Em̦õj ke am̦ kar lukkuun riiti katak ko ilo Naan in Keeañ ko an iiõ in? Eokwe, jouj im lale el̦aññe kwõmaroñ uwaaki kajjitõk ko itulal̦:

Ewi wãween ad aikuj kõm̦m̦an ñan Kũrjin rũkkapit ro?

Jej kam̦m̦oolol er kõn tõmak eo aer; bõtab ejjab l̦e jãn joñan ad nõbar im kautiej er. Jej kõjparok bwe en jab l̦e jãn joñan ad kautiej ro jet. (Jud 16) Jejjab kajjitõk ippãer men ko me ejjab tõllo̦kid ñan jel̦ã, ikijjeen kõjatdikdik eo aer.​—w20.01, peij 28-29.

Ta eo ej kaalikkar ñan eok bwe Jeova ej kea kake kwe?

Baibõl̦ eo ej kwal̦o̦k bwe ear jel̦ã wõt kajjiem̦ m̦okta jãn am̦ kar l̦otak. Im ej roñjake jar ko am̦. Ejel̦ã ta ko kwõj l̦õmn̦ak kaki im ta ko rej pãd ilo bũruom̦, im kõm̦m̦an ko am̦ rej jelõt e. (1 Kro. 28:9; JK. 27:11) Ear make kepaakel̦o̦k eok ñan e.​—w20.02, peij 12.

Ta jet iaan waanjoñak ko me rej kwal̦o̦k kõn ñããt eo ekkar bwe jen kõnono im ñããt eo ekkar bwe jen ikõñ?

Jej m̦õn̦õn̦õ in kõnono kõn Jeova. Jej kõnono ñe jej lo bwe juon ej ilo̦k ilo juon ial̦ me emaroñ tõll̦o̦ke ñan an kõm̦m̦ane juon bõd el̦ap. Em̦m̦aan ro rej lale eklejia rej lel̦o̦k naanin kauwe ko ñe ej juon menin aikuj. Jejjab kõnono ñan bõk (ak lel̦o̦k) mel̦el̦e ko kõn jerbal eo ad ilo jikin ko me em̦õj kamoik jerbal eo ad ie. Jejjab kwal̦o̦k mel̦el̦e ko me ro jet rejjab aikuj jel̦ã kaki.​—w20.03, peij 20-21.

Ewi wãween an oktak lokõs ko ilo Joel jebta 2 jãn lokõs ko ilo Revelesõn jebta 9?

Joel 2:20-29 ej ba bwe Anij ej ubaakel̦o̦k lokõs ko im ej kallim̦ur in bar kõjepl̦aakl̦o̦k aolep men ko lokõs ko rar kõjorrããni. Ãlikin men in, Anij ej lutõkl̦o̦k jetõb eo an. Men kein rar jejjet kũtieer ke Babil̦on ear nitbwili Israel im ilo tõre ko tokãlik. Revelesõn 9:1-11 ej kwal̦o̦k kõn rũkkapit ro me rej ãinwõt lokõs ko ilo raan kein ad ilo aer kwal̦o̦k kõn ekajet eo an Anij n̦ae jukjukun pãd in enana, im men in ekõm̦m̦an bwe ro rej rejetake jukjukun pãd in ren abn̦õn̦õ im inepata.​—w20.04, peij 3-6.

Wõn eo ej kiiñ eo an eañ ilo raan kein?

Russia ekoba aelõñ ko rej jerbal ippãn im jipañe. Rej tarin̦aeik armej ro an Anij, kamoik jerbalin kwal̦o̦k naan, im rej kwal̦o̦k aer dike Ri-Kõnnaan ro an Jeova. Kiiñ eo an eañ ej wõnm̦aanl̦o̦k wõt im jum̦aik kiiñ eo an rak.​—w20.05, peij 13.

Kadkad ko ruwatimjuon me kar kõllaajraki ilo Galetia 5:22, 23, rej ke kadkad ko wõt me rej m̦õttan “leen jetõb kwõjarjar”?

Jaab. Jetõb kwõjarjar ej jipañ kõj ñan ejaak kadkad ko jet rem̦m̦an, ãinwõt wãnõk. (Eps. 5:8, 9)​—w20.06, peij 17.

Ta juon iaan men ko rekauwõtata ikijjeen ad illik pija ko im naan ko ad ilo weepjait ko?

Men ko kwõj illik ilo weepjait ko remaroñ kõm̦m̦an an armej l̦õmn̦ak bwe kwõj kabbwil ak bwe ejjab ettã bũruom̦.​—w20.07, peij 6-7.

Ta ko me Kũrjin ri-kwal̦o̦k naan ro remaroñ katak jãn ri-eo̦ñõd ro relukkuun jel̦ã eo̦ñõd?

Rej eo̦ñõd ilo iien ko im jikin ko me ek ko remaroñ pãd ie. Em̦õj aer katak im bõk kamminene ko ñan kõjerbali kein jerbal ko rejejjet im rekkar. Im rej kwal̦o̦k peran ilo aer jerbal ilo elõñ wãween ko rokkõtaktak. Jemaroñ bar kõm̦m̦ani men kein ilo jerbalin kwal̦o̦k naan.​—w20.09, peij 5.

Ta jet iaan wãween ko jemaroñ jipañ rũkkatak ro ad ñan kam̦wilal̦l̦o̦k yokwe eo aer ñan Jeova?

Jemaroñ rõjañ er ñan riiti Baibõl̦ eo kajjojo raan im ñan kõl̦mãnl̦o̦kjen̦ kake men ko rej riiti. Im jemaroñ katakin er ñan jar.​—w20.11, peij 4.

Wõn ro rej uwaan rein ilo naan kein me ej ba: “Aolep renaaj mour kõn wõt Christ”?​—1 Kor. 15:22.

Rijjilõk Paul ear jab ba bwe aolep armej renaaj jerkakpeje. Ear jitõñl̦o̦k ñan Kũrjin rũkkapit ro, ro me em̦õj “kokkwõjarjar er bwe ren juon wõt ippãn Christ Jesus.” (1 Kor. 1:2; 15:18)​—w20.12, peij 5-6.

Ta eo rũkkapit ro renaaj kõm̦m̦ane ãlikin aer ‘oktak ilo bũkkinkwõle ilo rom, ilo naaj jilel eo ãliktata’?​—1 Kor. 15:51-53.

Renaaj jerbal ippãn Christ im jabõte ri-aelõñ ko kõn juon jokon̦ aen. (Rev. 2:26, 27)​—w20.12, peij 12-13.