BAIBÕL̦ eo eobrak kõn naan ko an ro me “eñjake ko [aer] rar ãinwõt eñjake ko ad.” (Jem. 5:17) Ñan waanjoñak, jemaroñ kajju mel̦el̦e kõn eñjake ko an Paul ñe jej riiti naan ko an ilo Rom 7:21-24 ke ear ba: “El̦aññe ikõn̦aan kõm̦m̦ane men eo ejim̦we, eitok wõt bwe in kõm̦m̦ane men eo enana. . . . El̦ap wõt aõ jerata!” Ñe ewõr m̦õjn̦o̦ ko ippãd me epen ad tarin̦aeiki, ad jel̦ã bwe em̦m̦aan eo etiljek Paul ear bar bõk ejja eñjake in, men in ej kaenõm̦m̦an kõj.

Ak ebar wõr eñjake ko jet Paul ear kwal̦o̦ki jãn bũruon. Ear ba: “Nejin Anij, . . . ear yokwe eõ im ajel̦o̦k mour eo an kõn ña.” (Gal. 2:20) Paul ear lukkuun tõmak im lõke men in. Ãindein ke bar ‘eñjake eo ad’? Bõlen ejjab aolep iien.

El̦aññe kwokabde l̦õmn̦ak bwe ejjel̦o̦k tokjam̦ kõn wõt bõd ko kwaar kõm̦m̦ani m̦okta, men in emaroñ kõm̦m̦an am̦ l̦õmn̦ak bwe Jeova ejjab yokwe eok im bwe ejjañin jol̦o̦k am̦ bõd. Ejjab men in wõt ak emaroñ kõm̦m̦an bwe en pen am̦ watõk katok in mour eo an Jesus bwe ej juon menin lewaj ñan kwe. Jesus ej ke lukkuun kõn̦aan bwe kwõn watõke katok in mour eo an ãinwõt juon menin lewaj? El̦aññe aet, ta eo emaroñ jipañ eok ñan tõmak men in? Jen etale kajjitõk kein ruo.

Aet, Jesus ekõn̦aan bwe kwõn watõk katok in mour eo an ãinwõt juon menin lewaj ñan kwe. Etke kwõmaroñ lõke men in? Pijaikl̦o̦k m̦õk ta eo ej wal̦o̦k ilo bokin Luk 23:39-43. Ke Jesus ej ettoto ioon juon al̦al̦ in eñtaan, juon em̦m̦aan me ej ettoto iturin ej kwal̦o̦k m̦ool im ba bwe ewõr ruõn kõn men eo enana ear kõm̦m̦ane. Emaroñ kar lukkuun l̦ap bõd eo ear kõm̦m̦ane kõnke ri-nana rot in wõt rar totoiki er ilo al̦al̦ in eñtaan. Kõn an em̦m̦aan in lukkuun inepata kõn ta eo enaaj wal̦o̦k ñane, ej eoware Jesus im ba: “Keememej ña ñe kwõnaaj pãd ilo Aelõñ eo am̦.”

Ta eo Jesus ear kõm̦m̦ane? Pijaikl̦o̦k m̦õk an Jesus lukkuun eñtaan wõt ak ej bõk bõran bwe en reilo̦k ñan em̦m̦aan in. Meñe eñtaan ak ej kate wõt bwe en ettõñdikdik l̦o̦k ñan em̦m̦aan eo im kaenõm̦m̦ane ilo an ba: “Ij kallim̦ur ñan kwe rainin, kwõnaaj pãd ippa ilo Pedetaij.” Jesus emaroñ kar kakeememej wõt em̦m̦aan in im ba bwe “Nejin armej . . . ear itok bwe en kõl̦l̦ã kõn mour eo an ñan lo̦mo̦o̦ren elõñ armej.” (Matu 20:28) Ijello̦kun an kar ba men in, ear kwal̦o̦k ewi wãween an em̦m̦aan in naaj bõk tokjãn jãn katok in mour eo an. Ear kwal̦o̦k jouj ñane ke ear kõjerbal naan kein “kwõnaaj” im “ippa.” Im ear ba ñan em̦m̦aan in bwe enaaj mour ilo pedetaij eo ijin ioon lal̦.

Ejjel̦o̦k pere, Jesus ear kõn̦aan bwe em̦m̦aan in en watõk katok in mour eo an ãinwõt juon menin lel̦o̦k ñane. El̦aññe Jesus ear bõk eñjake rot in kõn juon ri-nana me ear jab maroñ wõr juon iien epel̦l̦o̦k ñan karejar ñan Anij, alikkar bwe enaaj bõk eñjake rot in kõn Kũrjin ro me rej karejar ñan Anij. Innem ta eo emaroñ jipañ kõj bwe jen lukkuun tõmak bwe katok in mour eo an Christ enaaj jipañ kõj kajjojo meñe jaar kõm̦m̦an bõd kar m̦okta?

Kõnke Jesus ear lel̦o̦k ñan Paul juon jerbal, jerbalin kwal̦o̦k naan, Paul ear maroñ kile bwe Jesus ear  mej kõn e. Ewi wãween? Ear kõmel̦el̦e im ba: “El̦ap aõ kam̦m̦oolol Christ Jesus ad Irooj, eo ear kõkajoor eõ kõnke ear watõk eõ juon eo etiljek ilo an kar kããlõt eõ ñan jerbal eo an, meñe ikõn kar juon eo ear kõnono n̦ae Anij im kaeñtaan armej ro an im juon eo ejãjjãj.” (1 Tim. 1:12-14) An kar Jesus lel̦o̦k jerbal in ñan Paul meñe elõñ men ko renana ear kõm̦m̦ani, men in ear kaalikkar ñan Paul bwe Jesus ej tũriam̦o, yokwe, im lõke e. Ãinwõt Paul, em̦õj an Jesus letok ñan kõj kajjojo bwe jen kõm̦m̦ane jerbalin kwal̦o̦k naan. (Matu 28:19, 20) Jerbal in emaroñ ke bar jipañ kõj ñan kile bwe Jesus ear bareinwõt mej kõn kõj?

Albert, eo ej kab jepl̦aaktok ñan Jeova ãlikin an kar bukwel̦o̦k ium̦win enañin 34 iiõ, ej kõmel̦el̦e im ba: “Jerawiwi ko aõ rej im̦aõ iien otemjej. Ak ñe ij kwal̦o̦k naan, ij bõk ejja eñjake eo wõt an rijjilõk Paul im kile bwe Jesus make ear letok juon jerbal ñan eõ, ej jerbalin kwal̦o̦k naan. Men in ej kõketak eõ im ej kõm̦m̦an bwe in bõk wõt l̦õmn̦ak ko rejim̦we kõn ña make, mour e aõ, im ilju im jekl̦aj eo aõ.”​—Sam 51:3.

M̦okta jãn an kar Allan jel̦ã m̦ool eo, ekõn juon eo el̦ap an kowadoñ im lãj. Ej kwal̦o̦k bũruon ilo an ba: “Ñan kiiõ ij l̦õmn̦ak wõt kõn aolepen men ko renana iar kõm̦m̦ani ñan kõjorrããne ro jet. Ewõr iien men in ej kõm̦m̦an aõ lukkuun bũrom̦õj im ebbweer. Ak ij kam̦m̦oolol Jeova bwe ej kõtl̦o̦k bwe juon rijjerawiwi ãinwõt ña en kwal̦o̦k kõn nuuj eo em̦m̦an ñan ro jet. Ñe ij lo an armej ro em̦m̦akũt kõn nuuj eo em̦m̦an, ej kakeememej eõ kõn joñan an Jeova em̦m̦an im yokwe kõj. Ij kile an Jeova kõjerbal eõ ñan jipañ ro rekõn bar kõm̦m̦ani men ko renana ilo mour ko aer.”

Ñe jej kwal̦o̦k naan jej kõm̦m̦ane juon men em̦m̦an im jej l̦õmn̦ak wõt kõn men ko rem̦m̦an. Jerbal in ej kaalikkar ñan kõj bwe Jesus ej tũriam̦o, yokwe, im lõke kõj.

M̦ae iien jukjukun pãd in enana an Setan enaaj jako, bũruod emaroñ wõnm̦aanl̦o̦k wõt im liaakel̦o̦k kõj kõn bõd ko jaar kõm̦m̦ani m̦okta. Ta eo enaaj jipañ kõj ñan anjo̦ ioon eñjake rot in?

Jean, eo me ekkã an bũrom̦õj im nana an mour kõn an kar juon eo me ekõn kõm̦m̦ani men ko renana ilo ittino ke ear jo̦dikdik, ej ba: “Elukkuun em̦m̦an ad jel̦ã bwe Jeova el̦apl̦o̦k jãn bũruod.” (1 Jon 3:19, 20) Kõj bareinwõt jemaroñ bõk kaenõm̦m̦an kõn ad jel̦ã bwe el̦apl̦o̦k an Jeova im Jesus mel̦el̦e bwe kõj rijjerawiwi. Keememej bwe kõn aer yokwe kõj rar ajetok katok in mour eo an Jesus, ejjab ñan ro reweeppãn, ak ñan ro rej ukel̦o̦k jãn bõd ko aer.​—1 Tim. 1:15.

Ñe kwõj jar im kõl̦mãnl̦o̦kjen̦ kõn wãween an kar Jesus kõm̦m̦an ñan armej ro rejjab weeppãn im kate eok ñan kajejjet jerbal eo ear lewaj ñan kwe, kwõj kam̦ool ñan kwe make bwe katok im mour eo an Jesus ej jerbal ñan kwe. Ilo am̦ kõm̦m̦ane men in, kwõnaaj maroñ bõk ejja eñjake eo an Paul im ba: Jesus “ear yokwe eõ im ajel̦o̦k mour eo an kõn ña.”