1-2. Ekkar ñan Sam 34:8, ewi wãween ad maroñ jel̦ã kõn jouj eo an Jeova?

PIJAIKL̦O̦K an juon armej lewaj kijõm̦ juon m̦õñã me kwõjjañin kar edjoñe. Kwõmaroñ katak jidik kõn m̦õñã eo ikijjeen am̦ lale, ãt bwiin, lale iiõk eo, ak kajjitõk ippãn ro jet el̦aññe enno̦ ippãer. Bõtab wãween eo wõt ñan am̦ maroñ lukkuun jel̦ã ñe em̦m̦an ippam̦ m̦õñã eo, ej ñan edjoñe.

² Jemaroñ katak kõn an Jeova jouj ilo ad riiti Baibõl̦ im bok ko ad, ekoba ilo ad roñjake an ro jet kõnnaan kõn aolep jeraam̦m̦an ko rar bũki jãn Jeova. Bõtab bwe jen maroñ lukkuun mel̦el̦e kõn an Jeova lukkuun jouj, jej aikuj make “edjoñ” jouj eo an ñan kõj make. (Riit Sam 34:8.) Jen lale juon waanjoñak kõn wãween ad maroñ kõm̦m̦ane men in. Jen ba bwe jekõn̦aan kal̦apl̦o̦k ijo kun̦aad im karejar ñan Jeova full-time, bõtab bwe jen maroñ tõpar mejãnkajjik in, jej aikuj in jino mour ilo juon wãween el̦amwaan. Bõlen ekkã ad kar riiti kallim̦ur eo an Jesus bwe ñe jej likũt m̦okta men ko an Aelõñ eo, innem Jeova enaaj kabwe men ko me el̦ap ad aikuji. Ijoke jejjañin kar lo an jejjet kũtien kallim̦ur in ñan kõj make. (Matu 6:33) Meñe ãindein, ak kõn ad lõke kallim̦ur eo an Jesus, jej kadikl̦o̦k ad jol̦o̦k jããn, kadikl̦o̦k joñan awa ko jej julo̦k ilo jikin jerbal, im lukkuun kate kõj ilo jerbalin kwal̦o̦k naan. Ilo ad kõm̦m̦ane men in, jej make loe bwe Jeova ej lukkuun kabwe aikuj ko ad. Jej make ‘edjoñe’ jouj eo an Jeova.

3. Ãinwõt an Sam 16:1, 2 kwal̦o̦k, wõn ro rej bõk tokjãn jãn jouj eo an Jeova?

³ Jeova “ejouj ñan armej otemjej,” ekoba ro me rejjab jel̦ã kajjien. (Sam 145:9, UBS; Matu 5:45) Bõtab el̦aptata an Jeova kõjeraam̦m̦an ro rej yokwe e im rej karejar ñane kõn aolepen  mour ko aer. (Riit Sam 16:1, 2.) Lale jet iaan wãween ko jej bõk tokjãn jãn jouj eo an Jeova.

4. Ewi wãween an Jeova kwal̦o̦k jouj eo an ñan ro rej jino epaakel̦o̦k e?

⁴ Kajjojo iien jej jerbale ta ko jej katak jãn Jeova jej loe tokjãn ko rem̦m̦an ilo mour ko ad. Ke jaar katak kõn e im jino yokwe e, ear jipañ kõj ñan anjo̦ ioon l̦õmn̦ak im kõm̦m̦an ko me rejjab kabuñbũruon. (Kol. 1:21) Im ke jaar ajel̦o̦k mour ko ad ñan Jeova im peptaij ear l̦apl̦o̦k ad lo jouj eo an ke ear letok juon bõklõkõt em̦m̦an im ejaak juon jem̦jerã epaak ippãd.​—1 Pit. 3:21.

5. Ewi wãween ad maroñ lo jouj eo an Jeova ilo jerbalin kwal̦o̦k naan eo ad?

⁵ Jej wõnm̦aanl̦o̦k im lo jouj eo an Jeova ilo ad bõk kun̦aad ilo jerbalin kwal̦o̦k naan. Kwõj ke juon eo me ejjookok? Elõñ iaan armej ro an Jeova rej bar ãindein. Bõlen m̦okta jãn am̦ erom juon iaan Ri-Kõnnaan ro an Jeova, kwoban kar kõtmãne bwe kwõnaaj kar kal̦l̦al̦l̦al̦ ilo kõjjem̦ eo an juon eo kwõjaje kajjien, im kõnnaan ippãn kõn Baibõl̦ eo. Bõtab kiiõ eokkutkut am̦ kõm̦m̦ane men in. Ejjab men in wõt, ak kõn jipañ eo an Jeova kwõj lo m̦õn̦õn̦õ ilo am̦ kõm̦m̦ane jerbalin kwal̦o̦k naan! Em̦õj am̦ lo an Jeova jipañ eok ilo wãween ko jet. Ear jipañ eok bwe kwõn ineem̦m̦an wõt ke kwaar iioon juon ri-jum̦ae. Ear bar jipañ eok ñan keememej eoon eo ejejjet bwe kwõn maroñ kwal̦o̦ke ñan juon eo eitoklimo. Im ear lewaj ñan kwe kajoor eo ñan wõnm̦aanl̦o̦k wõt ke kwaar iioon armej ro me rejjab kõn̦aan roñjake ilo teretore eo.​—Jrm. 20:7-9.

6. Ewi wãween an kamminene ko jãn Jeova kaalikkar kõn jouj eo an?

⁶ Jeova ear bareinwõt kwal̦o̦k an jouj ñan kõj ilo an kammineneik kõj ñan jerbalin kwal̦o̦k naan. (Jon 6:45) Ilo kweilo̦k eo lukwõl̦pãn wiik, jej roñjake waanjoñak ko rem̦m̦an kõn kilen bwebwenato ippãn armej im em̦õj rõjañ kõj ñan kõjerbali ilo jerbalin kwal̦o̦k naan. Ilo jinoin, jemaroñ ikkũm̦kũm̦ jidik ñan kõm̦m̦ane kõl kein rekããl, bõtab jel̦ak kõm̦m̦ani jemaroñ loe bwe ewõr tõprak ko rej wal̦o̦k. Kar bareinwõt rõjañ kõj ilo kweilo̦k ko im kweilo̦k ko rel̦l̦ap ñan bõk kun̦aad ilo jerbalin kwal̦o̦k naan ko jet me jejjañin kar kõm̦m̦ani. Bar juon alen, men in emaroñ mel̦el̦ein bwe jemaroñ aikuj in kõm̦m̦ane juon men jejjab imminene kake, bõtab ñe jej kõm̦m̦ane men in, jej kõtl̦o̦k bwe Jeova en kõjeraam̦m̦an kate ko ad. Jen etale jet iaan jeraam̦m̦an ko jenaaj bũki ñe jej pukot wãween ko rekããl ñan lel̦o̦k men ko rem̦m̦antata ñan Jeova​—jekdo̦o̦n ta wãween ko jej iiooni. Innem jen lale jet iaan wãween ko jemaroñ kal̦apl̦o̦k ijo kun̦aad ilo jerbalin kwal̦o̦k naan.

7. Ta jeraam̦m̦an eo jej bõke ñe jej kate kõj ñan kal̦apl̦o̦k ijo kun̦aad ilo jerbalin kwal̦o̦k naan?

⁷ Jej epaakel̦o̦k Jeova. L̦õmn̦ak kõn joñak eo an juon em̦m̦aan ej lale eklejia etan Samuel, * eo me ej jerbal ilo Colombia ippãn lio pãleen. Rippãlele rein rar m̦õn̦õn̦õ ke erro ear bainier ilo eklejia eo aerro ilo ijo jikierro, bõtab erro ear kõn̦aan kal̦apl̦o̦k ijo kun̦aaerro im jipañ juon eklejia me el̦ap aikuj ri-kwal̦o̦k naan ro ie. Bwe erro en maroñ tõpar mejãnkajjik in, erro ear aikuj in kaarmejjeteik jet men. Samuel ej ba, “Kõm̦ro ear jerbale Matu 6:33 im bõjrak jãn am̦ro wiaik men ko kõm̦ro ejjab aikuji. Bõtab men eo me ekar pentata ej ñan em̦m̦akũt jãn apartment eo am̦ro. Kar kõm̦m̦ane ekkar ñan kõm̦ro im ekar ejjel̦o̦k on̦ããn am̦ro jokwe ie.” Ke erro ear em̦m̦akũtl̦o̦k ñan eklejia eo aerro ekããl, erro ear jab aikuj elõñ jããn ñan mour ãinwõt kar  m̦okta. Samuel ej ba, “Em̦õj am̦ro lo wãween an Jeova tõl kõm̦ro im an uwaaki jar ko am̦ro. Kõm̦ro ej eñjake yokwe eo an im an buñbũruon ippemro ilo elõñ wãween ko kõm̦ro ear jab lo m̦okta.” Ewõr ke am̦ maroñ ñan kal̦apl̦o̦k ijo kun̦aam ilo jerbalin kwal̦o̦k naan? El̦aññe aet, innem kwõmaroñ lõke bwe kwõnaaj epaakel̦o̦k Jeova im bwe enaaj kabwe aikuj ko am̦.​—Sam 18:25, UBS.

8. Ta eo kwõj katak jãn naan ko an Ivan im Viktoria?

⁸ Jej lo lañlõñ ilo jerbal eo ad. L̦õmn̦ak kõn naan ko an Ivan im Viktoria, ruo rippãlele me rej jerbalin bainier ilo Kyrgyzstan. Erro ear mour ilo juon wãween el̦amwaan bwe erro en maroñ bõk kun̦aaerro ilo jabdewõt jerbal ko an doulul in, ekoba jerbalin ekkal ko. Ivan ej ba: “Kõm̦ro ear lukkuun kate kõm̦ro joñan wõt am̦ro maroñ ilo kajjojo jerbal. Meñe kõm̦ro ear m̦õk ilo jem̦l̦o̦kin raan eo, ak kõm̦ro ear m̦õn̦õn̦õ kõnke kõm̦ro ear kõjerbal maroñ ko am̦ro ñan Jeova. Kõm̦ro ear bareinwõt m̦õn̦õn̦õ kõn aolep ro kõm̦ro ear m̦õttãik er im aolep men ko rem̦m̦an kõm̦ro ear iiooni.”​—Mark 10:29, 30.

9. Ta eo juon jeid im jatid lel̦l̦ap me ej iioon wãween ko reppen ear kõm̦m̦ane ñan kal̦apl̦o̦k ijo kun̦aan ilo jerbalin kwal̦o̦k naan eo an, im ta tõprak ko ear loi?

⁹ Jej lo lañlõñ ilo jerbal eo an Jeova meñe jej iioon wãween ko reppen. Ñan waanjoñak, juon lel̦l̦ap me emej eo pãleen ilo West Africa etan Mirreh, ear riittaer jãn an jerbal ãinwõt juon taktõ im jino bainier. Mirreh ear lukkuun nañinmej in kũrro im ear maroñ jol̦o̦k juon wõt awa ilo jerbalin em̦ ñan em̦. Bõtab emaroñ aetokl̦o̦k an pãd ilo kwal̦o̦k naan ilo̦bwilej. Elõñ an rũkkatak Baibõl̦ im ro ej jepl̦aak ippãer, jet iaaer ej tõpar er ilo talboon. Ta eo ear kõm̦akũt Mirreh ñan kal̦apl̦o̦k ijo kun̦aan? Ej ba, “El̦ap aõ lukkuun yokwe Jeova im Jesus Christ. Im ij keini aõ jar ñan Jeova bwe en jipañ eõ ñan kate eõ joñan wõt aõ maroñ ilo jerbal eo an.”​—Matu 22:36, 37.

10. Ãinwõt an 1 Piter 5:10 kwal̦o̦k, ta eo Jeova ej kõm̦m̦ane ñan ro rej kal̦apl̦o̦k ijo kun̦aaer ñane?

¹⁰ Bõk kamminene ko jet jãn Jeova. Juon bainier me ej jokwe ilo Mauritius, etan Kenny, ear loe bwe em̦ool men in. Ke ear katak kõn m̦ool eo, ear etal jãn university eo ear jikuul̦ ie, peptaij, im jino jerbalin full-time. Ej ba, “Ij kate eõ bwe in mour ekkar ñan naan ko an ri-kanaan Aiseia, me ear ba, ‘Ña e; Kwõn jilkinl̦o̦k eõ!’” (Ais. 6:8) El̦ap an Kenny bõk kun̦aan ilo jerbalin ekkal ko im ear bareinwõt jipañ ñan ukote bok ko rej pedped ioon Baibõl̦ ilo kajin eo an. Ej ba, “Iar bõk kamminene ko me rar katakin eõ men ko iaad aikuji ñan katõprak jerbal ko aõ.” Bõtab elõñl̦o̦k men ko Kenny ear katak ijello̦kun an katak wõt kõn wãween an kõm̦m̦ani jerbal ko. Ej ba, “Iar katak kõn joñan maroñ ko aõ im kadkad ko ij aikuji bwe en em̦m̦anl̦o̦k aõ karejar ñan Jeova.” (Riit 1 Piter 5:10.) Kwõmaroñ ke etale wãween ko kwõj iiooni ilo mour eo am̦ im lale ñe kwõmaroñ bõk kamminene ko jet jãn Jeova?

11. Ewi wãween an kar jet jeid im jatid lel̦l̦ap ilo South Korea kate er bwe ren maroñ bõk kun̦aaer ilo jerbalin kwal̦o̦k naan, im ta tõprak ko rar loi? (Lale pija eo ilo kilin bok in.)

¹¹ Ro jeid im jatid me el̦ap imminene ippãer rej bareinwõt bõk kamminene ñe rej katak wãween ko rekããl ñan kwal̦o̦k naan. Ilo tõre in me ej wal̦o̦k nañinmej in COVID-19, em̦m̦aan ro rej lale juon eklejia ilo South Korea, rar je im ba, “Ro me rar l̦õmn̦ak bwe rejjab bõk kun̦aaer ilo jerbalin kwal̦o̦k naan kõn ãjmour ko aer, kiiõ rej bõk kun̦aaer ilo online. Jilu jeid im jatid lel̦l̦ap me 80 jim̦a aer iiõ rar katak kilen kõjerbali kein jerbal ko rekapeel im jino bõk kun̦aaer ilo karõk in enañin aolep raan.” (Sam 92:14, 15) Kokõn̦aan ke kal̦apl̦o̦k ijo kun̦aam̦ im kal̦apl̦o̦k am̦ edjoñ jouj eo an Jeova?  Lale jet iaan buñtõn ne ko kwõmaroñ kõm̦m̦ani me renaaj jipañ eok ñan tõpar mejãnkajjik in.

12. Ta eo Jeova ej kallim̦ur ñan ro rej lõke e?

¹² Katak ñan lõke Jeova. Ñe jej lõke Jeova im lel̦o̦k ñane men ko rem̦m̦antata ippãd, ej kallim̦ur bwe enaaj lukkuun kõjeraam̦m̦an kõj. (Mal. 3:10) Juon jeid im jatid kõrã ilo Colombia etan Fabiola ear loe an Jeova kajejjet kallim̦ur in ñane. Ear kõn̦aan jerbal ãinwõt juon rekũl̦ar bainier ãlikin wõt an kar peptaij. Bõtab ear aikuj in jerbal ñan kabwe aikuj ko an l̦eo pãleen im ajri ro jilu nejierro. Kõn men in, ke ear maroñ riittaer, ear lukkuun jar ñan Jeova bwe en jipañe. Ej ba, “Ekkã an armej aikuj kõttar ium̦win juon iien aetok m̦okta jãn aer maroñ bõk kõl̦l̦ã in riittaer ko aer, ak iar maroñ jino bõk kõl̦l̦ã ko aõ allõñ eo tok juon. Ear ãinwõt juon menin kabwilõñlõñ!” Ruo allõñ tokãlik ear jino bainier. Kiiõ, 70 jim̦a an iiõ im elõñl̦o̦k jãn 20 iiõ in an pãd ilo jerbalin bainier im ej kõm̦m̦ane wõt jerbal in tok ñan kiiõ. Ilo tõre kein, ear jipañ ralitõk armej bwe ren peptaij. Ej ba, “Meñe ewõr iien ij eñjake aõ m̦õjn̦o̦, ak Jeova ej jipañ eõ aolep raan bwe in wõnm̦aanl̦o̦k wõt im bainier.”

13-14. Joñak ta ko remaroñ jipañ kõj ñan lõke Jeova im kal̦apl̦o̦k ijo kun̦aad?

¹³ Bõk tokjãn jãn joñak ko an ro rar lõke Jeova. Eobrak Baibõl̦ eo kõn joñak ko an ro me rar lukkuun kate er ilo jerbal eo an Jeova. Ilo elõñ iaan joñak kein, ri-karejar rein an Jeova rar aikuj in m̦okta kõm̦m̦ane juon men,  innem Jeova ear kõjeraam̦m̦an er. Ñan waanjoñak, Jeova ej kab kõjeraam̦m̦ane Ebream ãlikin wõt an etal jãn m̦weo im̦õn “meñe ear jaje ia eo ej etal ñane.” (Hib. 11:8) Jekob ej kab bõk juon jeraam̦m̦an ãlikin wõt an oktaak ippãn enjel̦ eo. (Jen. 32:24-30) Im ke aelõñin Israel ear pojakin del̦o̦ñel̦o̦k Ãneen Kallim̦ur eo, armej ro rej kab maroñ kijoone Reba Jordan ãlikin wõt an bũrij ro juuri Reba Jordan.​—Jos. 3:14-16.

¹⁴ Kwõmaroñ bareinwõt bõk tokjãn jãn joñak ko an Ri-Kõnnaan ro an Jeova ilo raan kein me rar lõke Jeova im kal̦apl̦o̦k ijo kun̦aaer. Ñan waanjoñak, ear em̦m̦an ippãn juon jeid im jatid em̦m̦aan etan Payton im lio pãleen Diana, riiti bwebwenato ko kõn ro jeid im jatid me rar kal̦apl̦o̦k ijo kun̦aaer ilo jerbal eo aer ñan Jeova, ãinwõt an wal̦o̦k ilo katak eo elõñ m̦õttan etan “Rar M̦õn̦õn̦õ in Em̦m̦akũt Ñan Jipañ.” * Payton ej ba: “Ñe kõm̦ro ej riiti bwebwenato kein, ej ãinwõt ñe kõm̦ro ej alwõje an juon armej m̦õñã juon m̦õñã elukkuun enno̦. Im el̦ak tol̦o̦k am̦ro alwõj, ear l̦apl̦o̦k am̦ro kõn̦aan ‘edjoñ im lo bwe Jeova e jouj.’” Ejjabto tokãlik, Payton im Diana rar em̦m̦akũt im jerbal ilo juon jikin me el̦ap aikuj ie. Em̦õj ke am̦ riiti katak in me elõñ m̦õttan? Im em̦õj ke am̦ alwõje pija kein Witnessing in Isolated Territory​—Australia im Witnessing in Isolated Territory—​Ireland ilo jw.org? Men kein remaroñ jipañ eok ñan pukot wãween ko kwõmaroñ kal̦apl̦o̦k ijo kun̦aam̦.

15. Ewi wãween ad bõk tokjãn jãn ro me em̦m̦an ñan aetõl er?

¹⁵ Kããlõt ro em̦m̦an ñan aetõl er. Epidodol̦o̦k ad kõn̦aan edjoñe juon m̦õñã ekããl el̦aññe jej jol̦o̦k iien ippãn ro me enno̦ m̦õñã eo ippãer. Ejja ãindeinl̦o̦k wõt, ñe jej aetõl ro rej likũt Jeova m̦okta ilo mour ko aer, emaroñ l̦apl̦o̦k ad kõn̦aan pukot wãween ko ñan kal̦apl̦o̦k ijo kun̦aad ñan Anij. Ruo rippãlele etaerro Kent im Veronica, rar kam̦oole men in. Kent ej ba, “Ro m̦õttam̦ro im baam̦le ko am̦ro rar rõjañ kõm̦ro ñan kajjioñ wãween ko rekããl ñan kal̦apl̦o̦k ijo kun̦aam̦ro. Kõm̦ro kar kile bwe ilo am̦ro aetõl ro me rej pukot m̦okta Aelõñ eo, ear l̦apl̦o̦k am̦ro peran ñan kajjioñe wãween ko rekããl.” Kiiõ Kent im Veronica rej jerbalin jipejel̦ bainier ilo Serbia.

16. Ãinwõt an waanjoñak eo an Jesus ilo Luk 12:16-21 kwal̦o̦k, etke jej aikuj m̦õn̦õn̦õ in kaarmejjeteik kõj?

¹⁶ Kaarmejjeteik kõj bwe jen kal̦apl̦o̦k ijo kun̦aad ñan Jeova. Jejjab aikuj bõjrak jãn ad kõm̦m̦ani aolep men ko rem̦m̦an ippãd bwe jen maroñ kabuñbũruon Jeova. (Ekl. 5:19, 20, UBS) Bõtab, el̦aññe jej jenliklik jãn ad kal̦apl̦o̦k ijo kun̦aad ilo jerbal eo an Anij kõnke jejjab kõn̦aan kaarmejjeteik men ko jekõn̦aan kõm̦m̦ani, innem jemaroñ kõm̦m̦ane ejja likjab eo wõt me em̦m̦aan eo ilo waanjoñak eo an Jesus ear kõm̦m̦ane. Em̦m̦aan in ear kate bwe en em̦m̦an kõjeiien, bõtab ear kõjekdo̦o̦n Anij. (Riit Luk 12:16-21.) Juon jeid im jatid em̦m̦aan etan in Christian, me ej jokwe ilo France, ej ba, “Iar lel̦o̦k jidik wõt aõ iien im kajoor ñan Jeova im ñan baam̦le eo aõ.” E im lio pãleen rar pepe ñan bainier. Bõtab ñan tõpar mejãnkajjik in, rar aikuj in kam̦õj erro jãn jikin jerbal ko aerro. Erro ear jino juon peejnej jidikdik in karreo, ñan kabwe aikuj ko aerro, im erro ear katak kilen jokwane wõt meñe ejjab lõñ men ko m̦weieer. Ear ke wõr tokjãn aerro kaarmejjeteik erro? Christian ej ba: “El̦apl̦o̦k am̦ro m̦õn̦õn̦õ kiiõ ilo jerbalin kwal̦o̦k naan im m̦õn̦õn̦õ in loe an rũkkatak ro am̦ro im ro kõmij bar jepl̦aak ippãer katak kõn Jeova.”

17. Ta eo emaroñ bõbraik kõj jãn ad kajjioñ kilen kwal̦o̦k naan ko rekããl?

 ¹⁷ M̦õn̦õn̦õ in kajjioñi kilen kwal̦o̦k naan ko rekããl. (Jrb. 17:16, 17; 20:20, 21) Juon bainier ilo Amedka, etan Shirley, ear aikuj in kõm̦m̦an oktak ilo jerbalin kwal̦o̦k naan eo an ilo tõre in me ej wal̦o̦k nañinmej in COVID-19. Ilo jinoin, ear mijak in kajjioñ kwal̦o̦k naan ilo talboon. Bõtab ãlikin wõt an bõk kamminene jãn iien lotok an ri-lotok eo, ear jino an ekkeini an kõjerbal kõl in ilo an kõm̦m̦ane jerbal in kwal̦o̦k naan. Ej ba, “Ilo jinoin iar mijak in kõm̦m̦ane, ak kiiõ elukkuun em̦m̦an ippa. El̦apl̦o̦k am tõpar elõñl̦o̦k armej kiiõ jãn ke kõm kijoñ kwal̦o̦k naan jãn em̦ ñan em̦!”

18. Ta eo emaroñ jipañ kõj ñan jelm̦ae apañ ko ilo ad kajjioñ kal̦apl̦o̦k ijo kun̦aad ilo jerbalin kwal̦o̦k naan eo ad?

¹⁸ Kõm̦m̦ane juon laajrak kõn men ko kwõnaaj kõm̦m̦ani im l̦oore. Ñe jej iioon apañ, jemaroñ jar kõn jipañ im lukkuun kõl̦mãnl̦o̦kjen̦ kõn ewi wãween ad maroñ kõm̦adm̦õdi. (JK. 3:21) Sonia, eo ej rekũl̦ar bainier ippãn kurub eo me rej kajin Romany ilo Europe, ej ba: “Em̦m̦an ippa je laajrakin men ko inaaj kõm̦m̦ani ilo juon pepa im ij likũt pepa in ilo juon jikin me imaroñ loe. Ewõr juon aõ pijain juon ial̦ me kwõmaroñ jeor ñan tuanmoon̦ ak tuanmiiñ me iar likũti ilo nien nuknuk eo aõ. Ñe ewõr juon pepe ij aikuj in kõm̦m̦ane, ij lale ial̦ kein ruo im l̦õmn̦ak el̦aññe pepe eo aõ enaaj jipañ eõ ñan tõpar mejãnkajjik eo aõ ak jaab.” Sonia ej kate e bwe en jim̦we wãween an l̦õmn̦ak kõn apañ ko ej iiooni. Ej ba, “Ij aikuj pepe el̦aññe inaaj watõk jabdewõt wãween ko rekããl ij iiooni ãinwõt juon wõrwõr me ej pinej eõ jãn aõ tõpare mejãnkajjik eo aõ ak juon bridge me enaaj jipañ eõ tõpare.”

19. Ta eo jekõn̦aan kõm̦m̦ane?

¹⁹ Jeova ej kõjeraam̦m̦an kõj ilo elõñ wãween ko. Jemaroñ kwal̦o̦k kõn ewi joñan ad kam̦m̦oolole kõn jeraam̦m̦an kein ej litok ikijjeen ad nõbar E joñan wõt ad maroñ. (Hib. 13:15) Men in emaroñ kitibuj ad kajjioñe wãween ko rekããl ilo ad kal̦apl̦o̦k ijo kun̦aad ñan Jeova. Ilo ad kõm̦m̦ane men in, jej kõtl̦o̦k ad bõk jeraam̦m̦an ko jet. Kajjojo raan, jãn pukot wãween ko ñan edjoñ im lo bwe Jeova ejouj. Innem jenaaj ãinwõt Jesus, eo ear ba: “M̦õñã eo kijõ in ej bwe in kõm̦anm̦an ankilaan eo ear jilkintok eõ im kadedel̦o̦k jerbal eo ear letok ñan eõ.”​—Jon 4:34.