1. Ta mãlejjoñ eo Josep ear iioone, im ewi wãween an kar em̦m̦akũt?

 L̦EO nejin Jekob etan Josep, ear jelm̦ae juon mãlejjoñ epen. Juon kõrã ear ba ñane: “Kwõn babu ippa.” Kõrã in ej lio pãleen Potipar, irooj eo an Josep. Josep ear m̦akoko in roñjake men eo liin ear ba. Rainin, juon emaroñ l̦õmn̦ak im ba, ‘Etke Josep ear jum̦ae menin kapo in?’ Potipar ear jako ilo tõre in. Im Josep ear juon ri-kõm̦akoko ilo m̦weo; liin emaroñ kar kõm̦m̦an bwe en lukkuun nana im pen wãween an Josep mour ñe enaaj m̦akoko in roñjake men eo ej ba. Meñe ãindein, ak Josep ear wõnm̦aanl̦o̦k wõt im kõjekdo̦o̦n an liin l̦akkar kate im akwel̦ap. Etke? Ej ba: “Ekõjkan aõ maroñ kõm̦m̦an nana in el̦ap, im jerawiwi ñan Anij?”​—Jen. 39:7-12.

2. Ewi wãween an kar Josep jel̦ã bwe lejãn ear juon jerawiwi n̦ae Anij?

² Ewi wãween an kar Josep jel̦ã bwe Anij eo an enaaj watõk lejãn bwe ej juon men el̦ap an nana? Ri-Israel ro rej kab nãj bõk Kien ko an Moses me ekitibuj kien in, “kwõn jab lejãn,” enañin 200 iiõ ko tokãlik. (Ex. 20:14, UBS) Meñe ãindein, ak ear bwe joñan jel̦ã eo ippãn Josep ñan jel̦ã wãween an Jeova eñjake kõn kõm̦m̦an ko rettoon. Ñan waanjoñak, ejjel̦o̦k pere bwe Josep ear jel̦ã bwe Jeova ear karõk bwe mourin m̦are en ikõtaan juon em̦m̦aan im juon kõrã. Im emaroñ kar roñ kõn wãween an kar Jeova em̦m̦akũt ilo iien ko ruo ear kõjparok lel̦l̦ap eo jibwin jemãn etan Sera bwe en maroñ tiljek wõt ñan l̦eo ippãn. Ãindein an kar Anij bar em̦m̦akũt ñan kõjparok kõrã eo pãleen Aisak, Rebeka. (Jen. 2:24; 12:14-20; 20:2-7; 26:6-11) Ilo an kar Josep kõl̦mãnl̦o̦kjen̦ kõn wãween kein rar wal̦o̦k, ear maroñ jel̦ã ta eo ejim̦we im ta eo ebõd im̦aan mejãn Anij. Im kõnke Josep ear yokwe Anij eo an, ear bareinwõt yokwe kien ko an Jeova kõn ta ko rejim̦we, im ear jek ilo bũruon ñan l̦oor kien kein.

3. Ta ko jenaaj kõnono kaki ilo katak in?

³ Kwõj ke yokwe wãnõk? Ejjel̦o̦k pere bwe kwõj. Meñe ãindein,  ak kõj aolep jejjab weeppãn, im el̦aññe jejjab kõjparok, emaroñ pidodo an l̦õmn̦ak ko an lal̦ in jelõt l̦õmn̦ak ko ad kõn ta ko rejim̦we ak rewãnõk. (Ais. 5:20; Rom 12:2) Kõn men in, jenaaj etale ta in wãnõk im wãween jemaroñ bõk tokjãn ñe jenaaj yokwe wãnõk. Innem jenaaj kõnono kõn jilu buñtõn ne ko jemaroñ bũki ñan jipañ kõj kõkajoorl̦o̦k ad yokwe kakien ko an Jeova.

4. Ta l̦õmn̦ak ko rebõd me elõñ armej rej bũki kõn mel̦el̦ein wãnõk?

⁴ Ñe armej rej l̦õmn̦ak kõn juon eo ewãnõk, elõñ remaroñ l̦õmn̦ak kõn juon eo me eutiej bũruon kõn e make, ekajoor ekajete ro jet, ak el̦ap an kõwãnõk e make. Bõtab Anij ediki aolep kadkad kein. Ke Jesus ear pãd ilo lal̦ in, ear kwal̦o̦k an lukkuun kõnanaik ri-tõl ro an kabuñ ko ilo tõre ko an kõn aer make kõm̦m̦an aer kakien kõn ta ko rejim̦we ak rewãnõk. (Ekl. 7:16; Luk 16:15) Juon eo ej m̦oolin wãnõk eban kõwãnõk e make ñan jidik.

5. Ekkar ñan Baibõl̦ eo, ta in wãnõk? Kwal̦o̦k juon waanjoñak.

⁵ Wãnõk ej juon kadkad elukkuun aiboojoj. Ilo tupidodo in, ej mel̦el̦ein kõm̦m̦ane men eo ejim̦we im̦aan mejãn Jeova Anij. Ilo Baibõl̦ eo, naan eo “wãnõk” ej kaalikkar l̦õmn̦ak eo kõn mour ekkar ñan kakien ko reutiejtata—kakien ko an Jeova. Ñan waanjoñak, Jeova ej kakien bwe ro rej jerbalin peejnej, rej aikuj kõjerbal kein bo̦un ak “joñak ko rem̦ool.” (Dut. 25:15, UBS) Naanin Hibru eo me kar ukote naan in “rem̦ool” jãne, emaroñ bar mel̦el̦ein “wãnõk” ñe rej ukote. Kõn men in, juon Kũrjin me ekõn̦aan bwe en wãnõk im̦aan mejãn Anij enaaj m̦ool ilo aolep men ilo an peejnej. Juon eo ewãnõk ej bar yokwe ekajet jim̦we—edike ñe ejjab jim̦we an ro jet kõm̦m̦an ñan bar juon. Bwe juon eo em̦ool an wãnõk en “maroñ lukkuun kabuñbũruon [Jeova],” ej aikuj l̦õmn̦ak kõn wãween an Jeova naaj watõk pepe ko ej kõm̦m̦ani.​—Kol. 1:10.

6. Etke jemaroñ lõke kakien ko an Jeova kõn ta eo ejim̦we im ta eo ebõd? (Aiseia 55:8, 9)

⁶ Baibõl̦ eo ej kwal̦o̦k bwe Jeova ej Wũnjãn wãnõk. Eñin unin Baibõl̦ ej n̦aetan Jeova “jikin jokwe ewãnõk.” (Jrm. 50:7) Kõnke Jeova ej ri-Kõm̦anm̦an eo, e wõt emaroñ jim̦we an litok kakien ko kõn ta eo ejim̦we im ta eo ebõd. Kõnke Jeova eweeppãn, jel̦ãl̦o̦kjen̦ eo an kõn ta eo ejim̦we im ta eo ebõd elukkuun utiej im l̦ap jãn jel̦ãl̦o̦kjen̦ eo ewõr ippãd me ekkã an jab weeppãn kab jerawiwi jelõte. (JK. 14:12; riit Aiseia 55:8, 9.) Bõtab, kõnke kar kõm̦anm̦an kõj ilo nemãmeen wõt Anij, jemaroñ mour ekkar ñan kakien ko an kõn wãnõk. (Jen. 1:27) Im jelukkuun kõn̦aan kõm̦m̦ane men in. Yokwe eo ad ñan eo Jemãd ilañ ej kõm̦akũt kõj ñan anõke e joñan wõt ad maroñ.​—Eps. 5:1.

7. Etke jej aikuji kakien ko me jemaroñ lukkuun lõki? Kwal̦o̦k juon waanjoñak.

⁷ Jej bõk tokjãn ñe jej pokake kakien ko an Jeova kõn ta eo ejim̦we im ta eo ebõd. Kwõj ke lo etke jemaroñ bõk tokjãn? Baj pijaikl̦o̦k m̦õk ta eo enaaj wal̦o̦k ñe kajjojo pããñ enaaj make kõm̦m̦an an kakien kõn joñan aorõkin kobban juon jããn ak ñe juon kom̦bani in ekkal enaaj make l̦oor kakien ko aer make kõn joñjoñ in juon men. Enãj lukkuun l̦ap pok. Im ñe ro rej bõk jerbalin taktõ ak nõõj rej likjab in l̦oor wãween ko kõn kilen taktõiki ri-nañinmej ro, jet ri-nañinmej remaroñ mej. Elukkuun alikkar bwe kakien ko me jemaroñ lõki rej menin kõjparok. Ejja ãindeinl̦o̦k wõt kakien ko an Anij kõn ta eo ejim̦we im ta eo ebõd, men kein rej kõjparok kõj.

8. Ta jeraam̦m̦an ko repãd im̦aan ñan ro rej m̦õn̦õn̦õ in kõm̦m̦ani men ko rejim̦we?

⁸ Jeova ej kõjeraam̦m̦an ro rej kate er ñan  mour ekkar ñan kakien ko an. Ej kallim̦ur im ba: “Ri-wãnõk renaaj amn̦ak ilo ãneo im enaaj ãneer ñan indeeo.” (Sam 37:29, UBS) Baj pijaikl̦o̦k m̦õk joñan an naaj armej ro bõrokuk, aenõm̦m̦an, im m̦õn̦õn̦õ ñe aolep renaaj l̦oor kakien ko an Jeova! Jeova ekõn̦aan bwe kwõn m̦õn̦õn̦õ kõn kain mour rot in. Im ejjel̦o̦k pere bwe kõj kajjojo ewõr un ko rem̦m̦an unin ad yokwe wãnõk! Ewi wãween jemaroñ kõkajoorl̦o̦k ad yokwe kadkad in? Jen lale jilu buñtõn ne ko jemaroñ bũki.

9. Ta eo enaaj jipañ kõj ñan yokwe wãnõk?

⁹ Buñtõn ne 1: Yokwe Eo me ear kõm̦m̦ani kakien ko. Bwe jen maroñ yokwe wãnõk, jej aikuj kaddekl̦o̦k yokwe eo ad ñan Eo me ear litok kakien ko kõn ta eo ejim̦we im ta eo ebõd. Ñe el̦apl̦o̦k ad yokwe Jeova, enaaj l̦apl̦o̦k ad kõn̦aan mour ekkar ñan kien ko an rewãnõk. Ñan kõm̦m̦an waanjoñak kõn men in: Ñe Adam im Iv ren kar yokwe Jeova, reban kar rupe kien eo ejim̦we an Jeova.​—Jen. 3:1-6, 16-19.

10. Ta eo ear jipañ Ebream bwe en l̦apl̦o̦k an mel̦el̦e kõn Jeova?

¹⁰ Jejjab kõn̦aan bwe jen kõm̦m̦ane ejja likjab eo wõt Adam im Iv rar kõm̦m̦ane. Jemaroñ kõjparok bwe en jab wal̦o̦k men in ñan kõj el̦aññe jenaaj wõnm̦aanl̦o̦k wõt im katak kõn Jeova, kwal̦o̦k ad kam̦m̦oolol kõn kadkad ko kadkadin, im kajjioñ mel̦el̦e kõn wãween an l̦õmn̦ak. Ilo ad kõm̦m̦ane men in, enaaj eddekl̦o̦k yokwe eo ad ñan Jeova. L̦õmn̦ak kõn Ebream. Ear juon eo ear lukkuun yokwe Jeova. Meñe ilo iien ko me ear pen an mel̦el̦e kõn pepe ko an Jeova, ak ear jab jum̦ae. Ijello̦kun an ãindein, ear kajjioñ kal̦apl̦o̦k an jel̦ã kajjien Jeova. Ñan waanjoñak, ke ear jel̦ã kõn pepe eo an Jeova ñan ko̦kkure Sodom im Gomorra, ilo jinoin ear mijak ñe “Eo ej Irooj in ekajet ñan aolepen lal̦” enaaj ko̦kkure aolep ro ri-wãnõk ippãn ro renana. Ippãn Ebream, ear juon men epen an pijaikl̦o̦k an wal̦o̦k, innem ilo ettã, ear kajjitõk elõñ kajjitõk ko ippãn Jeova. Jeova ear meanwõd ilo an uwaaki kajjitõk ko an. Ãliktata Ebream ear kile bwe Jeova ej etale bũruon kajjojo armej im bwe Jeova ejjãmin kauweik ro ejjel̦o̦k rueer ippãn ro ewõr rueer.​—Jen. 18:20-32.

11. Ewi wãween an kar Ebream kwal̦o̦k an yokwe im lõke Jeova?

¹¹ Ilo an kar Ebream kõnono ippãn Jeova kõn Sodom im Gomorra, men in ear lukkuun jelõte. Ejjel̦o̦k pere bwe men in ear kõm̦m̦an bwe en lukkuun l̦apl̦o̦k wõt an Ebream yokwe im kautiej eo Jemãn ilañ jãn kar m̦okta. Ilo iiõ ko tokãlik, Ebream ear iioon juon wãween me ear mãlejjoñe lõke eo an ñan Jeova. Jeova ear kajjitõk ippãn bwe en katok kõn l̦adik eo nejin me ejitõnbõro, Aisak. Bõtab ilo tõre in, em̦õj an l̦apl̦o̦k im em̦m̦anl̦o̦k an Ebream jel̦ã kajjien Anij eo an, im ear ejjel̦o̦k an kajjitõk ñan E. Ebream ear kajju kõppojak ñan an itõn kõm̦m̦ane men eo Jeova ear kajjitõk bwe en kõm̦m̦ane. Meñe ãindein, ak baj pijaikl̦o̦k m̦õk joñan an kar eddodo im metak bũruon ke ej kõppopo ñan kõm̦m̦ane men in kar kajjitõk bwe en kõm̦m̦ane! Ebream emaroñ kar lukkuun kõl̦mãnl̦o̦kjen̦ kõn ta ko ear katak kõn Jeova. Ear jel̦ã bwe Jeova eban kõm̦m̦an jabdewõt men me ejjab jim̦we ak ejjel̦o̦k yokwe ie. Ekkar ñan rijjilõk Paul, Ebream ear kõl̦mãnl̦o̦kjen̦ im jel̦ã bwe Jeova enaaj kõjerkakpejeik l̦adik eo nejin ejitõnbõro, Aisak. (Hib. 11:17-19) Im ilo m̦ool, em̦õj an kar Jeova kallim̦ur bwe Aisak enaaj jemãn juon aelõñ, im ilo kar tõre in, ejjañin kar wõr nejin Aisak. Ebream ear yokwe Jeova, innem ear lõke bwe eo Jemãn ilañ enaaj em̦m̦akũt ilo wãween eo ewãnõk.  Kõn tõmak, ear pokake meñe ear pen.​—Jen. 22:1-12.

12. Ewi wãween jemaroñ anõke joñak eo an Ebream? (Sam 73:28)

¹² Ewi wãween jemaroñ anõke joñak eo an Ebream? Ãinwõt Ebream, jej aikuj wõnm̦aanl̦o̦k wõt im katak kõn Jeova. Ilo ad kõm̦m̦ane men in, jenaaj epaakel̦o̦k Jeova im enaaj l̦apl̦o̦k wõt ad yokwe E. (Riit Sam 73:28.) Bareinwõt, bõklõkõt eo ad enãj bõk kamminene ñan l̦oor wãween an Jeova l̦õmn̦ak. (Hib. 5:14) Tokjãn men in, ñe juon enaaj kajjioñ kapoik kõj ñan kõm̦m̦ane juon men ebõd, jenaaj jum̦aik menin kapo eo. Jenaaj lukkuun dike l̦õmn̦ak eo ñan kõm̦m̦ane jabdewõt men me enaaj kõmetak eo Jemãd ilañ im ko̦kkure kõtaan eo ad ippãn. Ak kiiõ, bar ta ko jet jemaroñ kõm̦m̦ani ñan kwal̦o̦k bwe jej yokwe wãnõk?

13. Ewi wãween jemaroñ l̦oore ak jibadek wãnõk? (Jabõn Kõnnaan 15:9)

¹³ Buñtõn ne 2: Kate eok ñan kal̦apl̦o̦k am̦ yokwe wãnõk kajjojo raan. Ñe jekõn̦aan bwe en kajoorl̦o̦k m̦ajel̦ ko ad, jej aikuj kate kõj ñan ekjerjaij aolep raan. Ejja ãindeinl̦o̦k wõt, jej aikuj bar lukkuun kate kõj ñan kal̦apl̦o̦k ad yokwe kakien ko an Jeova. Men in ej juon men me jemaroñ kõm̦m̦ane kajjojo raan. Jeova ej juon eo ejel̦ã l̦õmn̦ak kõn maroñ ko ad, ejjab kõtmãne bwe jen kõm̦m̦ane juon men el̦apl̦o̦k jãn joñan eo jemaroñe. (Sam 103:14) Ej lukkuun kaalikkar ñan kõj bwe “ej yokwe eo ej l̦oore menin wãnõk.” (Riit Jabõn Kõnnaan 15:9.) Ñe jej l̦oore ak jibadek juon mejãnkajjik ilo ad jerbal ñan Jeova, jej wõnm̦aanl̦o̦k wõt im kate kõj ñan tõpare mejãnkajjik eo. Ejja ãindeinl̦o̦k wõt ñe jej kajjioñ l̦oor ak jibadek wãnõk. Ñe jej kõm̦m̦ane men in, Jeova enaaj kwal̦o̦k wõt an meanwõd im jipañ kõj bwe en em̦m̦an wõt ad kõm̦m̦an wõnm̦aanl̦o̦k.​—Sam 84:5, 7.

14. Ta ‘penjãn ob in wãnõk eo,’ im etke jej aikuji?

¹⁴ Jeova ej kakeememej kõj ilo yokwe bwe wãnõk ejjab juon men me ej kaddodoik kõj. (1 Jon 5:3) Ej juon menin kõjparok, juon men me jaikuji kajjojo raan. Keememej kein tarin̦ae ko ilo tõmak me rijjilõk Paul ear kwal̦o̦k  kaki. (Eps. 6:14-18) Ewi wõt iaaer ej kõjparok menono eo an juon rũttarin̦ae? Ej ‘penjãn ob in wãnõk eo’ me ej jutak kõn kakien ko rewãnõk an Jeova. Ãinwõt an juon penjãn ob kõjparok menono eo an juon rũttarin̦ae, ãindein an kakien ko rewãnõk an Jeova kõjparok bõro eo ilo kõkkar, ak armej eo itulowa. Kõn men in, jen lukkuun lale bwe en pãd penjãn ob in wãnõk eo ilo aolep kein tarin̦ae ko ilo tõmak me jej kõn̦aki!—JK. 4:23.

15. Ewi wãween kwõmaroñ kõn̦ak penjãn ob in wãnõk eo?

¹⁵ Ewi wãween kwõmaroñ kõn̦ak penjãn ob in wãnõk eo? Kwõmaroñ kõm̦m̦ane men in ilo am̦ l̦õmn̦ak kõn ta ko Anij ekõn̦aan bwe kwõn kõm̦m̦ani ñe kwõj kõm̦m̦ani pepe ko am̦ kajjojo raan. Ñe kwõj kajjioñ kõm̦m̦an am̦ pepe kõn ta ko kwõnãj kõnono kaki, al rot ko kwõnaaj roñjaki, pija ko kwõnãj alwõji, ak bok ta ko kwõnãj riit, m̦okta kwõn kajjitõk ippam̦ make: ‘Ta ko inãj kadel̦o̦ñtok ak kanne bũruõ kaki? Men in ej ke juon men em̦m̦an ekkar ñan l̦õmn̦ak eo an Jeova? Ak ej ke juon men me ej kowõnm̦aanl̦o̦k mour ettoon, lãj, kũbbon̦, im utiej bõro—men ko me Jeova ej watõki bwe rejjab menin wãnõk?’ (Pil. 4:8) Ñe pepe ko kwõj kõm̦m̦ani rej ekkar ñan ankilaan Jeova, innem kwõj kõtl̦o̦k bwe kakien ko an rewãnõk ren kõjparok bũruom̦.

16-17. Ewi wãween an Aiseia 48:18 kaalikkar ñan kõj bwe jemaroñ mour ekkar ñan kakien ko an Jeova ñan indeeo?

¹⁶ Kwõnañin ke kar l̦õmn̦ak im inepata el̦aññe kwõmaroñ wõnm̦aanl̦o̦k wõt im mour ekkar ñan kakien ko an Jeova kajjojo raan im kajjojo iiõ? L̦õmn̦ak kõn juon waanjoñak me Jeova ej kõjerbale ilo Aiseia 48:18. (Riit.) Jeova ej kallim̦ur bwe wãnõk eo ad emaroñ “ãinwõt n̦o ko in lo̦meto.” Pijaikl̦o̦k m̦õk am̦ jutak iparijet im kwõj alwõje an n̦o ko tõbtõb ãnetak im ejjel̦o̦k jem̦l̦o̦kin. Ilo am̦ alwõje n̦o kein, kwõnaaj ke kar inepata bwe juon raan enãj kajju jem̦l̦o̦k an wal̦o̦k n̦o kein? Jaab, kwoban kar! Kwõjel̦ã bwe ium̦win elõñ to̦ujin iiõ ko in an n̦o ko buñ im wõnãnetak, im eban bõjrak aer wal̦o̦k.

¹⁷ Am̦ wãnõk emaroñ ãinwõt n̦o ko ilo lo̦meto! Ewi wãween? Ñe ewõr juon pepe kwõj aikuj kõm̦m̦ane, m̦okta kwõn l̦õmn̦ak kõn ta eo Jeova enãj kar kõn̦aan bwe kwõn kõm̦m̦ane. Innem kõm̦m̦ane men eo me ekõn̦aan. Jekdo̦o̦n ewi joñan an maroñ pen pepe eo kwõj itõn kõm̦m̦ane, ak eo Jem̦am̦ ilañ me el̦ap an yokwe enaaj aolep iien pojakin jipañ eok ñan wõnm̦aanl̦o̦k wõt im mour ekkar ñan kakien ko An rewãnõk kajjojo raan in am̦ mour.​—Ais. 40:29-31.

18. Etke jej aikuj kõjparok ñan jab ekajete ro jet ekkar ñan l̦õmn̦ak ko ad make?

¹⁸ Buñtõn ne 3: Kõtl̦o̦k bwe Jeova eo en ekajet. Meñe jej kate kõj ñan mour ekkar ñan kakien ko rewãnõk an Jeova, ak jej aikuj kõjparok ñan jab ekajete ro jet im kõwãnõk kõj make. Ijello̦kun ad reilal̦l̦o̦k ñan ro jet im ãinwõt ñe ewõr ippãd jim̦we eo ñan ekajete er ekkar ñan l̦õmn̦ak ko ad, jej keememej bwe Jeova eo ej “Irooj in ekajet ñan aolepen lal̦.” (Jen. 18:25) Jeova ejjañin kar letok ñan kõj maroñ eo ñan ekajet. Im ilo m̦ool, Jesus ear letok naanin jiroñ in: “Kom̦win bõjrak jãn ami ekajete ro jet bwe Anij en jab ekajete kom̦.”—Matu 7:1. *

19. Ewi wãween an kar Josep kwal̦o̦k bwe ear lõke an Jeova ekajet?

¹⁹ Jen bar l̦õmn̦ak kõn joñak eo an em̦m̦aan eo ewãnõk Josep. Ear kõjparok bwe en jab  ekajete ro jet, meñe ro me ear nana aer kõm̦m̦an ñane. L̦õm̦aro jein rar ko̦kkure, wiakake bwe en ri-kõm̦akoko, im kõm̦m̦an bwe jemãer en tõmak bwe Josep emej. Elõñ iiõ tokãlik, Josep ear bar iioon baam̦le eo an. Kiiõ ke ear juon eo eutiej im kajoor ilo aelõñ eo ej pãd ie, Josep emaroñ kar ekajete l̦õm̦aro jein ilo lãj im ukotl̦o̦k nana eo rar kõm̦m̦ane ñane. L̦õm̦aro jein Josep rar mijak ñe enaaj kõm̦m̦an ekkar ñan aer kar kõm̦m̦an ñane, meñe rar lukkuun ukel̦o̦k im nana aer mour kõn men eo rar kõm̦m̦ane. Ijoke Josep ear kaenõm̦m̦an er im ba: “Kom̦win jab mijak, bwe ña ilo jikin Anij ke?” (Gen. 37:18-20, 27, 28, 31-35; 50:15-21) Ilo ettã, Josep ear kõtl̦o̦k wõt bwe Jeova eo en ekajet.

20-21. Ewi wãween jemaroñ kõjparok bwe jen jab juon eo me ej kõwãnõk e make?

²⁰ Ãinwõt Josep, jej kõtl̦o̦k wõt bwe Jeova eo en ekajet. Ñan waanjoñak, jeban bõk l̦õmn̦ak eo bwe jejel̦ã un ko unin an ro jeid im jatid kõm̦m̦ane juon men me rej kõm̦m̦ane. Jejjab maroñ riiti kobban bũruon armej; Jeova wõt ‘ej lale [ak, etale] l̦õmn̦ak ko ilo bũruod.’ (JK. 16:2, UBS) Ej yokwe aolep armej jãn aolep jikin kab m̦anit im imminene ko me reoktak jãn doon. Im Jeova ej rõjañ kõj ñan “lukkuun kõpel̦l̦o̦k [bũruod].” (2 Kor. 6:13) Jej kate kõj ñan yokwe aolep ro jeid im jatid ilo baam̦le eo ad ilo tõmak, im jab ekajete er.

²¹ Men in ej bar mel̦el̦ein bwe jen jab ekajete ro ilikin eklejia eo. (1 Tim. 2:3, 4) Kwõnãj ke kar ekajete juon nukum̦ me ejjab pãd ilo tõmak eo am̦ im ba, “Armej in elukkuun ban del̦o̦ñtok ilo m̦ool eo”? Jaab, kwoban kar, enãj kar juon men elukkuun nana ak ekwal̦o̦k bwe kwõj kõwãnõk eok make. Jeova ej wõnm̦aanl̦o̦k wõt im kõpel̦l̦o̦k ñan “aolep armej ijoko otemjej” jeraam̦m̦an eo ñan aer ukel̦o̦k. (Jrb. 17:30) Jej aikuj keememej aolep iien bwe kõwãnõk kõj make ej m̦õttan jerbal ko rejjab wãnõk.

22. Etke kwõj kõn̦aan jek ilo bũruom̦ ñan yokwe wãnõk?

²² Yokwe eo ad ñan kakien ko an Jeova kõn wãnõk en kõm̦m̦an bwe en l̦apl̦o̦k lañlõñ im kõm̦akũt ro jet, im jipañ er ñan epaaketok kõj im epaakel̦o̦k Anij eo ad. Im jen jab bõjrak jãn ad “kõn̦aan bwe en wõr wãnõk.” (Matu 5:6) Keememej bwe Jeova ej loe am̦ kate eok im bwe aolep iien ej m̦õn̦õn̦õ kõn am̦ kõm̦m̦an wõnm̦aanl̦o̦k. Ilo an lal̦ in l̦apl̦o̦k wõt an rũm̦l̦o̦k ilo jerbal ko rejjab wãnõk, jen aenõm̦m̦an wõt! Im keememej bwe aolep iien “Jeova ej yokwe ro ri-wãnõk.”—Sam 146:8.