AL IM kõjañjañ ear juon men eaorõk ilo m̦anit eo an ri-Israel ro. Ekkã an Baibõl̦ kõnono kõn an armej al im iukkure kõn kein kõjañjañ ko. Ilo m̦ool, elõñ iaan eoon ko rej al ko. Ñan waanjoñak, elõñ iaan al kein rej pãd ilo bokin Sam, Al eo an Solomon, im Liaajlo̦l̦. Bareinwõt, juon bok etan Music in Biblical Life ej ba bwe Baibõl̦ eo ej “lukkuun jipañ kõj pijaikl̦o̦k joñan an kar al im kõjañjañ kar aorõk ippãn ri-Israel ro im aer kar kõjerbale aolep raan.”

Al im kõjañjañ rar m̦õttan men ko ri-Israel ro rar kõm̦m̦ani kajjojo raan. Ri-Israel ro rekõn al ak kõjañjañ ñan kwal̦o̦k eñjake ko aer. (Ais. 30:29) Kõrã ro rar kõjañjañ kõn tamborin ko im lañlõñ ilo aer al im eb ilo iien ko rej kairooje juon armej, ilo kwõjkwõj ko, im ãlikin aer bõk anjo̦ ilo tarin̦ae. (Eka. 11:34; 1 Sa. 18:​6, 7; 1 Kñ. 1:​39, 40) Ri-Israel ro rar bareinwõt al kake alin bũrom̦õj ak liaajlo̦l̦ ko ilo iien bũrom̦õj. (2 Kro. 35:25) Alikkar bwe ear lukkuun aorõk al im kõjañjañ ippãn ri-Israel ro.

Al im kõjañjañ ilo im̦õn kiiñ eo. Ear em̦m̦an ippãn kiiñ ro an Israel al im kõjañjañ. Kiiñ Saul ear kũr Devid bwe en etal ñan m̦weo im̦õn bwe en kõjañjañ ñane. (1 Sa. 16:​18, 23, UBS) Tokãlik, ke Devid ear erom juon kiiñ, ear kõm̦m̦ane kein kõjañjañ ko rekããl, kine al ko remmejaja, im ear karõke ri-al im ri-kõjañjañ ro ilo tampel̦ eo an Jeova. (2 Kro. 7:6; Amos 6:5) Innem ke Solomon ear erom kiiñ, ear wõr em̦m̦aan im kõrã ro me rar ri-al ilo m̦weo im̦õn.—Ekl. 2:8.

Al im kõjañjañ ilo aer kabuñ. Men eo eaorõktata ej bwe ri-Israel ro rar kitibuj al im kõjañjañ ilo aer kabuñ ñan Jeova. Ilo m̦ool, ear wõr 4,000 ri-al im ri-kõjañjañ ro ilo tampel̦ eo ilo Jerusalem. (1 Kro. 23:5) Rar kõjañjañ kõn cymbal ko, kein kõjañjañ ko ewõr aer to, arp ko, im trumpet ko. (2 Kro. 5:12) Bõtab ri-kõjañjañ rein retijem̦l̦o̦k, ejjab er wõt rar kabuñ ñan Jeova kõn al im kein kõjañjañ ko. Elõñ iaan ri-Israel ro rar al kõn Al in Wanlõñl̦o̦k Ko ilo ial̦ eo aer l̦o̦k ñan kwõjkwõj ko kajjojo iiõ ilo Jerusalem. (Sam 120-134) Im ekkar ñan jeje ko an ri-Ju ro, ri-Israel ro rar al kõn Sam Ko in Hallel a ilo Kwõjkwõjin Kijoone Eo.

Jãn iien ko etto tok ñan raan kein, al im kõjañjañ rej juon men eaorõk ippãn armej ro an Anij. (Jem. 5:13) Ad al ej m̦õttan ad kabuñ ñan Jeova. (Eps. 5:19) Al ko rej kõm̦m̦an ad bõrokuk ippãn Kũrjin ro m̦õttad. (Kol. 3:16) Im rej kõkajoore kõj ñe jej iioon eñtaan. (Jrb. 16:25) Al im kõjañjañ ko rej juon wãween eaiboojoj jej kwal̦o̦k tõmak im yokwe eo ad ñan Jeova.