Kwõmaroñ ke uwaaki kajjitõk kein ekkar ñan Naanin Keeañ ko an 2019?

Ta mel̦el̦ein kallim̦ur eo an Anij me ej ba: “Jabdewõt kein tarin̦ae em̦õj n̦a wãween n̦ae eok, ejãmin jeraam̦m̦an”? (Ais. 54:17)

Jemaroñ lõke bwe Jeova enaaj kõjparok kõj jãn men ko rekajoor me remaroñ ko̦kkure kõj ãinwõt ‘kõto jãn ro relãj’. (Ais. 25:4, 5) Ri-kõjdat ro ad reban lo tõprak ilo aer kajjioñ ko̦kkure kõj.​—w19.01, peij. 6-7.

Ewi wãween an kar Anij kõm̦m̦an ñan ri-Kenan ro im ri-Israel ro ilo aer kar jab pokake, kwal̦o̦k kõn ekajet jim̦we eo an?

Anij ear bõktok ekajet ioon ro me rar bõk kun̦aaer im kõm̦m̦ani m̦anit ko rettoon ak ko̦kkure kõrã ro im ajri ro. Ear kõjeraam̦m̦ane armej ro me rar pokake e im ro me ear jim̦we aer kõm̦m̦an ñan ro jet.​—w19.02, peij 22-23.

Ta eo jemaroñ kõm̦m̦ane ñe jej pãd ilo juon jikin me juon eo ejjab pãd ilo tõmak ej jar?

Jemaroñ ikõñ wõt im kwal̦o̦k kautiej ak jeban ba “amen” ak jibwe pein ro jet ilo iien jar eo. Jemaroñ make jar ilo bũruod.​—w19.03, peij 31.

Ewi joñan an nana ñe juon ej ko̦kkure ajri ro?

An juon ko̦kkure juon ajri ej juon jerawiwi n̦ae eklejia eo, ri-utiej ro ilo kien, im n̦ae Anij. Ilo jikin ko me ej juon kakien ñan ripoot ñan kien bwe em̦õj an juon ko̦kkure juon ajri, em̦m̦aan ro rej lale eklejia rej pokake.​—w19.05, peij 9-10.

Ewi wãween am̦ maroñ ukot ak kakõm̦anm̦anl̦o̦k l̦õmn̦ak ko am̦?

Buñtõn ne ko raorõk jemaroñ bũki ej: Kõnono ñan Jeova ilo jar. Kõl̦mãnl̦o̦kjen̦ im kõm̦m̦an bwe en juon mejãnkajjik ñan etale eok make. Kããlõt wõn ro kwõj aetõl er ilo mãlõtlõt.​—w19.06, peij 11.

Ta eo jemaroñ kõm̦m̦ane kiiõ ñan kõpooj kõj ñan iien eo renaaj matõrtõr im kaeñtaan kõj?

Jej aikuj kõkajoore kõtaan eo ad ippãn Jeova. Lõke bwe Jeova ej yokwe kõj im ejjãmin ilo̦k jãn kõj. Riit Baibõl̦ kajjojo raan im jar aolep iien. Lukkuun tõmak bwe jeraam̦m̦an ko jãn Aelõñ eo renaaj jejjet im m̦ool. Kakkilõklõki eoon ko im al in nõbar ko rem̦m̦antata ippam̦.​—w19.07, peij 2-4.

Ta ko jemaroñ kõm̦m̦ani ñan jipañ baam̦le ko ad bõk lo̦mo̦o̦r?

Elukkuun aorõk bwe jen kwal̦o̦k ad jel̦ã mel̦el̦e kõn eñjake ko aer, kõtl̦o̦k bwe m̦wil ko m̦wilid rem̦m̦an ren kõnono ñan kõj, im jen bar kijenmej im kwal̦o̦k jouj.​—w19.08, peij 15-17.

Ewi wãween ad lo ad kakkije, ãinwõt an kar Jesus kallim̦ur kake ilo Matu 11:28?

Em̦m̦aan ro rej lale kõj el̦ap yokwe ippãer, ro m̦õttad rej ro rem̦m̦antata, im jerbal eo ad ej jerbal eo em̦m̦antata.​—w19.09, peij 23.

Ewi wãween an Anij maroñ letok ñan kõj kõn̦aan eo im kajoor eo ñan em̦m̦akũt? (Pil. 2:13)

Ilo ad riiti Naanin Anij im kõl̦mãnl̦o̦kjen̦ kake, Anij emaroñ kõkajoore kõj, letok ñan kõj kõn̦aan eo ñan kõm̦anm̦an ankilaan im kajoor eo ñan em̦m̦akũt. Kajoor eo an emaroñ kal̦apl̦o̦k kapeel ko ewõr ippãd kadede.​—w19.10, peij 21.

Ta buñtõn ne ko rej menin mãlõtlõt jemaroñ bũki m̦okta jãn ad kõm̦m̦ane juon pepe el̦ap?

L̦alem buñtõn ne ko jemaroñ bũki ej: Lukkuun kappok mel̦el̦e. Jar kõn mãlõtlõt. Etale unin am̦ kõm̦m̦ani pepe ko am̦. Jel̦ã ta mejãnkajjik ko am̦. Kile bwe ewõr joñan maroñ ko am̦.​—w19.11, peij 27-29.

L̦õmn̦ak eo bwe juon jetõb ak an me ej pãd ilowaad ej mour m̦aanl̦o̦k wõt ãlikin ad mej, ej ke itok jãn ta eo Setan ear ba ñan Iv?

Emaroñ jab. Setan ear ba ñan Iv bwe eban mej, ear jab ba enaaj ãinwõt ñe emej. Ejjel̦o̦k juon iaan mel̦el̦e ko reriab jãn kabuñ ko jet remaroñ kar wõnm̦aanl̦o̦k ãlikin Ibwijleplep eo. Tõmak in bwe juon jetõb ak an ilowaad ej mour m̦aanl̦o̦k wõt ãlikin ad mej, emaroñ kar wal̦o̦k m̦okta jãn an kar Anij kajjeplõklõke armej ro me rar kalõke em̦ eutiej eo ilo Bebel.​—w19.12, peij 15.