1-2. Etke Jesus ear lukkuun inepata?

ILO raan eo ãliktata in an kar Jesus mour ioon lal̦ in, ear lukkuun inepata. Ejjabto tokãlik armej ro renana renaaj kar kaeñtaane im m̦ane ñan mej. Bõtab, ewõr juon men el̦apl̦o̦k an kar Jesus inepata kake jãn aer naaj kar m̦ane ñan mej. Ear lukkuun yokwe Jemãn im kõn̦aan kabuñbũruon. Jesus ear jel̦ã bwe el̦aññe enaaj tiljek wõt ium̦win mãlejjoñ eo epen ej pojak in jelm̦aiki, enaaj jipañ kokkwõjarjare ãt eo etan Anij. Jesus ear bar yokwe armej ro, im ear jel̦ã bwe kõjatdikdik eo ad ñan mour indeeo ej wawa wõt ioon an naaj tiljek ñan mej.

² Meñe elõñ wãween ko rar kõm̦m̦an an Jesus inepata, ak ear aenõm̦m̦an wõt. Ear jiroñ rijjilõk ro an: “Aõ aenõm̦m̦an Ij lewaj ñan kom̦.” (Jon 14:27) Ear wõr ippãn Jesus ‘aenõm̦m̦an eo jãn Anij’ ak ineem̦m̦an, eo im ej wal̦o̦k jãn an juon lukkuun epaak kõtaan eo an ippãn Jeova. Im aenõm̦m̦an in ear kõjparok bũruon im l̦õmn̦ak ko an.​—Pil. 4:6, 7.

3. Ta eo jenaaj etale ilo katak in?

³ Ejjel̦o̦k juon iaad enaaj iioon kain mãlejjoñ rot eo Jesus ear aikuj jelm̦aiki. Ijoke, aolep ro rej l̦oore Jesus renaaj iioon mãlejjoñ. (Matu 16:24, 25; Jon 15:20) Im ãinwõt kar Jesus, ewõr iien jenaaj lukkuun inepata. Ak ta eo jemaroñ kõm̦m̦ane bwe en jab l̦e jãn joñan ad inepata im jako ad aenõm̦m̦an? Eokwe, jen etale jilu men ko Jesus ear kõm̦m̦ani ke ear kõm̦m̦ane jerbalin kwal̦o̦k naan eo an ijin ioon lal̦ im jen lale ewi wãween ad maroñ kajjioñe e ñe jej iiooni mãlejjoñ ko.

4. Jãn ad kar riiti 1 Tessalonika 5:17, kwal̦o̦k jet waanjoñak ko me rej kaalikkar bwe Jesus ear keini an jar ilo raan eo ãliktata in an kar mour ioon lal̦ in.

⁴ Riit 1 Tessalonika 5:17, UBS. Jesus ear jar ilo aolepen raan eo ãliktata in an mour ioon lal̦ in. Ke ear kwal̦o̦k ñan ri-kal̦oor ro kõn wãween aer keememej raanin mej eo an, ear jare bũreet eo im wain eo. (1 Ko. 11:23-25) Im m̦okta jãn aer kar em̦m̦akũt jãn jikin eo rar kõm̦m̦ane Kwõjkwõjin Kijoone eo ie, ear jar kõn ri-kal̦oor ro an. (Jon 17:1-26) Ke e im ri-kal̦oor ro an rar tõparl̦o̦k Tol̦ Olivet ilo boñõn eo, ear bar jar im elõñ alen an kar jar. (Matu 26:36-39, 42, 44) Bareinwõt, naan ko ãliktata ear ba m̦okta wõt jãn an bõk kũtuon im mej, rar juon jar. (Luk 23:46) Ilo an Jesus jar, ear kobaik Jeova ilo aolep men ko rar wal̦o̦k ilo raan eo an ãliktata ioon lal̦ in.

5. Etke ear jako an rijjilõk ro peran?

⁵ Juon iaan un ko unin an kar Jesus maroñ kijenmej ium̦win mãlejjoñ eo epen ear iioone, ej kõnke ear atartar ioon Jemãn ikijjeen jar. Bõtab, rijjilõk ro rar jab niknik ilo aer jar ilo boñõn eo. Kõn men in, ear jako aer peran ke rar iioone mãlejjoñ eo ear wal̦o̦k. (Matu 26:40, 41, 43, 45, 56) Ñe jej iiooni mãlejjoñ ko, jenaaj tiljek wõt el̦aññe jej l̦oore joñak eo an Jesus im jab bõjrak jãn ad “jar.” Ta eo jemaroñ jar kake?

6. Ewi wãween an naaj tõmak jipañ kõj bwe jen aenõm̦m̦an wõt?

⁶ Jemaroñ jar ñan Jeova bwe en ‘kal̦apl̦o̦k ad tõmak.’ (Luk 17:5; Jon 14:1) Ej aikuj wõr ad tõmak kõnke Setan enaaj mãlejjoñe aolep ro rej l̦oore Jesus. (Luk 22:31) Ewi wãween an tõmak maroñ jipañ kõj ñan aenõm̦m̦an wõt ñe ejjab jem̦l̦o̦k ad iioon apañ?  Eokwe, el̦aññe emaat joñan ad kar kate kõj ñan kajjioñ kõm̦adm̦õde apañ eo jej iioone, tõmak enaaj kõm̦akũt kõj bwe jen kiiõ likũt men otemjej n̦a ippãn Jeova. Kõnke jej lõke bwe ejel̦ãl̦o̦k kilen kõm̦adm̦õde apañ eo jãn kõj, jej aenõm̦m̦an wõt im jab inepata.​—1 Pi. 5:6, 7.

7. Ta eo kwaar katak jãn naan ko an Robert?

⁷ Jar ej jipañ kõj bwe jen ineem̦m̦an wõt jekdo̦o̦n ta mãlejjoñ ko jej iiooni. L̦õmn̦ak m̦õk kõn waanjoñak eo an Robert, juon eo etiljek im ej lale eklejia im 80 jim̦a an iiõ kiiõ. Ej ba: “Naanin kakapilõklõk eo ilo Pilippai 4:6, 7 ear jipañ eõ ñan kijenmej wõt ium̦win mãlejjoñ ko iar iiooni ilo mour eo aõ. Ewõr apañ ko iar iiooni ikijjeen jããn. Im ium̦win jidik iien, ear jako aõ juon iaan ro rej lale eklejia.” Ta eo ear jipañ Robert ñan ineem̦m̦an wõt? Ej ba, “Ij kile bwe el̦ak l̦apl̦o̦k aõ keini aõ jar im buul̦ jar, el̦apl̦o̦k aõ aenõm̦m̦an.”

8. Ekkar ñan Jon 8:29, ta juon iaan un ko unin an kar Jesus ineem̦m̦an wõt?

⁸ Riit Jon 8:29. Meñe rar kaeñtaane Jesus, ak ear ineem̦m̦an wõt kõnke ear jel̦ã bwe ear kam̦õn̦õn̦õik Jemãn. Ear pokake wõt jekdo̦o̦n ñe ear pen ñan kõm̦m̦ane men in. Ear yokwe Jemãn im ear kõm̦m̦an bwe an jerbal ñan Jeova en men eo eaorõktata ilo aolepen mour eo an. M̦okta jãn an kar itok ñan lal̦ in, ear “rũkkal eo ekapeel” an Anij. (JK. 8:30, UBS) Im ke ear pãd ioon lal̦ in, ear kijejeto ilo an katakin ro jet kõn Jemãn. (Matu 6:9; Jon 5:17) Jerbal in ear kõm̦m̦an bwe Jesus en lukkuun lañlõñ.​—Jon 4:34-36.

9. Etke ad poub ilo jerbalin kwal̦o̦k naan ej jipañ kõj ñan ineem̦m̦an wõt?

 ⁹ Jemaroñ kajjioñe Jesus ilo ad pokake Jeova im ‘kijejeto iien otemjej ilo ad jerbal ñan Irooj.’ (1 Ko. 15:58, UBS) Ñe el̦ap ad poub ilo jerbalin kwal̦o̦k naan, men in ej jipañ kõj ñan kajim̦we l̦õmn̦ak ko ad kõn apañ ko jej iiooni. (Jrb. 18:5) Ñan waanjoñak, ro jej iioon er ilo kwal̦o̦k naan ekkã an nanal̦o̦k apañ ko rej iiooni jãn kõj. Bõtab, ñe rej katak im jino yokwe Jeova im l̦oore naanin kakapilõklõk ko an, em̦m̦anl̦o̦k wãween mour ko aer im rejino m̦õn̦õn̦õl̦o̦k. Kajjojo iien jej lo an men in wal̦o̦k, el̦apl̦o̦k ad tõmak bwe Jeova enaaj lale kõj. Im ad tõmak ilo e ej jipañ kõj ñan ineem̦m̦an wõt. Juon jeid im jatid kõrã me eto an kar bũrom̦õj im l̦õmn̦ak bwe ejjel̦o̦k tokjãn, ear kile bwe em̦ool men in. Ej ba: “Ñe ij poub ilo jerbalin kwal̦o̦k naan, ij kile bwe el̦apl̦o̦k an em̦m̦an aõ mour kõn ña make im el̦apl̦o̦k aõ m̦õn̦õn̦õ. Im ãinwõt il̦ak lale ej kõnke ñe ij pãd ilo kwal̦o̦k naan, eñin iien eo iepaaketata Jeova.”

10. Ta eo kwaar katak jãn naan ko an Brenda?

¹⁰ Bar l̦õmn̦ak m̦õk kõn waanjoñak eo an juon jeid im jatid kõrã etan Brenda. Erro ledik eo nejin jim̦or rar bõk juon nañinmej me el̦ap an jelõt ãjmour eo aerro. Brenda ejjab maroñ etetal im ej aikuj itoitak wõt kõn wiil̦jea. Jet iien ej kwal̦o̦k naan jãn em̦ ñan em̦ ñe ewõr an maroñ, ak enañin aolep iien ej kwal̦o̦k naan ilo an jeje lõta. Ej ba: “Ãlikin aõ kar kile im mel̦el̦e bwe eban em̦m̦anl̦o̦k nañinmej eo aõ ilo jukjukun pãd in, ear jako aõ inepata kõn men in im kiiõ iar maroñ l̦õmn̦ak wõt kõn jerbalin kwal̦o̦k naan. Ilo m̦ool, jerbalin kwal̦o̦k naan ear kõm̦ad eõ jãn aõ inepata. Ear booje eõ ñan l̦õmn̦ak wõt kõn aõ maroñ jipañ armej ro iar tõpar er ilo teretore eo ilo eklejia eo ammim. Im aolep iien ear kakeememej eõ kõn kõjatdikdik eo aõ kõn ilju im jekl̦aj.”

11-13. (1) Ewi wãween an kar rijjilõk ro im ro jet kam̦ool bwe rar ro m̦õttan Jesus rem̦ool? (2) Ilo an kar ro m̦õttan Jesus rejetake e, ewi wãween an kar men in jipañ Jesus?

¹¹ Ilo aolepen iien eo Jesus ear kwal̦o̦k naan, rijjilõk ro retiljek rar kam̦ool ñane bwe rej ro m̦õttan rem̦ool. Rej ãinwõt armej ro Baibõl̦ ej kwal̦o̦k kõn er bwe rej tiljek im m̦ool ñan ro m̦õttaer. Ej ba: “Jet rej jerã im kautiej doon el̦apl̦o̦k jãn ro rej jemjein jemjatin.” (JK. 18:24, UBS) Kain jem̦jerã rot in ear aorõk ippãn Jesus. Ilo iien eo ear kwal̦o̦k naan, ejjel̦o̦k juon iaan l̦õm̦aro jatin rar kwal̦o̦k aer tõmak ilo e. (Jon 7:3-5) Juon iien, juon jãn baam̦le eo an ear l̦õmn̦ak bwe ‘ewũdeakeak’ ak ebwebwe. (Mark 3:21) Elukkuun oktak jãn rijjilõk ro retiljek an Jesus. Eñin unin Jesus ear ba ñan er ilo boñõn eo m̦okta jãn an mej: “Kom̦ar pãdwõt ippa ium̦win aolepen iien mãlejjoñ ko aõ.”​—Luk 22:28, UBS.

¹² Ewõr iien rijjilõk ro rar kabũrom̦õj Jesus, ak ear kõjekdo̦o̦n bõd ko aer im ear loe bwe rar tõmak ilo e. (Matu 26:40; Mark 10:13, 14; Jon 6:66-69) Ilo boñõn eo an ãliktata ippãn em̦m̦aan rein retiljek, ear ba: “Iar n̦aetami ro jera, bwe men otemjej Iar roñ jãn Jema Iar kwal̦o̦k ñan kom̦.” (Jon 15:15) Ejjel̦o̦k pere ñan jidik bwe ro m̦õttan Jesus rar lukkuun kõkajoore. Aer kar jipañ Jesus ilo jerbalin kwal̦o̦k naan eo an ear kõm̦m̦an bwe en lukkuun lañlõñ.​—Luk 10:17, 21.

¹³ Ear bar wõr ro jet m̦õttan Jesus, em̦m̦aan im kõrã jim̦or, me rar bar jipañe ilo jerbalin kwal̦o̦k naan im ilo wãween ko jet. Jet iaaer rar kõpel̦l̦o̦k m̦õko im̦weer ñane bwe en wõr jikin an m̦õñã. (Luk 10:38-42; Jon 12:1, 2) Ro jet rar itoitak ippãn im rar kõjerbal  men ko m̦weieer ñan jipañ e. (Luk 8:3) Ear wõr ro m̦õttan Jesus me rem̦m̦an kõnke ear juon eo em̦m̦an an m̦õttãiki ro jet. Ear kõm̦m̦ani men ko rem̦m̦an ñan ro m̦õttan im ear kwal̦o̦k kõmmaanwa ilo an kar jab kõtmãne bwe ren kõm̦m̦ani men ko el̦ap jãn joñan aer maroñ. Meñe Jesus ear weeppãn ak ear kam̦m̦oolol ro m̦õttan me rar jab weeppãn kõn aer kar jipañe. Im ejjel̦o̦k pere bwe rein rar jipañe bwe en ineem̦m̦an wõt.

14-15. Ewi wãween bwe jen maroñ lo ro m̦õttad rem̦m̦an, im ewi wãween aer naaj jipañ kõj?

¹⁴ Ro m̦õttad me rem̦m̦an renaaj jipañ kõj bwe jen tiljek wõt ñan Jeova. Wãween eo em̦m̦antata ñan lo ro m̦õttad me rem̦m̦an ej bwe jej aikuj juon eo me em̦ool an m̦õttãiki ro jet. (Matu 7:12) Ñan waanjoñak, Baibõl̦ ej rõjañ kõj ñan kõjerbal iien im maroñ ko ad ñan jipañ ro jet, el̦aptata ro rej pãd ilo “aikuj.” (Ep. 4:28) Ewõr ke juon ilo eklejia eo am̦ me kwõmaroñ jipañe? Kwõmaroñ ke jipañ kaikujkuj ñan juon ri-kwal̦o̦k me ej pãdwõt m̦weo im̦õn kõn an rũtto ak nañinmej? Kwõmaroñ ke bõkl̦o̦k kijen juon baam̦le me repãd ilo apañ kõn an jabwe jããn? Ak el̦aññe kwõjel̦ã kilen kõjerbal weepjait eo ad, jw.org^® im JW Library^® app eo, kwõmaroñ ke jipañ ro jet ilo eklejia eo am̦ bwe ren jel̦ã kilen kõjerbali? Ñe jej poub ilo ad jipañ ro jet, jenaaj kile an l̦apl̦o̦k ad m̦õn̦õn̦õ.​—Jrb. 20:35.

¹⁵ Ro jej m̦õttãik er renaaj jipañ kõj ñe jenaaj iioon mãlejjoñ ko, im renaaj jipañ kõj bwe jen ineem̦m̦an wõt. Ãinwõt Ilaihu ke ear roñjake an Job kõnnaan kõn mãlejjoñ ko ear iiooni, ro m̦õttad renaaj jipañ kõj ilo aer kijenmej wõt im roñjake ad kõnnaan kõn inepata  ko ad. (Job 32:4) Jejjab aikuj kõtmãne bwe ro m̦õttad ren jiroñ kõj ta eo jen kõm̦m̦ane, bõtab jenaaj kwal̦o̦k ad mãlõtlõt ñe jej roñjake naanin kakapilõklõk ko aer me rej pedped ioon Baibõl̦. (JK. 15:22) Ãinwõt kar Kiiñ Devid ke ear kõttãik bũruon im bõk jipañ jãn ro m̦õttan, jen jab utiej bũruod im m̦akoko in bõk jipañ jãn ro m̦õttad ñe rej letok peier im jipañ kõj ilo iien ad aikuj. (2 Sa. 17:27-29) Alikkar bwe kain jem̦jerã rot in ej juon menin letok jãn Jeova.​—Jem. 1:17.

16. Ekkar ñan Pilippai 4:6, 7, ta wãween eo wõt me enaaj jipañ kõj ñan lo aenõm̦m̦an? Jouj im kõmel̦el̦e.

¹⁶ Riit Pilippai 4:6, 7. Etke Jeova ej ba bwe jenaaj maroñ lo aenõm̦m̦an eo jãn E ‘ikijjeen Christ Jesus’? Kõnke wãween eo wõt bwe en aenõm̦m̦an bũruod im l̦õmn̦ak ko ad, ej ñe jenaaj mel̦el̦e im kwal̦o̦k ad tõmak ilo jerbal eo an Jesus ñan kajejjet karõk eo an Jeova. Ñan waanjoñak, ikijjeen katok in mour eo an Jesus, Anij emaroñ jeorl̦o̦k aolep jerawiwi ko ad. (1 Jon 2:12) Ñe jej l̦õmn̦ak kõn men in, el̦ap an kaenõm̦m̦an kõj! Ãinwõt Kiiñ eo an Aelõñ eo an Anij, Jesus enaaj jol̦o̦k aolep apañ ko Setan im lal̦ in an rej kõm̦m̦an bwe jen eñtaan kaki. (Ais. 65:17; 1 Jon 3:8; Rev. 21:3, 4) Men in ej letok juon kõjatdikdik me jemaroñ reim̦aanl̦o̦k ñane. Im meñe Jesus ear letok juon jerbal epen bwe jen kõm̦m̦ane, ej pãd ippãd im rejetake kõj ilo raan kein ãliktata an jukjukun pãd in. (Matu 28:19, 20) El̦ap wõt an men in kaperan kõj! Kaenõm̦m̦an, kõjatdikdik, im peran, rej men ko el̦ap aer naaj jipañ kõj bwe jen aenõm̦m̦an wõt.

17. (1) Ewi wãween an juon Kũrjin maroñ ineem̦m̦an wõt? (2) Ãinwõt kar kallim̦ur ilo Jon 16:33, ta eo jenaaj maroñ kõm̦m̦ane?

¹⁷ Innem ewi wãween am̦ maroñ ineem̦m̦an wõt ñe mãlejjoñ ko reppen kwõj iiooni rej kõm̦m̦an am̦ inepata? Kwõmaroñ kõm̦m̦ane men in ilo am̦ anõke men ko Jesus ear kõm̦m̦ani. Kein kajuon, jar im keini am̦ jar. Kein karuo, pokake Jeova im kijejeto ilo kwal̦o̦k naan meñe jet iien epen ñan kõm̦m̦ane men in. Im kein kajilu, atartar ioon ro m̦õttam̦ ñan jipañ eok ñe kwõj iiooni apañ im mãlejjoñ ko. Innem aenõm̦m̦an eo jãn Anij enaaj kõjparok bũruom̦ im l̦õmn̦ak ko am̦. Im ãinwõt Jesus, kwõnaaj anjo̦ ioon jabdewõt kain mãlejjoñ.​—Riit Jon 16:33, UBS.