ÑE KOKÕN̦AAN jel̦ã jete awa, ta eo kwõj kõm̦m̦ane? Bõlen kwõnãj lale waj eo ilo peim̦ ak clock eo ilo m̦weo. El̦aññe juon m̦õttam̦ ej kajjitõk ippam̦ jete awa, ewi wãween am̦ nãj uwaake? Eokwe eoktak wãween an armej kwal̦o̦k jete awa. Ewi wãween?

Jen ba bwe ej 1 awa im 30 minit ãlikin raelep. Kwõmaroñ uwaake armej eo m̦õttam̦ im ba juon jimattan. Ak kõnke eoktak aelõñ eo kwõj jokwe ie im wãween an armej ro ie lale awa, bõlen kwõmaroñ uwaak im ba 13:30. Kõnke ewõr 24 awa ilo juon raan, rein rej bwine awa eo jãn 1 ñan 24. Ilo bar jet jikin, ñe rej kwal̦o̦k kõn ejja awa in wõt, rej ba “jimattan ruo,” mel̦el̦ein 30 minit m̦okta jãn ruo.

Ilo am̦ riit Baibõl̦, kwõmaroñ l̦õmn̦ak kõn ewi wãween an armej ro ilo iien ko etto kar kwal̦o̦k jete awa. Eokwe elõñl̦o̦k jãn juon wãween aer ba. Bok ko jinoin ilo Baibõl̦ me kar je ilo kajin Hibru, rekõn kwal̦o̦k jete awa ilo aer kaalikkar ñe ej ‘jibboñ,’ “raelep,” ak “jota.” (Jen. 8:11; 19:27, UBS; Dt. 28:29; 1 Kñ. 18:26) Bõtab, ewõr iien rej lukkuun kaalikkar awa eo ñe rej kõm̦m̦ane juon men.

Ear juon m̦anit ilo iien ko etto ñan kõjerbal ri-waj ro. Ekkã aer kõjerbal er ilo boñ. Elõñ bukwi iiõ ko m̦okta jãn an kar Jesus l̦otak, ri-Israel ro rar kõjenolo̦k jilu iien waj ilo boñ, im jet iien rej n̦aetan iien “emmej ko.” (Sam 63:6) Ñan waanjoñak, bokin Ekajet 7:19 ej ba “emmej eo kein karuo.” Bõtab, ilo raan ko an Jesus, ri-Ju ro rar l̦oore wãween an ri-Rom im ri-Grik kõjenolo̦k emãn iien waj ilo boñ.

Ekkã an bokin Gospel ko kwal̦o̦k kõn iien waj ak emmej kein. Ñan waanjoñak, “ilo iien waj kein kãmen ilo boñ,” Jesus ear etetal ioon dãn ñan jibadekl̦o̦k ri-kal̦oor ro ilo wa eo. (Matu 14:25) Ilo juon waanjoñak, Jesus ear ba: “El̦aññe al̦ap in m̦weo ear jel̦ã ilo emmej rot ri-ko̦o̦t ej itok, enaaj kar ekkõl, im jãmin kar kõtl̦o̦k bwe en rupe im̦õn.”​—Matu 24:43.

Jesus ear kõnnaan kõn iien waj ak emmej kein emãn ke ear ba ñan ri-kal̦oor ro an: “Kom̦win ekkõl; bwe kom̦ jaje ñããt Irooj in m̦weo ej itok, ke ejota, ak ilukwõn boñ, ak ñe kako ej ikkũr, ak ñe ejibboñ.” (Mark 13:35) Waj eo kein kajuon iaan waj kein emãn ej ‘jota,’ im ear jino jãn tulo̦kun al̦ l̦o̦k ñan ruwatimjuon awa ilo jota. Waj eo kein karuo ej “ilukwõn boñ,” im ear jino jãn ruwatimjuon l̦o̦k ñan joñoul ruo awa. Im waj eo kein kajilu ej “ñe kako ej ikkũr” ak jimmarok, im ear jino jãn joñoul ruo awa l̦o̦k ñan jilu awa ilo jimmarok. Emaroñ kar ilo waj eo kein kajilu ear jino ikkũr kako ilo boñõn eo Jesus ear kalbuuj. (Mark 14:72, UBS) Im waj eo kein kãmen ej ‘jibboñ,’ im ear jino jãn jilu awa l̦o̦k ñan iien eo ej tak al̦.

Meñe ear ejjel̦o̦k an armej ro ilo iien ko etto kein lale awa ko ãinwõt an wõr ippãd raan kein, ak ear wõr aer make laajrak bwe ren maroñ jel̦ã jete awa ilo raan im boñ.