1. Ta eo Jeova ear ba bwe enaaj wal̦o̦k ilo raan kein ad?

JEOVA ear kanaan kõn raan kein ad ilo an kar ba: “Joñoul ri-aelõñ ko renaaj etal ñan ippãn juon ri-Ju im ba, ‘Kõm kõn̦aan iwõj ippemi kõnke kõmar roñ ke Anij ej pãd ippemi.’” (Zek. 8:23) “Ri-Ju” eo ilo kanaan in ej jutak kõn ro me Jeova ear kapit er kõn jetõb kwõjarjar. Kar bar n̦aetan rein “Israel an Anij.” (Gal. 6:16) “Ri-aelõñ ko” joñoul ej jutak kõn ro me kõjatdikdik eo aer ej ñan mour indeeo ijin ioon lal̦. Rejel̦ã bwe em̦õj an Jeova kõjeraam̦m̦ane kumi in rũkkapit rein im rej watõk bwe ej juon jeraam̦m̦an ñan aer kabuñ ñane ippãn rein.

2. Ewi wãween an “ri-aelõñ ko” joñoul “etal ñan ippãn” rũkkapit ro?

² Meñe jejjab maroñ jel̦ã etan kajjojo iaan rũkkapit ro ijin ioon lal̦ ilo raan kein, ak ro ewõr aer kõjatdikdik in mour ioon lal̦ remaroñ “etal” ippãn rũkkapit rein. * (Lale kõmel̦el̦e eo itulal̦.) Ewi wãween? Baibõl̦ eo ej ba bwe “ri-aelõñ ko” joñoul renaaj “etal ñan ippãn [ak “jibwe tõrerein nuknuk an”, WGM] juon ri-Ju im ba, ‘Kõm kõn̦aan iwõj ippemi kõnke kõmar roñ ke Anij ej pãd ippemi.’” Jinoin eoon in ej kwal̦o̦k kõn juon ri-Ju. Bõtab jem̦l̦o̦kin eoon in ej kõjerbal naan  in “ippemi.” Mel̦el̦ein men in bwe ejjab juon wõt armej ej jutak ikijjeen aolepen kumi in rũkkapit ro. Ro im rejjab rũkkapit rej karejar ñan Jeova ippãn ro em̦õj kapit er. Ijoke, rejjab watõk rũkkapit ro ãinwõt ri-tõl ro aer, rej kile bwe Jesus ej eo ej Tõl.​—Matu 23:10.

3. Ta kajjitõk ko jenaaj uwaaki ilo katak in?

³ Kõnke ej wõr wõt Kũrjin rũkkapit ro ibwiljin armej ro an Anij rainin, jet remaroñ l̦õmn̦ak im ba: (1) En kar ewi wãween an rũkkapit ro watõk er make? (2) Ewi wãween ad aikuj kõm̦m̦an ñan ro rej m̦õñã bũreet im idaak wain ilo iien Kwõjkwõj eo? (3) Jej aikuj ke inepata el̦aññe elõñl̦o̦k oran ro rej m̦õñã bũreet im idaak wain? Katak in enaaj uwaaki kajjitõk kein.

4. Ta naanin kakkõl ko me rũkkapit ro rej aikuj lukkuun l̦õmn̦ak kaki ilo 1 Korint 11:27-29, im etke?

⁴ Rũkkapit ro rej aikuj lukkuun l̦õmn̦ak kõn naanin kakkõl ko ilo 1 Korint 11:27-29. (Riit.) Ewi wãween an juon rũkkapit kwal̦o̦k an jab kautiej ñe ej m̦õñã bũreet im idaak wain ilo iien Kwõjkwõj eo? Ej kõm̦m̦ane men in el̦aññe ej m̦õñã bũreet im idaak wain eo ak ejjab mour ekkar ñan kien ko an Jeova. (Hib. 6:4-6; 10:26-29) Rũkkapit ro rej kile  bwe rej aikuj dãpij wõt aer tiljek el̦aññe rekõn̦aan bõk “jinõkjeej eo kõn kũr eo jãn lañ an Anij ikijjeen Christ Jesus.”​—Pil. 3:13-16. 

5. En kar ewi wãween an Kũrjin rũkkapit ro watõk er make?

⁵ Jetõb kwõjarjar eo an Jeova ej jipañ ri-karejar ro an bwe en ettã bũrueer, im jab utiej bũrueer. (Eps. 4:1-3; Kol. 3:10, 12) Innem, rũkkapit ro rejjab bõk eñjake eo bwe rem̦m̦anl̦o̦k jãn ro jet. Rejel̦ã bwe ejjab l̦apl̦o̦k an Jeova lel̦o̦k jetõb kwõjarjar eo an ñan rũkkapit ro jãn ri-karejar ro an jet. Rejjab l̦õmn̦ak bwe em̦wilal̦l̦o̦k jel̦ã eo aer kõn Baibõl̦ jãn ro jet. Im reban ba ñan bar juon bwe em̦õj kapiti im ej aikuj jino m̦õñã bũreet im idaak wain ilo iien Kwõjkwõj eo. Ijello̦kun aer ãindein, rej kwal̦o̦k etta bõro ilo aer kile bwe Jeova wõt ej kũr armej ro bwe ren etal ñan lañ.

6. Ekkar ñan 1 Korint 4:7, 8 en kar ewi wãween an Kũrjin rũkkapit ro mour im kõm̦m̦an?

⁶ Meñe rũkkapit ro rej kile bwe ej juon jeraam̦m̦an ñan bõk kũr in ñan etal ñan lañ, ak rejjab kõtmãne bwe ro jet ren kautiej er. (Pil. 2:2, 3) Bareinwõt, rejel̦ã bwe ilo iien eo Jeova ear kapit er, ear jab kõjjel̦ãik ro jet kake men in. Kõn men in, juon rũkkapit ejjab bwilõñ ñe ro jet rejjab m̦õkaj im tõmak bwe em̦õj kapiti. Ej kile bwe Baibõl̦ eo ej ba bwe jen jab m̦õkaj im tõmake juon eo ej ba bwe Anij ear lel̦o̦k ñane juon eddo ejejuwaan. (Rev. 2:2) Juon Kũrjin rũkkapit eban ba ñan ro ej kab itõn iioon er bwe ej juon rũkkapit ñan kõm̦m̦an bwe armej ro ren kile im nõbare. Im alikkar bwe eban kõmjãje kõn men in ñan ro jet.​—Riit 1 Korint 4:7, 8.

7. Ta eo rũkkapit ro renaaj kõjparok er jãn aer kõm̦m̦ane, im etke?

⁷ Rũkkapit ro rejjab l̦õmn̦ak bwe rej aikuj aetõl wõt rũkkapit ro jet ãinwõt ñe ewõr juon aer make doulul jidikdik. Rejjab pukotl̦o̦k rũkkapit ro jet im kõjatdikdik bwe renaaj kõnono kõn wãween kar kapit er, ak ejaak kurub ko aer make bwe ren maroñ katak kõn Baibõl̦ eo ippãn doon. (Gal. 1:15-17) Eklejia eo eban kar bõrokuk el̦aññe rũkkapit ro rar kõm̦m̦ani men kein. Ilo m̦ool ñe en kar ãindein ren kar jerbal n̦ae jetõb kwõjarjar, eo ej jipañ armej ro an Anij bwe en wõr aenõm̦m̦an im bõrokuk.​—Rom 16:17, 18.

8. Etke kwõj aikuj kõjparok wãween am̦ kõm̦m̦an ñan ro rej m̦õñã bũreet im idaak wain? (Bar lale kõmel̦el̦e eo.)

⁸ En ewi wãween ad kõm̦m̦an ñan rũkkapit ro jeid im jatid? Ejjab jim̦we ñan ad kautieje  juon armej el̦e jãn joñan, meñe ej juon rũkkapit jatin Christ. (Matu 23:8-12) Ñe Baibõl̦ ej kõnono kõn em̦m̦aan ro rej lale eklejia, ej rõjañ kõj ñan anõke ak “l̦oore tõmak eo aer,” bõtab ejjab ba bwe jemaroñ kõm̦m̦an bwe jabdewõt armej en ad ri-tõl. (Hib. 13:7) Ilo m̦ool, Baibõl̦ ej ba bwe ewõr ro ej “tõllo̦kier bwe ren bõk kautiej bõtab en ruo alen l̦apl̦o̦k.” Ak unin men in ej kõnke “em̦m̦an wãween aer tõl” im “el̦ap aer kate er ilo kõnono im katakin,” ejjab kõnke er rũkkapit. (1 Tim. 5:17) Ñe el̦e jãn joñan ad nõbare im kautieje rũkkapit ro, jemaroñ kajook er. * (Lale kõmel̦el̦e eo itulal̦.) Ak men eo enanal̦o̦k, ej eñin, jemaroñ kõm̦m̦an bwe ren jino utiej bũrueer. (Rom 12:3) Ejjel̦o̦k iaad enaaj kar kõn̦aan kõm̦m̦ane juon men me enaaj kaal an juon iaan rũkkapit ro jatin Christ kõm̦m̦ane kain bõd rot in el̦ap!​—Luk 17:2.

9. Ewi wãween ad kwal̦o̦k bwe jej kautiej Kũrjin rũkkapit ro?

⁹ Ewi wãween ad kwal̦o̦k bwe jej kautiej ro em̦õj an Jeova kapit er? Jeban kajjitõk ippãer kõn ewi wãween kar kapit er? Men in ej juon men me aer make, im ejjab juon men ekkar bwe jen jel̦ã kake. (1 Tes. 4:11; 2 Tes. 3:11) Im jejjab aikuj kajju l̦õmn̦ak bwe eo pãleer, rũtto ro jemãer im jineer, ak ro jet ilo baam̦le eo aer rej bar rũkkapit. Juon armej ejjab jolõte kõjatdikdik eo ñan mour ilañ jãn ro ilo baam̦le eo an. Ej jolõt men in jãn Anij. (1 Tes. 2:12) Jej aikuj bar kõjparok kõj jãn ad kwal̦o̦k kajjitõk ko me remaroñ kõmetak ro jet. Ñan waanjoñak, jeban kajjitõk ippãn kõrã eo pãleen em̦m̦aan eo em̦õj kapiti kõn wãween an eñjake kõn an naaj mour indeeo ijin ioon lal̦ ak ejako l̦eo pãleen iturin. Ilo m̦ool, jemaroñ lukkuun lõke bwe ilo lal̦ eo ekããl, Jeova enaaj kajejjet ‘kõn̦aan ko an men otemjej remour.’​—Sam 145:16.

10. Ewi wãween ad kõjparok kõj make ñe jej lale bwe en jab l̦e jãn joñan ad kautiej ro jet?

¹⁰ El̦aññe jej kõjparok bwe jen jab kõm̦m̦an ñan rũkkapit ro ãinwõt ñe raorõkl̦o̦k jãn ro jet, eokwe jej bar kõjparok kõj make. Ewi wãween? Baibõl̦ eo ej ba bwe jet rũkkapit ro remaroñ jab dãpij aer tiljek. (Matu 25:10-12; 2 Pit. 2:20, 21) Bõtab, el̦aññe jej kõjparok bwe en jab l̦e jãn joñan ad kautiej ro jet, jeban l̦oore er, meñe er rũkkapit, ak ro me ebwe an lõñ rejel̦ã kajjier, ak eto aer karejar ñan Jeova. (Jud 16) Innem, el̦aññe renaaj oktak im jab dãpij aer tiljek ak ilo̦k jãn eklejia eo, eban jako ad tõmak ilo Jeova ak jeban bõjrak jãn ad karejar ñane.

11. Ta eo ej wal̦o̦k kõn oran ro rej m̦õñã bũreet im idaak wain ilo iien Kwõjkwõj eo?

¹¹ Ium̦win elõñ iiõ ko, ear dikl̦o̦k wõt oran ro rej m̦õñã bũreet im idaak wain. Bõtab ilo iiõ ko rej kab mootl̦o̦k, ej kab lõñl̦o̦k wõt oran rein kajjojo iiõ. Jej aikuj ke inepata kõn men in? Jaab. Jen lale jet men ko raorõk ñan ad keememeji.

12. Etke jejjab aikuj inepata kõn joñan oran ro rej m̦õñã bũreet im idaak wain ilo iien Kwõjkwõj eo?

¹² “Jeova ejel̦ã wõn ro rej doon.” (2 Tim. 2:19) Em̦m̦aan ro jeid im jatid me rej bõnbõn oran ro rej m̦õñã bũreet im idaak wain reoktak jãn Jeova kõnke rejjab jel̦ã wõn ro elukkuun m̦ool aer rũkkapit. Oran in ej kitibuj ro me rej l̦õmn̦ak er rũkkapit ak ilo m̦ool rejjab. Ñan waanjoñak, jet ro rekõn m̦õñã bũreet im idaak wain rar bõjrak tokãlik. Ro jet  emaroñ wõr aer nañinmej ilo kõmãlij im ej kõm̦m̦an bwe ren tõmak bwe renaaj irooj ippãn Christ ilañ. Ealikkar, jejjab lukkuun jel̦ã jete oran rũkkapit ro ilo lal̦ in.

13. Baibõl̦ ej ke kwal̦o̦k kõn naaj jete oran rũkkapit ro ilo iien eo enaaj jino eñtaan eo el̦ap?

¹³ Enaaj wõr rũkkapit ro ilo elõñ iaan jikin ko ilo lal̦ in ilo iien eo Jesus enaaj itok im bõk er ñan ilañ. (Matu 24:31) Baibõl̦ ej ba bwe ilo raan ko ãliktata, enaaj wõr wõt jejjo rũkkapit ro ilo lal̦ in. (Rev. 12:17) Bõtab ejjab kwal̦o̦k jete oraer ilo iien eo eñtaan eo el̦ap enaaj jinoe.

14. Ãinwõt an Rom 9:11, 16 kwal̦o̦k, ta eo jej aikuj mel̦el̦e kake ikijjeen an Jeova kããlõt rũkkapit ro?

¹⁴ Jeova eo ej pepe ñããt eo enaaj kããlõt rũkkapit ro. (Rom 8:28-30) Jeova ear jino kããlõt rũkkapit ro ãlikin an kar Jesus jerkakpeje. Ilo tõre ko an rijjilõk ro, emaroñ aolep Kũrjin ro rem̦ool rar rũkkapit. Ilo iiõ ko tokãlik, elõñ ro me rar ba bwe er Kũrjin rar jab lukkuun l̦oore Christ. Meñe ãindein, ak ilowaan kar iiõ kein Jeova ear kapiti jet iaan Kũrjin ro rem̦ool. Rein rar ãinwõt wiit ko Jesus ear ba bwe renaaj eddek ibwiljin mar ko. (Matu 13:24-30) Ilo raan kein ãliktata, Jeova ej wõnm̦aanl̦o̦k wõt im kããlõt armej ro rej uwaan 144,000. * (Lale kõmel̦el̦e eo itulal̦.) Innem el̦aññe Anij ej pepe in kããlõt jet iaan rein m̦okta wõt jãn an itok jem̦l̦o̦kin, jejjab aikuj pere mãlõtlõt eo an. (Riit Rom 9:11, 16.) * (Lale kõmel̦el̦e eo itulal̦.) Jej aikuj kõjparok bwe jen jab arin ri-jerbal ro Jesus ear kwal̦o̦k kake er ilo juon  iaan waanjoñak ko an. Rein rar aol̦ kõn wãween an irooj eo aer kõm̦m̦an ñan ro rar jino jerbal ilo awa eo ãliktata.​—Matu 20:8-15.

15. Aolep rũkkapit ro rej ke m̦õttan “ri-karejar eo etiljek im mãlõtlõt” me Matu 24:45-47 ej kwal̦o̦k kake? Jouj im kõmel̦el̦e.

¹⁵ Ejjab aolep ro ewõr aer kõjatdikdik ñan mour ilañ rej m̦õttan “ri-karejar eo etiljek im mãlõtlõt.” (Riit Matu 24:45-47.) Ãinwõt ilo kar tõre ko an rijjilõk ro, rainin Jeova im Jesus rej kõjerbal jejjo iaan em̦m̦aan ro jeid im jatid ñan naajdik ak katakin elõñ armej. Kar kõjerbal jejjo wõt iaan Kũrjin rũkkapit ro ilo kar tõre ko an rijjilõk ro ñan jei Jeje ko jãn Kajin Grik. Rainin, jejjo wõt iaan Kũrjin rũkkapit ro ewõr aer eddo ñan lel̦o̦k ñan armej ro an Anij “kijeer ilo iien eo ejejjet.”

16. Ta eo kwaar katak jãn katak in?

¹⁶ Ta eo katak in ear katakin kõj? Jeova ear pepe in lel̦o̦k mour indeeo ñan enañin aolep armej ro an bwe ren mour ioon lal̦ in im ear kõm̦m̦an bwe jet ren mour ilañ im tõl ippãn Jesus. Jeova ej kõjeraam̦m̦ane aolep ri-karejar ro an​—“ri-Ju” eo im “ri-aelõñ ko” joñoul​—im ej kõtmãne bwe ren aolep pokake kien ko an im tiljek ñane. Aolep rej aikuj kõttãik wõt bũrueer. Aolep rej aikuj karejar ñane ippãn doon ilo bõrokuk. Im aolep rej aikuj kate er bwe en wõr wõt aenõm̦m̦an ilo eklejia eo. Ilo ad epaakel̦o̦k jem̦l̦o̦kin, kõj aolep jen wõnm̦aanl̦o̦k wõt im karejar ñan Jeova im l̦oore Christ ãinwõt “juon wõt bwij.”​—Jon 10:16.