Kõn an ejjel̦o̦k on̦ããn bok im pija ko ad me rej pedped ioon Baibõl̦, jet remaroñ l̦õmn̦ak bwe ejjab nana ñan kõm̦m̦an kaape in men kein im likũti online ak ilo weepjait ko me jemaroñ illik pija ak mel̦el̦e ko kõn kõj make bwe ro jet ren loi. Bõtab wãween in ej n̦ae kon̦ eo kõn Kilen Kõjerbale * (Lale kõmel̦el̦e eo itulal̦.) weepjait eo ad im elõñ jorrããn ko em̦õj aer jarjar jãn men in. Ilo kon̦ in ñan Kilen Kõjerbale weepjait eo ad, ej lukkuun kaalikkar bwe ejjab mãlim an jabdewõt armej “post pija ko im bok ko ad online, kõjerbale kõkal̦l̦e eo ad, al ko im pijain alwõj ko, ak katak ko jãn weepjait eo ad im likũti ilo Internet (jabdewõt weepjait ko me rej share file ko ie, pijain alwõj ko, ak mel̦el̦e ko me armej rej loi).” Etke kar aikuj kõm̦m̦an mo̦ ñan men kein?

Aolep men ko ilo weepjait eo ad ewõr aer copyright, mel̦el̦ein bwe emo̦ ñan kõm̦m̦an kaape. Ro rar ilo̦k jãn doulul in im rej jum̦ae, ekoba rijum̦ae ro jet rej kõjerbal bok ko ad ilo weepjait ko aer ñan kaall̦o̦k Ri Kõnnaan ro an Jeova im ro jet. Rein rar kobaik katak ko jet aer make ilo weepjait kein ñan kõm̦m̦an menin an ririit ro pere katak ko ad. (Sam 26:4; JK. 22:5) Ro jet rar kõjerbal jet katak jãn bok ko ad ak kõkal̦l̦e eo jw.org im likũti ilo kein karreelel ko aer im wiakaki. Rej bareinwõt kõm̦m̦an aer app kake me jemaroñ taunl̦outi ñan jeel̦boon ko, iPad ko im ko ãierl̦o̦kwõt. Em̦õj ad kõm̦m̦an juon kon̦ ilo court bwe en jab mãlim an jabdewõt kõm̦m̦an kaape in aolep men ko ilo weepjait eo ad im kõjerbale kõkal̦l̦e eo an doulul in. (JK. 27:12) Bõtab, el̦aññe  jej kõtl̦o̦k an jabdewõt ekoba ro jeid im jatid kõjerbale kobban weepjait eo ad im likũti ilo bar jet weepjait, ak likũti kõkal̦l̦e eo jw.org ilo menin wiakake ko aer, enaaj pen an court rejetake kõj ñan bõbrae rijum̦ae ro im ripeejnej ro.

Ekauwõtata ñan taunl̦outi bok ko ad jãn weepjait ko jet ijello̦kun wõt jãn jw.org. Ro wõt im Jeova ear lel̦o̦k eddo eo ñan litok katak ko ej “rũkarejar eo etiljek im mãlõtlõt.” (Matu 24:45, UBS) Im weepjait ko wõt “rũkarejar eo etiljek im mãlõtlõt” ej kõjerbali ñan litok katak ko ej www.pr418.com, tv.pr418.com, im wol.pr418.com. Im ewõr wõt jilu ad app me jemaroñ taunl̦outi ñan men ko nejid. App kein rej JW Language^®, JW Library^®, im JW Library Sign Language^®. Jemaroñ lõke bwe ejjel̦o̦k jabdewõt lippijinjin ak kein karreelel ko jãn jukjukun pãd in an Setan repãd ilo men kein. El̦aññe jej bõk katak ko jãn weepjait ak app ko jet, jeban jel̦ã el̦aññe rar ikũrl̦o̦k ak kobaiktok katak ko rejjab m̦ool.​—Sam 18:26, UBS; 19:8, UBS.

Bareinwõt, el̦aññe jej likũt bok ko ad ilo weepjait ko me ewõr jikin an armej ro jei l̦õmn̦ak ko aer ie, wãween in ej n̦a jikin an rijum̦ae ro ejaak l̦õmn̦ak ko ñan pere doulul eo an Jeova. Jet jeid im jatid rar jino po im kõbauwe online im tokjãn aer kar ãindein ear kananaik etan Jeova. Men in ejjab juon wãween ekkar im em̦m̦an ñan “kajim̦we ro rej jum̦ae” ilo jouj. (2 Ti. 2:23-25, UBS; 1 Ti. 6:3-5, UBS) Bareinwõt, em̦õj etale im lo bwe ewõr jet rar kõm̦m̦an weepjait ko im likũti ium̦win etan doulul in kab Kumi eo ej Lale Aolep Eklejia ko an Ri Kõnnaan ro an Jeova, ak rejjab m̦ool. Rein rar bar sign up ñan weepjait ko ilo aer kõjerbale etan jet iaan em̦m̦aan ro rej tõl doulul in, ijoke ejjel̦o̦k juon iaan rein ewõr aer make weepjait ak account ilo weepjait ko me armej rej ilik pija im mel̦el̦e ko ie kõn er make.

Ad kwal̦o̦kl̦o̦k weepjait eo ad ñan armej ro ej juon wãween ñan kajeededl̦o̦k ‘ennaan eo em̦m̦an.’ (Matu 24:14, UBS) Jãn iien ñan iien rej kakõm̦anm̦anil̦o̦k kein jerbal ko ñan kwal̦o̦k naan im rej pãd ilo weepjait eo ad. Jekõn̦aan bwe aolep ren bõk tokjãn jãn men kein. Kõn men in, ekkar ñan kon̦ eo kõn Kilen Kõjerbale weepjait in, kwõmaroñ jilkinl̦o̦k juon bok ak link me enaaj kwal̦o̦ke weepjait eo ad ñan armej ro rej itoklimo. Ilo ad tõll̦o̦k armej ro ñan weepjait in, jej jipañ er ñan bõk katak ko rem̦ool jãn “rũkarejar eo etiljek im mãlõtlõt.”