1-2. Ekkar ñan Matu 5:11, en kar ewi wãween ad watõk apañ ko jej iiooni?

JESUS ear kallim̦uri ri-kal̦oor ro an bwe renaaj lo m̦õn̦õn̦õ eo em̦ool. Ear bareinwõt kakkõl ro rej yokwe e bwe renaaj iioon apañ ko. (Matu 10:22, 23; Luk 6:20-23) Jej lañlõñ bwe jej ri-kal̦ooran Christ. Bõtab ewi wãween ad eñjake kõn ad naaj maroñ iioon jum̦ae jãn baam̦le eo ad, an kien jum̦ae im kaeñtaan kõj, ak an ri-jikuul̦ ak ri-jerbal ro m̦õttad kajjioñ kapo kõj ñan kõm̦m̦ane juon men ebõd? Ejjel̦o̦k pere bwe an men kein maroñ wal̦o̦k, remaroñ kõm̦m̦an ad inepata.

² Elõñ armej ro rejjab bõk l̦õmn̦ak eo bwe an ro jet jum̦ae im kaeñtaan er, ej juon un ñan aer lañlõñ. Ijoke, eñin ej men eo me Naanin Anij ej jiroñ kõj ñan kõm̦m̦ane. Ñan waanjoñak, ri-kal̦oor Jemes ear je im ba bwe ijello̦kun ad kanooj inepata, jej aikuj watõk bwe ej juon menin lañlõñ ñe jej iioon apañ ko. (Jem. 1:2, 12) Im Jesus ear ba bwe jen m̦õn̦õn̦õ wõt meñe jej iioon jum̦ae im kaeñtaan. (Riit Matu 5:11.) Ewi wãween ad maroñ dãpij wõt ad lañlõñ meñe jej iioon apañ ko? Elõñ men ko jemaroñ katak kaki ikijjeen ad etali jet men ko ilo lõta eo an Jemes ñan Kũrjin ro ilo jinoin. M̦oktata, jen etali wãween ko reppen Kũrjin rein rar jelm̦aiki.

3. Ta eo ear wal̦o̦k ejjabto tokãlik ãlikin an kar Jemes erom ri-kal̦ooran Jesus?

³ Ejjabto tokãlik ãlikin an kar Jemes, l̦eo jatin Jesus, erom juon ri-kal̦oor, Kũrjin ro ilo Jerusalem rar iioon matõrtõr im jum̦ae. (Jrb. 1:14; 5:17, 18) Im ãlikin aer kar m̦ane ri-kal̦oor eo etan Stipen, elõñ iaan Kũrjin ro rar ko jãn Jerusalem im “rar  ejjeplõklõk ñan jikin ko ilo Judia im Sameria,” joñan tokãlik, rar pãd ilo jikin ko rettol̦o̦k ãinwõt Saiprõs im Antiok. (Jrb. 7:58–8:1; 11:19) Baj l̦õmn̦ak m̦õk kõn joñan apañ ko ri-kal̦oor ro rar aikuj in kijenmej kaki. Meñe ãindein, ak rar kijejeto ilo aer kwal̦o̦k naan kõn ennaan eo em̦m̦an ilo jabdewõt jikin rar etal ñane, im ekar wõr eklejia ko rar jino ejaak ilo jikin ko rar pãd ium̦win kien eo an Rom. (1 Pit. 1:1) Bõtab ãlikin iien in, elõñl̦o̦k wãween ko reppen rar bar iiooni.

4. Ta apañ ko jet me Kũrjin ro ilo jinoin rar aikuj in kijenmej kaki?

⁴ Elõñ kain apañ ko Kũrjin ro ilo jinoin rar aikuj kijenmej kaki. Ñan waanjoñak, iturinl̦o̦k iiõ eo 50 C.E., ri-tõl eo an Rom etan Klaudiõs ear kakien aolep ri-Ju ro bwe ren em̦m̦akũt jãn Rom. Innem ri-Ju ro me rar erom Kũrjin, rar aikuj in etal jãn m̦õko im̦weer im em̦m̦akũt ñan bar juon jikin. (Jrb. 18:1-3) Ilo iturinl̦o̦k 61 C.E. eo, rijjilõk Paul ear je im kwal̦o̦k kõn Kũrjin ro m̦õttan bwe kar kajjirere kake er ilo̦bwilej, kalbuuji er, im rakimi men ko m̦weieer. (Hib. 10:32-34) Im ãinwõt armej ro jet, Kũrjin ro rar aikuj in bar kijenmej kõn aer jeram̦õl im iioon nañinmej.​—Rom 15:26; Pil. 2:25-27.

5. Ta kajjitõk ko jenaaj uwaaki?

⁵ Ke Jemes ear je lõta eo an m̦okta jãn iiõ eo 62 C.E., el̦ap an kar jel̦ã kõn apañ ko ro jein im jatin rar iiooni. Jeova ear kõm̦akũti Jemes ñan jejel̦o̦k ñan Kũrjin rein bwe en lel̦o̦k naanin jipañ ko me renaaj jipañ er lañlõñ wõt meñe rej iioon apañ ko. Jen etale lõta eo an Jemes im uwaaki kajjitõk kein: Lañlõñ rot eo Jemes ear jeje kake? Ta eo emaroñ kõm̦m̦an bwe en jako an juon Kũrjin lañlõñ? Im ewi wãween an mãlõtlõt, tõmak, im peran maroñ  jipañ kõj dãpij wõt ad lañlõñ jekdo̦o̦n ta apañ ko jej jelm̦aiki?

6. Ekkar ñan Luk 6:22, 23, etke juon Kũrjin emaroñ lañlõñ ñe ej iioon apañ ko?

⁶ Armej remaroñ l̦õmn̦ak bwe wãween eo wõt remaroñ m̦õn̦õn̦õ ej ñe em̦m̦an ãjmour ko aer, elukkuun lõñ aer jããn, im ñe eaenõm̦m̦an baam̦le eo aer. Bõtab kain lañlõñ eo me Jemes ear jeje kake ej m̦õttan leen jetõb kwõjarjar eo an Anij im ejjab wawa ioon wãween ko juon armej ej iiooni. (Gal. 5:22) Juon Kũrjin ej lañlõñ ak lukkuun m̦õn̦õn̦õ, jãn an jel̦ã bwe ej kabuñbũruon Jeova im l̦oore joñak eo an Jesus. (Riit Luk 6:22, 23; Kol. 1:10, 11) Ãinwõt juon kijeek me ej urur ilowaan juon l̦aam̦ me ej bõbraiki jãn an kun, ãindein kain lañlõñ eo ej urur ilo bũruon juon Kũrjin. Lañlõñ in ejjab jino dikl̦o̦k an urur ñe enana ãjmour eo an ak ñe ejabwe jããn. Im ejjab kun ñe ro nukũn ak ro jet rej kajjirere kake ak jum̦aiki. Ijello̦kun an kun kijeek in, ej meraml̦o̦k wõt kajjojo iien ri-jum̦ae ro rej kajjioñ in kune. Apañ ko jej iiooni kõn tõmak eo ad rej kam̦ool bwe jej ri-kal̦oor ro rem̦ool an Christ. (Matu 10:22; 24:9; Jon 15:20) Eñin unin Jemes ear maroñ je naan kein: “Ro jeiũ im jatũ, kom̦win watõk bwe ej juon menin ami lukkuun lañlõñ ñe kom̦ij iioon elõñ kain apañ.”​—Jem. 1:2.

7-8. Ewi wãween an apañ ko kõm̦m̦an an kajoorl̦o̦k tõmak eo ad?

⁷ Jemes ej kwal̦o̦k un eo juon unin an Kũrjin ro m̦õn̦õn̦õ in jelm̦ae apañ ko rekanooj in pen. Ej ba: “Ñe tõmak eo ami ej iioon mãlejjoñ ko, ej wal̦o̦k kijenmej.” (Jem. 1:3) Apañ ko remaroñ ãinwõt kijeek eo rej kõjerbale ñan kõm̦m̦an mejãn jãje mããl. Ñe rej tile mejãn jãje eo innem kam̦õl̦oiki, mããl eo ej jino penl̦o̦k. Ejja ãindeinl̦o̦k wõt, ñe jej kijenmej ium̦win apañ ko, tõmak eo ad ej kajoorl̦o̦k. Eñin unin Jemes ear je im ba: “Kõtl̦o̦k bwe kijenmej en kadedel̦o̦k an jerbal ilo kom̦, kõnke kom̦win maroñ iio im weeppãn ilo aolep wãween.” (Jem. 1:4) Ñe jej lo an apañ ko jej iiooni kõkajoorl̦o̦k tõmak eo ad, jemaroñ kijenmej ium̦win wãween kein ilo lañlõñ.

⁸ Ilo lõta eo an Jemes, ej bar kwal̦o̦k kõn jet iaan men ko remaroñ kõm̦m̦an bwe en jako ad lañlõñ. Ta wãween kein reppen, im ewi wãween ad maroñ anjo̦ ioer?

9. Etke ej aikuj wõr ippãd mãlõtlõt?

⁹ Wãween eo epen: Ad jab jel̦ã ta eo jen kõm̦m̦ane. Ñe jej jelm̦ae juon apañ, em̦m̦an ñan kajjitõk ippãn Jeova ñan jipañ kõj bwe jen kõm̦m̦ani pepe ko me rej kabuñbũruon, rej kõm̦m̦an bwe ro jeid im jatid ren bõk tokjãn  jãni, im rej jipañ kõj ñan dãpij wõt ad tiljek. (Jrm. 10:23) Ej aikuj wõr ippãd mãlõtlõt ñan jel̦ã ta eo jen kõm̦m̦ane im ta eo jen ba ñan ro rej jum̦aik kõj. Ñe jejjab jel̦ã ta eo jen kõm̦m̦ane, jemaroñ l̦õmn̦ak bwe ejjel̦o̦k ad maroñ ioon wãween ko jej iiooni, im emaroñ m̦õkaj an jako ad lañlõñ.

10. Ñan bõk mãlõtlõt, ta eo Jemes 1:5 ej jiroñ kõj bwe jej aikuj kõm̦m̦ane?

¹⁰ Wãween eo ñan lo tõprak: Kajjitõk ippãn Jeova kõn mãlõtlõt. Ñan ad maroñ kijenmej ium̦win apañ ko jej iiooni ilo lañlõñ, jej aikuj m̦okta kajjitõk ippãn Jeova ilo jar ñan letok mãlõtlõt eo jej aikuji ñan kõm̦m̦ani pepe ko rem̦m̦an. (Riit Jemes 1:5.) Ta eo jen kõm̦m̦ane ñe jej l̦õmn̦ak bwe Jeova ejjab uwaake jar eo ad ilo m̦õkaj? Jemes ear ba bwe “en jab bõjrak [ad] kajjitõk” ippãn Anij. Jeova ejjab abbũn̦õn̦õ ñe ejjab bõjrak ad kajjitõk ippãn kõn mãlõtlõt. Eban illu ippãd. El̦ap an Jemãdwõj ilañ ‘m̦õn̦õn̦õ in letok’ ñe jej jar kõn mãlõtlõt eo ñan kijenmej ium̦win apañ ko jej iiooni. (Sam 25:12, 13) Ej loe apañ ko jej iiooni, ej bũrom̦õj kõn ad eñtaan, im elukkuun kõn̦aan jipañ kõj. Ejjel̦o̦k pere bwe men in ej kõm̦m̦an ad lañlõñ! Ijoke, ewi wãween an Jeova letok ñan kõj mãlõtlõt?

11. Ta ko jet jej aikuj kõm̦m̦ani ñan bõk mãlõtlõt?

¹¹ Jeova ej letok ñan kõj mãlõtlõt ikijjeen Naan eo an. (JK. 2:6) Ñan bõk mãlõtlõt in, jej aikuj katak Naanin Anij im bok ko ad me rej pedped ioon Baibõl̦. Bõtab ebar wõr men ko jej aikuj kõm̦m̦ani jãn ad baj katak wõt. Jej aikuj bareinwõt kõjerbale mãlõtlõt eo an Anij ilo mour ko ad ikijjeen ad jerbali naanin kakapilõk ko an. Jemes ear je im ba: “Kom̦win ro rej jerbale naan eo im jab ri-roñjake wõt.” (Jem. 1:22) Ñe jej jerbale naanin kauwe ko an Anij, jej oktak im l̦apl̦o̦k ad aenõm̦m̦an, jouj ak kõmmaanwa, im tũriam̦o. (Jem. 3:17) Kadkad kein rej jipañ kõj ñan kijenmej ilo jabdewõt apañ ko jej iiooni im bwe en jab jako ad lañlõñ.

12. Etke eaorõk bwe jen lukkuun jel̦ã kõn kobban Baibõl̦ eo?

 ¹² Naanin Anij ej ãinwõt juon kilaaj, ej jipañ kõj ñan loe im jel̦ã ta eo jej aikuj in jerbale. (Jem. 1:23-25) Ñan waanjoñak, ãlikin ad katak Naanin Anij, jemaroñ kile bwe jej aikuj jel̦ã dãpij ad illu. Kõn jipañ eo jãn Jeova, jej katak kilen ineem̦m̦an wõt ñe jej iioon armej ro ak wãween ko me remaroñ kõm̦m̦an ad illu. Kõn ad ineem̦m̦an, jejel̦ãl̦o̦k kilen kijenmej ium̦win ijjiped ko jej iiooni. Em̦m̦anl̦o̦k wãween ad kõl̦mãnl̦o̦kjen̦ im kõm̦m̦ani pepe ko rem̦m̦an. (Jem. 3:13) Joñan an aorõk bwe jen lukkuun jel̦ã kõn kobban Baibõl̦ eo!

13. Etke eaorõk bwe jen katak ak etale waanjoñak ko an ro ilo Baibõl̦?

¹³ Jet iien ãlikin wõt ad kõm̦m̦ane juon bõd, jej kab tõn jel̦ã ta eo jen kõjparok kõj jãne. Bõtab ejjab eñin wãween eo em̦m̦an ñan katak. Juon wãween em̦m̦anl̦o̦k ñan bõk mãlõtlõt ej ñan katak jãn tõprak ko im bõd ko an ro jet. Eñin unin Jemes ej rõjañ kõj ñan etali waanjoñak ko an ro ilo Baibõl̦, ãinwõt Ebream, Rehab, Job, im Ilaija. (Jem. 2:21-26; 5:10, 11, 17, 18) Ri-karejar rein retiljek an Jeova rar maroñ kijenmej ium̦win apañ ko me remaroñ kar kõm̦m̦an bwe en jako aer lañlõñ. Joñak kein aer kõn kijenmej ej kwal̦o̦k bwe ikijjeen jipañ eo jãn Jeova jemaroñ kõm̦m̦ane ejja men in wõt.

14-15. Etke jejjab aikuj kõjekdo̦o̦n men ko jej pere kaki?

¹⁴ Wãween eo epen: Ñe ewõr ad pere. Jãn iien ñan iien, emaroñ wõr men en̦ epen ad mel̦el̦e kake jãn Naanin Anij. Ak bõlen Jeova emaroñ jab uwaake jar ko ad ilo wãween eo jaar kõtmãne kake. Men in emaroñ kõm̦m̦an an jino wõr ad pere. El̦aññe jej kõjekdo̦o̦n men ko jej pere kaki, men kein renaaj kam̦õjn̦o̦ik tõmak eo ad im ko̦kkure jem̦jerã eo ad ippãn Jeova. (Jem. 1:7, 8) Im joñan, remaroñ bar kõm̦m̦an bwe jen luuji kõjatdikdik eo ad kõn ilju im jekl̦aj.

¹⁵ Rijjilõk Paul ear keidi kõjatdikdik eo ad kõn ilju im jekl̦aj ñan juon añkõ. (Hib. 6:19) Juon añkõ ej dãpiji juon tim̦a ñe ej wal̦o̦k juon l̦añ el̦ap im ej bõbraiki jãn an pel̦o̦k im ãr ioon dekã ko. Bõtab ewõr wõt tokjãn añkõ eo ñan tim̦a eo el̦aññe jeen eo ejjab tũm̦ jãne. Ãinwõt an l̦õjo kam̦õjn̦o̦ik jeen eo an juon añkõ, an wõr ad pere ej kam̦õjn̦o̦ik tõmak eo ad. Ñe juon eo ewõr an pere ej iioon jum̦ae, men in emaroñ kõm̦m̦an bwe en jako an tõmak bwe Jeova enaaj kajejjete kallim̦ur ko an. Ñe ejako ad tõmak, ebar jako kõjatdikdik eo ad. Ãinwõt an Jemes ba, juon eo me ewõr an pere ‘ej ãinwõt n̦o ko ilo̦meto me kõto ko rej uukto uuktak.’ (Jem. 1:6) Eo ej bõk eñjake rot in, emaroñ jab lañlõñ ñan jidik!

16. Ta eo jej aikuj in kõm̦m̦ane ñe ewõr ad pere?

¹⁶ Wãween eo ñan lo tõprak: Jol̦o̦k am̦ pere; kõkajoore tõmak eo am̦. M̦õkaj im em̦m̦akũt. Ilo raan ko an ri-kanaan Ilaija, armej ro an Jeova rar pere men ko rar tõmaki. Ilaija ear ba ñan er: “Ewi toun ami ajukub ikõtaan ruo l̦õmn̦ak? El̦aññe Jeova ej Anij, kom̦win l̦oor E; a el̦aññe Beal, innem kom̦win l̦oor e.” (1 Kñ. 18:21) Ebar m̦ool men in ilo raan kein. Jej aikuj kõm̦m̦an etale ko ñan kam̦ool ñan kõj make bwe Jeova ej Anij, bwe Baibõl̦ eo ej Naan eo an, im bwe Ri-Kõnnaan ro an Jeova rej armej ro an. (1 Tes. 5:21) Ad kõm̦m̦ani aolepen men kein enaaj kõm̦m̦an bwe en jako ad pere im kõkajoore tõmak eo ad. El̦aññe jej aikuj jipañ ñan jol̦o̦k ad pere, jemaroñ kajjitõk ippãn em̦m̦aan ro rej lale eklejia. Jej aikuj in m̦õkaj im em̦m̦akũt bwe jen maroñ dãpij wõt ad lañlõñ ilo ad karejar ñan Jeova.

17. Ta eo enaaj wal̦o̦k ñe ejako ad peran?

¹⁷ Wãween eo epen: Ñe jej ebbweer. Naanin  Anij ej ba: “El̦aññe [kwõnaaj] ebbweer ilo iien ko reppen, innem [kwõnaaj] juon armej eo em̦õjn̦o̦.” (JK. 24:10, UBS) Naanin Hibru eo me kar ukote ñan ‘kwõnaaj ebbweer’ emaroñ mel̦el̦ein “ñan jako am̦ peran.” Ñe ejako am̦ peran, enaaj m̦õkaj an jako am̦ lañlõñ.

18. Ta mel̦el̦ein ñan kijenmej wõt?

¹⁸ Wãween eo ñan lo tõprak: Atartar ioon Jeova bwe en lewaj ñan eok peran ñan kijenmej wõt. Ej aikuj in wõr ad peran bwe jen maroñ kijenmej ium̦win apañ ko. (Jem. 5:11) Naan eo Jemes ear kõjerbale me kar ukote ñan “kijenmej” ej jitõñl̦o̦k ñan juon eo me ej jutak im tõt wõt ilo ijo ej pãd ie. Men in emaroñ kõm̦m̦an ad l̦õmn̦ak kõn juon rũttarin̦ae me ej peran ilo an jutak pen ilo ijo ej pãd ie im ejjab ko meñe ri-kõjdat ro an rej itõn tarin̦aeiki.

19. Ta eo jemaroñ katak jãn joñak eo rijjilõk Paul ear likũt ñan kõj?

¹⁹ Rijjilõk Paul ear likũt juon joñak elukkuun em̦m̦an ñan kõj kõn peran im kijenmej. Ewõr iien, ear eñjake an m̦õjn̦o̦. Bõtab ear maroñ kijenmej wõt kõnke ear atartar ioon Jeova bwe en lel̦o̦k ñane kajoor eo ear aikuji. (2 Kor. 12:8-10; Pil. 4:13) Emaroñ wõr ippãd kain kajoor im peran rot in el̦aññe jej kwal̦o̦k ettã bõro im kile bwe jej aikuji jipañ eo an Jeova.​—Jem. 4:10.

20-21. Ta eo jemaroñ lõke?

²⁰ Jemaroñ lõke bwe apañ ko jej iiooni, rejjab menin kaje jãn Jeova. Jemes ej kõkajoor kõj im ba: “Ñe juon ej iioon mãlejjoñ en jab ba: ‘Anij ej mãlejjoñe eõ.’ Unin ej kõnke men ko renana rejjab mãlejjoñe Anij, bareinwõt ejjab mãlejjoñe jabdewõt.” (Jem. 1:13) Ñe jej lukkuun tõmake men in, jenaaj epaakel̦o̦k Jemãdwõj ilañ me el̦ap yokwe ippãn.​—Jem. 4:8.

²¹ Jeova “ejjab oktak.” (Jem. 1:17) Ear jipañe Kũrjin ro jinoin ilo apañ ko aer, im enaaj bar jipañ kõj kajjojo ilo raan kein. Akwel̦ap ñan Jeova bwe en jipañ eok bõk mãlõtlõt, tõmak, im peran. Enaaj uwaake jar ko am̦. Ilo am̦ ãindein, kwõmaroñ lõke bwe enaaj jipañ eok ñan dãpij wõt am̦ lañlõñ ilo am̦ iioon apañ ko!