Kwaar ke lukkuun riiti Naan in Keeañ ko an allõñ ko l̦o̦k? Lale kwõmaroñ ke uwaake kajjitõk kein:

Ewõr ke kein kam̦ool rej kwal̦o̦k bwe ear jab to kũtien aer tarin̦aeik jikin kweilo̦k in Jeriko?

Ilo iien ko etto, ñe eto kũtien aer tarin̦aeik juon jikin, armej ro ie rej kamaati enañin aolep m̦õñã ko rar kakon̦i. Ñe rũttarin̦ae ro rej anjo̦ ioon jikin in, rej bõk aolep men ko rekõn̦aan, ekoba bween m̦õñã ko rej loi. Bõtab, ilo Jeriko, rũmmãlõtlõt ro rar loe bwe ear lõñ wõt m̦õñã ie. An kar lõñ m̦õñã ilo Jeriko, ej kam̦ool bwe ear m̦õkaj an RiIsrael ro bõk anjo̦ ioon jikin kweilo̦k in, ãinwõt an Baibõl̦ kwal̦o̦k.​—w15 11/15, p. 13.

Ta men ko raorõk jemãn im jinen jo̦dikdik ro remaroñ kõm̦m̦ani ñan katakin rein nejier bwe ren karejar ñan Jeova?

Elukkuun aorõk bwe rũtto ro ren yokwe jo̦dikdik ro nejier im kwal̦o̦k ettã bõro ilo kõm̦m̦an ko aer. Bareinwõt, eaorõk bwe rũtto ro ren kwal̦o̦k lol̦o̦kjen̦ im kate er ñan kajjioñ jel̦ã bũruon jo̦dikdik ro nejier.​—w15 11/15, p. 9-11.

Ta ko jej aikuj l̦õmn̦ak kaki m̦okta jãn ad kõnnaan?

Ñan kõjparok wãween ad kõnnaan, jej aikuj l̦õmn̦ak kõn (1) ñããt eo ekkar ñan kõnnaan (Ekklisiastis 3:7), (2) ta eo jen kõnnaan kake (Jabõn Kõnnaan 12:18, UBS), im (3) wãween ad kõnnaan ñan ro jet (Jabõn Kõnnaan 15:4).​—w15 12/15, p. 19-22.

Etke m̦anit ko rej kõm̦m̦ani ilo Kũrijm̦õj rebõd?

Elukkuun alikkar bwe men eo el̦aptata an bõd kõn Kũrijm̦õj ej kõnke ej itok jãn m̦antin kabuñ in ripeikan ro. Kõn men in, raanin Kũrijm̦õj ejjab kautiej Anij im Nejin, Jijej Kũraij. M̦antin Kũrijm̦õj ej juon men el̦ap an bõd. Ej ãinwõt juon kããn wõjke me eip im “reban kajim̦we.”—wp16.1, p. 11.

Ewi wãween ad aikuj watõk ro rej m̦õñã bũreet im idaak wain ilo iien Kwõjkwõj ko?

Ebõd ñe el̦e jãn joñan an Kũrjin ro kautiej ro rej m̦õñã bũreet im idaak wain ilo iien Kwõjkwõj ko. Bareinwõt, rũkkapit ro rejjab kõtmãne bwe ro jet ren lukkuun kautiej er l̦e jãn joñan. Rejjab kõmmejãje kõn an Anij kããlõt er. (Matu 23:8-12)—w16.01, p. 23-24.

Ta ko jemaroñ katak jãn wãween an kar Ebream erom jeran Anij?

Ebream ear katak im jel̦ã kõn Anij, im emaroñ kar katak kõn e jãn Shem. Ebar lõñ men ko Ebream ear katak jãn men ko Anij ear kõm̦m̦ani ñan e im baam̦le eo an. Ãinwõt Ebream, ad katak kõn Jeova im jel̦ã kajjien enaaj kõm̦m̦an bwe jen epaake.​—w16.02, p. 9-10.

Wõn ear kõm̦m̦ani jebta im eoon ko ilo Baibõl̦?

Juon kar rũtõlin kabuñ etan Stephen Langton ear kõm̦m̦an jebta ilo Baibõl̦ ilo 1200 jim̦a ko. RiJu ro me rekõn jeje im kõm̦m̦an kaape in bok ko ilo Baibõl̦ rar kõm̦m̦an nõm̦ba in eoon ilo aolepen bok ko ilo kajin Hibru. Innem, ilo 1500 jim̦a ko, juon rũmmãlõtlõt etan Robert Estienne ear kõm̦m̦an nõm̦ba in eoon ilo jebta in bok ko ilo kajin Grik.​—wp16.2, p. 14-15.

Ke Setan ear kajjioñ kapo Jijej, ear ke lukkuun bõkl̦o̦k Jijej ñan tampel̦ eo?

Ilo m̦ool, jejjab lukkuun jel̦ã. Ñe jenaaj lale bokin Matu 4:5 (UBS) im Luk 4:9 (UBS), jejjab lukkuun jel̦ã el̦aññe Setan ear bõkl̦o̦k Jijej ñan tampel̦ eo ikijjeen juon pijen ak el̦aññe Jijej ear lukkuun etal ñan Jerusalem im jutak ilo juon jikin eutiej ilo tampel̦ eo.​—w16.03, p. 31-32.

Ewi wãween an jerbalin kwal̦o̦k naan ãinwõt m̦õl̦awi?

M̦õl̦awi ej wal̦o̦k jidik kõn jidik jãn okmããn̦ãn̦ in mejatoto, im ej kaem̦õl̦ol̦o im kowãmourur menin eddek ko. M̦õl̦awi ej juon jeraam̦m̦an jãn Anij. (Duteronomi 33:13) Jerbalin kwal̦o̦k eo ad ej ãinwõt m̦õl̦awi ñe kõj aolep jej kate kõj ilo jerbal in.​—w16.04, p. 4.