1. Etke peptaij ej juon buñtõn ne elukkuun aorõk? (Lale pija eo itulõñ.)

KAJJOJO iiõ elõñ to̦ujin rũkkatak ro rej peptaij. Im elõñ iaan rein rej jo̦dikdik im ajri ro. Bõlen rein rar dik im rũttol̦o̦k ilo m̦ool eo. Kwõj ke juon iaan rein? El̦aññe aet, elukkuun em̦m̦an kããlõt in am̦. Etke? Kõnke juon Kũrjin ej aikuj peptaij bwe en maroñ bõk lo̦mo̦o̦r im mour ñan indeeo.​—Matu 28:19, 20; 1 Pi. 3:21, UBS.

2. Etke kwõjjab aikuj mijak in ajel̦o̦k mour n̦e am̦ ñan Jeova?

² Ke kwaar peptaij, Jeova ear jino kõjeraam̦m̦an eok ilo elõñ wãween ko. Bõtab, ekar wõr eddo ko rekããl kwaar aikuj kõm̦m̦ani. Ta eddo kein? Eokwe, ilo raan eo kwaar peptaij, em̦m̦aan eo jeid im jatid me ear kõm̦m̦ane katak in peptaij eo ear kajjitõk: “Ikijjeen katok in mour eo an Jesus Christ, em̦õj ke am̦ ukel̦o̦k jãn jerawiwi ko am̦ im ajel̦o̦k eok make ñan Jeova bwe kwõnaaj kõm̦anm̦an ankilaan?” Innem kwaar uwaak im ba aet. Kwaar kallim̦ur bwe kwõnaaj yokwe Jeova im bwe am̦ karejar ñane enaaj men eo eaorõktata ilo mour n̦e am̦. Kwõj ke ajl̦o̦k kõn am̦ kar kõm̦m̦ane kallim̦ur in elukkuun aorõk? Alikkar kwõjjab. Kwoban ajl̦o̦k ñan jidik kõn am̦ kar kããlõt bwe Jeova en tõl mour n̦e am̦.  L̦õmn̦ak m̦õk ñe kwaar jab kõm̦m̦ane men in. Juon eo ejjab kõtl̦o̦k an Jeova tõl e ej pãd ium̦win tõl eo an Setan. Im Tepil̦ eo ejjab kea kõn armej in ñan jidik jekdo̦o̦n ñe kwe. Ilo m̦ool, enaaj lukkuun m̦õn̦õn̦õ el̦aññe kwõnaaj luuji kõjatdikdik eo am̦ ñan bõk mour indeeo kõnke kwaar kããlõt ñan l̦oore e im kõjekdo̦o̦ne Jeova.

3. Ewi wãween an kar Jeova kõjeraam̦m̦an eok kõn am̦ kar ajel̦o̦k mour n̦e am̦ ñane?

³ L̦õmn̦ak m̦õk kõn wãween an kar Jeova kõjeraam̦m̦an eok kõn am̦ kar ajel̦o̦k mour n̦e am̦ ñane im peptaij. Kõnke em̦õj am̦ ajel̦o̦k mour n̦e am̦ ñan Jeova, kwõmaroñ lõke e im ba: ‘Jeova ej pãd ippa, innem ijãmin mijak, kõn men in ta eo armej remaroñ kõm̦m̦ane ñan eõ?’ (Sam 118:6, UBS) Alikkar bwe ejjel̦o̦k bar juon jeraam̦m̦an el̦apl̦o̦k jãn am̦ pãd ilo jait eo an Anij im jel̦ã bwe el̦ap an buñbũruon ippam̦.

4, 5. (1) Ñe juon ej ajel̦o̦k mour eo an ñan Jeova, etke kõtaan eo an ippãn Jeova ej eddo eo an make? (2) Ta mãlejjoñ ko aolep Kũrjin ro rej iiooni jekdo̦o̦n ewi joñan dettaer?

⁴ Jejjab aikuj l̦õmn̦ak bwe kõtaan eo ad ippãn Jeova ej ãinwõt juon men jemaroñ jolõte, ãinwõt ad jolõt juon bwidej ak wãto jãn baam̦le eo ad. Meñe kwõj jokwe wõt ippãn jinõm̦ im jem̦am̦ ak kõtaan eo am̦ ippãn Jeova ej eddo eo am̦ make. Etke eaorõk ñan keememej men in? Kõnke ejjel̦o̦k juon iaad ejel̦ã ta ko remaroñ mãlejjoñe tõmak eo ad ilju im jekl̦aj. Ñan waanjoñak, bõlen kwaar peptaij ke kwaar dik wõt. Bõtab kiiõ ke kwõj juon jo̦dikdik, ewõr eñjake ko kwõj jino bũki im apañ ko kwõj iiooni. Juon jiroñ ej ba: “Ekkã an juon ajri jab illu ak inepata bwe ej juon iaan Ri Kõnnaan ro an Jeova im bwe ejjab maroñ m̦õñã keek in bõõrte ilo jikin jikuul̦. Bõtab jejjo iiõ tokãlik ñe ejino kajoor kõn̦aan eo an ñan pãd ippãn bar juon, eñin iien eo enaaj aikuj lukkuun tõmak bwe an pokaki kien ko an Jeova aolep iien ej wãween eo em̦m̦antata.”

⁵ Bõtab, ejjab jo̦dikdik ro wõt renaaj jino iiooni mãlejjoñ ko ilo mour ko aer. Rũtto ro ej kab m̦õj aer peptaij rej bar iioon elõñ mãlejjoñ ko me rar jab kõtmãne kaki. Wãween kein remaroñ wal̦o̦k ikijjeen mourin pãlele, ãjmour, ak jerbal. Innem jekdo̦o̦n ewi joñan dettad, ak kõj kajjojo jej aikuj in tiljek wõt ñan Jeova ilo jabdewõt wãween ko jej iiooni.​—Jem. 1:12-14, UBS.

6. (1) Ta eo jej aikuj keememej ke jaar kallim̦ur im ajel̦o̦k mour ko ad ñan Jeova, im ta mel̦el̦ein men in? (2) Ta eo kwõj katak jãn Pilippai 4:11-13?

⁶ Bwe kwõn maroñ dãpij wõt am̦ tiljek, eaorõk ñan keememej bwe kwõnaaj aikuj kajejjete kallim̦ur eo am̦ ñan Jeova ilo aolepen am̦ mour. Mel̦el̦ein men in bwe kwaar kallim̦ur ñan Eo Eutiejtata bwe kwõnaaj karejar wõt ñane jekdo̦o̦n ta ko kwõnaaj iiooni, im jekdo̦o̦n ñe ro m̦õttam̦ ak rũtto ro jem̦am̦ im jinõm̦ renaaj bõjrak jãn aer karejar ñane. (Sam 27:10) Kõn men in, ilo aolep wãween ko kwõj iiooni, kajjitõk ippãn Jeova bwe en jipañ eok ñan kajejjete kallim̦ur eo am̦ ñane.​—Riit Pilippai 4:11-13, UBS.

7. Ta mel̦el̦ein an Baibõl̦ ba, “Kom̦win kate kom̦, kõn mijak im ekkõl, bwe kom̦win kab maroñ tõprak ami lo̦mo̦o̦r”?

⁷ Jeova ekõn̦aan bwe kwõn jem̦jerãik e. Ijoke, kwõj aikuj kate eok bwe en kajoor wõt jem̦jerã eo am̦ ippãn bwe kwõn maroñ bõk lo̦mo̦o̦r. Pilippai 2:12 (UBS) ej ba: “Kom̦win kate kom̦, kõn mijak im ekkõl, bwe kom̦win kab maroñ tõprak ami lo̦mo̦o̦r.” Kõn men in, jej aikuj lukkuun l̦õmn̦ak kõn ewi wãween ad naaj pãd epaake wõt Jeova im tiljek wõt ñane jekdo̦o̦n ta mãlejjoñ ko jej iiooni. Jejjab aikuj lõke kõj make im l̦õmn̦ak bwe jenaaj tiljek wõt. Keememej bwe ewõr ro rar karejar ñan Anij ium̦win elõñ iiõ, bõtab tokãlik rar jab dãpij wõt aer tiljek. Innem, ta jet iaan wãween ko remaroñ jipañ eok bwe kwõn maroñ bõk lo̦mo̦o̦r?

8. Ad katak Baibõl̦ ej kitibuj ad ta? Im etke eaorõk men in?

⁸ Bwe jen maroñ jem̦jerãik Jeova, jej aikuj roñjake e im kõnono ippãn. Wãween eo el̦aptata jemaroñ roñjake ainikien Jeova ej ilo ad katak Baibõl̦. Men in ekitibuj ad riit im kõl̦mãnl̦o̦kjen̦ kõn Naanin Anij im bok ko rej pedped ioon Baibõl̦. Bõtab, wãween ad katak Baibõl̦ eoktak jãn ñe jej katak im kakkilõklõk ñan juon teej jej pojakin bõke ilo jikuul̦. Ilo m̦ool, ad katak Baibõl̦ ej ãinwõt ñe jej etal ilo juon tũreep ekãitoktoklimo im elõñ mel̦el̦e ko rekããl jej loi im katak kõn Jeova. Wãween in enaaj kõm̦m̦an bwe jen epaakel̦o̦k Anij, im enaaj ruwaaktok ñan kõj.​—Jem. 4:8.

9. Ta kein katak ko rej jipañ eok ilo am̦ katak ippam̦ make?

⁹ Elõñ kein katak ko me doulul in an Jeova ej litoki im remaroñ jipañ eok ilo am̦ katak ippam̦ make. Ñan waanjoñak, ewõr jet kein katak ko ñan jo̦dikdik ro (Bible Study Activities) me remaroñ jipañ eok ñan l̦oori men ko kwõj katak jãn bwebwenato ko ilo Baibõl̦. Kwõnaaj lo katak kein ñe kwõj etal ñan weep jait eo jw.org ilo kajin Pãlle im lale ium̦win ijo ej ba “Teenagers.” Im ilo ijin, kwõnaaj loi kein katak ko an bok eo “Ta eo Baibõl̦ Ej Lukkuun Katakin Kõj?” ilo kajin Pãlle. Kein katak kein remaroñ kõkajoor tõmak n̦e am̦, im jipañ eok bwe kwõn jel̦ã kõmel̦el̦eik ro jet kõn tõmak eo am̦. Ilo Awake! eo an Eprõl̦ 2009, elõñ bar mel̦el̦e ko jet kõn kilen am̦ maroñ riit ak katak Baibõl̦ ippam̦ make (Young People Ask . . . How Can I Make Bible Reading Enjoyable?). Alikkar bwe am̦ katak im kõl̦mãnl̦o̦kjen̦ kõn men ko kwõj katak kaki, rej men ko raorõk kwõj aikuj kõm̦m̦ani ilo am̦ kate eok bwe kwõn maroñ bõk lo̦mo̦o̦r.​—Riit Sam 119:105.

10. Etke juon eo em̦õj an peptaij ej aikuj jar?

¹⁰ Ñe jej katak Baibõl̦, jej roñjake ainikien Jeova. Bõtab ñe jej jar, jej kõnono ippãn. Jejjab aikuj in l̦õmn̦ak bwe jar ej juon imminene bajjek, ak juon m̦anit jej kõm̦m̦ane bwe jen jeraam̦m̦an. Jar ej juon wãween jej kõnono ippãn Rũkõm̦anm̦an eo ad. Im Jeova ekõn̦aan roñjake jabdewõt men kokõn̦aan ba ñan e. (Riit Pilippai 4:6.) Innem ñe kwõj inepata kõn jabdewõt, Baibõl̦ ej ba bwe kwõn “jol̦o̦k menin eddo ko am̦ ioon Jeova.” (Sam 55:22) Elõñ milien ro jeid im  jatid remaroñ kam̦ool ñan eok bwe naanin kakapilõk in ear jipañ er, im alikkar bwe emaroñ bar jipañ eok.

11. Etke kwõj aikuj kam̦m̦oolol Jeova aolep iien?

¹¹ Bõtab, jejjab aikuj jar wõt ilo iien ko jej aikuji jipañ eo an Jeova. Baibõl̦ ej kakeememej kõj im ba: “Kom̦win kam̦m̦oolol Anij.” (Kol. 3:15, UBS) Jet iien kõn an l̦ap ad inepata kõn apañ ko jej iiooni, jejjab kile aolep jeraam̦m̦an ko ewõr ippãd. Innem em̦m̦an ñe kwõj kajjioñe men in: Kajjojo raan, l̦õmn̦ak kõn 3 men ko el̦ap am̦ m̦õn̦õn̦õ kaki, im kwal̦o̦k am̦ kam̦m̦oolol Jeova kõn men kein. Juon jo̦dikdik etan Abigail, me ear peptaij ke ear 12 an iiõ ej ba: “Ij kile bwe ej tõllo̦kũn Jeova bwe en l̦apl̦o̦k ad kam̦m̦oolole jãn jabdewõt armej ilo lal̦ in. Aolep iien jej aikuj kam̦m̦oolole kõn menin letok ko ej litok ñan kõj.” Jet iien Abigail ej kajitũkin e make kõn kajjitõk in ear roñ: ‘Ñe inaaj rujlo̦k ilju kõn men ko wõt iar kam̦m̦oolole Jeova kaki rainin, enaaj ewi joñan men kein?’ * (Lale kõmel̦el̦e eo itulal̦.)

12, 13. Ewi wãween am̦ kar kam̦ool im lo bwe Jeova ejouj im em̦m̦an, im etke elukkuun aorõk bwe kwõn keememej wãween an kar Jeova jipañ eok?

¹² Jeova ear jipañ Kiiñ Devid ñan kijenmej ium̦win elõñ apañ ko. Eñin unin Devid ear ba: “Kwõn edjoñ im lo bwe Jeova ejouj; em̦õn̦õn̦õ eo ej lõke E.” (Sam 34:8) Eoon in ej kwal̦o̦k bwe jej aikuj make kam̦ool im lo bwe Jeova ejouj im elukkuun em̦m̦an. Ñe kwõj riiti Baibõl̦ eo, bok ko ad, im pãd ilo kweilo̦k ko, kwõj katak kõn wãween an kar Anij jipañ ro jet bwe ren tiljek wõt. Bõtab ilo am̦ epaakel̦o̦k Jeova, elukkuun aorõk bwe kwõn bar lo wãween an jipañ eok. Em̦õj ke am̦ edjoñ im lo bwe Jeova ejouj im elukkuun em̦m̦an?

¹³ Ewõr juon wãween me em̦õj an aolep Kũrjin ro lo bwe Jeova elukkuun jouj im em̦m̦an. Ta in? Ej ilo an kar kũr kõj kajjojo bwe jen ruwaakl̦o̦k ñan e im ñan Nejin. Jesus ear ba: “Ejjel̦o̦k en̦ emaroñ itok ñan ippa el̦aññe Jema ejjab kõmaroñe.” (Jon 6:65, UBS) Kwõj ke tõmak bwe Jeova ear karuwaakl̦o̦k eok ñane? Ke ta, kwõj ke l̦õmn̦ak bwe Jeova ear karuwaakl̦o̦k rũtto ro jinõm̦ im jem̦am̦ ñan e im kwõj baj l̦oore wõt er? Eokwe keememej bwe ke kwaar ajel̦o̦k mour eo am̦ ñan Jeova im peptaij, kwaar kaalikkar bwe ewõr juon am̦ jem̦jerã ejejuwaan ippãn. Eñin unin el̦apl̦o̦k an epaake eok im jel̦ã kajjiem̦. Baibõl̦ ej ba: “El̦aññe jabdewõt armej ej yokwe Anij, Anij ejel̦ã e.” (1 Ko. 8:3) Kõn men in, kaorõk ijo kun̦aam̦ aolep iien ilowaan doulul eo an Jeova me em̦õj an lewaj ñan eok.

14, 15. Ewi wãween an jerbalin kwal̦o̦k naan maroñ jipañ kõkajoorl̦o̦k tõmak eo am̦?

¹⁴ Bar juon wãween kwõmaroñ lo bwe Jeova ejouj im em̦m̦an, ej ñe kwõj lo an kaperan eok bwe kwõn kõnono ippãn ro jet kõn tõmak eo am̦ ilo kwal̦o̦k naan ak ilo jikin jikuul̦. Emaroñ pen ñan am̦ kwal̦o̦k naan ñan rijikuul̦ ro m̦õttam̦. Bõlen kwõmaroñ inepata kõn ta ko renaaj ba ak kõm̦m̦ani ñe kwõj kwal̦o̦k naan ñan er. Im emaroñ l̦apl̦o̦k am̦ mijak in kwal̦o̦k kõn tõmak eo am̦ im̦aan mejãn elõñ armej. Ak ta eo emaroñ jipañ eok?

¹⁵ M̦okta, l̦õmn̦ak kõn unin am̦ tõmaki katak ko. El̦aññe ewõr ilo kajin eo am̦ kein katak ko an jo̦dikdik ro ilo weep jait eo jw.org, em̦m̦an bwe kwõn kortokjãer im kõjerbali. Kein katak kein remaroñ jipañ eok ñan l̦õmn̦ak kõn men ko kwõj tõmaki, unin am̦ tõmaki, im wãween am̦ maroñ kõmel̦el̦eik ro jet kõn tõmak eo am̦. Innem el̦aññe kwõj lukkuun tõmak katak ko im kwaar bõk iien ñan kõpooji l̦o̦k im̦aan, men in enaaj kõm̦m̦an  bwe kwõn kõn̦aan kwal̦o̦k ñan ro jet kõn Jeova.​—Jer. 20:8, 9.

16. Ta eo emaroñ jipañ eok bwe kwõn peran in kõnono ñan ro jet kõn tõmak eo am̦?

¹⁶ Meñe em̦õj kadede am̦ kõppojakl̦o̦k im̦aan, ak bõlen kwõmaroñ mijak im ikkũm̦kũm̦ wõt in kõmel̦el̦eik ro jet kõn tõmak eo am̦. Juon jeid im jatid jiroñ 18 an iiõ im ear peptaij ke ear 13 an iiõ, ej ba: “El̦ap aõ tõmaki katak ko bõtab jet iien elukkuun pen aõ kõmel̦el̦eiki im kwal̦o̦k kaki ñan ro jet.” Innem ta eo jiroñ in ear kõm̦m̦ane? Ej ba: “Ij kajjioñ bwebwenato bajjek ippãn rijikuul̦ ro m̦õtta. Kõnke ekkã aer m̦õn̦õn̦õ in bwebwenato kõn men ko rej kõm̦m̦ani, men in ear jipañ eõ ñan kile bwe ijjab aikuj ãliklik in bar bwebwenato kõn men ko ij kõm̦m̦ani. Kõn men in ñe ij bwebwenato ippãer, ij kwal̦o̦k wõt ilo tukadu kõn men ko iar kõm̦m̦ani. Ñan waanjoñak, ij jino bwebwenato ippãer im ba, ‘Inne, ke iar kwal̦o̦k naan, iar . . . ’ Innem ij wõnm̦aanl̦o̦k im kwal̦o̦k bwebwenato eo meñe ejjab kõn Baibõl̦. Meñe ijjab kwal̦o̦k kõn juon katak ilo Baibõl̦ ak ekkã aer kõn̦aan jel̦ã ta ko ij kõm̦m̦ani ñe ij kwal̦o̦k naan, im jet iien rej kajjitõk kõn men in. Ilo an l̦apl̦o̦k aõ kõm̦m̦ane wãween in, ekõm̦m̦an bwe en pidodo aõ kõnnaan ippãn ro jet kõn tõmak e aõ. Im ãlikin, ilukkuun m̦õn̦õn̦õ im em̦m̦an aõ mour!”

17. Ta ko remaroñ bar jipañ eok ñan kõnono ippãn ro jet kõn tõmak eo am̦?

¹⁷ Ñe ro jet renaaj kile bwe el̦ap am̦ kautiej im kea kake er, enaaj bar pidodo aer kautiej eok im tõmak n̦e am̦. Ñan waanjoñak, Olivia, eo me 17 an iiõ im ear peptaij ke ear dik wõt, ej ba: “Ekkã aõ mijak im l̦õmn̦ak bwe ñe inaaj jino kõnono ippãn ro jet kõn Baibõl̦, renaaj ba bwe ilukkuun kõttõmakmak.” Bõtab, Olivia ear jino ukot wãween an l̦õmn̦ak. Ijello̦kun an l̦õmn̦ak wõt kõn an mijak, ear ba: “Elõñ jo̦dikdik ro im ro reddik ilo jikin jikuul̦ rejjab lukkuun jel̦ã kõn Ri Kõnnaan ro an Jeova. Im ijo wõt remaroñ iioon Ri Kõnnaan ro an Jeova im jel̦ã kajjier ie ej ilo jikin jikuul̦. Kõn men in, men ko jej ba im kõm̦m̦ani renaaj jelõt wãween aer l̦õmn̦ak kõn kõj. Ñan waanjoñak, ta el̦aññe jej ãliklik im epen ad kõnono ñan ro jet kõn tõmak eo ad, ak jej kwal̦o̦k ad jook ñe jej kõnnaan ippãer? Eokwe, remaroñ l̦õmn̦ak bwe jejjab m̦õn̦õn̦õ in kwal̦o̦k bwe jej juon iaan Ri Kõnnaan ro an Jeova. Bareinwõt, emaroñ jab em̦m̦an wãween aer kõnnaan ñan kõj im remaroñ jab itoklimo in roñjake kõn ad ãliklik im mijak. Bõtab, el̦aññe jej kwal̦o̦k ad peran im kaalikkar bwe jej lukkuun tõmaki katak ko jej bwebwenato ippãer kaki, emaroñ l̦apl̦o̦k aer kautiej kõj im remaroñ m̦õn̦õn̦õ in roñjake.”

18. Ta ko kwõj aikuj kate eok ñan kõm̦m̦ani bwe kwõn maroñ bõk lo̦mo̦o̦r?

¹⁸ Em̦õj am̦ katak im lo bwe ej juon am̦ eddo eaorõk ñan am̦ kate eok bwe kwõn maroñ bõk lo̦mo̦o̦r. Innem ñan am̦ maroñ kõm̦m̦ane men in, kwõj aikuj riit im kõl̦mãnl̦o̦kjen̦ kõn Naanin Anij, jar ñan Jeova, im lukkuun l̦õmn̦ak kõn aolep wãween ko ear jipañ eok ilo mour n̦e am̦. Am̦ kõm̦m̦ani men kein enaaj jipañ eok bwe en l̦apl̦o̦k am̦ tõmak bwe Jeova ej juon Jeram̦. Wãween in enaaj kõm̦m̦an bwe kwõn kõn̦aan kõnono ñan ro jet kõn tõmak eo am̦.​—Riit Sam 73:28, UBS.

19. Etke elukkuun aorõk ñan am̦ kate eok bwe kwõn maroñ bõk lo̦mo̦o̦r?

¹⁹ Jesus ear ba: “El̦aññe jabdewõt armej ekõn̦aan l̦oor Eõ, en make kaarmejjete . . . im l̦oor Eõ.” (Matu 16:24) Alikkar bwe kajjojo Kũrjin rej aikuj ajel̦o̦k mour ko aer ñan Jeova im peptaij bwe ren maroñ l̦oor Jesus. Ad kõm̦m̦ane men in ej kõpel̦l̦o̦k juon ial̦ ñan ad maroñ bũki jeraam̦m̦an ko kiiõ, im mour indeeo ilo jukjukun pãd eo ekããl an Anij. Kõn men in, wõnm̦aanl̦o̦k wõt im kate eok joñan wõt am̦ maroñ ñan bõk lo̦mo̦o̦r.