1. Ta jet iaan kajjitõk ko juon jeid im jatid kõrã ejjañin m̦are ej aikuj kajitũkin e make, ñe ej l̦õmn̦ak kõn wõn eo enaaj m̦areiki?

JESUS CHRIST eo im eweeppãn an tõl, ej bõran aolep Kũrjin ro. Bõtab, ãlikin an juon kõrã m̦are, kiiõ ej pãd ium̦win bar eo an l̦eo pãleen, eo im ejjab weeppãn. Im men in emaroñ kõm̦m̦an bwe en jab pidodo. Kõn men in, ñe juon jeid im jatid kõrã ej etale juon eo ej l̦õmn̦ak in m̦areiki, em̦m̦an ñe ej kajjitõk ippãn make: ‘Ta ko rej kwal̦o̦k bwe armej in enaaj juon bõran baam̦le em̦m̦an? An karejar ñan Jeova ej ke men eo eaorõktata ilo mour eo an? El̦aññe jaab, ta eo ej kõm̦m̦an aõ l̦õmn̦ak bwe enaaj em̦m̦an an jipañ kõm̦ro kõjparok kõtaan eo am̦ro ippãn Jeova ãlikin am̦ro m̦are?’ Em̦ool bwe ebar em̦m̦an ñe juon kõrã jeid im jatid ebar kajjitõk ippãn make: ‘Ta kadkad ko ewõr ippa me renaaj jipañ mourin m̦are eo am̦ro? Ij ke juon eo me ejel̦ã kijenmej im em̦õn̦õn̦õ in lel̦o̦k? Ekajoor ke kõtaan eo aõ ippãn Jeova?’ (Ekl. 4:9, 12) Pepe ko juon kõrã ej kããlõti m̦okta jãn an m̦are, remaroñ jelõt joñan m̦õn̦õn̦õ eo enaaj loe ilo mourin m̦are eo an.

2. Ta ko jenaaj etali ilo katak in?

² Elõñ milien Kũrjin kõrã ro jeid im jatid me rej likũt juon joñak elukkuun em̦m̦an ikijjeen aer kõttãik er ñan l̦õm̦aro pãleer. Jej lukkuun nõbar er! Jelukkuun m̦õn̦õn̦õ bwe jej karejar ñan Jeova ippãn kõrã rein retiljek! Ilo katak in, jenaaj etale uwaak ko ñan kajjitõk kein jilu: (1) Ta jet iaan wãween ko reppen kõrã rippãlele ro rej jelm̦aiki? (2) Etke juon kõrã rippãlele ej kããlõt ñan kõttãik e ñan l̦eo pãleen? (3) Ta ko Kũrjin em̦m̦aan rippãlele ro im kõrã rippãlele ro remaroñ katak ikijjeen men in kõttãik, jãn joñak ko an Jesus, Abigeil, im Meri, lio pãleen Josep im jinen Jesus?

3. Etke ejjel̦o̦k juon mourin m̦are eweeppãn?

³ Mourin m̦are ej juon menin letok eweeppãn jãn Anij, bõtab armej ro rejjab weeppãn. (1 Jon 1:8) Eñin unin Naanin Anij ej kakkõl rippãlele ro bwe renaaj iioon wãween ko reppen, me ej kõmel̦el̦eik ãinwõt “eñtaan ko ilo kanniõk.” (1 Kor. 7:28, ftn.) L̦õmn̦ak m̦õk kõn jet wõt iaan wãween ko reppen juon kõrã rippãlele emaroñ jelm̦aiki.

4. Etke juon kõrã rippãlele emaroñ l̦õmn̦ak bwe an kõttãik e ñan l̦eo pãleen, ej kõm̦m̦an menin an dikl̦o̦k an aorõk?

⁴ Bõlen kõn wãween an kar dik im rũttol̦o̦k, juon kõrã rippãlele emaroñ l̦õmn̦ak bwe an kõttãik e ñan l̦eo pãleen, ej kõm̦m̦an menin an dikl̦o̦k an aorõk. Marisol, eo ej jokwe ilo Amedka, ej ba: “Ilo ijo iar dik im rũttol̦o̦k ie, ekkã aer kar jiroñ kõrã ro bwe rej aikuj in jokkun wõt juon ippãn em̦m̦aan ro ilo men otemjej. Ijel̦ã bwe em̦õj an Jeova kõm̦m̦ane laajrak eo kõn bar im bwe ear lel̦o̦k ñan kõrã ro juon jerbal me rej aikuj kwal̦o̦k aer kõttãik er, ijoke ebar ekkar ñan aer bõk kautiej. Bõtab ejjab pidodo ñan bõk l̦õmn̦ak eo ejokkun wõt juon ñe ej itok ñan laajrak eo kõn bar.”

5. Kain l̦õmn̦ak rot ko ewõr ippãn jet ikijjeen kõrã ro, me ejjab pedped ioon Baibõl̦?

⁵ Bõtab, juon kõrã emaroñ pãlele ippãn juon em̦m̦aan me ej l̦õmn̦ak bwe kõrã ro rejjab lukkuun aorõk jãn em̦m̦aan ro. Juon jeid im jatid kõrã etan Ivon, eo ej jokwe ilo South America, ej ba: “Ilo ijo ij jokwe ie, em̦m̦aan ro rej m̦õñã m̦okta, innem kõrã ro tokãlik. Im leddik jiddik ro rej aikuj in kõmat im karreo, ak ñan l̦addik jiddik ro, jineer im ledik ro jeier im jatier rej jerbal ñan er, im kar jiroñ l̦adik rein bwe rej ‘irooj ñan m̦weo.’” Juon jeid im jatid kõrã etan Yingling, eo ej jokwe ilo Asia, ej ba: “Ilo kajin eo aõ, ewõr juon jabõn kõnnaan ej kwal̦o̦k bwe kõrã ro rejjab aikuj mãlõtlõt ak wõr kapeel ko ippãer. Jerbal eo aer ej ñan kõm̦m̦ani aolep jerbal ko ilo m̦weo, im ejjel̦o̦k aer mãlim ñan kwal̦o̦k l̦õmn̦ak ko aer ñan l̦õm̦aro pãleer.” Juon em̦m̦aan rippãlele me ej bõk l̦õmn̦ak rot in me ejjel̦o̦k yokwe ie im ejjab pedped ioon Baibõl̦, ej kõm̦m̦an bwe en kanooj pen ñan kõrã eo pãleen, ej likjab in anõke joñak eo an Jesus, im ejjab kabuñbũruon Jeova.​—Eps. 5:28, 29; 1 Pit. 3:7.

6. Ta ko kõrã rippãlele ro rej aikuj in kõm̦m̦ane bwe ren maroñ kõkajoore jem̦jerã eo aer ippãn Jeova?

⁶ Ãinwõt kar kwal̦o̦k kake ilo katak eo l̦o̦k, Jeova ej kõtmãne bwe Kũrjin em̦m̦aan rippãlele ro ren kabwe aikuj ko an baam̦le eo aer im jipañ er bwe en em̦m̦an kõtaan eo aer ippãn Jeova. (1 Tim. 5:8) Ijoke, ñan kõrã ro jeid im jatid em̦õj aer m̦are, rej aikuj in kõm̦m̦an iien kajjojo raan, meñe repoub, ñan riit Naanin Anij im kõl̦mãnl̦o̦kjen̦ kake im reilo̦k ñan Jeova ilo aer akwel̦ap im jar. Men in emaroñ jab epidodo. Kõrã rippãlele ro repoub, innem remaroñ l̦õmn̦ak bwe ejjel̦o̦k aer iien ak maroñ ñan kõm̦m̦ani men kein, bõtab el̦ap an aorõk bwe ren kõm̦m̦an iien. Etke? Ej kõnke Jeova ekõn̦aan bwe kõj kajjojo jen kal̦apl̦o̦k im dãpij wõt juon ad jem̦jerã ippãn.​—Jrb. 17:27.

7. Ta eo enaaj kõm̦m̦an bwe en pidodol̦o̦k an juon kõrã rippãlele kajejjete jerbal eo an?

⁷ Jemel̦el̦e bwe kõrã eo emaroñ aikuj lukkuun kate ñan kõttãik e ñan l̦eo pãleen me ejjab weeppãn. Ijoke, enaaj kile an pidodol̦o̦k an maroñ kajejjete eddo eo Jeova ear lel̦o̦k ñane ñe ej mel̦el̦e im errã kõn un ko ilo Baibõl̦ unin an aikuj in kõttãik e make.

8. Ãinwõt an wal̦o̦k ilo Epesõs 5:22-24, etke juon Kũrjin kõrã rippãlele ej kããlõt ñan kõttãik e ñan l̦eo pãleen?

⁸ Juon Kũrjin kõrã rippãlele ej kããlõt ñan  kõttãik e ñan l̦eo pãleen kõnke eñin men eo Jeova ej kajjitõk jãne. (Riit Epesõs 5:22-24.) Ej lõke Jemãn ilañ kõnke ejel̦ã bwe aolep iien yokwe ej kõm̦akũt E ñan kõm̦m̦ani men ko ej kõm̦m̦ani, im bwe Eban kajjitõk ippãn ñan kõm̦m̦ane juon men el̦aññe ejjab ñan tokjãn eo an.​—Dut. 6:24; 1 Jon 5:3.

9. Ta eo ej wal̦o̦k ñe juon Kũrjin kõrã jeid im jatid ej kautiej maroñ eo an l̦eo pãleen?

⁹ Lal̦ in ej rõjañ kõrã ro ñan kõjekdo̦o̦n wãween an Jeova l̦õmn̦ak im ñan watõk men in kõttãik, ãinwõt juon men me ej kõm̦m̦an aer ettã. Em̦ool bwe ro rej kowõnm̦aanl̦o̦k mel̦el̦e kein rejjab jel̦ã kajjien Anij eo ad me el̦ap an yokwe. Jeova eban kar lel̦o̦k ñan jiroñ ak kõrã ro nejin me rejitõnbõro ippãn, juon kien me enaaj kõm̦m̦an bwe en dikl̦o̦k aorõkier. Juon jeid im jatid kõrã ej lukkuun kate ñan kajejjete jerbal eo Jeova ear lel̦o̦k ñane, ej kõm̦m̦an bwe en wõr aenõm̦m̦an ilo baam̦le eo an. (Sam 119:165) L̦eo pãleen ej bõk tokjãn, bareinwõt e, im ajri ro.

10. Ta ko jemaroñ katak jãn naan ko an Carol?

¹⁰ Juon kõrã rippãlele me ej kõttãik e ñan l̦eo pãleen ejjab weeppãn, ej kam̦ool bwe ej yokwe im kautiej Jeova, eo im ear ejaake laajrak eo kõn bar. Carol, eo ej jokwe ilo South America, ej ba: “Ijel̦ã bwe l̦eo pãleõ enaaj baj kõm̦m̦an wõt bõd. Im ibar jel̦ã bwe wãween aõ em̦m̦akũt ñan bõd kein ej kwal̦o̦k ewi joñan aõ lukkuun kaorõke jem̦jerã eo aõ ippãn Jeova. Kõn men in, ij kate eõ ñan kõttãik wõt ña kõnke ikõn̦aan kabuñbũruon Jema ilañ.”

11. Ta eo ej jipañ juon jeid im jatid kõrã etan Aneese ñan jel̦ã jeorl̦o̦k bõd, im ta eo jemaroñ katak jãn naan ko an?

¹¹ Emaroñ pen ñan an juon kõrã rippãlele kwal̦o̦k kautiej im kõttãik e ñe ej l̦õmn̦ak bwe l̦eo pãleen ejjab kaorõk eñjake im l̦õmn̦ak ko an. Bõtab l̦õmn̦ak kõn wãween an Aneese, juon jeid im jatid kõrã me em̦õj an m̦are, em̦m̦akũt ñe men in ej wal̦o̦k. Ej ba: “Ij kate eõ ñan jab oktak im illu. Ij keememej bwe kõj aolep jej kõm̦m̦an bõd. Mejãnkajjik eo aõ ej bwe in m̦õn̦õn̦õ in jeorl̦o̦k bõd, ãinwõt an Jeova bar kõm̦m̦ane. Ñe ij kõm̦m̦ane men in, ij eñjake aõ bar aenõm̦m̦an ilo bũruõ.” (Sam 86:5) Ñe juon kõrã rippãlele ej m̦õn̦õn̦õ in jeorl̦o̦k bõd, enaaj maroñ kile an pidodol̦o̦k an kõttãik e.

12. Waanjoñak ta ko Baibõl̦ ej kwal̦o̦k kaki?

¹² Jet remaroñ l̦õmn̦ak bwe juon eo ej kõttãik e, ej juon eo em̦õjn̦o̦. Bõtab ejjab m̦ool men in ñan jidik. Baibõl̦ ej kwal̦o̦k elõñ waanjoñak ko kõn ro rekajoor me rar jel̦ã kõttãik er make. L̦õmn̦ak kõn ta ko jemaroñ katak jãn Jesus, Abigeil, im Meri.

13. Etke Jesus ej kõttãik e ñan Jeova? Jouj im kõmel̦el̦e.

¹³ Jesus ej kõttãik e ñan Jeova, bõtab ejjab kõnke edik an mãlõtlõt ak kapeel. Kain en̦ wõt me ekanooj in mãlõtlõt emaroñ katakin ilo juon wãween epidodo im ealikkar ãinwõt kar Jesus. (Jon 7:45, 46) Joñan an Jeova kar lukkuun kaorõke maroñ im kapeel ko an Jesus, Ear kõtl̦o̦k bwe Jesus en jerbal Ippãn ke Ear kõm̦anm̦an men otemjej ilañ im ilal̦. (JK. 8:30; Hib. 1:2-4) Im ãlikin an kar Jesus jerkakpeje, Jeova ear lel̦o̦k ñane ‘maroñ ioon men otemjej ilo lañ im ioon lal̦.’ (Matu 28:18) Meñe Jesus ej juon eo ekapeel, ak ej reilo̦k wõt ñan Jeova bwe en tõl e. Etke? Kõnke ej yokwe Jemãn.​—Jon 14:31.

14. Ta ko l̦õm̦aro remaroñ katak jãn (1) wãween an Jeova watõk kõrã ro? (2) naan ko ilo Jabõn Kõnnaan 31?

¹⁴ Men ko l̦õm̦aro remaroñ katak. Jeova ear jab kõm̦m̦an bwe kõrã ro ren kõttãik er ñan l̦õm̦aro pãleer kõnke Ej watõk kõrã ro bwe rettãl̦o̦k jãn em̦m̦aan ro. Jeova ear make kam̦oole men in ikijjeen an kããlõt kõrã ro ekoba em̦m̦aan ro ñan tõl ippãn Jesus ilañ. (Gal. 3:26-29) Jeova ear kwal̦o̦k an lõke Nejin ilo an lel̦o̦k maroñ ñane. Ejja ãindeinl̦o̦k wõt, juon em̦m̦aan rippãlele me emãlõtlõt enaaj lel̦o̦k jet maroñ ñan lio pãleen. Naanin Anij ej kõmel̦el̦eik jerbal ko an juon kõrã epol̦õmãn, ej kwal̦o̦k bwe emaroñ loloodjake men ko an m̦weo, wia im lali wãto ko, im kõm̦m̦an kon̦ ko ikijjeen jããn. (Riit Jabõn Kõnnaan 31:15, 16, 18.) Ejjab juon ri-kõm̦akoko me ejjel̦o̦k an maroñ ñan kwal̦o̦k l̦õmn̦ak ko an. Ijoke, l̦eo pãleen ej lõke e im ej roñjake l̦õmn̦ak ko an. (Riit Jabõn Kõnnaan 31:11, 26, 27.) Ñe juon em̦m̦aan ej kwal̦o̦k kain kautiej rot in ñan kõrã eo pãleen, lio enaaj m̦õn̦õn̦õ in kõttãik e ñane.

15. Ta ko lim̦aro remaroñ katak jãn joñak eo an Jesus?

¹⁵ Men ko lim̦aro remaroñ katak. Jekdo̦o̦n ñe ewõr tõprak ko Jesus ear kõm̦m̦ani, ak ejjab l̦õmn̦ak bwe ej juon men ettã ñan an kõttãik e ñan maroñ eo an Jeova ãinwõt eo ej bõran. (1 Kor. 15:28; Pil. 2:5, 6) Ãindeinl̦o̦k wõt, juon kõrã epol̦õmãn me ej anõk joñak eo an Jesus eban l̦õmn̦ak bwe ettã ñe ej kõttãik e ñan l̦eo pãleen. Enaaj rejetake l̦eo pãleen ejjab kõn an yokwe wõt e, ak el̦aptata kõnke ej yokwe im kautiej Jeova.

16. Ekkar ñan 1 Samuel 25:3, 23-28, ta wãween ko reppen Abigeil ear jelm̦aiki? (Lale pija eo ilo kilin bok in.)

¹⁶ Abigeil ear pãleek em̦m̦aan eo etan Nebal. L̦ein ear juon eo el̦ap an l̦õmn̦ak wõt kõn e make, eutiej bũruon, im ejaje kam̦m̦oolol. Meñe ãindein, ak Abigeil ear jab kappok ial̦an an etal jãn mourin m̦are eo an. Emaroñ kar pãd wõt im m̦õj im kõtl̦o̦k an Devid im em̦m̦aan ro an m̦ane l̦eo pãleen. Ijello̦kun an ãindein, ear bõk buñtõn ne ko ñan kõjparok Nebal im ro ilo m̦weo im̦weerro me elõñ uwaaer. Baj l̦õmn̦ak m̦õk kõn joñan an Abigeil kar aikuj in lukkuun peran in wõnm̦ae 400 em̦m̦aan ro ewõr kein tarin̦ae ko ippãer im ilo ejja iien eo wõt, ej kajjioñ kõnnaan ippãn Devid ilo kautiej. Joñan ear bar m̦õn̦õn̦õ in n̦aruon e make kõn kõm̦m̦an ko an l̦eo pãleen. (Riit 1 Samuel 25:3, 23-28.) Devid ear m̦õkaj im kile bwe Jeova ear kõjerbale kõrã in eperan ñan lel̦o̦k ñane naanin jipañ ko ear aikuji ñan bõbraiki jãn an kõm̦m̦ane juon bõd el̦ap.

17. Ta ko l̦õm̦aro remaroñ katak jãn bwebwenato eo an Devid im Abigeil?

 ¹⁷ Men ko l̦õm̦aro remaroñ katak. Abigeil ear juon kõrã elol̦o̦kjen̦. Ilo mãlõtlõt, Devid ear roñjake naanin rõjañ eo an. Tokjãn an kar ãindein, ear bõbraik e make jãn an wõr ruõn kõn kato̦o̦rl̦o̦k bõtõktõk. Ejja ãindeinl̦o̦k wõt, juon em̦m̦aan rippãlele emãlõtlõt enaaj lukkuun roñjake l̦õmn̦ak ko an lio pãleen ñe ej kõm̦m̦ani pepe ko relukkuun aorõk. Bõlen l̦õmn̦ak ko an lio pãleen renaaj jipañ bõbraik e jãn an kõm̦m̦ane juon pepe ejjab mãlõtlõt.

18. Ta ko lim̦aro remaroñ katak jãn joñak eo an Abigeil?

¹⁸ Men ko lim̦aro remaroñ katak. Juon kõrã rippãlele me ej yokwe im kautiej Jeova emaroñ jipañ baam̦le eo an, meñe l̦eo pãleen ejjab karejar ñan Jeova ak mour ekkar ñan naanin kakapilõk ko An. Eban kappok wãween ko rejjab pedped ioon Baibõl̦ ñan kõm̦m̦an ial̦an an etal jãn mourin m̦are eo an. Ijello̦kun an ãindein, an kwal̦o̦k kautiej im kõttãik e ñan l̦eo pãleen, men kein remaroñ naaj kajjioñ kõm̦akũti ñan katak kõn Jeova. (1 Pit. 3:1, 2) Bõtab jekdo̦o̦n ñe l̦eo pãleen ejjab em̦m̦akũt kõn joñak eo an em̦m̦an, ak Jeova ej kaorõk an kõrã rippãlele eo kõttãik wõt e im kwal̦o̦k an tiljek ñan E.

19. Ñããt eo juon kõrã rippãlele eban pokake l̦eo pãleen?

¹⁹ Ijoke, juon Kũrjin kõrã rippãlele me ej kõttãik e, eban rejetake l̦eo pãleen ñe ej kajjitõk ippãn ñan ko̦kkure naanin kakapilõk ak kien ko ilo Baibõl̦. Ñan waanjoñak, jen ba bwe l̦eo pãleen juon jeid im jatid kõrã me ejjab juon rũttõmak, ej ba bwe en riab, ko̦o̦t, ak kõm̦m̦an jet men me rej n̦ae Baibõl̦. Aolep Kũrjin ro, ekitibuj kõrã ro em̦õj aer m̦are, rej aikuj tiljek ñan Jeova Anij m̦oktata ilõñin men otemjej. El̦aññe kar kajjitõk ippãn juon jeid im jatid kõrã bwe en rupe naanin kakapilõk ko ilo Baibõl̦, ej aikuj in ba jaab, im kõmel̦el̦e ilo juon wãween ejouj ak ebar alikkar an jutak pen, kõn unin an jab maroñ kõm̦m̦ane men eo l̦eo ej kajjitõk ippãn ñan kõm̦m̦ane.​—Jrb. 5:29.

20. Ewi wãween ad jel̦ã bwe ear wõr juon an Meri jem̦jerã elukkuun epaak ippãn Jeova?

²⁰ Ear wõr juon an Meri jem̦jerã elukkuun epaak ippãn Jeova. Ealikkar an kar lukkuun jel̦ã kobban Jeje ko. Juon iien ke ear bwebwenato ippãn Elisabet, kõrã eo jinen Jon ri-Peptaij,  Meri ear ãlijtok naan jãn Jeje ko jãn kajin Hibru elõñl̦o̦k jãn 20 alen. (Luk 1:46-55) Im l̦õmn̦ak kõn men in: Meñe Meri ear pojak in m̦areiki Josep, ak enjel̦ eo an Jeova ear jab wal̦o̦kl̦o̦k ñan Josep m̦okta. Enjel̦ eo ear m̦okta kõnnaan ippãn Meri im ear kõnnaanek e bwe enaaj keotak eo Nejin Anij. (Luk 1:26-33) Jeova ear lukkuun jel̦ã kajjien Meri im ear lõke bwe Meri enaaj yokwe im kõjparoke eo Nejin. Im ejjel̦o̦k pere bwe Meri ear wõnm̦aanl̦o̦k wõt im epaake Jeova ãlikin an kar Jesus mej im wanlõñl̦o̦k ñan lañ.​—Jrb. 1:14.

21. Ta ko l̦õm̦aro remaroñ katak jãn ta eo Baibõl̦ ej ba kõn Meri?

²¹ Men ko l̦õm̦aro remaroñ katak. Juon em̦m̦aan rippãlele emãlõtlõt, em̦õn̦õn̦õ ñe lio pãleen elukkuun jel̦ã kobban Baibõl̦ eo. Ejjab inepata ippãn kõrã eo pãleen im l̦õmn̦ak bwe ekõn̦aan erom bõran baam̦le eo. Ej kile bwe juon kõrã me elukkuun jel̦ã kobban Baibõl̦ im naanin kakapilõk ko ie, emaroñ l̦ap an jipañ baam̦le eo an. Em̦ool bwe meñe lio emaroñ l̦apl̦o̦k jel̦ãl̦o̦kjen̦ eo ippãn jãn l̦eo pãleen, ak ej kun̦aan l̦eo ñan tõl baam̦le eo ilo iien kabuñ an baam̦le im ilo wãween ko jet ikijjeen aer kabuñ ñan Jeova.​—Eps. 6:4.

22. Ta ko lim̦aro remaroñ katak jãn Meri?

²² Men ko lim̦aro remaroñ katak. Juon kõrã rippãlele ej aikuj in kõttãik e ñan l̦eo pãleen, bõtab ej kun̦aan lio ñan make kõkajoore wõt tõmak eo an. (Gal. 6:5) Kõn men in, ej aikuj kõm̦m̦an iien ñan katak ippãn make im kõl̦mãnl̦o̦kjen̦. Men in enaaj jipañe ñan dãpij wõt yokwe eo an ñan Jeova im kautiej E, im ñan lo lañlõñ ilo an kõttãik e ñan l̦eo pãleen.

23. Ewi wãween an kõrã rippãlele ro me rej kõttãik er kõm̦m̦an bwe er, baam̦le ko aer, im eklejia eo ren bõk tokjãn?

²³ Kõrã rippãlele ro me rej kõttãik wõt er ñan l̦õm̦aro pãleer kõn aer yokwe Jeova, enaaj l̦apl̦o̦k aer lo lañlõñ im jokwane jãn ro rejjab kõn̦aan l̦oore laajrak eo an Jeova kõn bar. Rej likũt juon joñak em̦m̦an ñan likao ro im jiroñ ro jim̦or. Im rej jipañ kõm̦m̦an bwe en wõr juon mejatoto em̦m̦an, ejjab ilowaan baam̦le eo wõt ak bareinwõt ilo eklejia eo. (Tai. 2:3-5) Rainin, enañin aolep ri-karejar ro retiljek an Jeova ej kõrã ro. (Sam 68:11) Kõj aolep, meñe kõj em̦m̦aan ak kõrã, ewõr ijo kun̦aad eaorõk ilo eklejia eo. Katak in tok juon enaaj kõnono kõn wãween an kõj kajjojo maroñ kajejjete eddo in.