1. Ewi wãween an elõñ kate er ñan kal̦apl̦o̦k ijo kun̦aaer ilo jerbal eo an Jeova?

 ELUKKUUN lõñ men ko jej aikuj in kõm̦m̦ani ilo an epaaktok jem̦l̦o̦kin jukjukun pãd in. (Matu 24:14; Luk 10:2; 1 Pit. 5:2) Kõj aolep jekõn̦aan karejar ñan Jeova kõn aolepen ad maroñ. Elõñ rej kal̦apl̦o̦k ijo kun̦aaer ilo jerbalin kwal̦o̦k naan. Jet rekõn̦aan bõk jerbalin bainier. Ro jet rekõn̦aan jerbal ilo Betel̦ ak bõk kun̦aaer ilo jerbalin ekkal ko an doulul in. Im elõñ iaan likao im em̦m̦aan ro jeid im jatid rej kate er bwe ren bõk jerbalin rijjipañ ilo eklejia eo ak bwe ren juon iaan em̦m̦aan ro rej lale eklejia. (1 Tim. 3:1, 8) Ejjel̦o̦k pere bwe elukkuun buñbũruon Jeova ñan lo an armej ro an m̦õn̦õn̦õ in jerbal ñane!—Sam 110:3; Ais. 6:8.

2. Ta eñjake eo jemaroñ bõke ñe ejjab tõprak jet iaan mejãnkajjik ko ad ilo jerbal eo ad ñan Jeova?

² Ijoke, jemaroñ jino ebbweer el̦aññe em̦õj an mootl̦o̦k juon iien aetok ak jejjañin tõpar jet iaan mejãnkajjik ko ad ilo jerbal eo ad ñan Jeova. Ak jemaroñ ebbweer ñe jejjab maroñ bõk jet iaan jeraam̦m̦an ko ilo doulul in kõn wõt ad rũtto ak kõn wãween ko jet ilo mour eo ad. (JK. 13:12, UBS) Eñin men eo ear wal̦o̦k ñan Melissa. * Elukkuun kõn̦aan jerbal ilo Betel̦ ak etal ñan Jikuul̦ eo ñan Ri-Kwal̦o̦k Naan ro an Aelõñ Eo, ak ej ba: “Irũtto jãn joñan iiõ eo me rej bõk juon ñan an del̦o̦ñ ilo men kein. Kiiõ jeraam̦m̦an kein rej ãinwõt juon baj ettõn̦ak wõt ñan ña. Kõn men in, ewõr iien ij ebbweer.”

3. Ta buñtõn ne ko me jet remaroñ aikuj kõm̦m̦ani bwe ren maroñ bõk jet eddo ko?

³ Ewõr ro im em̦m̦an dettaer im ãjmour ko aer, remaroñ aikuj iien bwe ren rũttol̦o̦k ilo kõl̦mãnl̦o̦kjen̦ im jel̦ã kilen kwal̦o̦k jet kadkad ko m̦okta jãn aer maroñ bõk eddo ko jet. Ñan waanjoñak, remaroñ jet ro me remãlõtlõt, rejel̦ã kõm̦m̦ani pepe ko, im rem̦õn̦õn̦õ in jipañ; ijoke remaroñ bar jet ro me ej aikuj l̦apl̦o̦k  aer jel̦ã kwal̦o̦k kijenmej, lõt wãween aer jerbal, im jel̦ã kwal̦o̦k kautiej. Ñe kwõj kate eok bwe en wõr ippam̦ kadkad ko me rej menin aikuj, innem emaroñ naaj pel̦l̦o̦k ñan eok juon jeraam̦m̦an ilo iien eo kwaar jab kõtmãne kake. L̦õmn̦ak kõn waanjoñak eo an Nick. Ke ear 20 an iiõ, ear lukkuun ebbweer kõnke kar jab jitõñe bwe en juon rijjipañ ilo eklejia eo. Ej ba, “Iar l̦õmn̦ak bwe bõlen ewõr juon men me ejjab em̦m̦an ippa.” Bõtab Nick ear wõnm̦aanl̦o̦k wõt im kate e. Ear kate joñan wõt an maroñ kõn jeraam̦m̦an ko rar pel̦l̦o̦k ñane. Rainin, ej jerbal ãinwõt juon iaan em̦m̦aan ro rej lale juon iaan ra ko ad.

4. Ta ko jenaaj etali ilo katak in?

⁴ Kwõj ke ebbweer kõnke kwõjjañin tõpar juon iaan mejãnkajjik ko am̦? El̦aññe aet, kwal̦o̦k inepata ko am̦ ñan Jeova. (Sam 37:5-7) Bareinwõt, kwõmaroñ kajjitõk jipañ jãn ro jeid im jatid me rerũtto ilo tõmak kõn jet wãween ko kwõmaroñ kakõm̦anm̦anl̦o̦k jerbal ko am̦ ñan Anij, innem kate eok joñan wõt am̦ maroñ ñan jerbali naanin jipañ kein aer. El̦aññe kwõnaaj ãindein, kwõnaaj maroñ bõk eddo eo ak tõpar mejãnkajjik eo am̦. Bõtab ãinwõt Melissa, eo me kar kwal̦o̦k kake m̦oktal̦o̦k, bõlen kwõjjab maroñ bõk jeraam̦m̦an eo me kokõn̦aan bõke ilo tõre in. Innem ta eo kwõmaroñ kõm̦m̦ane kiiõ? Ewi wãween am̦ maroñ dãpij wõt am̦ lañlõñ? Ñan uwaake kajjitõk kein, katak in enaaj kõnono kõn (1) ia eo kwõmaroñ lo lañlõñ ie, (2) wãween am̦ maroñ kal̦apl̦o̦k am̦ lañlõñ, im (3) kain mejãnkajjik rot ko me kwõmaroñ kõm̦m̦ani me renaaj kal̦apl̦o̦k am̦ lañlõñ.

5. Ñan ad maroñ lo lañlõñ, ta ko jej aikuj l̦õmn̦ak wõt kaki? (Ekklisiastis 6:9)

⁵ Ãinwõt an alikkar ilo Ekklisiastis 6:9, jemaroñ lo lañlõñ ñe ejim̦we ijo jej pukot e ie. (Riit.) Juon eo me em̦m̦an ippãn men ko me mejãd ej loi, ej kwal̦o̦k an kam̦m̦oolol kõn men ko ewõr ippãn, ãinwõt wãween ko ej iiooni ilo tõre eo. Ijo iturãjet, juon eo me ekõn̦aan wõt jibadeki kõn̦aan ko an ej wõnm̦aanl̦o̦k wõt im l̦õmn̦ak kõn men ko me ejjab maroñ wõr ippãn. Ta eo jej katak jãn men in? Jej katak bwe ñan ad maroñ lo lañlõñ, jej aikuj l̦õmn̦ak wõt kõn men ko ewõr ippãd im men ko me jejel̦ã bwe ewõr ad maroñ ñan naaj lukkuun bũki ilo iien ko im̦aan.

6. Waanjoñak ta eo jenaaj etale kiiõ, im ta eo jenaaj katak jãne?

⁶ Jemaroñ ke lukkuun m̦õn̦õn̦õ kõn men ko me ewõr ippãd kadede? Elõñ armej rej l̦õmn̦ak bwe ejjab maroñ ãindein kõnke kõj armej em̦m̦an ippãd ñan katak kilen kõm̦m̦ani men ko rekããl. Bõtab ilo m̦ool, men in ej juon men me emaroñ wal̦o̦k. Jemaroñ lukkuun m̦õn̦õn̦õ kõn men ko me mejãd ej loi. Ewi wãween ad maroñ kõm̦m̦ane men in? Bwe jen jel̦ã, jen etale waanjoñak eo an Jesus kõn tal̦õn ko ilo Matu 25:14-30. Jenaaj lale ta eo jemaroñ katak kõn wãween ad maroñ lo lañlõñ im bareinwõt kal̦apl̦o̦k ad lañlõñ ilo jeraam̦m̦an ko me ewõr ippãd.

7. Kwal̦o̦k ilo tukadu waanjoñak eo an Jesus kõn tal̦õn ko.

⁷ Ilo waanjoñak eo, juon em̦m̦aan ear pojakin etal ilo juon tũreep. M̦okta jãn an etal, ej kũrtok ri-karejar ro an im ej lel̦o̦k ñan er kajjojo tal̦õn ko ñan aer kõm̦m̦an peejnej kaki. * Ilo an l̦õmn̦ak kõn joñan maroñ ko ewõr ippãer kajjojo, em̦m̦aan eo ear lel̦o̦k ñan juon iaan ri-karejar ro an l̦alem tal̦õn, ñan ri-karejar eo juon ruo tal̦õn, im ñan ri-karejar eo tok juon, juon tal̦õn. Ri-karejar ro ruo rar tiljek ilo aer lali men ko m̦weien irooj eo aer. Ak ri-karejar  eo ãliktata ear jab kõm̦m̦an jabdewõt kõn jããn eo kar lel̦o̦k ñane, im kõn men in irooj eo an ear jol̦o̦k an ri-karejar eo jerbal ñane.

8. Etke ri-karejar eo jinoin emaroñ kar lukkuun lañlõñ?

⁸ Ri-karejar eo jinoin emaroñ kar lukkuun lañlõñ bwe irooj eo an ear lel̦o̦k l̦alem tal̦õn ñane. Ear lukkuun l̦ap joñan jããn in, im men in ear kaalikkar joñan an irooj eo an lukkuun lõke e! Ak ta kõn ri-karejar eo kein karuo? Bõlen emaroñ nãj kar ebbweer kõnke ear jab bõk ejja joñan tal̦õn eo me ri-karejar eo jinoin ear bõke. Bõtab ewi wãween an kar em̦m̦akũt?

9. Ta eo Jesus ear jab ba kõn ri-karejar eo kein karuo? (Matu 25:22, 23)

⁹ Riit Matu 25:22, 23. Jesus ear jab ba bwe ri-karejar eo kein karuo ear oktak im illu kõnke ear bõk ruo wõt tal̦õn. Bareinwõt, Jesus ear jab ba bwe ri-karejar in ear ellotaan im ba: ‘M̦ool ke bwe joñan eo dein ij bõke, ke ebar l̦ap aõ kate eõ jerbal ãinwõt ri-karejar eo me ear bõk l̦alem tal̦õn? Ñe irooj e aõ ejjab kwal̦o̦k an kam̦m̦oolol kõn jerbal kã aõ, innem em̦m̦an bwe in kalibwini tal̦õn kein ruo im make jerbal ñan ña make.’

10. Ta eo ri-karejar eo kein karuo ear kõm̦m̦ane kõn tal̦õn ko an?

¹⁰ Ãinwõt ri-karejar eo kein kajuon, ri-karejar eo kein karuo ear kile joñan an aorõk jerbal eo kar lel̦o̦k ñane, kõn men in ear lukkuun kate ñan jerbal ñan irooj eo an. Tokjãn men in, ear kõm̦m̦an bwe en ruo alen an lõñl̦o̦k joñan tal̦õn ko an irooj eo an. Kar lukkuun kõjeraam̦m̦ane ri-karejar in kõn an kijejeto im kapeel. Irooj eo an ear jab baj m̦õn̦õn̦õ wõt ak ear bar kile bwe ekkar ñan an ri-karejar eo bõk elõñl̦o̦k jerbal!

11. Ewi wãween ad maroñ kal̦apl̦o̦k ad lañlõñ?

 ¹¹ Ejja ãindeinl̦o̦k wõt, jemaroñ kal̦apl̦o̦k ad lañlõñ ilo ad lukkuun kate kõj kõn jerbal ko em̦õj litok ilo jerbal eo an Jeova. En “l̦apl̦o̦k wõt” ad kwal̦o̦k naan, im jen lukkuun bõk kun̦aad ilo m̦akũtkũt ko an eklejia. (Jrb. 18:5; Hib. 10:24, 25) Kõppojakl̦o̦k im̦aan ñan kweilo̦k ko bwe kwõn maroñ kwal̦o̦k uwaak ko rekõketak. Watõk bwe men ko kun̦aam̦ ilo kweilo̦k eo ilo lukwõl̦pãn wiik relukkuun aorõk. El̦aññe kar kajjitõk ippam̦ ñan jipañ kõn juon jerbal ilo eklejia eo, kwõn m̦õkaj ñan iien im kwal̦o̦k am̦ juon eo me remaroñ lõke. Jab l̦õmn̦ak bwe men ko kun̦aam̦ kar liwaj edik tokjãer im reko̦kkure iien ko am̦. Kate eok ñan kal̦apl̦o̦k kapeel ko am̦. (JK. 22:29, UBS) Ñe jenãj lukkuun kate kõj ilo m̦akũtkũt ko an doulul in im men ko kun̦aad, enaaj m̦õkajl̦o̦k ad kõm̦m̦an wõnm̦aanl̦o̦k im l̦apl̦o̦k ad lañlõñ. (Gal. 6:4) Kwõnaaj bareinwõt lo bwe enaaj pidodol̦o̦k am̦ lañlõñ ñe ro jet rej bõk jeraam̦m̦an eo me kwaar kõn̦aan bõke.​—Rom 12:15; Gal. 5:26.

12. Ta buñtõn ne ko me ruo jeid im jatid rar kõm̦m̦ani ñan kal̦apl̦o̦k aer lañlõñ?

¹² Keememej Melissa, eo jeid im jatid me ear kwal̦o̦k an kõn̦aan jerbal ilo Betel̦ ak pãd ilo Jikuul̦ eo ñan Ri-Kwal̦o̦k Naan ro an Aelõñ Eo? Mekarta ñe ejjab maroñ kõm̦m̦ani men ko ear kõn̦aan kõm̦m̦ani, ak ej ba: “Ij kate eõ bwe in lukkuun bõk kun̦aõ ilo aõ jerbalin bainier im kõm̦m̦ani aolep wãween ko ñan kõm̦m̦ane jerbal in. Men in ear bõktok el̦ap lañlõñ ñan ña.” Im ewi wãween an kar Nick kijenmej jãn an ebbweer ke rar jab jitõñe bwe en juon rijjipañ ilo eklejia eo? Ej ba, “Iar poub wõt ilo jeraam̦m̦an ko me rar pel̦l̦o̦k ñan ña—ãinwõt bõk kun̦aõ ilo jerbalin kwal̦o̦k naan im kwal̦o̦k uwaak ko rekõketak ilo iien kweilo̦k ko. Iar bareinwõt kane ñan jerbal ilo Betel̦ im iar maroñ etal ilo iiõ eo tok juon.”

13. Ta tokjãn el̦aññe kwõnaaj kate eok ilo am̦ kõm̦m̦ane jerbal eo am̦ kiiõ? (Ekklisiastis 2:24)

¹³ Ñe kwõnaaj lukkuun kate eok ilo jerbal eo am̦ kiiõ, kwõnaaj ke bõk eddo ko jet ilo ilju im jekl̦aj? Men in emaroñ wal̦o̦k, ãinwõt an kar wal̦o̦k ñan Nick. Bõtab ñe ejjab, ãinwõt Melissa, kwõmaroñ lo an l̦apl̦o̦k wõt am̦ lañlõñ, im kwõnaaj eñjake an jubũruom̦ im bwe ear l̦ap tõprak ko kwaar kõm̦m̦ani. (Riit Ekklisiastis 2:24.) Bareinwõt, kwõnaaj lo am̦ lañlõñ ilo am̦ jel̦ã bwe am̦ kate eok ej kabuñbũruon Irooj eo ad, Jesus Christ.

14. Ikijjeen mejãnkajjik ko ad ilo jerbal eo ad ñan Jeova, ta eo jej aikuj keememeje?

¹⁴ Kõnke jej poub ilo jerbal ko ad kiiõ, ej ke mel̦el̦ein bwe jej aikuj bõjrak jãn ad pukot wãween ko jet ñan kal̦apl̦o̦k ad jerbal ñan Jeova? Ejjab ñan jidik! Jemaroñ im jej aikuj kõm̦m̦an mejãnkajjik ko me renaaj jipañ kõj bwe en em̦m̦anl̦o̦k ad kwal̦o̦k naan im katakin im ñan jipañ ro jeid im jatid. Jenaaj tõpar mejãnkajjik kein ñe jej kwal̦o̦k mãlõtlõt im ettã bõro ilo ad l̦õmn̦ak in jipañ ro jet ijello̦kun ad l̦õmn̦ak wõt kõn kõj make.​—JK. 11:2; Jrb. 20:35.

15. Ta jet iaan mejãnkajjik ko me renaaj kal̦apl̦o̦k am̦ lañlõñ?

¹⁵ Ta mejãnkajjik ko kwõmaroñ kõttõpari? Kajjitõk ippãn Jeova bwe en jipañ eok ñan jel̦ã ta eo kwõmaroñ kajejjete im katõprake. (JK. 16:3, UBS; Jem. 1:5) Kwõmaroñ ke kajjioñ tõpari mejãnkajjik ko me kar kwal̦o̦ki ilo  jinoin katak in—ãinwõt erom juon akjel̦õri ak rekũl̦ar bainier, jerbal ilo Betel̦, ak bõk kun̦aam ilo jerbalin ekkal ko an doulul in? Ak bõlen kwõmaroñ katak bar juon kajin ekããl bwe kwõn maroñ kajeeded ennaan eo em̦m̦an ak ñan bar kwal̦o̦k naan ilo bar juon jikin. Kwõmaroñ kal̦apl̦o̦k am̦ jel̦a kõn jet iaan mejãnkajjik kein ilo am̦ etale jebta 10 ilo bok eo etan Organized to  Do Jehovah’s Will im ilo am̦ kõnnaan ippãn em̦m̦aan ro rej lale eklejia. * Ilo am̦ kate eok im tõpari mejãnkajjik kein, ro jet renaaj lo am̦ kõm̦m̦an wõnm̦aanl̦o̦k im enaaj l̦apl̦o̦k am̦ lañlõñ.

16. Ilo tõre in me kwõjjab maroñ tõpar juon iaan mejãnkajjik ko am̦, ta eo kwõmaroñ kõm̦m̦ane?

¹⁶ Bõtab ta el̦aññe ilo tõre in kwõjjab maroñ tõpare juon iaan mejãnkajjik kein kar kwal̦o̦k kaki m̦oktal̦o̦k? Men eo eaorõk ej ñan bar pukot juon am̦ mejãnkajjik, im en juon mejãnkajjik me kwõmaroñ tõpare. L̦õmn̦ak kõn jet iaan wãween kein.

17. Ekkar ñan 1 Timote 4:13, 15, ta ko juon jeid im jatid likao ak em̦m̦aan emaroñ kõm̦m̦ane bwe en em̦m̦an wãween an katakin?

¹⁷ Riit 1 Timote 4:13, 15. El̦aññe kwõj juon likao ak em̦m̦aan me em̦õj an peptaij, kwõmaroñ kate eok ñan kakõm̦anm̦anl̦o̦k wãween am̦ kõnono im katakin. Etke? Kõnke ñe kwõnaaj “lel̦o̦k aolepen am̦” ilo am̦ riit, kõnono, im katakin, men in enaaj juon jeraam̦m̦an ñan ro rej roñjake eok. Kajjioñ kõm̦m̦an juon am̦ mejãnkajjik ñan katak im jerbale kajjojo iaan kõl ko ilo bok eo etan Kate Eok ñan Kal̦apl̦o̦k Am̦ Jel̦ã Kilen Riit im Katakin. Katak kõn kõl kein juon ilo̦k juon, lukkuun kõmmãlmeli ilo m̦weo im̦õm̦, innem kate eok ñan jerbali ilo iien ko kwõj kõm̦m̦an am̦ katak ijo im̦aan. Kajjitõk jipañ kõn wãween ko jet kwõmaroñ kõm̦m̦ani jãn auxiliary counselor eo ak em̦m̦aan ro jet me rej lale eklejia me “el̦ap aer kate er ilo kõnono im katakin.” * (1 Tim. 5:17) Jab l̦õmn̦ak wõt kõn wãween am̦ maroñ jerbale kõl eo ak bareinwõt l̦õmn̦ak kõn wãween am̦ maroñ jipañ kõkajoor tõmak eo an ro rej roñjake eok  ak wãween am̦ maroñ rõjañ er bwe ren jerbale men ko rej katak kaki. Ilo am̦ ãindein, kwõnaaj kal̦apl̦o̦k am̦ lañlõñ kab ro rej roñjake eok.

18. Ta eo emaroñ jipañ kõj ñan tõpar mejãnkajjik ko ad ilo jerbalin kwal̦o̦k naan?

¹⁸ Kõj aolep ewõr ippãd jerbal eo ñan kwal̦o̦k naan im kõm̦m̦an ri-kal̦oor. (Matu 28:19, 20; Rom 10:14) Kokõn̦aan ke kal̦apl̦o̦k am̦ kapeel ilo am̦ kõm̦m̦ane jerbal in elukkuun aorõk? Katak kõn bok eo etan Kate Eok ñan Kal̦apl̦o̦k Am̦ Jel̦ã Kilen Riit im Katakin, innem kõm̦m̦an mejãnkajjik ko me renaaj jipañ eok jerbale men ko kwõj katak kaki. Kwõmaroñ bareinwõt lo naanin jipañ ko jet ilo Jerbal eo Ad im Wãween Ad Mour—Kein Katak im jãn pijain waanjoñak ko kõn kilen bwebwenato ippãn armej me rej kwal̦o̦ki ilo kweilo̦k eo ilo lukwõl̦pãn wiik. Kajjioñ kõm̦m̦an elõñ kain wãween ko ñan lale ewi wõt iaan wãween kein kwõj lo tõprak ie. Ñe kwõnaaj l̦oori naanin jipañ kein, innem kwõnaaj lukkuun eñjake lañlõñ eo ej itõk jãn am̦ juon ri-katakin eo ekapeel.​—2 Tim. 4:5.

19. Ewi wãween kwõmaroñ kal̦apl̦o̦k am̦ kwal̦o̦k kadkad ko kadkadin juon Kũrjin?

¹⁹ Ñe kwõj l̦õmn̦ak kõn mejãnkajjik ko kokõn̦aan kõm̦m̦ani, jab mel̦o̦kl̦o̦k kõn juon iaan men ko raorõktata kwõmaroñ kõm̦m̦ane, ej bwe kwõn kal̦apl̦o̦k am̦ kwal̦o̦k kadkad ko kadkadin juon Kũrjin.(Gal. 5:22, 23; Kol. 3:12; 2 Pit. 1:5-8) Ewi wãween am̦ maroñ kõm̦m̦ane men in? Ñan waanjoñak, bõlen kokõn̦aan kõkajoorl̦o̦k tõmak eo am̦. Kwõmaroñ riiti katak ko ilo bok ko ad me rej kwal̦o̦k kõn wãween ko me kwõmaroñ kõm̦m̦ani ñan kõkajoore tõmak eo am̦. Kwõnaaj bareinwõt lukkuun bõk tokjãn jãn am̦ alwõji waanjoñak ko an ro jeid im jatid ilo JW Broadcasting^® me rar kwal̦o̦k joñak ko rem̦m̦an kõn tõmak ke rar iioon elõñ apañ. Innem l̦õmn̦ak kõn wãween ko kwõmaroñ kõm̦m̦ani ñan anõke tõmak eo aer ilo mour eo am̦.

20. Ewi wãween ad kal̦apl̦o̦k ad lañlõñ im kadikl̦o̦k ad eñjake in ebbweer?

²⁰ Ejjel̦o̦k pere bwe kõj aolep jekõn̦aan bwe en l̦apl̦o̦k men ko jej kõm̦m̦ani ñan Jeova jãn joñan eo me jemaroñ kõm̦m̦ane kiiõ. Ilo lal̦ eo ekããl an Anij, jenaaj maroñ karejar ñane im ejjel̦o̦k jabdewõt men enaaj kapañ kõj. Bõtab ilo tõre in, ilo ad kortokjãn jabdewõt wãween ko repel̦l̦o̦k ñan kõj kiiõ, jemaroñ kal̦apl̦o̦k ad lañlõñ im kadikl̦o̦k jabdewõt eñjake ko rej kabbweer kõj. Im men eo el̦aptata an aorõk, jenaaj bõktok aiboojoj im nõbar ñan Jeova, ad “Anij in m̦õn̦õn̦õ.” (1 Tim. 1:11) Kõn men in, jen lo lañlõñ ilo jeraam̦m̦an ko ewõr ippãd!