1. Ta kajjitõk ko remaroñ jiktok ilo l̦õmn̦ak ko ad ñe jej kõl̦mãnl̦o̦kjen̦ kõn aolep men ko Jeova ear kõm̦anm̦ani?

ÑE JEJ kõl̦mãnl̦o̦kjen̦ kõn aolep men ko Jeova ear kõm̦anm̦ani ilañ im ioon lal̦, jemaroñ bar bõk ejja eñjake eo wõt an Devid, eo ear jar im kwal̦o̦k kajjitõk kein: “Ke ij lale lañ ko Am̦, jerbal an addiim̦; allõñ im iju ko kwaar kõm̦anm̦ani; Ta armej bwe kwõn keememeje? Im nejin armej bwe kwõn itok ñan ippãn?” (Sam 8: 3, 4) Ãinwõt Devid, jemaroñ kalimjek lal̦ in me jej jokwe ie im lo bwe elukkuun dik ñe keidi ñan ijoko ilañ im ilal̦, kõn men in jemaroñ bwilõñ kõn an Jeova likũt wõt kõj ilo l̦õmn̦ak ko an. Bõtab jenãj bar lo bwe Jeova ear jab baj kwal̦o̦k an l̦õmn̦ak wõt armej ro ruo m̦oktata, Adam im Iv, ak ear bareinwõt kõm̦m̦an bwe ren m̦õttan baam̦le eo an.

2. Kar ta karõk eo an Jeova ñan ro kar nejin m̦oktata ilo lal̦ in?

² Adam im Iv kar ro nejin Jeova m̦oktata ilo lal̦ in, im Jeova ear eo Jemãer ilañ me el̦ap an yokwe. Ear kõtmãne bwe rippãlele rein ren uwaan baam̦le eo an Jeova me em̦m̦an aer kajejjet ijo kun̦aaer. Ear jiroñ er im ba: “Kom̦win timmon im orl̦o̦k, im koobrak lal̦, im kajoor jãne.” (Jen. 1:28) Ear kõn̦aan bwe en wõr nejier im bwe ren lale im kõjparok ijin jikier ilo lal̦ in. El̦aññe Adam im Iv renaaj kar pokake im kõm̦m̦ani men ko Jeova ear karõki, innem erro kab aolep ro ineer renaaj kar uwaan wõt baam̦le eo an Jeova ñan indeeo.

3. Etke jemaroñ ba bwe ear lukkuun em̦m̦an im aorõk ijo jikin Adam im Iv ilowaan baam̦le eo an Jeova?

³ Ear lukkuun em̦m̦an im aorõk ijo jikin Adam im Iv ilowaan baam̦le eo an Jeova. Ãinwõt kar je ilo Sam 8:5, Devid ear ba men in kõn armej, ro im rej menin kõm̦anm̦an an Jeova: “Kwaar kõttãik e jidik jãn enjel̦ ran̦, im kõpãlpele kõn aiboojoj im wuj.” Em̦ool bwe kar jab lel̦o̦k ejja joñan kajoor im mãlõtlõt kab maroñ ko ñan armej ãinwõt enjel̦ ro. (Sam 103:20) Meñe ãindein, ak jidik wõt an armej ro ettãl̦o̦k jãn enjel̦ rein me rekajoor. Elukkuun  kabwilõñlõñ men in ñe jej l̦õmn̦ak kake! Jeova ear lel̦o̦k juon wãween mour elukkuun em̦m̦an ñan ro jemãd im jined m̦oktata.

4. Ta eo ear wal̦o̦k ñan Adam im Iv kõn wõt aerro jab pokake Jeova, im ta ko jenaaj etali kaki ilo katak in?

 ⁴ Ekabũrom̦õjm̦õj bwe Adam im Iv rar luuji ijo jikier ilowaan baam̦le eo an Jeova. Men in ear bõktok el̦ap jorrããn ñan ro ineer ãinwõt ad naaj lale tokãlik ilo katak in. Ijoke, ejjañin oktak karõk eo an Jeova. Ej kõn̦aan wõt bwe armej ro me rej pokake ren maroñ naaj nejin ñan indeeo. M̦okta, jen lale ewi wãween an Jeova kautiej kõj. Innem tokãlik, jenãj kõnono kõn ta ko jemaroñ kõm̦m̦ani kiiõ ñan kwal̦o̦k bwe jekõn̦aan m̦õttan ak uwaan baam̦le eo an Jeova. Im ãliktata, jenaaj kõnono kõn jeraam̦m̦an ko me ro nejin Jeova ijin ioon lal̦ renaaj m̦õn̦õn̦õ kaki ñan indeeo.

5. Ewi wãween ad maroñ lel̦o̦k aiboojoj im nõbar ñan Anij kõn an kar kõm̦anm̦an kõj ilo nemãmeen wõt E?

⁵ Jeova ear kautiej kõj ilo an kar kõm̦anm̦an kõj ilo nemãmeen wõt E. (Jen. 1:26, 27) Kõnke kar kõm̦anm̦an kõj ilo nemãmeen wõt Anij, jemaroñ kaddek im kwal̦o̦k elõñ iaan kadkad ko kadkadin me relukkuun em̦m̦an ãinwõt yokwe, tũriam̦o, tiljek, im wãnõk. (Sam 86:15, UBS; 145:17) Ilo ad kaddekl̦o̦k kain kadkad rot kein ippãd, jej lel̦o̦k aiboojoj im nõbar ñan Jeova im kam̦ool bwe el̦ap ad kam̦m̦oolole. (1 Pit. 1:14-16) Ñe wãween m̦wilid ak kõm̦m̦an ko ad rej ekkar ñan wãween eo me ej kabuñbũruon Jeova, men in ekõm̦m̦an bwe jen m̦õn̦õn̦õ im jubũruod. Im ilo an kar Jeova kõm̦anm̦an kõj ilo nemãmeen wõt e, men in ekõm̦m̦an bwe jen maroñ erom kain armej rot eo me ekõn̦aan bwe ren uwaan baam̦le eo an.

6. Ewi wãween an kar Jeova kautiej armej ro ilo wãween an kar kõpooj lal̦ in?

⁶ Jeova ear kõpooj juon jikid ejejuwaan. M̦oktal̦o̦k jãn an kar Jeova kõm̦anm̦an em̦m̦aan eo m̦oktata, ear kõpooj lal̦ in ñan armej. (Job 38:4-6, UBS; Jrm. 10:12) Kõnke Jeova ej juon eo el̦ap an l̦õmn̦ak kõn ro jet im elukkuun jouj, ear kõpooj elõñ men ko rem̦m̦an ñan ad maroñ m̦õn̦õn̦õ kaki. (Sam 104:14, 15, 24, UBS) Ewõr iien, ear kõl̦mãnl̦o̦kjen̦ kõn men ko ear kõm̦anm̦ani, im ear ‘lo bwe rem̦m̦an.’ (Jen. 1:10, 12, 31) Ear kautiej armej ilo an kar ‘kairooj er ioon’ aolep menin kõm̦anm̦an ko an rekabwilõñlõñ ijin ioon lal̦. (Sam 8:6) Karõk eo an Anij ej bwe armej ro reweeppãn ren lo lañlõñ ilo aer lale im kõjparok menin kõm̦anm̦an ko An ñan indeeo. Kwõj ke ekkeini am̦ kam̦m̦oolol Jeova kõn kallim̦ur in an el̦ap an em̦m̦an?

7. Ewi wãween an Joshua 24:15 kaalikkar bwe ewõr ippãn armej anemkwõj in kããlõt?

⁷ Em̦õj an Jeova letok ñan kõj menin letok eo kõn anemkwõj in kããlõt. Jemaroñ kããlõt kain wãween mour rot eo jekõn̦aan mour kake. (Riit Joshua 24:15.) Ekkã aer n̦aetan maroñ in, anemkwõj in kããlõt. Anij eo ad me el̦ap yokwe ippãn ej lukkuun lañlõñ ñe jej kããlõt ñan karejar ñane. (Sam 84:11; JK. 27:11) Jemaroñ kõjerbal ilo jim̦we anemkwõj in kããlõt eo ad ilo elõñ wãween ko. L̦õmn̦ak kõn waanjoñak eo Jesus ear likũti ñan kõj.

8. Kwal̦o̦k juon waanjoñak kõn wãween an kar Jesus kõjerbal maroñ eo an ñan kããlõt.

⁸ Jemaroñ anõke joñak eo an Jesus ilo ad kããlõt ñan likũt kõn̦aan ko an ro jet m̦okta jãn kõn̦aan ko ad. Ewõr juon iien Jesus im rijjilõk ro an rar lukkuun m̦õk, im rar jibadekl̦o̦k juon jikin ejjel̦o̦k ekkeroro ie bwe ren kakkije. Ijoke rar jab maroñ kakkije, kõnke juon jarlepju in armej rar lo er im rar lukkuun kõn̦aan bwe Jesus en katakin er. Meñe ãindein, ak Jesus ear jab oktak im abn̦õn̦õ kake er. Ijello̦kun an ãindein, ear tũriam̦okake er. Innem ta eo Jesus ear kõm̦m̦ane? “Ear jino katakin er kõn elõñ men” ko. (Mark 6:30-34) Ñe jej anõke Jesus ilo ad kaarmejjeteik iien kab maroñ ko ad bwe jen maroñ jipañ ro jet, men in ej bõktok aiboojoj im nõbar  ñan eo Jemãd ilañ. (Matu 5:14-16) Bareinwõt, jej kaalikkar ñan Jeova bwe jekõn̦aan erom uwaan baam̦le eo an.

9. Ta jeraam̦m̦an eo ejejuwaan em̦õj an Jeova letok ñan armej?

⁹ Jeova ear lel̦o̦k ñan armej maroñ eo ñan an wõr nejier, bareinwõt eddo eo ñan katakin ro nejier ñan yokwe E im jerbal ñane. El̦aññe kwõj juon jinen ak jemãn, kwõj ke kwal̦o̦k am̦ kam̦m̦oolol kõn menin letok in ejejuwaan? Meñe elukkuun l̦ap an Jeova kõjeraam̦m̦an enjel̦ ro, ak ear jab lel̦o̦k ñan er jeraam̦m̦an eo ñan neje. Kõn men in, ñe kwõj juon eo ewõr nejin, kwal̦o̦k am̦ kam̦m̦oolol kõn jeraam̦m̦an in ñan kipel im lale ajri ro nejũm̦ ilo aer rũttol̦o̦k. Em̦õj lel̦o̦k ñan ro jemãn im jinen juon menin jolõt ñan kõjparoke, juon eddo eokkwõjarjar ñan lale im kõkkaajiririik ro nejier “ilo kauwe im kõn naanin kakapilõk ko an Jeova.” (Eps. 6:4; Dut. 6:5-7; Sam 127:3) Ñan jipañ ro me ewõr nejier, em̦õj an doulul eo an Jeova kõpooj elõñ kein jerbal ko me rej pedped ioon Baibõl̦ ãinwõt bok ko, pijain alwõj ko, kõjañjañ im al ko, im katak ko jet ilo online. Ealikkar bwe eo Jemãd ilañ kab eo Nejin jim̦or el̦ap aerro kaorõk ro reddik. (Luk 18:15-17) Ñe ro ewõr nejier rej atartar ioon Jeova im kate er joñan wõt aer maroñ ñan lale im kõjparok ajri ro nejier, men in ej lukkuun kabuñbũruon Jeova. Bareinwõt ilo aer ãindein, rej lel̦o̦k ñan ro nejier jeraam̦m̦an eo ñan aer maroñ bar erom uwaan baam̦le eo an Jeova ñan indeeo!

10-11. Ta eo Jeova ear kõm̦m̦ane bwe en maroñ wal̦o̦k ikijjeen katok in mour eo an Jesus?

¹⁰ Jeova ear letok eo Nejin ej make wõt aorõk bwe jen bar maroñ uwaan baam̦le eo An. Ãinwõt ad kar kõnono kake ilo  pãrokõrããp 4, Adam im Iv rar luuji ijo jikier ilowaan baam̦le eo an Jeova, im men in ear kõm̦m̦an bwe en bar ejjel̦o̦k jikin ro nejier ilo baam̦le eo An. (Rom 5:12) Adam im Iv rar kããlõt ñan jab pokake Jeova, kõn men in ekkar bwe Jeova en jol̦o̦k erro jãn baam̦le eo An. Ak ta kõn ro nejierro? Ilo yokwe, Jeova ear kõm̦m̦an bwe en pel̦l̦o̦k ial̦an an ro rej pokake E maroñ erom uwaan baam̦le eo An. Ear kõm̦m̦ane men in ikijjeen katok in mour eo an Jesus Christ, eo Nejin me ej make wõt. (Jon 3:16; Rom 5:19) Kõn wõt katok in mour eo an Jesus, em̦õj kõm̦m̦an bwe ro rej uwaan 144,000 ren maroñ erom ro nejin Anij.​—Rom 8:15-17; Rev. 14:1.

¹¹ Bareinwõt, ewõr milien im milien ro jet retiljek me rej pokake im kõm̦anm̦an ankilaan Anij. Rej reim̦aanl̦o̦k ñan iien eo renaaj lukkuun erom uwaan baam̦le eo an Anij ãlikin naaj iien mãlejjoñ eo ãliktata ilo jem̦l̦o̦kin 1,000 iiõ ko. (Sam 25:14, UBS; Rom 8:20, 21) Ilo aer reim̦aanl̦o̦k wõt ñan jeraam̦m̦an in, meñe kiiõ ak rej ãñinñini Jeova, eo me ej aer ri-Kõm̦anm̦an, ãinwõt juon ‘Jemãer.’ (Matu 6:9) Naaj bareinwõt lel̦o̦k ñan ro renaaj jerkakpeje, jeraam̦m̦an eo ñan katak kõn ta ko Jeova ekõn̦aan bwe ren kõm̦m̦ani. Ro me renaaj kããlõt ñan pokake naanin tõl ko an, renaaj bareinwõt oktak im erom uwaan baam̦le eo an Jeova.

12. Ta kajjitõk eo me jenaaj uwaake kiiõ?

¹² Ãinwõt an m̦õj ad loe, elõñ men ko em̦õj an Jeova kõm̦m̦ani ñan kwal̦o̦k an kautiej armej ro. Em̦õj an kadede bõk rũkkapit ro bwe ren erom nejin, im em̦õj an lel̦o̦k ñan ro me rej uwaan ‘jar eo el̦ap’ jeraam̦m̦an eo ñan lukkuun erom ro nejin ilo naaj lal̦ eo ekããl. (Rev. 7:9) Ta eo jemaroñ kõm̦m̦ane kiiõ ñan kaalikkar ñan Jeova bwe jekõn̦aan erom uwaan baam̦le eo an ñan indeeo?

13. Ta eo jemaroñ kõm̦m̦ane bwe jen uwaan baam̦le eo an Anij? (Mark 12:30)

¹³ Kwal̦o̦k am̦ yokwe Jeova ilo am̦ karejar ñane kõn aolepen bũruom̦. (Riit Mark 12:30.) Iaan aolep men ko me Anij ear litok ikijjeen jouj eo an ñan kõj, bõlen juon iaan menin letok ko an  me ej make wõt l̦aptata ej maroñ eo ñan kabuñ ñane. Jej kwal̦o̦k bwe jej yokwe Jeova ilo ad “pokake kien ko an.” (1 Jon 5:3) Jesus ear kõnono ikijjeen Jemãn ilo an kar letok naanin jiroñ eo ñan kõj bwe jen kõm̦m̦an ri-kal̦oor, im peptaiji er. (Matu 28:19) Ear bareinwõt kakien kõj ñan yokwe doon. (Jon 13:35) Jeova enaaj kõm̦m̦an bwe ro rej pokake kien ko an, ren erom m̦õttan baam̦le eo an ipel̦aakin lal̦ in me rej kabuñ ñane.​—Sam 15:1, 2.

14. Ewi wãween ad maroñ kwal̦o̦k yokwe ñan ro jet? (Matu 9:36-38; Rom 12:10)

¹⁴ Kwal̦o̦k yokwe ñan ro jet. Yokwe ej kadkad eo el̦aptata kadkadin Jeova. (1 Jon 4:8) Jeova ear kwal̦o̦k yokwe ñan kõj m̦okta jãn ad kar jel̦ã kajjien. (1 Jon 4:9, 10) Jej anõke E ñe jej kwal̦o̦k yokwe ñan ro jet. (Eps. 5:1) Juon iaan wãween ko rem̦m̦antata jemaroñ kwal̦o̦k yokwe ñan armej ro ej ilo ad jipañ er ñan katak kõn Jeova kiiõ ke ejja wõr wõt iien. (Riit Matu 9:36-38.) Ilo ad kõm̦m̦ane men in, jej kõpel̦l̦o̦k juon ial̦an aer maroñ katak im jel̦ã ta eo ren kõm̦m̦ane bwe ren maroñ bar erom ro uwaan baam̦le eo an Anij. Ãlikin an juon armej peptaij, jej aikuj wõnm̦aanl̦o̦k wõt im yokwe e im kautieje. (1 Jon 4:20, 21) Ewi wãween ad kõm̦m̦ane men in? Juon wãween ej ilo ad kwal̦o̦k ad lõke bwe em̦m̦an l̦õmn̦ak ak kõttõpar ko an. Ñan waanjoñak, ñe jejjab maroñ mel̦el̦e etke ear kõm̦m̦ane juon men, jeban bõk l̦õmn̦ak eo bwe ear kõm̦m̦ane men in kõn wõt un ko rekũbbon̦. Ijello̦kun ad ãindein, jenaaj kwal̦o̦k wõt kautiej ñan in jeid im jatid, im watõk e bwe eutiejl̦o̦k jãn kõj.​—Riit Rom 12:10; Pil. 2:3.

15. Wõn ro jej aikuj kwal̦o̦k tũriam̦o im jouj ñan er?

¹⁵ Kwal̦o̦k tũriam̦o im jouj ñan aolep armej. El̦aññe jekõn̦aan bwe jen uwaan ro me ewõr ippãer jim̦we im maroñ eo ñan ãñinñini Jeova bwe ej Jemãer ñan indeeo, innem jej aikuj jerbale Naanin Anij ilo mour ko ad. Ñan waanjoñak, Jesus ear katakin kõj bwe jej aikuj kwal̦o̦k tũriam̦o im jouj ñan aolep armej, bareinwõt ñan ro me rej kõjdate kõj. (Luk 6:32-36) Jemaroñ lo bwe jet iien emaroñ pen ñan ad kõm̦m̦ane men in. El̦aññe ãindein, jej aikuj katak ñan l̦õmn̦ak im kõm̦m̦an ãinwõt kar Jesus. Ñe jenaaj kate kõj ñan pokake Jeova im anõke joñak eo an Jesus, jej kwal̦o̦k ñan eo Jemãd ilañ bwe jekõn̦aan erom uwaan baam̦le eo an ñan indeeo.

16. Ewi wãween ad maroñ kõjparok wõt etan baam̦le eo an Jeova?

¹⁶ Kõjparok etan baam̦le eo an Jeova. Ilowaan juon baam̦le, ekkã an juon l̦adik jidikdik anõke ta ko l̦adik eo jein ej kõm̦m̦ani. Ñe l̦adik eo erũtto ej jerbale naanin kakapilõklõk ko jãn Baibõl̦ ilo mour eo an, innem enãj juon joñak em̦m̦an ñan l̦adik eo jatin. Bõtab ñe l̦adik eo erũtto ej kõm̦m̦ani men ko rejjab jim̦we, l̦adik eo edik emaroñ anõke joñak in an enana. Ejja ãindeinl̦o̦k wõt ilowaan baam̦le eo an Jeova. El̦aññe juon Kũrjin me ear tiljek ilo kar m̦okta ej oktak im bõk l̦õmn̦ak ko an juon ri-jum̦ae ak kããlõt juon wãween mour ettoon im enana, ro jet remaroñ jino bar po ilo wãween in im kobal̦o̦k ippãn im kõm̦m̦ani men ko renana. Ro me rej kõm̦m̦ane men in rej ko̦kkure etan baam̦le eo an Jeova me rej kabuñ ñane. (1 Tes. 4:3-8) Jej aikuj kõjparok ñan jab anõke joñak ko renana im jab kõtl̦o̦k bwe jabdewõt men en kattol̦o̦k kõj jãn eo Jemãd ilañ me el̦ap yokwe ippãn.

17. Kain l̦õmn̦ak rot eo jej aikuj kõjparok kõj jãn ad bõke, im etke?

¹⁷ Lõke Jeova ijello̦kun ad lõke m̦weiuk ko. Jeova ear kallim̦ur bwe enaaj kõke aikuj ko ad ikijjeen m̦õñã, ballid, im jikin jokwe el̦aññe jenaaj pukot m̦oktata Aelõñ eo an im mour ekkar ñan kien ko an rewãnõk. (Sam 55:22; Matu 6:33) Ñe jej keememej men in, jenaaj kõjparok jãn ad bõk l̦õmn̦ak eo bwe m̦weiuk ko an lal̦ in renaaj bõktok kõjparok ak jokwane im m̦õn̦õn̦õ eo me ejjel̦o̦k jem̦l̦o̦kin. Jejel̦ã bwe wãween eo dein wõt ñan ad maroñ lo aenõm̦m̦an eo em̦ool, ej ilo ad kõm̦anm̦an ankilaan Jeova. (Pil. 4: 6, 7) Meñe emaroñ wõr ad maroñ ñan wiaik elõñ men ko, ak jej aikuj lukkuun kõl̦mãnl̦o̦kjen̦ kõn el̦aññe m̦ool bwe elukkuun wõr ad iien im maroñ ñan kõjerbal im kõjparoki men kein. Jemaroñ ke oktak im kiiõ l̦ap ad yokwi m̦weiuk kein? Jej aikuj keememej bwe Anij ej kõtmãne bwe en em̦m̦an ad kajejjet ijo kun̦aad. Mel̦el̦ein bwe jejjab aikuj kõtl̦o̦k bwe jen m̦ad. Ejjel̦o̦k pere bwe jejjab kõn̦aan ãinwõt likao eo me ear kõjekdo̦o̦n jeraam̦m̦an eo ñan karejar ñan Jeova, ekoba jeraam̦m̦an eo ñan an maroñ erom nejin—kõn wõt an l̦ap an yokwi jet iaan m̦weiuk ko an lal̦ in!—Mark 10:17-22.

18. Ta jeraam̦m̦an eo el̦aptata armej ro rej pokake Anij renaaj m̦õn̦õn̦õ kake ñan indeeo?

¹⁸ Jeraam̦m̦an eo el̦aptata me ro rej pokake renaaj m̦õn̦õn̦õ kake, ej jeraam̦m̦an eo ñan yokwe im kabuñ ñan Jeova ñan indeeo! Ro me kõjatdikdik eo aer ej ñan mour ilo lal̦ in, renaaj bareinwõt m̦õn̦õn̦õ kõn jeraam̦m̦an eo ñan lale im kõjparok lal̦ in eaiboojoj me Jeova ear kõm̦anm̦ane bwe en juon jikin ejejjet im em̦m̦an ñan aer jokwe ie. M̦õttan wõt jidik lal̦ in im aolep men ko rej mour ie renaaj bar kããl ium̦win tõl eo an Aelõñ eo an Anij. Jesus enaaj jol̦o̦k aolep wãween ko renana me rej wal̦o̦k kiiõ itok wõt jãn an kar Adam im Iv kããlõt ñan etal jãn baam̦le eo an Anij. Jeova enaaj kõjerkakpejeik elõñ milien armej ro im lel̦o̦k ñan er jeraam̦m̦an eo ñan mour indeeo kõn juon ãjmour em̦m̦an im weeppãn ioon lal̦ in me enaaj oktak im erom juon bar pedetaij. (Luk 23:42, 43) Ilo an ro uwaan baam̦le eo an Jeova ijin ioon lal̦ etal ñan aer naaj lukkuun weeppãn, kajjojo iaaer naaj kõpãlpele kõn “aiboojoj im wuj” eo me Devid ear jeje kake.​—Sam 8:5.

19. Ta eo kwõj aikuj keememej ak likũt wõt ilo l̦õmn̦ak eo am̦?

¹⁹ El̦aññe kwõj uwaan ‘jar eo el̦ap,’ ewõr juon am̦ kõjatdikdik ekanooj in em̦m̦an. Anij ej yokwe eok, im ekõn̦aan bwe kwõn uwaan baam̦le eo an. Kõn men in, kwõn kate eok kõn aolepen am̦ maroñ ñan kabuñbũruon. Ilo kajjojo raanin am̦ mour, kwõn likũt ilo l̦õmn̦ak eo am̦ im ilo bũruom̦ kallim̦ur ko an Anij. Kwal̦o̦k am̦ kam̦m̦oolol kõn jeraam̦m̦an eo am̦ ñan kabuñ ñan eo Jemãdwõj ilañ me ejitõnbõro, im kaorõk jeraam̦m̦an eo am̦ ñan nõbare ñan indeeo!