KWÕNAÑIN ke bõk eñjake eo bwe kwõmake iaam̦ ñe kwõj iioon wãween ko reppen?Jej mour ilo “iien ko rekanooj in nana im reppen” im men in emaroñ kõm̦m̦an ad ebbweer im l̦õmn̦ak bwe jemake iaad. (2 Tim. 3:1) Meñe ãindein, ak ñe jej iioon wãween ko reppen, ewõr ro im remaroñ jipañ kõj. Baibõl̦ ej kaalikkar an juon jeran em̦ool maroñ lukkuun jipañ “ilo iien jorrããn.”—JK. 17:17.

Rijjilõk Paul ear ito-itak ippãn jet iaan ro jeran ilo tũreep in mijinede ko an, im elõñ wãween ko rein rar jipañ Paul. (Kol. 4:​7-11) Ke Paul ear kalbuuj ilo Rom, ro jeran rar kõm̦m̦ani jerbal ko me ear ejjel̦o̦k an Paul maroñ ñan kõm̦m̦ani. Ñan waanjoñak, Epaprodaitõs ear lel̦o̦k ñan Paul men ko ej aikuji me rej jãn rũttõmak ro jein im jatin jãn Pilippai. (Pil. 4:18) Tikikõs ear bõkl̦o̦k lõta ko an Paul ñan eklejia ko. (Kol. 4:7) Ikijjeen jipañ eo jãn ro jeran, Paul ear maroñ wõnm̦aanl̦o̦k wõt ilo jerbalin kwal̦o̦k naan eo an meñe ear kalbuuj ilo juon em̦ ak make iaan ilo jikin kalbuuj. Ewi wãween kwõmaroñ kwal̦o̦k bwe kwõj juon jeran em̦ool ilo raan kein?

Joñak ko an ro jeid im jatid ilo raan kein rej kaalikkar aorõkin ad kwal̦o̦k bwe jej juon jeran em̦ool. L̦õmn̦ak kõn joñak eo an juon jeid im jatid kõrã me ear kam̦ool bwe ej juon jeran em̦ool ñan Elisabet, juon rekũl̦ar bainier ilo Spain. Ke jinen Elisabet ear bõk nañinmejin kããnjer, kõrã eo jeid im jatid ear jilkinl̦o̦k ñan Elisabet elõñ naanin kaenõm̦m̦an ko jãn Baibõl̦ ikijjeen text. Elisabet ej ba: “Naanin kaenõm̦m̦an kein rar kõkajoor eõ bwe in maroñ kõm̦m̦ani men ko iar aikuj kõm̦m̦ani kajjojo raan im jab eñjake aõ make iaõ.”—JK. 18:24.

Jemaroñ kõkajoore jem̦jerã eo ad ippãn rũttõmak ro m̦õttad ikijjeen ad jipañ er ñan kwal̦o̦k naan im etal ñan iien kweilo̦k ko. Ñan waanjoñak, kwõmaroñ ke ba ñan juon jeid im jatid rũtto bwe kwõpel̦l̦o̦k ñan kattõr ñane ñan iien kweilo̦k ko ak ilo jerbalin kwal̦o̦k naan? Ilo am̦ ãindein, ejjel̦o̦k pere kom̦ naaj kõkajoore doon. (Rom 1:12) Ijoke, ewõr jet Kũrjin ro rejjab maroñ etal jãn m̦õko im̦weer. Ewi wãween ad maroñ kwal̦o̦k ñan er bwe jej juon jeran em̦ool?

Jet iaan rũttõmak ro m̦õttad, ejjab em̦m̦an ãjmour ko aer ak rej iioon wãween ko me rej bõbraik er jãn aer maroñ pãd ilo iien kweilo̦k ko ilo Im̦õn Kweilo̦k eo. L̦õmn̦ak kõn joñak eo an David, eo ear wõr an nañinmejin kããnjer. Elõñl̦o̦k jãn jiljino allõñ in an kar chemotherapy. Ilo tõre in, David im kõrã eo pãleen etan Lidia, rar kobal̦o̦k ilo iien kweilo̦k ko ad ilo online.

Ewi wãween an kar ro jeid im jatid ilo eklejia eo kõkajoore erro? Ekkã an jet iaan ro ilo Im̦õn Kweilo̦k eo kõnono ippãn David im Lidia ikijjeen video  call ãlikin kajjojo iien kweilo̦k. Kobal̦o̦k ippãn men in, ñe David im Lidia rej uwaak, ekkã an ro jeid im jatid jilkinl̦o̦k naanin nõbar ikijjeen text ãlikin iien kweilo̦k ko. Ta tokjãn ko rar wal̦o̦k jãn aer ãindein? Ear dikl̦o̦k an David im Lidia eñjake aer make iaaerro.

Jemaroñ ke kõm̦m̦an karõk ñan jerbal ippãn ro rejjab maroñ etal jãn m̦õko im̦weer? Jemaroñ kõm̦m̦an jidik ukoktak ilo jikejuul̦ eo ad bwe jen maroñ jerbal ippãer. Ilo ad ãindein, jej kwal̦o̦k ñan er bwe jejjab mel̦o̦kl̦o̦k er. (JK. 3:27) Kwõmaroñ ke kõm̦m̦an karõk ñan kwal̦o̦k naan ippãer ikijjeen jeje lõta ak talboon? Ro rejjab maroñ etal jãn m̦õko im̦weer remaroñ kobal̦o̦k ilo iien kweilo̦k ko ñan kwal̦o̦k naan ilo online. David im Lidia rar kam̦m̦oolol kõn karõk in. David ej kõmel̦el̦e im ba: “Ilo am̦ro kobal̦o̦k ippãn kumi in kwal̦o̦k naan eo am̦ro ñan bwebwenato jidik im jar ippãer, men in ear lukkuun kõkajoore kõm̦ro.” Bareinwõt, ñe ekkar im ejjab kauwõtata, kwõmaroñ ke jãn iien ñan iien karõk ñan bõktok juon iaan rũkkatak ro am̦ ñan m̦weo im̦õn eo jeid im jatid bwe kom̦win katak ie?

Ñe jej jerbal ippãn ro jeid im jatid me rejjab maroñ etal jãn m̦õko im̦weer im jej lo kadkad ko aer rem̦m̦an, men in enaaj kõm̦m̦an ad epaakel̦o̦k er. Ñan waanjoñak, ñe kwõj lo aer jel̦ã kilen kõjerbale Baibõl̦ eo ñan tõpare bũruon juon armej, ejjel̦o̦k pere el̦apl̦o̦k am̦ kautiej er. Ñe kwõj rejetake rũttõmak ro m̦õttam̦ ilo jerbal ko an Jeova, kwõnaaj epaakel̦o̦k er im renaaj erom ro jeram̦.—2 Kor. 6:13.

Paul ear bõk kaenõm̦m̦an ke eo m̦õttan etan Taitõs ear pãd ippãn. (2 Kor. 7:​5-7) Bwebwenato in ej kakeememej kõj bwe jemaroñ kaenõm̦m̦an ro rej pãd ilo aikuj, ejjab ilo naan ko ad wõt ak bareinwõt ikijjeen ad pãd ippãer im jipañ er ilo jabdewõt wãween jemaroñe.—1 Jon 3:18.

Ro jeid im jatid ilo Russia rej likũt juon joñak elukkuun em̦m̦an ikijjeen aer jipañ im rejetake doon. L̦õmn̦ak kõn bwebwenato eo an Sergey im kõrã eo pãleen etan Tatyana. Ãlikin an kar bwilijmããn̦ ro etale im kapoke m̦weo m̦weerro, rar bõk erro bwe ren kajitũkini erro. Kar kõtl̦o̦k Tatyana m̦okta im ear jepl̦aak ñan m̦weo m̦weerro. Sergey ej ba: “Ãlikin wõt an [Tatyana] tõpar m̦weo, juon jeid im jatid kõrã ear kwal̦o̦k peran ilo an kar itok ñan m̦weo. Innem elõñ bar ro jeid im jatid rar itok im jipañ kõm̦ro karreo im karõk m̦weo im̦õm̦ro.”

Sergey ej wõnm̦aanl̦o̦k im ba: “Ear baj em̦m̦an wõt ippa Jabõn Kõnnaan 17:17 me ej ba: ‘Juon jeran [em̦ool, NW] ej yokwe iien otemjej; im juon jein im jatin [me] ear l̦otak bwe en rijjipañ ilo iien jorrããn.’ Ear l̦apl̦o̦k an aorõk naan kein ippa ilo tõre in rej jum̦ae im kaeñtaan eõ kõnke ear jab pidodo aõ kijenmej make iaõ. Jeova ear letok ro jera me rar kwal̦o̦k peran ilo aer pãdwõt iturũ.” a

Ilo ad iioon wãween ko reppenl̦o̦k, jej aikuji ro jerad me jemaroñ atartar ioer. Im enaaj l̦apl̦o̦k ad aikuji er ilo iien eñtaan eo el̦ap. Kõn men in, jen kate kõj joñan wõt ad maroñ ñan kwal̦o̦k bwe jej juon jeran em̦ool kiiõ!—1 Pit. 4:​7, 8.