Kwaar ke lukkuun riiti Naan in Keeañ ko an allõñ ko l̦o̦k? Lale kwõmaroñ ke uwaake kajjitõk kein:

Ta men ko emãn jemaroñ kõm̦m̦ani ñan kakõm̦anm̦anl̦o̦k ad al?

Jemaroñ kajim̦we ad jutak, lelõñl̦o̦k bokin al eo ad, im bõk kũtuod im menono. Bareinwõt, enaaj l̦apl̦o̦k ainikien ad al ñe el̦ap ad kõpel̦l̦o̦ke lo̦ñiid.​—w17.11, peij 5.

Ta eo jej katak jãn ijoko jikin kone ko rar pãd ie ilo Israel im ial̦ ko rar tõll̦o̦k ñan jikin kein?

Ekar wõr jiljino jikin kone ko ilo Israel, jilu rar pãd iturearin reba Jordan im jilu ilo bar jait eo juon ilo ãneen Kenan. Bareinwõt ial̦ ko ñan jikin kone kein rar em̦m̦an kõn an kar armej ro keini aer karreoiki. Kõn men in, emaroñ kar m̦õkaj im pidodo an juon armej ko ñan juon iaan jikin kein.​—w17.11, peij 14.

Etke menin letok eo an Anij kõn katok in mour eo an Jesus ej menin letok eo em̦m̦antata jãn jabdewõt menin letok?

Kõnke ej kajejjet kõn̦aan eo ad ñan wõnm̦aanl̦o̦k wõt im mour, im ej katõprak aikuj eo ad bwe jen rõl̦o̦k jãn jerawiwi im mej. Kõn an kar Anij yokwe ro ineen Adam, ear letok Jesus bwe en mej kõn kõj meñe kõj rijjerawiwi.​—wp17.6, peij 6-7.

Ewi wãween Sam 118:22 (UBS) ej jitõñl̦o̦k ñan jerkakpeje eo an Jesus?

RiJu ro rar kõjekdo̦o̦n Jesus ãinwõt Messaia eo im kar m̦ane ñan mej. Kõn men in, Jesus ear aikuj jerkakpeje bwe en maroñ erom “dekã eo el̦aptata tokjãn,” im kajejjet kũtien kanaan in.​—w17.12, peij 9-10.

Menmenbwij eo an Messaia eo ear ke m̦õttan jeraam̦m̦an ko rej etal ñan m̦aanje ro?

Jet iien menmenbwij eo an Messaia eo ear itok jãn m̦aanje ro, ijoke ejjab aolep iien ear ãindein. Devid ear jab m̦aanje eo nejin Jesse. Meñe ãindein, ak menmenbwij eo an Messaia eo ear wal̦o̦ktok jãn Devid.​—w17.12, peij 14-15.

Ta jet iaan naanin kakapilõklõk ko kõn ãjmour me repãd ilo Baibõl̦?

Ekkar ñan Kien Moses, kar aikuj kõjenolo̦k ro ewõr nañinmej ko rekauwõtata ippãer. Armej ro rar aikuj karreoik er ãlikin aer uñũr ãnbwinnin juon rimej. Kien eo ear bar jiroñ armej ro bwe ren kalibwin ak jol̦o̦k bwidej ko aer. L̦adik ro rar aikuj m̦wijm̦wij ilo raan eo kein karalitõk kõnke eñin ej iien eo em̦m̦an joñan an mekak bõtõktõkier im bwe en jab l̦ap aer to̦o̦r.​—wp18.1, peij 7.

Etke ejjab juon men ebõd ñe jej yokwe kõj make?

Jej aikuj yokwe ro rũturid ãinwõt ad yokwe kõj make. (Mark 12:31, UBS) L̦õm̦aro rej aikuj “yokwe lim̦aro pãleer ãinwõt aer yokwe ãnbwinnier make.” (Ep. 5:28, UBS) Bõtab el̦aññe el̦ap an juon yokwe e make, emaroñ jino kũbbon̦ ak l̦ap an l̦õmn̦ak kõn e make.​—w18.01, peij 23.

Ta ko jemaroñ kõm̦m̦ani ñan kõkajoorl̦o̦k jem̦jerã eo ad ippãn Jeova?

Jej aikuj katak Naanin Anij im kõl̦mãnl̦o̦kjen̦ kake im jerbali men ko jej katak kaki. Jej aikuj bar kõtl̦o̦k bwe jetõb kwõjarjar en tõl l̦õmn̦ak ko ad im bũruod, im m̦õn̦õn̦õ in bõk jipañ jãn ro jet.​—w18.02, peij 26.

Jedjed iju im rũkaanij rej ke ial̦an ad jel̦ã kobban ilju im jekl̦aj?

Ejjab. Elõñ un ko unin an jedjed iju im rũkaanij rejjab ial̦an ad jel̦ã kobban ilju im jekl̦aj, ak un eo el̦aptata unin ej kõnke Anij edike aolep jerbalin anijnij.​—wp18.2, peij 4-5.

Ewi wãween ad kajejjet naan ko ad ñe rej kũrl̦o̦k kõj ñan juon iien m̦õñã?

El̦aññe juon ear kũrl̦o̦k kõj ñan m̦weo im̦õn im em̦õj ad uwaake, jej aikuj kajejjete kallim̦ur in ad ijello̦kun wõt ñe ewõr ad utam̦we im jejjab maroñ etal. (Sam 15:4, UBS) Eaorõk men in kõnke eo ear kũrl̦o̦k kõj ñan m̦weo im̦õn emaroñ kar pojak ñan an karwaineneik kõj.​—w18.03, peij 18.

Ta eo em̦m̦aan ro em̦õj jitõñ er remaroñ katak jãn Timote?

Timote ear lukkuun yokwe armej im men eo ear likũt m̦oktata ej jerbal in kwal̦o̦k naan. Ear kate ilo jerbal eo eokkwõjarjar im ear l̦oori men ko ear katak kaki. Ear wõnm̦aanl̦o̦k wõt im katak kab kammineneik e make im ear atartar ioon jetõb kwõjarjar an Jeova. Em̦m̦aan ro rej lale eklejia eo im ro jet remaroñ anõk joñak eo an Timote.​—w18.04, peij 13-14.