Kwaar ke lukkuun riiti Naan in Keeañ ko an allõñ ko l̦o̦k? Lale kwõmaroñ ke uwaake kajjitõk kein:

Etke rũtto ro me rar em̦m̦akũttok jãn aelõñ eo aer rej aikuj lukkuun l̦õmn̦ak kõn ta kajin eo enaaj jipañ ajri ro nejier ñan kõkajoorl̦o̦k tõmak eo aer?

Ajri ro remaroñ katak kajin eo an aelõñ eo me baam̦le eo aer rar em̦m̦akũtl̦o̦k ñane ilo jikin jikuul̦ ak jãn ro rej pãd ibwiljier. Emaroñ em̦m̦an im l̦ap an jipañ ajri eo el̦aññe ejel̦ã ruo kajin. Jemãn im jinen ajri ro rej aikuj lale ta kajin eo enaaj jipañ ajri ro ñan mel̦el̦e kõn m̦ool eo im kõkajoorl̦o̦k tõmak eo aer. Emaroñ ilo eklejia eo me rej kõjerbal kajin eo an aelõñ eo baam̦le eo aer ej pãd ie, ak ilo eklejia eo me rej kõjerbal kajin eo an aelõñ eo rar em̦m̦akũt jãne. Kõn men in, jemãn im jinen ajri ro me rej Kũrjin rej likũt aikuj ko an ajri ro nejier m̦okta jãn kõn̦aan ko aer make.​—w17.05, peij 9-11.

Ke Jesus ear kajjitõk ippãn Piter, “Kwõj ke yokwe eõ el̦apl̦o̦k jãn men kein?” ta “men kein” Jesus ear kõnnaan kaki? (Jon 21:15, UBS)

“Men kein” Jesus ear kõnnaan kaki remaroñ kar jitõñl̦o̦k ñan ek ko kun̦aaer ak peejnej in eo̦ñõd eo. Ãlikin an kar Jesus mej, Piter ear jepl̦aak ñan peejnej in eo̦ñõd eo an. Kũrjin ro rej aikuj lukkuun etale er make im lale el̦aññe el̦apl̦o̦k aer kaorõk jerbal ko aer.​—w17.05, peij 22-23.

Etke Ebream ear kajjitõk ippãn lio pãleen bwe en ba bwe ej lio jatin? (Jen. 12:10-13, UBS)

Ilo m̦ool, Sera ear lukkuun jatin Ebream kõnke kar juon wõt jemãerro, bõtab ekajjo jineerro. Bõtab, el̦aññe Sera ear kwal̦o̦k bwe Ebream ej l̦eo pãleen, remaroñ kar m̦an Ebream, innem eban kar wal̦o̦k ine eo jãn ineen Ebream me Anij ear kallim̦uri e kake.​—wp17.3, peij 14-15.

Ta eo Elias Hutter ear kõm̦m̦ane bwe en jipañ ro rar kõn̦aan katak kajin Hibru?

Ear kõn̦aan jipañ rijikuul̦ ro bwe ren maroñ kile naanin Hibru ko (root word) ilo Baibõl̦ me em̦õj aer kobaiki ippãn jet lõta me rej pãd ilo jinoin (prefix) ak jem̦l̦o̦kin (suffix) naan ko. Kõn men in, ear kõmeeje naanin Hibru ko, ak ear kõjãmeeje lõta ko rej pãd ilo jinoin ak jem̦l̦o̦kin naan kein. Ilo ukokin Baibõl̦ eo etan New World Translation of the Holy Scriptures​—With References ej bar kõm̦m̦ane ejja men in wõt ilo kõmel̦el̦e ko itulal̦in eoon ko.​—wp17.4, peij 11-12.

Ta jet iaan naan in kakapilõklõk ko juon Kũrjin ej aikuj l̦õmn̦ak kaki ñe ewõr juon an bu bwe en kõjparok e make jãn armej ro jet?

L̦õmn̦ak m̦õk kõn jet iaaer: (1) Mour elukkuun aorõk ippãn Anij. (2) Jesus ear jab rõjañ rũkal̦ooran bwe ren bõk jãje bwe ren kõjparok er make. (Luk 22:36, 38, UBS) (3) Baibõl̦ eo ej ba bwe jen noe jãje ko ad bwe ren kein poktak bwidej. (4) Mour el̦apl̦o̦k an aorõk jãn m̦weiuk. (5) Jekõn̦aan likũt juon joñak em̦m̦an im kautiej l̦õmn̦ak ko an ro jet. (2 Ko. 4:2)​—w17.07, peij 31-32.

Etke eoktak bwebwenato ko kõn mour eo an Jesus ke ear dik ilo bok in Matu jãn bwebwenato ko ilo bok in Luk?

El̦apl̦o̦k an Matu bwebwenato kõn men ko rar wal̦o̦k ñan Josep. Ñan waanjoñak, Matu ear kwal̦o̦k kõn l̦õmn̦ak eo an Josep ke ear roñ bwe Meri ebõro̦ro im bareinwõt ke juon enjel̦ ear kakkõle bwe en ko ñan Ijipt innem bar jepl̦aak tokãlik. Ak el̦ap wõt an Luk bwebwenato kõn Meri. Ear kwal̦o̦k kõn iien eo ear lol̦o̦k Elisabet im bar l̦õmn̦ak ko an Meri ke l̦adik eo Jesus ear pãd wõt ilo tampel̦ eo.​—w17.08, peij 32.

Ta men ko rar kõm̦m̦an bwe en pen an wõr Baibõl̦?

Naan im mel̦el̦e ko kar kõjerbali ñan je Baibõl̦ eo relukkuun oktak kiiõ. Kõn an kar wõr oktak ko ilo lal̦ in jãn kien ko, men in ear kõm̦m̦an bwe en oktak kajin ko armej rekõn kõjerbali. Bareinwõt, ewõr ro rar jum̦ae an ro jet ukote Baibõl̦ eo ñan kajin ko armej remel̦el̦e kaki.​—w17.09, peij 19-21.

Ewõr ke juon enjel̦ ej lale im kõjparok kõj?

Ejjel̦o̦k. Jesus ear kõnnaan ñan rũkal̦oor ro an im ba bwe enjel̦ ro ilañ rej pãd im̦aan mejãn Anij iien otemjej. (Matu 18:10, UBS) Jesus ear ba men in ñan kaalikkar bwe enjel̦ ro rej itoklimo kõn rũkal̦oor ro an, im ejjab bwe rej lale im kõjparok kajjojo iaaer ilo juon wãween ekabwilõñlõñ.​—wp17.5, peij 5.

Kain yokwe rot eo el̦aptata im eaorõktata?

Yokwe eo el̦ap im eaorõktata ej pedped ioon ad l̦oori naanin kakapilõklõk ko an Anij im yokwe in ej jitõñl̦o̦k ñan naanin Grik eo etan, a·gaʹpe. Yokwe in ej kitibuj eñjake ko ad ñe jej lukkuun yokwe juon armej. Bõtab, ejjab juon eñjake wõt ak ej pedped ioon naanin kakapilõklõk ko ikijjeen ad jipañ ro jet im ejjab kõnke jekõn̦aan jabdewõt men jãn er.​—w17.10, peij 7.