ETKE kwõmaroñ lõke im tõmak bwe Jeova ej kaorõk eok? Juon un ej kõnke Baibõl̦ make ej ba men in. Ilo 1 Piter 5:7 ej ba: “Kom̦win likũt ami inepata otemjej n̦a Ippãn, bwe kwõaorõk Ippãn.” Ewõr ke kein kam̦ool ko rej kwal̦o̦k bwe Jeova Anij ej kaorõk eok?

Ewõr ippãn Anij wãween ko rem̦m̦an me kwõj loi ippãn ro m̦õttam̦. Ro rej jipañ im kwal̦o̦k jouj ñan doon, ekkã aer jem̦jerãik doon. Ealikkar bwe kwõj kile an Jeova jipañ im kwal̦o̦k jouj ñan armej aolep raan. Ñan waanjoñak, Jeova ej “kõtak al̦ ioon ro renana im ioon ro rem̦m̦an, im kawõt ioon ro rũwãnõk im ioon ro rejjab wãnõk.” (Matu 5:45) Ewi wãween an al̦ im wõt jipañ kõj? Jet iaan wãween ko Anij ej kõjerbal men kein ej ñan ‘letok kijed im kobrak bũruod kõn m̦õn̦õn̦õ.’ (Jerbal 14:17, UBS) Ealikkar bwe Jeova ej kõm̦m̦an bwe en lõñ m̦õñã ioon lal̦ in, im elukkuun l̦ap ad m̦õn̦õn̦õ ñe jej m̦õñã m̦õñã ko renno̦.

Ak etke elukkuun lõñ rej kwõle? Kõnke ekkã an rũtõl ro an kien l̦õmn̦ak wõt kõn wãween aer kõm̦m̦an bwe en l̦apl̦o̦k aer maroñ ioon armej ro im bwe en lõñl̦o̦k aer jããn ijello̦kun aer jipañ armej ro kõn apañ ko aer. M̦õttan jidik Jeova enaaj kõm̦adm̦õde apañ in ilo an naaj kõm̦m̦an bwe Aelõñ eo an ilañ, eo me Nejin ej Rũtõl eo ie, en bõk jikin kien ko ilo lal̦ in. Ilo naaj iien en̦, ejjel̦o̦k juon enaaj bar kwõle. Bõtab ilo tõrein jej kõttar, Anij ej lale im kabwe aikuj ko an rũkarejar ro an retiljek. (Sam 37:25, UBS) Men in ejjab ke kam̦ool bwe Jeova ej kaorõk kõj?

Juon eo kwõj m̦õttãiki me ej kaorõk eok, ej kõm̦m̦an an iien ippam̦. Emaroñ bwebwenato ippam̦ ium̦win elõñ awa kõn men ko komiro jim̦or ej itoklimo kaki. Enaaj bar lukkuun roñjake eok ñe kwõj kwal̦o̦k kõn apañ im inepata ko am̦ ñane. Jeova ej ke bar m̦õn̦õn̦õ in roñjake kõj? Aet. Ej m̦õn̦õn̦õ in roñjake jar ko ad. Eñin unin, Baibõl̦ ej rõjañ kõj ñan “niknik ilo jar,” im ej bar ba bwe jen “jar iien otemjej.”​—Rom 12:12; 1 Tessalonika 5:17, UBS.

Jeova ej ke m̦õn̦õn̦õ in roñjake jar ko ad meñe elukkuun aetok ad jar? Ewõr juon waanjoñak ilo Baibõl̦ me ej jipañ kõj ñan jel̦ã kõn men in. M̦okta jãn an kar Jijej kããlõt rijjilõk ro an, “ear jar ñan Anij aolepen boñõn eo.” (Luk 6:12, UBS) Ilo jar in an, Jijej emaroñ kar kwal̦o̦k kõn etan elõñ iaan rũkal̦oor ro an, kõn kain armej rot er, im m̦õjn̦o̦ ko aer. Ear bar kajjitõk ippãn Jemãn bwe en jipañe ñan jel̦ã wõn iaaer en kããlõte. Ilo jibboñõn raan eo tok juon, Jijej ear jel̦ã bwe ear kããlõt ro me enaaj em̦m̦antata aer jerbal ãinwõt rijjilõk ro an. Jeova ej “roñjake jar” ko an armej ro, im em̦õn̦õn̦õ in roñjake aolep ro rej jar ñane kõn juon bõro em̦ool. (Sam 65:2) Meñe juon emaroñ jar ium̦win elõñ awa kõn juon men el̦ap an inepata kake, ak Jeova eban m̦õk in roñjake an jar.

Jet iien, epen ñan an ro rej jem̦jerãik doon jol̦o̦k an doon bõd. Meñe eto an ruo armej m̦õttãik doon, ak emaroñ bõjrak aerro m̦õttãik doon kõnke epen aerro jol̦o̦k an doon bõd. Bõtab, Jeova ejjab ãindein. Baibõl̦ ej rõjañ aolep ro em̦ool aer ukel̦o̦k bwe ren kajjitõk ippãn Anij ñan jol̦o̦k aer bõd kõnke Anij “enaaj kanooj wũjlep in jol̦o̦k bõd.” (Aiseia 55:6, 7) Etke Anij ej m̦õn̦õn̦õ in jol̦o̦k ad bõd?

Unin ej kõnke el̦ap an Anij yokwe. Joñan an Anij yokwe lal̦, ear jilkintok Nejin, Jijej, bwe en lo̦mo̦o̦ren armej ro jãn jerawiwi im men ko renana rej jelõt kõj aolep kõn ad rijjerawiwi. (Jon 3:16) Ilo m̦ool, elõñl̦o̦k tokjãn ko jej loi jãn katok in  mour eo an Jijej. Ikijjeen katok in mour eo an, Anij emaroñ jol̦o̦k bõd ko an ro ej yokwe er. Rijjilõk Jon ear je im ba: “El̦aññe jej kwal̦o̦k jerawiwi ko ad, [Jeova] E tiljek im wãnõk bwe En jeorl̦o̦k jãn kõj jerawiwi ko.” (1 Jon 1:9) Kõnke Jeova ej m̦õn̦õn̦õ in jol̦o̦k ad bõd, jemaroñ wõnm̦aanl̦o̦k im jem̦jerãiki. Ad jel̦ã kõn men in ej lukkuun kõm̦akũt bũruod.

Juon jerad eo em̦ool ej jipañ kõj ñe jej aikuj jipañ. Jeova ej ke kõm̦m̦ane men in? Baibõl̦ ej ba: “El̦aññe [rũkarejar ro an Anij] rej buñ rejãmin babu wõt ioon bwidej, kõnke Irooj enaaj kajutak er.” (Sam 37:24, UBS) Elõñ wãween ko Jeova ej jipañ rũkarejar ro an. Jen lale juon bwebwenato jãn juon jikin etan St. Croix me epãd ilo Caribbean.

Juon leddik ear iioon jum̦ae jãn ro ilo kilaaj eo an kõn an jab kabuñ ñan bõl̦eak eo. Men in ear n̦ae tõmak eo an. Ãlikin an kar jar ñan Jeova bwe en jipañe, ear pepe in jojomare tõmak eo an. Ke ear kõm̦m̦ane ripoot eo an ilo kilaaj eo an, ear kõnnaan kõn kabuñ ñan bõl̦eak. Ear kõjerbale bok eo etan Aõ Buk in Bwebwenato Ko Jen Baibel ñan kõmel̦el̦e kõn wãween an pepe eo an pedped ioon bwebwenato eo an Shadrak, Meshak, im Abednego. Ledik in ear ba: “Jeova ear kõjparok RiHibru rein jilu kõnke rar jab kabuñ ñan ekjab eo.” Innem, ear kajjitõk ippãn ro rar pãd ilo iien eo ñe rekõn̦aan aer kaape in bok in. Joñoul juon iaan ro ilo kilaaj eo an rar kõn̦aan ebbõk aer kaape. Ledik in ear lukkuun m̦õn̦õn̦õ kõnke ear kile bwe Jeova ear kakajoore im lel̦o̦k mãlõtlõt ñane bwe en maroñ kwal̦o̦k naan im kõmel̦el̦e kõn tõmak in an meñe ear jab pidodo ñan kõnnaan kake.

El̦aññe kwõj l̦õmn̦ak bwe Jeova ejjab kaorõk eok, kwõmaroñ kõl̦mãnl̦o̦kjen̦ kõn jet eoon ko ilo Baibõl̦ ãinwõt Sam 34:17-19; 55:22 (UBS); im 145:18, 19 (UBS). Kwõmaroñ kajjitõk ippãn ro eto aer karejar ñan Jeova kõn wãween an kar Jeova kwal̦o̦k an kaorõk er. Im ñe kwõj aikuji jipañ eo an Anij, jar ñane kõn apañ eo am̦. Innem, kwõnaaj lo bwe “kwõaorõk ippãn” Jeova.