Rijjilõk Paul ear je ñan Kũrjin ro ilo Tessalonika im ba: “El̦aññe jabdewõt ejjab pokake naan ko am ilo lõta in, kom̦win kõkal̦l̦eik armej in.” (2 Tes. 3:14) Ilo m̦okta, jaar ba bwe eñin ej men eo em̦m̦aan ro rej lale eklejia rej kõm̦m̦ane. Ñe juon ej wõnm̦aanl̦o̦k wõt im jab pokake naanin kakapilõk ko ilo Baibõl̦ meñe em̦õj kar lel̦o̦k naanin rõjañ ñane elõñ alen, em̦m̦aan ro rej lale eklejia remaroñ kõm̦m̦ane juon katak ñan kakkõl eklejia eo. Tokãlik, kajjojo iaan ri-kwal̦o̦k naan ro rej bõjrak jãn aer kõm̦m̦ao im iiãio ippãn armej in em̦õj kõkal̦l̦eiki.

Bõtab, kar aikuj kõm̦m̦an oktak ilo mel̦el̦e eo ad kõn eoon in. Kiiõ jemel̦el̦e bwe naan kein an Paul rej jitõñl̦o̦k ñan pepe eo me kajjojo iaan Kũrjin ro rej aikuj kõm̦m̦ane ekkar ñan men eo ej wal̦o̦k. Kõn men in, ejjab menin aikuj ñan an em̦m̦aan ro rej lale eklejia kõm̦m̦ane juon katak ñan kakkõl eklejia eo. Etke eoktak wãween ad mel̦el̦e kõn 2 Tessalonika 3:14? L̦õmn̦ak kõn ta eo Paul ear kõnono kake ke ear ba naan kein.

Paul ear kile bwe jet iaan ro ilo eklejia eo “ejjab jim̦we wãween aer mour.” Ear lel̦o̦k ñan er naanin kauwe ko rej pedped ioon Naanin Anij, ak rar m̦akoko in roñjake. Ilo iien eo l̦o̦k ear lol̦o̦k er, ear jiroñ er im ba: “El̦aññe jabdewõt em̦akoko in jerbal, en jab m̦õñã.” Meñe ear ba men in, ak jet rar m̦akoko wõt in jerbal ñan kabwe aikuj ko aer meñe ear wõr aer maroñ ñan jerbal. Bareinwõt, rar bõk kun̦aaer ilo men ko ejjel̦o̦k aer l̦o̦k ie. En kar ewi wãween an Kũrjin ro kõm̦m̦an ñan rein ejjab jim̦we wãween aer mour?—2 Tes. 3:​6, 10-12.

Paul ear ba: “Kom̦win kõkal̦l̦eik armej in.” Ukokin naan kein ilo kajin Grik ej letok mel̦el̦e eo bwe kwõnãj kile armej rot in im kile bwe emaroñ juon eo ejjab em̦m̦an ñan aetõle. Paul ear lel̦o̦k naanin jiroñ in ñan aolep ro ilo eklejia eo, im jab ñan em̦m̦an ro rej lale eklejia wõt. (2 Tes. 1:1; 3:6) Innem, kajjojo iaan Kũrjin ro me remaroñ kar kile bwe juon iaan ro jein im jatin ear jab pokake naanin kakapilõk ko jãn Naanin Anij, rar kããlõt ñan “jab aetõle” eo ejjab jim̦we wãween an mour.

Men in ear ke mel̦el̦ein bwe kar watõke armej in ãinwõt juon eo em̦õj jol̦o̦ke jãn eklejia eo? Jaab, Paul ear bar ba: “Wõnm̦aanl̦o̦k wõt im kakapilõke ãinwõt juon jeimi im jatimi.” Kõn men in, kajjojo iaan Kũrjin ro rar maroñ aetõl eo em̦õj kõkal̦l̦eiki ilo iien kweilo̦k ko im ilo jerbalin kwal̦o̦k naan, bõtab rar kããlõt in jab aetõle armej in ilo iien iiãio ko ak ilo menin kam̦õn̦õn̦õ ko. Etke? Paul ear ba: “Bwe en oktak im jook.” Ñe jej bõjrak jãn ad aetõle eo jeid im jatid ilo wãween in, emaroñ jook kõn men eo ej kõm̦m̦ane im kõm̦m̦an oktak.—2 Tes. 3:​14, 15.

Ewi wãween an Kũrjin ro ilo raan kein maroñ jerbale naanin jiroñ in? M̦oktata, jekõn̦aan lukkuun lale el̦aññe kõm̦m̦an ko an armej eo ej kaalikkar bwe “ejjab jim̦we wãween [an] mour,” ãinwõt an kar Paul kõnono kake. Ear jab kõnono kõn ro me eoktak bõklõkõt eo aer ak men ko rem̦m̦an ippãer jãn kõj. Im ear jab kõnono kõn ro me rar kõmetak kõj. Ijoke, Paul ear kõnnaan kõn ro me kar lel̦o̦k naanin jiroñ ko ñan er jãn Naanin Anij ak rar kããlõt ñan jab pokake.

Ilo raan kein, el̦aññe jej kile bwe juon iaan ro jeid im jatid ej wõnm̦aanl̦o̦k wõt im jab pokake naanin jiroñ ko jãn Naanin Anij, a jenaaj make kããlõt ñan jab aetõle ilo iien iiãio ko ak ilo menin kam̦õn̦õn̦õ ko. Kõnke men in ej an juon make jokãlõt, jeban kõnnaan kake ippãn ro ilikin baam̦le eo ad me jejjab jokwe ippãer. Ñe enaaj kõm̦m̦an oktak ilo wãween an l̦õmn̦ak im kõm̦m̦an ko an, innem jemaroñ bar aetõle ãinwõt kar m̦okta.