oktata ilo mour eo an ke ear juon jo̦dikdik ijello̦kun an jibadek juon jerbal el̦ap on̦ããn ilo lal̦ in. Kiiõ ke erũtto im baam̦le eo an ekkã an aikuj jããn, emaroñ pere el̦aññe ejim̦we pepe eo ear kõm̦m̦ane ke ear dik. Im pijaikl̦o̦k juon jeid im jatid lel̦l̦ap me em̦õjn̦o̦ im ejjab l̦ap maroñ ko ippãn. Emaroñ ebbweer kõnke ejako an maroñ kõm̦m̦ani men ko ekõn kõm̦m̦ani m̦okta. Em̦õj ke am̦ kajjitõk ippam̦ make kajjitõk rot kein: ‘Em̦ool ke bwe Jeova ej lo men ko ij iiooni? Ewõr ke tokjãn aolep men ko iar kaarmejjeteiki ñan Jeova? Jeova emaroñ ke kõjerbale wõt eõ ilo jerbal eo An?’

² El̦aññe jejjab kate kõj ñan pukot uwaakin kajjitõk kein, remaroñ kõm̦m̦an bwe en jako ad lõke Jeova im ad karejar ñan E. Ilo katak in, jenaaj lale wãween an naanin kakapilõk ko ilo Baibõl̦ maroñ jipañ kõj ñe (1) jej pere el̦aññe Jeova ej kea  kake kõj, (2) jej pere pepe ko jaar kõm̦m̦ani m̦okta, im (3) ñe jej pere el̦aññe Jeova emaroñ kõjerbale wõt kõj.

WÃWEEN ÑAN JOL̦O̦K AM̦ PERE

3. Ta juon iaan wãween ko emaroñ jipañ kõj ñan jol̦o̦k ad pere?

³ Juon iaan wãween ko emaroñ jipañ kõj ñan jol̦o̦k ad pere ej ilo ad lale Naanin Anij bwe jen maroñ lo uwaakin kajjitõk ko ad. El̦aññe jej ãindein, jenaaj bõk kõkajoor, rũttol̦o̦k ilo tõmak, im jenaaj maroñ “jutak pen . . . ilo tõmak.”—1 Kor. 16:13.

4. Ewi wãween ad lukkuun “etale men otemjej”? (1 Tessalonika 5:21)

⁴ Riit 1 Tessalonika 5:21. Baibõl̦ eo ej rõjañ kõj bwe jen lukkuun “etale men otemjej.” Ewi wãween ad kõm̦m̦ane men in? El̦aññe jej pere men ko jej tõmaki, eokwe jemaroñ lale ta eo Baibõl̦ ej ba. Ñan waanjoñak, l̦õmn̦ak kõn juon jo̦dikdik me ej pere el̦aññe Jeova ej kea kake e. Ej aikuj ke kajju tõmak men in? Jaab, ej aikuj lukkuun “etale men otemjej” ikijjeen an katak Baibõl̦ bwe en jel̦ã el̦aññe Jeova ej lukkuun kea kake e.

5. Ewi wãween an Jeova maroñ jipañ kõj ñan lo uwaakin kajjitõk ko ad?

⁵ Ñe jej riiti Naanin Anij, ej ãinwõt ñe Jeova ej kõnono ñan kõj. Bõtab el̦aññe jekõn̦aan bõk l̦õmn̦ak ko an Jeova kõn juon men, elõñl̦o̦k men ko jej aikuj kõm̦m̦ani ijello̦kun ad baj riit wõt. Jej aikuj pukot im katak kõn eoon ko me renaaj jipañ kõj ñan uwaake kajjitõk ko ad. Jemaroñ kõm̦m̦an research ilo ad kõjerbal kein jerbal ko me doulul eo an Jeova ej litok ñan kõj. (JK. 2:​3-6) Ilo ad kõm̦m̦an research, jemaroñ jar im kajjitõk bwe Jeova en jipañ kõj lo uwaakin kajjitõk ko ad. Innem, jemaroñ pukot naanin kakapilõk ko ilo Baibõl̦ im mel̦el̦e ko me rejejjet im ekkar ñan wãween eo jej iioone. Jemaroñ bareinwõt bõk tokjãn jãn ad etale bwebwenato ko an ri-karejar ro ilo Baibõl̦ me rar iioone wãween ko me rej ãinl̦o̦kwõt wãween eo jej iioone.

6. Ewi wãween an kweilo̦k ko maroñ jipañ kõj ñan jol̦o̦k ad pere?

⁶ Bar juon wãween Jeova ej kõnono ñan kõj ej ilo iien kweilo̦k ko. El̦aññe jej keini ad pãd ilo iien kweilo̦k ko, jemaroñ roñ juon boin ilo juon katak ak ilo juon uwaak im ej men eo jej aikuji ñan jol̦o̦k ad pere. (JK. 27:17) Jen kiiõ etale ewi wãween jemaroñ jol̦o̦k ad pere.

ÑE KWÕJ PERE BWE JEOVA EJ KEA KAKE EOK

7. Ta eo ro jet remaroñ kajjitõk kake?

⁷ Em̦õj ke am̦ l̦õmn̦ak im ba, ‘Jeova ej ke lukkuun kea kake eõ?’ El̦aññe kwõj bõk l̦õmn̦ak eo bwe ejjel̦o̦k tokjam̦, kwõmaroñ l̦õmn̦ak bwe kwõjjab maroñ jem̦jerãik ri-Kõm̦anm̦an eo ad ñan jidik. Kiiñ Devid emaroñ kar bõk ejja l̦õmn̦ak in wõt. Ear bwilõñ bwe Jeova ej lukkuun kea kake kõj meñe kõj armej bajjek. Innem ear kajjitõk im ba: “Jeova, ta armej bwe Kwõn [kalimjeke, NW]? Ak nejin armej bwe Kwõn l̦õmn̦ak kake?” (Sam 144:3) Eokwe, ia eo kwõmaroñ lo uwaakin kajjitõk in?

8. Ekkar ñan 1 Samuel 16:​6, 7, 10-12, ta eo Jeova ej lo ippãn armej?

⁸ Ilo Baibõl̦ eo, jej katak bwe Jeova ej loe ro me armej rej watõk er bwe rettã ak rejjab aorõk. Ñan waanjoñak, Jeova ear jilkinl̦o̦k Samuel ñan m̦weo im̦õn Jesse bwe en kapit juon iaan l̦õm̦aro nejin. Eo me Samuel ear kapiti enaaj kar erom kiiñ in Israel. Jesse ear kũrtok jimjuon iaan l̦õm̦aro nejin bwe ren iioone Samuel, bõtab ear jab kũrtok l̦eo nejin ediktata etan Devid. b Meñe ãindein,  ak Devid eo me Jeova ear kããlõte. (Riit 1 Samuel 16:​6, 7, 10-12, UBS.) Jeova ear lukkuun loe Devid im kain armej rot e itulowa—juon likao eo me ear kaorõk men ko l̦oor jetõb.

9. Etke kwõmaroñ lõke bwe Jeova ej kea kake eok? (Bar lale pija eo.)

⁹ L̦õmn̦ak kõn wãween ko em̦õj an Jeova kwal̦o̦k bwe ej kile im loe eok. Ej lewaj naanin jipañ ko me rekkar im jejjet ñan aikuj ko am̦. (Sam 32:8) Jeova emaroñ kar ke kõm̦m̦ane men in el̦aññe ejaje kajjiem̦? (Sam 139:​1, UBS) Ñe kwõj jerbale naanin kakapilõk ko an Jeova im loe wãween aer jipañ eok, kwõnaaj lukkuun lõke bwe Jeova ej kea kake eok. (1 Kro. 28:9; Jrb. 17:​26, 27) Jeova ej loe am̦ lukkuun kate eok. Ej loe aolep kadkad ko am̦ rem̦m̦an im ekõn̦aan jem̦jerãik eok. (Jrm. 17:​10, UBS) Im enaaj lukkuun m̦õn̦õn̦õ el̦aññe kokõn̦aan bar jem̦jerãiki.—1 Jon 4:19.

ÑE KWÕJ PERE BWE PEPE KO KWAAR KÕM̦M̦ANI M̦OKTA REM̦M̦AN

10. Ñe jej l̦õmn̦ak kõn pepe ko jaar kõm̦m̦ani m̦okta, ta kajjitõk ko jemaroñ kajjitõk ippãd make kaki?

¹⁰ Ewõr iien jet remaroñ l̦õmn̦ak kõn pepe ko rar kõm̦m̦ani m̦okta im remaroñ pere el̦aññe em̦m̦an pepe ko rar kõm̦m̦ani. Bõlen rar kõjekdo̦o̦n juon jerbal el̦ap on̦ããn ak juon peejnej me el̦ap an kõm̦m̦an jããn bwe ren maroñ kal̦apl̦o̦k ijo kun̦aaer ñan Jeova. Ijoke, remaroñ kar kõm̦m̦ani pepe kein elõñ iiõ ko remootl̦o̦k. Ak kiiõ, bõlen rej lo jet iaan ro me rejel̦ã kajjier im rar jibadek jerbal ko rem̦m̦an, im ãinwõt elukkuun lõñ aer jããn im em̦m̦an kõjeiier. Kõn men in, remaroñ l̦õmn̦ak im ba: ‘Ewõr ke tokjãn aõ kar kaarmejjeteiki men kein bwe in karejar ñan Jeova? Ak in ke kar aikuj jibadek men kein bwe en lõñ aõ jããn kiiõ?’

11. Ta eo ear kainepataik ri-jeje eo an Sam 73?

¹¹ El̦aññe kain kajjitõk rot in ej jiktok ilo l̦õmn̦ak eo am̦, eokwe l̦õmn̦ak kõn wãween an  kar ri-jeje eo an Sam 73 eñjake. Ri-jeje sam in ear lo an ro jet m̦õn̦õn̦õ im ãinwõt relukkuun ãjmour, m̦weiie, im ejjel̦o̦k aer inepata ñan jidik. (Sam 73:​3-5, 12) El̦ak loe an rein jeraam̦m̦an, ear l̦õmn̦ak bwe ejjel̦o̦k tokjãn an lukkuun kate ilo an karejar ñan Jeova. ‘Aolep raan ear eñtaan’ kõn an ebbweer. (Sam 73:​13, 14) Ewi wãween an kar anjo̦ ioon l̦õmn̦ak kein rekabbweerer?

12. Ekkar ñan Sam 73:​16-18, ewi wãween an kar ri-jeje sam eo anjo̦ ioon l̦õmn̦ak ko rekabbweerer?

¹² Riit Sam 73:​16-18, UBS. Ri-jeje sam in ear etal ñan tampel̦ eo an Jeova, ijo me el̦ap aenõm̦m̦an ie. Ke ear pãd ilo tampel̦ eo, ear jino em̦m̦an an kõl̦mãnl̦o̦kjen̦. Ear kile bwe meñe jet emaroñ em̦m̦an kõjeiier im em̦m̦an aer mour, ak ejjel̦o̦k aer kõjatdikdik kõn ilju im jekl̦aj. Ãlikin an kar mel̦el̦e kõn men in, ear maroñ lo aenõm̦m̦an ilo an kõl̦mãnl̦o̦kjen̦ im ear lukkuun tõmak bwe an kar likũt Jeova m̦oktata ilo mour eo an, ear pepe eo em̦m̦antata. Tokjãn men in, ear jek ippãn make bwe enaaj wõnm̦aanl̦o̦k wõt im karejar ñan Jeova.—Sam 73:​23-28.

13. Ta eo kwõmaroñ kõm̦m̦ane ñe kwõj pere jet iaan pepe ko kwaar kõm̦m̦ani m̦okta? (Bar lale pija eo.)

¹³ Ãinwõt ri-jeje sam in, kwõmaroñ bareinwõt anjo̦ ioon l̦õmn̦ak ko rekabbweerer. Ewi wãween? Eokwe kõl̦mãnl̦o̦kjen̦ kõn jeraam̦m̦an ko kwõj loi kiiõ—ekitibuj an Jeova buñbũruon ippam̦—im keememej bwe Jeova ejjab jem̦jerãik ro me rejjab karejar ñan E. Ñan armej rein, men eo eaorõktata ippãer ej ñan bõk juon jerbal em̦m̦an im juon mour me enaaj kõm̦m̦an bwe en em̦m̦an kõjeiier. Etke? Kõnke ejjel̦o̦k aer kõjatdikdik kõn juon ilju im jekl̦aj. Ak ñan kwe, Jeova ej kallim̦ur bwe enaaj lewaj jeraam̦m̦an ko rel̦l̦apl̦o̦k jãn joñan  am̦ maroñ kõtmãne kake. (Sam 145:16) Ejjab men in wõt, ak kwõl̦ak lale enaaj ke kar em̦m̦an mour eo am̦ ñe kwaar jab kããlõt ñan karejar ñan Jeova? Juon men jekõn̦aan keememej ej bwe ñe jej kõm̦m̦ani pepe ko me rej pedped ioon ad yokwe Anij im ri-turid, jenaaj lo jeraam̦m̦an ko rem̦m̦an im rej bõktok m̦õn̦õn̦õ eo em̦ool.

ÑE KWÕJ PERE BWE JEOVA EMAROÑ KÕJERBALE WÕT EOK

14. Ta wãween ko reppen ro jeid im jatid rej iiooni, im ta kajjitõk eo emaroñ jiktok ilo l̦õmn̦ak ko aer?

¹⁴ Ewõr jet iaan ri-karejar ro an Jeova rej iioon wãween ko reppen kõn aer rũttol̦o̦k, nañinmej, ak kõnke ewõr juon utam̦we ilo ãnbwinnier. Men in emaroñ kõm̦m̦an bwe ren pere an Jeova kaorõk er. Remaroñ kajjitõk im ba, ‘Jeova emaroñ ke kõjerbale wõt eõ?’

15. Ta eo ri-jeje eo an Sam 71 ear lukkuun lõke?

¹⁵ Ri-jeje eo an Sam 71 ear bõk ejja l̦õmn̦ak in wõt. Ear jar im ba: “Kwõn jab ilo̦k jãn ña ñe im̦õjn̦o̦l̦o̦k.” (Sam 71:​9, 18) Meñe ear bõk eñjake in, ak ri-jeje sam in ear lukkuun lõke bwe el̦aññe enaaj tiljek wõt ñan Jeova, eokwe Jeova enaaj tõl e im jipañ wõt e. Aet, ri-jeje sam in ear katak im jel̦ã bwe Jeova ej buñbũruon ippãn ro rej kate er ñan karejar ñan E, meñe ewõr joñan maroñ ko ippãer.—Sam 37:​23-25, UBS.

16. Ewi wãween Jeova emaroñ kõjerbale ro rerũtto? (Sam 92:​12-15)

¹⁶ Kom̦ rũtto ro, kajjioñ bõk l̦õmn̦ak eo an Jeova kõn wãween eo kwõj iioone. Jeova emaroñ jipañ eok ilo am̦ karejar ñan E ilo tiljek meñe kwõj m̦õjn̦o̦l̦o̦k im ewõr joñan maroñ ko ippam̦. (Riit Sam 92:​12-15.) Ijello̦kun am̦ l̦õmn̦ak kõn men ko ejako am̦ maroñ kõm̦m̦ani, kwõn l̦õmn̦ak wõt kõn men ko ewõr am̦ maroñ ñan kõm̦m̦ani. Ñan waanjoñak, kwõmaroñ kõkajoor ro jet ikijjeen am̦ dãpij wõt  am̦ tiljek ñan Jeova im am̦ kwal̦o̦k am̦ itoklimo kake er. Kwõmaroñ kõnono kõn wãween an kar Jeova jipañ eok ium̦win iiõ kein m̦aantak im kõn kõjatdikdik eo am̦ kõn kallim̦ur ko renaaj jejjet kũtieer ilju im jekl̦aj. Im jab mel̦o̦kl̦o̦k bwe ilo am̦ jar kõn ro jet, men in elukkuun kajoor im l̦ap tokjãn. (1 Pit. 3:12) Jekdo̦o̦n ta wãween ko jej iiooni, ak kõj aolep ewõr men ko jemaroñ lil̦o̦k ñan Jeova im ñan ro jet.

17. Etke jej aikuj kõjparok bwe jen jab keidi kõj ñan ro jet?

¹⁷ El̦aññe kwõj inepata kõn am̦ jab maroñ kal̦apl̦o̦k ijo kun̦aam̦ ilo am̦ jerbal ñan Jeova, eokwe keememej bwe el̦ap an Jeova kaorõk jabdewõt men kwõmaroñ kõm̦m̦ane. Bõlen eitok wõt bwe kwõn keidi men ko kwõj kõm̦m̦ani ippãn men ko ro jet rej kõm̦m̦ani. Bõtab jouj im jab kõm̦m̦ane men in! Etke? Kõnke Jeova ejjab keidi jerbal ko am̦ ñan jerbal ko an ro jet. (Gal. 6:4) Ñan waanjoñak, Meri ear lel̦o̦k ñan Jesus juon bõkã me el̦ap on̦ããn ãinwõt juon menin lel̦o̦k. (Jon 12:​3-5) Ijoke, kõrã eo ejeram̦õl me emej l̦eo pãleen ear jaba kõn ruo jããn jiddik me edik tokjãer ilo tampel̦ eo. (Luk 21:​1-4) Bõtab, Jesus ear jab keidi kõrã rein ruo. Ijello̦kun an ãindein, ear kile bwe kõrã rein rar kwal̦o̦k aerro tõmak. Eo Jemãd ilañ, Jeova, ej lukkuun kaorõk aolep jerbal ko am̦ kõn wõt am̦ yokwe im tiljek ñan E, jekdo̦o̦n ñe kwõj l̦õmn̦ak bwe edik.

18. Ta eo enaaj jipañ kõj ñan jol̦o̦k ad pere? (Bar lale bo̦o̦k eo etan “ Naanin Anij Emaroñ Jipañ Eok ñan Jol̦o̦k Am̦ Pere.”)

¹⁸ Ewõr iien kõj aolep jej pere. Bõtab ãinwõt ad kar etale ilo katak in, Naanin Anij, Baibõl̦ eo, emaroñ jipañ kõj ñan jol̦o̦k ad pere. Kõn men in, kwõn lukkuun kate eok ñan jol̦o̦k am̦ pere, im kwõnaaj peran ilo am̦ tõmak. Jeova elukkuun l̦ap an kea kake eok. Im el̦ap an m̦õn̦õn̦õ kõn aolep men ko kwaar kaarmejjeteiki bwe kwõn maroñ karejar ñan E, im ej kallim̦ur bwe enaaj kõjeraam̦m̦an eok. Keememej bwe Jeova ej yokwe im kea kake aolep ri-karejar ro an retiljek.