IIÕ eo l̦o̦k, kar jitõñ elõñ to̦ujin em̦m̦aan ro jãn ibwiljin Ri Kõnnaan ro an Jeova ipel̦aakin lal̦ in bwe ren bõk eddon lale eklejia im rijjipañ ilo eklejia. El̦aññe kwõj juon iaan rein, ejjel̦o̦k pere bwe kwõm̦õn̦õn̦õ ilo jerbal in am̦ ekããl me ej juon jeraam̦m̦an.

Bõtab jemel̦el̦e bwe bõlen emaroñ bar wõr jidik am̦ eñjake in inepata. Jason, juon likao im ej juon iaan ro rej lale eklejia ej ba, “Ilo jinoin ke rar jitõñ eõ ñan bõk eddo in ekããl, iar l̦õmn̦ak bwe ijjab maroñe.” Ke ear wõr eddo ko rekããl Jeova ear lel̦o̦k ñan Moses im Jeremaia, erro ear bareinwõt l̦õmn̦ak bwe rejjab maroñi. (Ex. 4:10; Jer. 1:6) El̦aññe ãindein bareinwõt am̦ eñjake, ewi wãween kwõmaroñ anjo̦ ioon eñjake in im kõm̦m̦an wõnm̦aanl̦o̦k? Eokwe jen lale joñak eo an rũkal̦oor Timote.​—Jrb. 16:1-3.

Ke Paul ear kũr Timote bwe en m̦õttan ilo jerbalin lol̦o̦k eklejia ko, Timote emaroñ kar juon jo̦dikdik wõt ak bõlen ekar 20 jim̦a an iiõ. Ilo iien eo ke ear jino bõk jerbal in, emaroñ kar ãliklik im l̦õmn̦ak bwe ejjab maroñe eddo in ekããl ñane kõn an dik wõt. (1 Ti. 4:11, 12; 2 Ti. 1:1, 2, 7, UBS) Ijoke 10 iiõ ko tokãlik, Paul ear jiroñ eklejia eo ilo Pilippai im ba: “A ij kõtmãne ilo Irooj Jesus bwe in m̦õkaj in jilkinwaj Timote ñan kom̦ . . . Bwe ejjel̦o̦k armej ippa ãin bũruon wõt.”—Pil. 2:19, 20.

Ta eo ear jipañ Timote bwe en em̦m̦an an kõm̦m̦ane eddo eo an ãinwõt juon eo ej lale eklejia? Jen lale wãween ko jiljino jemaroñ katak kaki jãn joñak eo an.

1. Ear lukkuun yokwe armej. Paul ear ba ñan Kũrjin ro ilo Pilippai: “[Timote] enaaj ekanooj l̦õmn̦ak kõn” kom̦. (Pil. 2:20) Aet, Timote ear l̦õmn̦ak kake armej ro. Ear kõn̦aan jipañ er ñan epaake Jeova im ear m̦õn̦õn̦õ in kal̦apl̦o̦k ijo kun̦aan kõn er.

Jab ãinwõt juon rũkattõr bus kõnke men eo wõt ej l̦õmn̦ake ñe ej kõm̦m̦ane jerbal in an, ej bwe en jejjete awa ko ej aikuj tõpare ijoko ej jibadeki, im ejjab ñan lale bwe aolep armej ro ren uwe. William, juon eo ej lale eklejia im elõñl̦o̦k jãn 20 iiõ in an kõm̦m̦ane eddo in ej rõjañ aolep ro rekããltok ñan bõk jerbal in, ej ba: “Kwõn yokwe ro jeid im jatid. Jab eddãp wõt ñan laajrak ko, ak kwõn bareinwõt l̦õmn̦ak kõn ta ko rej aikuji.”

2. Men eo ear likũt m̦oktata ej jerbalin kwal̦o̦k naan. Joñak eo an Timote ear oktak jãn ro jet. Paul ear ba: “Er otemjej rej pukot men ko aer make, jab men ko an Jesus Christ.” (Pil. 2:21) Naan kein Paul ear jei ke ear pãd ilo Rom, rej kaalikkar an kar kile bwe Kũrjin ro ijo rar lukkuun m̦ad kõn jerbal ko aer make. Joñan rar jab lukkuun kate er ilo jerbal ko an Anij. Bõtab Timote ear jab ãinwõt er! Ke ear pel̦l̦o̦k iien ñane bwe en kal̦apl̦o̦k ijo kun̦aan kõn ennaan eo em̦m̦an, Timote ear ãinwõt Aiseia, eo ear ba: “Ña e; Kwõn jilkinl̦o̦k eõ.”—Ais. 6:8.

Ta eo kwõj aikuj kõm̦m̦ane bwe eddo ko am̦ make ren pel̦an ippãn eddo ko am̦ ilo jerbal eo an Anij? Kein kajuon, kwõn kõjenolo̦k men ko raorõk jãn men ko rejjab. Paul ear ba: “Kããlõt men ko rem̦m̦antata.” (Pil. 1:10, UBS) Men ko raorõk ippãn Anij, erkein men ko kwõj aikuj likũti bwe ren m̦oktata ilo mour n̦e am̦. Kein karuo, en l̦amwaan wãween am̦ mour. Kwõn jol̦o̦k men ko el̦ap aer bõk iien ko am̦ im rej kõm̦m̦an am̦ m̦õk. Paul ear rõjañ Timote im ba: “Kwõn el̦l̦o̦k jãn m̦õm̦ ko an likao  rõn, im jibadek wãnõk, tõmak, yokwe, im aenõm̦m̦an.” (2 Ti. 2:22, UBS)

3. Ear kate ilo jerbal eo eokkwõjarjar. Paul ear kakeememej ro ilo Pilippai: “Kom̦ make jel̦ã ekõjkan an Timote kar make kam̦ool ke el̦ap tokjãn jerbal eo an, im ekõjkan am̦ro kar jerbal ippãn doon ilo etan gospel eo ãinwõt juon nejin im jemãn.” (Pil. 2:22, UBS) Timote ear jab jowan. Ear niknik im kate ilo an kar jerbal ippãn Paul, im men in ear kõm̦m̦an aerro lukkuun epaake doon.

Rainin, elukkuun l̦ap jerbal ko ilo doulul eo an Anij. Jerbal ko ie rej bõktok jubõro im rej kõm̦m̦an bwe kwõn epaake ro jeid im jatid. Kõn men in, aolep iien en am̦ mejãnkajjik ñan ‘kijejeto iien otemjej ilo am̦ jerbal ñan Irooj.’—1 Ko. 15:58, UBS.

4. Ear l̦oori men ko ear katak kaki. Paul ear jeje ñan Timote im ba: “Kwaar l̦oor katak ko aõ, im kõm̦m̦an ko aõ, im menin kõttõpar eo ilo mour eo aõ; kwaar lo wãween aõ tõmak im aõ ineem̦m̦an im aõ yokwe im aõ kijenmej.” (2 Ti. 3:10, UBS) Timote ear juon eo ekkar im jejjet ñan bõk eddo ko rel̦l̦apl̦o̦k kõn an kar l̦oori men ko ear katak kaki.​—1 Ko. 4:17.

Ewõr ke juon eo erũtto ilo tõmak im ej jipañ eok? El̦aññe ejjel̦o̦k, kwõmaroñ pukot juon ñan jipañ eok. Juon em̦m̦aan ej lale eklejia etan Tom, ej ba: “Juon iaan em̦m̦aan ro rar lale eklejia ear jipañ ña im katakin eõ. Ekkã aõ kajjitõk jipañ jãne im l̦oori naanin kakapilõklõk ko an. Men in ear kõm̦m̦an bwe en dikl̦o̦k aõ inepata im pere.”

5. Ear wõnm̦aanl̦o̦k wõt im katak kab kammineneik e make. Paul ear rõjañ Timote: “Kwõn make kammineneikl̦o̦k eok ilo jerbalin Anij.” (1 Ti. 4:7) Em̦ool bwe juon rukkure ewõr an coach, ak ej aikuj bareinwõt make katak im kammineneik e make. Paul ear ba ñan Timote: “Kwõn niknik ilo kõnono ilo bok, im kauwe, im katakin. . . . Kwõn owan ilo [kõl̦mãnl̦o̦kjen̦ kõn, NW] men kein, im make lel̦o̦k eok ñan er, bwe am̦ wõnm̦aanl̦o̦k en alikkar ñan ro otemjej.”​—1 Ti. 4:13-15.

Kwe bareinwõt kwõj aikuj wõnm̦aanl̦o̦k wõt im kakõm̦anm̦anl̦o̦k kapeel ko am̦. Jab kõtl̦o̦k bwe tõmak eo am̦ en m̦õjn̦o̦l̦o̦k, im kwõn kate eok bwe mel̦el̦e eo am̦ en juon wõt ilo mel̦el̦e ko jãn doulul eo. En jab l̦e jãn joñan am̦ lõke eok make ilo am̦ bõlen l̦õmn̦ak bwe kõn an to am̦ kõm̦m̦ani eddo ko, kwõmaroñ kõm̦m̦an aolep men im kwõjjab aikuj kõm̦m̦an etale ko m̦okta. Kwõn l̦oore joñak eo an Timote ilo am̦ ‘kõjparok eok, im katak ko am̦.’​—1 Ti. 4:16.

6. Ear atartar ioon jetõb kwõjarjar an Jeova. Ikijjeen jerbalin kwal̦o̦k naan, Paul ear kakeememej Timote im ba: “Kwõn dãpij wõt men ko rem̦m̦an em̦õj lõke eok kaki, ilo kajoor an jetõb kwõjarjar, eo ej mour ilo kõj.” (2 Ti. 1:14, UBS) Bwe Timote en kaorõke wõt an jerbalin kwal̦o̦k naan, ear aikuj in atartar ioon jetõb kwõjarjar an Anij.

Donald, juon eo eto an lale eklejia ej ba: “Em̦m̦aan ro em̦õj jitõñ er rej aikuj kaorõk kõtaan eo aer ippãn Anij. Ro rej ãindein renaaj “kajoorl̦o̦k” wõt. El̦aññe rej jar kõn jetõb kwõjarjar an Anij im kakõm̦anm̦anl̦o̦k wãween ko ippãer jãn jetõb kwõjarjar ãinwõt yokwe im men ko ãierl̦o̦k wõt, rein renaaj lukkuun juon jeraam̦m̦an ñan ro jeid im jatid.”​—Sam 84:7, UBS; 1 Pi. 4:11.

El̦ap an kõketak ñe jej lo bwe elõñ em̦m̦aan ro rej jitõñ er ãinwõt kwe, rej kõm̦m̦an wõnm̦aanl̦o̦k ko ilo aer karejar ñan Jeova. Jason, eo kar kwal̦o̦k kake ilo jinoin, ej ba: “Jãn iien eo iar jino bõk jerbalin lale eklejia, elõñ men ko iar katak im ejakol̦o̦k aõ pere im inepata. Kiiõ, el̦ap aõ lañlõñ ilo jerbal in aõ im ij watõke bwe ej juon jeraam̦m̦an elukkuun em̦m̦an!”

Kwõnaaj ke kõm̦m̦an wõt wõnm̦aanl̦o̦k ko ilo am̦ karejar ñan Jeova? En juon am̦ kõttõpar ñan katak jãn joñak eo an Timote. Ilo wãween in, kwe bareinwõt kwõnaaj juon jeraam̦m̦an ñan armej ro an Anij.