Em̦õj ke am̦ kar lukkuun riiti katak ko ilo Naan in Keeañ ko an iiõ in? Eokwe, jouj im lale el̦aññe kwõmaroñ uwaaki kajjitõk ko itulal̦:

Ta mel̦el̦ein ñan ‘ukot l̦õmn̦ak ko ad’? (Rom 12:2)

Ej kitibuj ad kõm̦m̦ani men ko rem̦m̦an. Ejjab men in wõt, ak jej aikuj etale kain armej rot kõj itulowa im kõm̦m̦an oktak ko bwe jen maroñ kate kõj joñan wõt ad maroñ ñan mour ekkar ñan l̦õmn̦ak ko an Jeova ikijjeen men ko rem̦m̦an im renana.—w23.01, peij 8-9.

Ewi wãween ad maroñ kwal̦o̦k pel̦an ñe jej lale ta ko rej wal̦o̦k ilo lal̦ in?

El̦ap ad itoklimo in lo wãween an men ko rej wal̦o̦k ilo lal̦ in kiiõ kajejjete kanaan ko ilo Baibõl̦. Ijello̦kun ad kajjidede kõn men ko rej wal̦o̦k kiiõ, juon men me emaroñ ko̦kkure bõrokuk eo an eklejia eo, em̦m̦an ñe men ko jej kõnono kaki rej pedped ioon men ko rej itok jãn doulul eo an Jeova. (1 Kor. 1:10)—w23.02, peij 16.

Etke eoktak an kar Jesus peptaij jãn an ri-kal̦oor ro an peptaij?

Kõnke Jesus ear l̦otaktok im m̦õttan juon aelõñ me em̦õj ajel̦o̦k ñan Anij, ear jab aikuj ajel̦o̦k mour eo an ñan Jeova, ãinwõt kõj. Jesus ear juon eo eweeppãn im ejjab jerawiwi, kõn men in ear jab aikuj ukel̦o̦k jãn jabdewõt jerawiwi.—w23.03, peij 5.

Ewi wãween jemaroñ jipañ ro jet ñan uwaak ilo iien kweilo̦k ko?

Jemaroñ uwaak ilo tukadu bwe ro jet ren maroñ uwaak. Bareinwõt, jemaroñ kõjparok bwe en jab lukkuun lõñ boin ko jej kõnono kaki. Ilo ad ãindein, enaaj wõr wõt boin ko me ro jet remaroñ kõnono kaki.—w23.04, peij 23.

“Ial̦ eo Eokkwõjarjar” me Aiseia 35:8 (UBS) ej kõnono kake ej jitõñl̦o̦k ñan ta?

Ilo jinoin, ear jitõñl̦o̦k ñan ial̦ eo an ri-Ju ro jãn Babil̦on l̦o̦k ñan ijo kapijukuneer. Ak ta kõn raan kein? Ium̦win elõñ bukwi iiõ ko m̦okta jãn 1919, elõñ jerbal ko kar kõm̦m̦ani ñan kõpooje ial̦ in—ãinwõt kar ukote Baibõl̦ eo im bũriini, ekoba men ko jet. Armej ro an Anij rej etetal ilo ‘Ial̦ in Eokkwõjarjar’ me ej jipañ kõj ñan etetal ilo pedetaij eo ilo kõkkar im ej tõll̦o̦k kõj ñan jeraam̦m̦an ko me Aelõñ eo an Anij enaaj bũktoki ilju im jekl̦aj.—w23.05, peij 15-19.

Jabõn Kõnnaan jebta 9 ej letok naanin kakapilõk ko ikijjeen an kõnono kõn ruo kõrã ilo kõkkar. Wõn kõrã rein ilo kõkkar?

Bokin Jabõn Kõnnaan ej kõnono kõn ‘lio ebwebwe,’ me ej tõll̦o̦k aolep ro rej eo̦roñe ñan “Sheol,” ak lõb an ri-mej. Bareinwõt, ej kõnono kõn bar juon kõrã me ej jutak kõn “mãlõtlõt” eo em̦ool, im ej tõll̦o̦k aolep ro rej eo̦roñe ñan “ial̦an jel̦ãl̦o̦kjen̦” im ñan mour. (JK. 9:​1, 6, 13, 18)—w23.06, peij 22-24.

Ewi wãween an kar Anij kwal̦o̦k bwe ettã bũruon im ej juon ri-mel̦el̦e ikijjeen kõm̦m̦an ko an ñan Lot?

Jeova ear jiroñ Lot bwe en ko jãn Sodom ñan tol̦ ko. Ke Lot ear akwel̦ap im kajjitõk el̦aññe emaroñ etal ñan Zoar, Anij ear kõtl̦o̦k bwe en etal ñan jikin in.—w23.07, peij 21.

Ta eo juon kõrã emaroñ kõm̦m̦ane el̦aññe l̦eo pãleen ej alwõje pijain keelwaan ko?

Lio ej aikuj keememej bwe ejjel̦o̦k ruõn. Ej aikuj l̦õmn̦ak wõt kõn jem̦jerã eo an ippãn Jeova im kõl̦mãnl̦o̦kjen̦ kõn bwebwenato ko ilo Baibõl̦ kõn kõrã ro me rar iioon el̦ap inepata im rar bõk kaenõm̦m̦an jãn aer reilo̦k ñan Jeova. Emaroñ jipañ l̦eo pãleen ñan kõjparok e make jãn men ko renaaj kapoe ñan alwõji pija kein.—w23.08, peij 14-17.

Ñe juon armej ej kajitũkin kõj kõn tõmak eo ad, ewi wãween an lol̦o̦kjen̦ maroñ jipañ kõj ñan kwal̦o̦k ineem̦m̦an?

Jemaroñ watõk kajjitõk eo an armej eo ãinwõt juon wãween jemaroñ katak kõn men ko ej l̦õmn̦ak kaki ak ta ko raorõk ippãn. Men in emaroñ jipañ kõj ñan uwaak ilo juon wãween eineem̦m̦an.—w23.09, peij 17.

Ta eo jemaroñ katak jãn Meri ikijjeen ad bõk kõkajoor?

Ke Meri ear jel̦ã bwe enaaj jinen Messaia eo, ear bõk kõkajoor jãn ro jet. Gebriel im Elisabet rar kõkajoore Meri. Kõj bareinwõt jemaroñ bõk kõkajoor jãn rũttõmak ro jeid im jatid.—w23.10, peij 15.

Ewi wãween an Jeova uwaaki jar ko ad?

Ej kallim̦ur bwe enaaj roñjake jar ko ad im lale wãween aer ekkejell̦o̦k ippãn karõk ko an. (Jrm. 29:12) Meñe emaroñ uwaake jar ko rej ãinl̦o̦kwõt juon ilo wãween ko reoktak jãn doon, ak enaaj aolep iien jipañ kõj.—w23.11, peij 21-22.

Ilo Rom 5:​2, Paul ej kõnono kõn “kõjatdikdik,” innem etke ear bar kõnono kõn kõjatdikdik ilo eoon 4?

Jinoin an juon armej roñ kõn ennaan eo em̦m̦an, emaroñ wõr an kõjatdikdik ñan mour ijin ioon lal̦ ilo juon pedetaij. Bõtab ilo an jelm̦ae eñtaan ko, kijenmej wõt, im kile an Anij buñbũruon ippãn, el̦apl̦o̦k an lõke bwe enaaj jejjet kũtien kõjatdikdik eo an im el̦apl̦o̦k an kaorõke.—w23.12, peij 12-13.