Rijjilõk Paul ear jejel̦o̦k ñan Timote, eo ear bareinwõt juon eo ej lale eklejia im ba: “Ij jiroñ eok im̦aan mejãn Anij im Christ Jesus im enjel̦ ro em̦õj kããlõt er, bwe kwõn l̦oore naanin jiroñ kein ilo ejjel̦o̦k jep ak kalijekl̦o̦k.”—1 Tim. 5:21.

M̦oktata, jenaaj etale wõn ro rejjab maroñ uwaan enjel̦ rein. Alikkar bwe enjel̦ rein rejjab jitõñl̦o̦k ñan ro 144,000. Ke Paul ear jejel̦o̦k ñan Timote, ejjañin kar wõr rũkkapit ro me rar jerkakpeje ñan lañ. Rijjilõk ro im rũkkapit ro jet rejjañin kar erom jetõb ilo tõre in. Kõn men in, “enjel̦ ro em̦õj kããlõt er” ear jab maroñ jitõñl̦o̦k ñan er.—1 Kor. 15:​50-54; 1 Tes. 4:​13-17; 1 Jon 3:2.

Bareinwõt, “enjel̦ ro em̦õj kããlõt er” rejjab maroñ jitõñl̦o̦k ñan enjel̦ ro me rar jab pokake ilo iien Ibwijleplep eo. Enjel̦ rein rar jait ippãn Setan, erom tim̦on̦ ro, im rar ri-kõjdat ro an Jesus. (Jen. 6:2; Luk 8:​30, 31; 2 Pit. 2:4) Ilo raan ko rej pãd im̦aan, renaaj kalbuuj ilo juon abyss ium̦win 1,000 iiõ im tokãlik naaj ko̦kkure er ekoba Tepil̦ eo.—Jud 6; Rev. 20:​1-3, 10.

“Enjel̦ ro em̦õj kããlõt er” me Paul ear kwal̦o̦k kake remaroñ jitõñl̦o̦k ñan enjel̦ ro retiljek ilañ me rej rejetake “Anij im Christ Jesus.”

Elõñ to̦ujin im to̦ujin enjel̦ ro retiljek. (Hib. 12:​22, 23) Jejjab aikuj l̦õmn̦ak bwe ewõr juon wõt jerbal ñan aolep enjel̦ ro ilañ. (Rev. 14:​17, 18) Ñan waanjoñak, Jeova ear kajjitõk ippãn juon wõt enjel̦ ñan m̦an 185,000 rũttarin̦ae ro an Assiria. (2 Kñ. 19:35) Jet enjel̦ ro remaroñ kar bõk jerbal eo ñan “jol̦o̦k jãn Aelõñ eo an [Jesus] aolep armej ro rej kõm̦m̦an an ro jet jerawiwi im ro rej kõm̦m̦ani men ko renana.” (Matu 13:​39-41) Enjel̦ ro jet remaroñ “aintok ro kar kããlõt er” ak rũkkapit ro ñan aer pãd ilañ. (Matu 24:31) Im kar kakien enjel̦ ro jet ñan “kõjparok [kõj] ilo ial̦ ko [ad] otemjej.”—Sam 91:11; Matu 18:10; keidi Matu 4:11; Luk 22:43.

“Enjel̦ ro em̦õj kããlõt er” me 1 Timote 5:21 ej kwal̦o̦k kake emaroñ jitõñl̦o̦k ñan enjel̦ ro rej kõm̦m̦ani jerbal ko rejejuwaer me rej ekkejell̦o̦k ippãn armej ro an Anij. Ilo eoon ko ipel̦aakin eoon in, Paul ear lel̦o̦k naanin kakapilõk ko remãlõtlõt kõn wãween an em̦m̦aan ro rej lale eklejia kõm̦m̦ani eddo ko aer, im bwe ro ilo eklejia eo rej aikuj kwal̦o̦k kautiej ñan em̦m̦aan rein. Paul ear ba bwe ro rej lale eklejia rejjab aikuj kwal̦o̦k “jep ak kalijekl̦o̦k,” im rejjab aikuj kõm̦m̦ani pepe ko ilo aer jab lukkuun kõl̦mãnl̦o̦kjen̦ m̦okta. Juon un eaorõk unin an em̦m̦aan rein l̦oore naanin kakapilõk in an Paul ej bwe rej kõm̦m̦ane jerbal eo aer “im̦aan mejãn Anij im Christ Jesus im enjel̦ ro em̦õj kããlõt er.” Kõn men in, ealikkar bwe kar lel̦o̦k ñan jet enjel̦ ro jerbal ko me rej ekkejel ippãn eklejia eo, ãinwõt ñan kõjparok ri-karejar ro an Anij, jipañ ilo jerbalin kwal̦o̦k naan, im kwal̦o̦k ñan Jeova ta ko rej loi.—Matu 18:10; Rev. 14:6.