Ejjab. Men eo me Devid ear je im ba ilo eoon in ear juon men em̦ool im jim̦we.

L̦õmn̦ak kõn men eo ear je ilo eoon in im eoon ko rej ãinl̦o̦kwõt: “Inaaj al im nõbar etam̦ ñan indeeo, bwe in kam̦ool aõ naanin kallim̦ur raan im raan.” “Inaaj nõbar Eok, O Irooj aõ Anij, kõn aolepen bũruõ; inaaj kaiboojoj etam̦ ñan indeeo.” “Inaaj nõbar etam̦ ñan indeeo im indeeo.”—Sam 61:8; 86:12; 145:1, 2.

Ke Devid ear je naan kein, ear jab kõl̦l̦apl̦ap im l̦õmn̦ak bwe ejjãmin mej. Ear jel̦ã bwe em̦õj an Jeova kakien im ba bwe an armej jerawiwi enaaj tõll̦o̦k ñan mej, im Devid ear make kwal̦o̦k bwe e juon rijjerawiwi. (Jen. 3:3, 17-19; Sam 51:4, 5) Ear jel̦ã bwe meñe ekar wõr em̦m̦aan ro me Anij ear buñbũruon kake er ãinwõt Ebream, Aisak, im Jekob, ak rar mej. Im Devid ear jel̦ã bwe e bareinwõt enaaj mej. (Sam 37:25, UBS; 39:4) Ijoke, naan kein me ear je ilo Sam 61:8 rej kaalikkar kõn eñjake im kõn̦aan eo an ekajoor ñan nõbar Anij ñan indeeo, mel̦el̦ein toon wõt an naaj kar Devid mour.​—2 Sa. 7:12.

Jet iien Devid ear jeje im kwal̦o̦k kõn men ko ear iiooni ilo mour eo an make, ãinwõt ad maroñ loe ilo kõmel̦el̦e jidikdik ko itulõñin ak m̦okta jãn jebta kein ilo Sam 18, 51, im 52. Ilo Sam 23, Devid ear kwal̦o̦k kõn Jeova bwe ej ãinwõt juon jabõt me ej tõle, kõkajoore, im kõjparoke. Devid ear bar juon jabõt rot in, im ear kõn̦aan karejar ñan Jeova ‘toon wõt an mour.’—Sam 23:6, UBS.

Keememej bareinwõt bwe Jeova eo ear kõm̦akũt Devid ñan je naan kein. Men ko ear je rar kitibuj kanaan ko kõn men ko me renaaj wal̦o̦k tokãlik. Ñan waanjoñak, ilo Sam 110, Devid ear jitõñl̦o̦k ñan juon iien ñe Irooj eo an enaaj ‘pãd ituanbwijmaroñin’ pein Anij ilo lañ im bõk kajoor el̦ap. Enaaj bõk kajoor ñan ta? Ñan bõk anjo̦ ioon ri-kõjdat ro an Anij im “ekajet ippãn ro ri-aelõñ ko” ioon lal̦. Devid ear eo me Messaia eo ear itok jãne, eo im enaaj tõl jãn lañ im enaaj “juon bũrij ñan indeeo.” (Sam 110:1-6) Jesus ear ba bwe kanaan in ilo Sam 110 ear kwal̦o̦k kõn e im bwe enaaj jejjet kũtien kanaan in ilo ilju im jekl̦aj.​—Matu 22:41-45.

Aet, kar kõm̦akũt Devid ñan jeje kõn tõre ko an im kõn juon iien ilo ilju im jekl̦aj ñe enaaj jerkakpeje im maroñ nõbar Jeova ñan indeeo. Men in ej jipañ kõj ñan kile bwe Sam 37:10, 11, 29 emaroñ jitõñl̦o̦k ñan tõre ko me kar je naan kein im bareinwõt ñan ilju im jekl̦aj. Eoon kein rar jejjet kũtieer ilo tõre ko etto ilo aelõñin Israel im renaaj bar jejjet kũtieer ilju im jekl̦aj ñe Anij enaaj kajejjet kallim̦ur ko an.​—Lale pãrokõrããp 8 ilo katak eo etan “Kwõnaaj Pãd Ippa ilo Pedetaij” ilo magazine in.

Kõn men in, Sam 61:8 im eoon ko jet me rej ãinl̦o̦kwõt rej kaalikkar bwe Devid ear kõn̦aan kaiboojoj Jeova m̦ae iien enaaj kar mej ilo tõre ko etto ilo Israel. Eoon kein rej lukkuun kaalikkar men eo Devid enaaj maroñ kõm̦m̦ane ilju im jekl̦aj el̦aññe Jeova enaaj bar kõjepl̦aaktok bwe en mour.